൯. പടിസാരണീയസുത്തം

൮൯. [ചൂളവ. ൩൯ ഥോകം വിസദിസം] ‘‘അട്ഠഹി, ഭിക്ഖവേ, ധമ്മേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ പടിസാരണീയകമ്മം കരേയ്യ. കതമേഹി അട്ഠഹി? ഗിഹീനം അലാഭായ പരിസക്കതി, ഗിഹീനം അനത്ഥായ പരിസക്കതി, ഗിഹീ അക്കോസതി പരിഭാസതി, ഗിഹീ ഗിഹീഹി ഭേദേതി, ബുദ്ധസ്സ അവണ്ണം ഭാസതി, ധമ്മസ്സ അവണ്ണം ഭാസതി, സങ്ഘസ്സ അവണ്ണം ഭാസതി, ധമ്മികഞ്ച ഗിഹിപടിസ്സവം ന സച്ചാപേതി. ഇമേഹി ഖോ, ഭിക്ഖവേ, അട്ഠഹി ധമ്മേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ പടിസാരണീയം കമ്മം കരേയ്യ.

‘‘അട്ഠഹി, ഭിക്ഖവേ, ധമ്മേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ പടിസാരണീയകമ്മം പടിപ്പസ്സമ്ഭേയ്യ. കതമേഹി അട്ഠഹി? ന ഗിഹീനം അലാഭായ പരിസക്കതി, ന ഗിഹീനം അനത്ഥായ പരിസക്കതി, ന ഗിഹീ അക്കോസതി പരിഭാസതി, ന ഗിഹീ ഗിഹീഹി ഭേദേതി, ബുദ്ധസ്സ വണ്ണം ഭാസതി, ധമ്മസ്സ വണ്ണം ഭാസതി, സങ്ഘസ്സ വണ്ണം ഭാസതി, ധമ്മികഞ്ച ഗിഹിപടിസ്സവം സച്ചാപേതി. ഇമേഹി ഖോ, ഭിക്ഖവേ, അട്ഠഹി ധമ്മേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ പടിസാരണീയകമ്മം പടിപ്പസ്സമ്ഭേയ്യാ’’തി. നവമം.