൪. ബാലദുജ്ജനകണ്ഡോ

൬൮. അതിപ്പിയോ ന കാതബ്ബോ,

ഖലോ കോതൂഹലം കരോ;

സിരസാ വഹ്യമാനോപി,

അഡ്ഢപൂരോ ഘടോ യഥാ.

൬൯. സപ്പോ ദുട്ഠോ ഖലോ ദുട്ഠോ,

സപ്പോ ദുട്ഠതരോ ഖലോ;

മന്തോസധേഹി സോ സപ്പോ,

ഖലോ കേനുപസമ്മതി.

൭൦. യോ ബാലോ മഞ്ഞതി ബാല്യം,

പണ്ഡിതോ വാപി തേന സോ;

ബാലോവ പണ്ഡിതമാനീ,

സോ വേ ബാലോതി വുച്ചതി.

൭൧. മധുംവ മഞ്ഞതീ ബാലോ,

യാവ പാപം ന പച്ചതി;

യദാച പച്ചതീ പാപം,

അഥ ദുക്ഖം നിഗച്ഛതി.

൭൨. ന സാധു ബലവാ ബാലോ,

സഹസാ വിന്ദതേ ധനം;

കായസ്സ ഭേദാ ദുപ്പഞ്ഞോ,

നിരയം സോപപജ്ജതി.

൭൩. ഘരേ ദുട്ഠോ ച മൂസീകോ ച,

വനേ ദുട്ഠോ ച വാനരോ;

സകുണേ ച ദുട്ഠോ കാകോ,

നരേ ദുട്ഠോച ബ്രാഹ്മണോ.

൭൪. ദീഘാ ജാഗരതോ രത്തി,

ദീഘം സന്തസ്സ യോജനം;

ദീഘോ ബാലാന സംസാരോ,

സദ്ധമ്മം അ-വിജാനതം.

൭൫. തില മത്തം പരേസംവ,

അപ്പ ദോസഞ്ച പസ്സതി;

നാളികേരമ്പി സദോസം,

ഖല-ജാതോ ന പസ്സതി.

൭൬. നത്തദോസം പരേ ജഞ്ഞാ,

ജഞ്ഞാ ദോസം പരസ്സതു;

ഗുയ്ഹേ കുമ്മോ അങ്ഗാനി,

പര ദോസഞ്ച ലക്ഖയേ.

൭൭. പണ്ഡിതസ്സ പസംസായ,

ദണ്ഡോ ബാലേന ദീയതേ;

പണ്ഡിതോ പണ്ഡിതേനേവ,

വണ്ണിതോവ സുവണ്ണിതോ.

൭൮. ലുദ്ധം അത്ഥേന ഗണ്ഹേയ്യ,

ഥദ്ധം അഞ്ജലി കമ്മുനാ;

ഛന്ദാനുവത്തിയാ മൂള്ഹം,

യഥാഭൂതേന പണ്ഡിതം.

ബാലദുജ്ജനകണ്ഡോ നിട്ഠിതോ.