൨. നാമകപ്പ
പഠമകണ്ഡ
൫൨. , ൬൦. ജിനവചനയുത്തം ഹി.
‘‘ജിനവചനയുത്തം ഹി’’ ഇച്ചേതം അധികാരത്ഥം വേദിതബ്ബം.
൫൩. , ൬൧. ലിങ്ഗഞ്ച നിപ്പജ്ജതേ.
യഥാ യഥാ ജിനവചനയുത്തം ഹി ലിങ്ഗം, തഥാ തഥാ ഇധ ലിങ്ഗഞ്ച നിപ്പജ്ജതേ.
തം യഥാ? ഏസോ നോ സത്ഥാ, ബ്രഹ്മാ അത്താ, സഖാ, രാജാ.
൫൪. , ൬൨. തതോ ച വിഭത്തിയോ.
തതോ ജിനവചനയുത്തേഹി ലിങ്ഗേഹി വിഭത്തിയോ പരാ ഹോന്തി.
൫൫. , ൬൩. സി യോ, അം യോ, നാ ഹി, സ നം, സ്മാ ഹി, സ നം, സ്മിം സു.
കാ ച പന തായോ വിഭത്തിയോ? സി, യോ ഇതി പഠമാ, അം, യോഇതി ദുതിയാ, നാ ഹി ഇതി തതിയാ, സ, നംഇതി ചതുത്ഥീ, സ്മാ, ഹി ഇതി പഞ്ചമീ, സ, നം ഇതി ഛട്ഠീ, സ്മിം, സു ഇതി സത്തമീ.
വിഭത്തിഇച്ചനേന ക്വത്ഥോ? അമ്ഹസ്സ മമം സവിഭത്തിസ്സ സേ.
൫൬. , ൬൪. തദനുപരോധേന.
യഥാ യഥാ തേസം ജിനവചനാനം അനുപരോധോ. തഥാ തഥാ ഇധ ലിങ്ഗഞ്ച നിപ്പജ്ജതേ.
൫൭. , ൭൧. ആലപനേ സി ഗ സഞ്ഞോ.
ആലപനത്ഥേ സി ഗസഞ്ഞോ ഹോതി.
ഭോതി അയ്യേ, ഭോതി കഞ്ഞേ, ഭോതി ഖരാദിയേ.
ആലപനേതി കിമത്ഥം? സാ അയ്യാ.
സീതി കിമത്ഥം? ഭോതിയോ അയ്യായോ.
ഗഇച്ചനേന ക്വത്ഥോ? ഘതേ ച.
൫൮. , ൨൯. ഇവണ്ണുവണ്ണാ ഝലാ.
ഇവണ്ണുവണ്ണാഇച്ചേതേ ഝലസഞ്ഞാ ഹോന്തി യഥാസങ്ഖ്യം.
ഇസിനോ, അഗ്ഗിനോ, ഗഹപതിനോ, ദണ്ഡിനോ. സേതുനോ, കേതുനോ, ഭിക്ഖുനോ. സയമ്ഭുനോ, അഭിഭുനോ.
ഝലഇച്ചനേന ക്വത്ഥോ? ഝലതോ സസ്സ നോ വാ.
൫൯. , ൧൮൨. തേ ഇത്ഥിഖ്യാ പോ.
തേ ഇവണ്ണുവണ്ണാ യദാ ഇത്ഥിഖ്യാ, തദാ പസഞ്ഞാ ഹോന്തി.
രത്തിയാ, ഇത്ഥിയാ, ധേനുയാ, വധുയാ.
ഇത്ഥിഖ്യാതി കിമത്ഥം? ഇസിനാ, ഭിക്ഖുനാ.
സഇച്ചനേന ക്വത്ഥോ? പതോ യാ.
൬൦. , ൧൭൭. ആ ഘോ.
ആകാരോ യദാ ഇത്ഥിഖ്യോ, തദാ ഘസഞ്ഞോ ഹോതി.
സദ്ധായ, കഞ്ഞായ, വീണായ, ഗങ്ഗായ, ദിസായ സാലായ, മാലായ, തുലായ, ദോലായ, പഭായ, സോഭായ, പഞ്ഞായ, കരുണായ നാവായ, കപാലികായ.
ആതി കിമത്ഥം? രത്തിയാ, ഇത്ഥിയാ.
ഇത്ഥിഖ്യോതി കിമത്ഥം? സത്ഥാരാ ദേസിതോ അയം ധമ്മോ.
ഘഇച്ചനേന ക്വത്ഥോ? ഘതോ നാദീനം.
൬൧. , ൮൬. സാഗമോ സേ.
സകാരാഗമോ ഹോതി സേ വിഭത്തിമ്ഹി.
പുരിസസ്സ, അഗ്ഗിസ്സ, ഇസിസ്സ, ദണ്ഡിസ്സ, ഭിക്ഖുസ്സ, സയമ്ഭുസ്സ, അഭിഭുസ്സ.
സേതി കിമത്തം? പുരിസസ്മിം.
൬൨. , ൨൦൬. സംസാസ്വേകവചനേസു ച.
സംസാസു ഏകവചനേസു വിഭത്താദേസേസു സകാരാഗമോ ഹോതി.
ഏതിസ്സം, ഏതിസ്സാ ഇമിസ്സം, ഇമിസ്സാ, തിസ്സം, തിസ്സാ,
തസ്സം തസ്സാ, യസ്സം, യസ്സാ, അമുസ്സം, അമുസ്സാ.
സംസാസ്വീതി കിമത്ഥം? അഗ്ഗിനാ, പാണിനാ.
ഏകവചനേസ്വീതി കിമത്ഥം? താസം, സബ്ബാസം.
വിഭത്താദേസേസ്വീതി കിമത്ഥം? മനസാ, വചസാ, ഥാമസാ.
൬൩. , ൨൧൭. ഏതിമാസമി.
ഏതാഇമാഇച്ചേതേസമന്തോ സരോ ഇകാരോ ഹോതി സംസാസു ഏകവചനേസു വിഭത്താദേസേസു.
ഏതിസ്സം, ഏതിസ്സാ, ഇമിസ്സം, ഇമിസ്സാ.
സംസാസ്വീതി കിമത്ഥം? ഏതായ, ഇമായ.
ഏകവചനേസ്വീതി കിമത്ഥം? ഏതാസം, ഇമാസം.
൬൪. , ൨൧൬. തസ്സാ വാ.
തസ്സാ ഇത്ഥിയം വത്തമാനസ്സ അന്തസ്സ ആകാരസ്സ ഇകാരോ ഹോതി വാ സംസാസു ഏകവചനേസു വിഭത്താദേസേസു.
തിസ്സം, തിസ്സാ, തസ്സം, തസ്സാ.
൬൫. , ൨൧൫. തതോ സസ്സ സ്സായ.
തതോ താ ഏതാ ഇമാതോ സസ്സ വിഭത്തിസ്സ സ്സായാദേസോ ഹോതി വാ.
തിസ്സായ, ഏതിസ്സായ, ഇമിസ്സായ.
വാതി കിമത്ഥം? തിസ്സാ, ഏതിസ്സാ, ഇമിസ്സാ.
൬൬. , ൨൦൫. ഘോ രസ്സം.
ഘോ രസ്സമാപജ്ജതേ സംസാസു ഏകവചനേസു വിഭത്താദേസേസു.
തസ്സം, തസ്സാ, യസ്സം, യസ്സാ, സബ്ബസ്സം, സബ്ബസ്സാ.
സംസാസ്വീതി കിമത്ഥം? തായ, സബ്ബായ.
ഏകവചനേസ്വീതി കിമത്ഥം? താസം, സബ്ബാസം.
൬൭. , ൨൨൯. നോ ച ദ്വാദിതോ നംമ്ഹി.
ദ്വിഇച്ചേവമാദിതോ സങ്ഖ്യാതോ നകാരാഗമോ ഹോതി നംമ്ഹി വിഭത്തിമ്ഹി.
ദ്വിന്നം, തിന്നം, ചതുന്നം, പഞ്ചന്നം, ഛന്നം, സത്തന്നം, അട്ഠന്നം, നവന്നം, ദസന്നം.
ദ്വാദിതോതി കിമത്ഥം? സഹസ്സാനം.
നംമ്ഹീതി കിമത്ഥം? ദ്വീസു, തീസു.
ചഗ്ഗഹണേനസ്സഞ്ചാഗമോ ഹോതി. ചതസ്സന്നം ഇത്ഥീനം തിസ്സന്നം വേദനാനം.
൬൮. , ൧൮൪. അമാ പതോ സ്മിംസ്മാനം വാ.
പഇച്ചേതസ്മാ സ്മിംസ്മാഇച്ചേതേസം അംആആദേസാ ഹോന്തി വാ യഥാസങ്ഖ്യം.
മത്യം, മതിയം, മത്യാ, മതിയാ, നികത്യം. നികതിയം, നികത്യാ, നികതിയാ, വികത്യം, വികതിയം, വികത്യാ, വികതിയാ, വിരത്യം, വിരതിയം, വിരത്യാ, വിരതിയാ, രത്യം, രതിയം, രത്യാ, രതിയാ, പുഥബ്യം, പുഥവിയം, പുഥബ്യാ, പുഥവിയാ, പവത്യം, പവത്യാ, പവത്തിയം, പവത്തിയാ.
൬൯. , ൧൮൬. ആദിതോ ഓ ച.
ആദിഇച്ചേതസ്മാ സ്മിംവചനസ്സ അംഓആദേസാ ഹോന്തി വാ.
ആദീം, ആദോ.
വാതി കിമത്ഥം? ആദിസ്മിം, ആദിമ്ഹി നാഥം നമസ്സിത്വാന,
ചഗ്ഗഹണേന അഞ്ഞസ്മാപി സ്മിം വചനസ്സ ആ ഓ അംആദേസാ ഹോന്തി. ദിവാ ച രത്തോ ച ഹരന്തി യേ ബലി. ബാരാണസിം അഹു രാജാ.
൭൦. , ൩൦. ഝലാനമിയുവാ സരേ വാ.
ഝലഇച്ചേതേസം ഇയ ഉവഇച്ചേതേ ആദേസാ ഹോന്തി വാ സരേ പരേ യഥാസങ്ഖ്യം.
തിയന്തം പച്ഛിയാഗാരേ, അഗ്ഗിയാഗാരേ, ഭിക്ഖുവാസനേ നിസീദതി, വുഥുവാസനേ നിസീദതി.
സരേതി കിമത്ഥം? തിമലം, തിഫലം, തിചതുക്കം, തിദണ്ഡം, തിലോകം, തിനയനം, തിപാസം, തിഹംസം, തിഭവം, തിഖന്ധം, തിപിടകം, തിവേദനം, ചതുദ്ദിസം, പുഥുഭൂതം.
വാതി കിമത്ഥം? പഞ്ചഹങ്ഗേഹി തീഹാകാരേഹി. ചക്ഖായതനം.
വാതി വികപ്പനത്ഥം, ഇകാരസ്സ അയാദേസോ ഹോതി, വത്ഥുത്തയം.
൭൧. , ൫൦൫. യവകാരാ ച.
ഝലാനം യകാര വകാരാദേസാ ഹോന്തി സരേ പരേ യഥാസങ്ഖ്യം.
അഗ്യാഗാരം, പക്ഖായതനം, സ്വാഗതം, തേ മഹാവീര.
ചഗ്ഗഹണം സമ്പിണ്ഡനത്ഥം.
൭൨. , ൧൮൫. പസഞ്ഞസ്സ ച.
പസഞ്ഞസ്സ ച ഇവണ്ണസ്സ വിഭത്താദേസേ സരേ പരേ യകാരാദേസോ ഹോതി.
പുഥബ്യാ, രത്യാ, മത്യാ.
സരേതി കിമത്ഥം? പുഥവിയം.
൭൩. , ൧൭൪. ഗാവ സേ.
ഗോഇച്ചേതസ്സ ഓകാരസ്സ ആവാദേസോ ഹോതി സേ വിഭത്തിമ്ഹി.
ഗാവസ്സ.
൭൪. , ൧൬൯. യോസു ച.
ഗോഇച്ചേതസ്സ ഓകാരസ്സ ആവാദേസോ ഹോതി യോഇച്ചേതേസു പരേസു.
ഗാവോ ഗച്ഛന്തി, ഗാവോ പസ്സന്തി, ഗാവീ ഗച്ഛന്തി, ഗാവീ പസ്സന്തി.
ചഗ്ഗഹണം കിമത്ഥം? നാസ്മാസ്മിംസു വചനേസു ആവാ ദേസോ ഹോതി.
ഗാവേന, ഗാവാ, ഗാവേ, ഗാവേസു.
൭൫. , ൧൭൦. അവമ്ഹി ച.
ഗോഇച്ചേതസ്സ ഓകാരസ്സ ആവഅവഇച്ചേതേ ആദേസാ ഹോന്തി അംമ്ഹി വിഭത്തിമ്ഹി.
ഗാവം, ഗവം.
ചഗ്ഗഹണേന സാദിസേസേസു പുബ്ബുത്തവചനേസു ഗോഇച്ചേതസ്സ ഓകാരസ്സ അവാദേസോ ഹോതി.
ഗവസ്സ, ഗവോ, ഗവേന, ഗവാ, ഗവേ, ഗവേസു.
൭൬. , ൧൭൧. ആവസ്സു വാ.
ആവഇച്ചേതസ്സ ഗാവാദേസസ്സ അന്ത സരസ്സ ഉകാരാദേസോ ഹോതി വാ അംമ്ഹി വിഭത്തിമ്ഹി.
ഗാവും, ഗാവം.
ആവസ്സേതി കിമത്ഥം? ഗാവോ തിട്ഠന്തി.
൭൭. , ൧൭൫. തതോ നമം പതിമ്ഹാ ലുത്തേ ച സമാസേ.
തതോ ഗോസദ്ദതോ നംവചനസ്സ അംആദേസോ ഹോതി, ഗോഇച്ചേതസ്സ ഓകാരസ്സ അവാദേസോ ഹോതി പതിമ്ഹി പരേ അലുത്തേ ച സമാസേ.
ഗവപതി.
അലുത്തേതി കിമത്ഥം? ഗോപതി.
ചഗ്ഗഹണേന അസമാസേപി നംവചനസ്സ അംആദേസോ ഹോതി, ഗോഇച്ചേതസ്സ ഓകാരസ്സ അവാദേസോ ഹോതി.
ഗവം.
൭൮. , ൩. ഓസരേ ച.
ഗോഇച്ചേതസ്സ ഓകാരസ്സ അവാദേസോ ഹോതി സമാസേ ച സരേ പരേ.
ഗവസ്സകം, ഗവേളകം, ഗവാജിനം.
ചഗ്ഗഹണേന ഉവണ്ണഇച്ചേവമന്താനം ലിങ്ഗാനം ഉവഅവഉരാദേസാ ഹോന്തി സ്മിംയോഇച്ചേതേസു ക്വചി.
ഭുവി, പസവോ, ഗുരവോ, ചതുരോ.
സരേതി കിമത്ഥം? ഗോധനോ, ഗോവിന്ദോ.
൭൯. , ൪൬. തബ്ബിപരീതൂപപദേ ബ്യഞ്ജനേ ച.
തസ്സ അവസദ്ദസ്സ യദാ ഉപപദേ തിട്ഠമാനസ്സ തസ്സ ഓകാരസ്സ വിപരീതോ ഹോതി ബ്യഞ്ജനേ പരേ.
ഉഗ്ഗതേ സൂരിയേ, ഉഗ്ഗച്ഛതി, ഉഗ്ഗഹേത്വാ.
ചഗ്ഗഹണമവധാരണത്ഥം. അവസാനേ, അവകിരണേ, അവകിരതി.
൮൦. , ൧൭൩. ഗോണ നംമ്ഹി വാ.
സബ്ബസ്സേവ ഗോസദ്ദസ്സ ഗോണാദേസോ ഹോതി വാ നംമ്ഹി വിഭത്തിമ്ഹി.
ഗോണാനം സത്തന്നം.
വാതി കിമത്ഥം?
ഗോനഞ്ചേ തരമാനാനം, ഉജും ഗച്ഛതി പുങ്ഗവോ.
സബ്ബാ ഗാവീ ഉജും യന്തി, നേത്തേ ഉജും ഗതേ സതി.
യോഗവിഭാഗേന അഞ്ഞത്രാപി ഗോണാദേസോ ഹോതി. ഗോണഭൂതാനം.
൮൧. , ൧൭൨. സുഹിനാസു ച.
സുഹിനാഇച്ചേതേസു സബ്ബസ്സ ഗോസദ്ദസ്സ ഗോണാദേസോ ഹോതി വാ.
ഗോണേസു, ഗോണേഹി, ഗോണേഭി, ഗോണേന.
വാതി കിമത്ഥം? ഗോസു, ഗോഹി, ഗോഭി, ഗവേന.
ചഗ്ഗഹണേന സ്യാദിസേസേസു പുബ്ബുത്തരവചനേസുപി ഗോണ ഗു ഗവയാദേസാ ഹോന്തി. ഗോണോ, ഗോണാ, ഗോണം, ഗോണേ, ഗോണസ്സ, ഗോണമ്ഹാ. ഗോണമ്ഹി, ഗുന്നം, ഗവയേഹി, ഗവയേഭി.
൮൨. , ൧൪൯. അംമോ നിഗ്ഗഹിതം ഝലപേഹി.
അംവചനസ്സ മകാരസ്സ ച ഝലപഇച്ചേതേഹി നിഗ്ഗഹിതം ഹോതി
അഗ്ഗിം, ഇസിം, ഗഹപതിം, ദണ്ഡിം, മഹേസിം, ഭിക്ഖും, പടും, സയമ്ഭും, അഭിഭും, രത്തിം, ഇത്ഥിം, വധും, പുല്ലിങ്ഗം, പുമ്ഭാവോ, പുങ്കോകിലോ.
അംമോതി കിമത്ഥം? അഗ്ഗിനാ, പാണിനാ, ഭിക്ഖുനാ, രത്തിയാ, ഇത്ഥിയാ, വധുയാ.
ഝലപേഹീതി കിമത്ഥം? സുഖം, ദുക്ഖം.
പുനാരമ്ഭ ഹണം വിഭാസാനിവത്തനത്ഥം. അഗ്ഗിം, പടും, ബുദ്ധിം, വധും.
൮൩. , ൬൭. സരലോപോ’ മാദേസ പച്ചയാദിമ്ഹി സരലോപേ തു പകതി.
സരലോപോ ഹോതി അമാദേസപച്ചയാദിമ്ഹി സര ലോപേ തു പകതി ഹോതി.
പുരിസം, പുരിസേ, പാപം, പാപേ, പാപിയോ, പാപിട്ഠോ.
അമാദേസപച്ചയാദിമ്ഹീതി കി ത്ഥം? അപ്പമാദോ അമതം പദം.
സരലോപേതി കിമത്ഥം? പുരിസസ്സ, ദണ്ഡിനം.
തുഗ്ഗഹണമവധാരണത്ഥം. ഭിക്ഖുനീ, ഗഹപതാനീ.
പകതിഗ്ഗഹണസാമത്ഥേന പുന സന്ധിഭാവോ ച ഹോതി. സേയ്യോ, സേട്ഠോ, ജേയ്യോ, ജേട്ഠോ.
൮൪. , ൧൪൪. അഘോരസ്സമേകവചനയോസ്വപി ച.