൭. പത്തനികുജ്ജനസുത്തം

൮൭. [ചൂളവ. ൨൬൫] ‘‘അട്ഠഹി, ഭിക്ഖവേ, അങ്ഗേഹി സമന്നാഗതസ്സ ഉപാസകസ്സ ആകങ്ഖമാനോ സങ്ഘോ പത്തം നിക്കുജ്ജേയ്യ [നികുജ്ജേയ്യ (ക.)]. കതമേഹി അട്ഠഹി? ഭിക്ഖൂനം അലാഭായ പരിസക്കതി, ഭിക്ഖൂനം അനത്ഥായ പരിസക്കതി, ഭിക്ഖൂനം അവാസായ [അനാവാസായ (സീ. സ്യാ.)] പരിസക്കതി, ഭിക്ഖൂ അക്കോസതി പരിഭാസതി, ഭിക്ഖൂ ഭിക്ഖൂഹി ഭേദേതി [വിഭേദേതി (ബഹൂസു)], ബുദ്ധസ്സ അവണ്ണം ഭാസതി, ധമ്മസ്സ അവണ്ണം ഭാസതി, സങ്ഘസ്സ അവണ്ണം ഭാസതി. ഇമേഹി ഖോ, ഭിക്ഖവേ, അട്ഠഹങ്ഗേഹി സമന്നാഗതസ്സ ഉപാസകസ്സ ആകങ്ഖമാനോ സങ്ഘോ പത്തം നിക്കുജ്ജേയ്യ.

‘‘അട്ഠഹി, ഭിക്ഖവേ, അങ്ഗേഹി സമന്നാഗതസ്സ ഉപാസകസ്സ ആകങ്ഖമാനോ സങ്ഘോ പത്തം ഉക്കുജ്ജേയ്യ. കതമേഹി അട്ഠഹി? ന ഭിക്ഖൂനം അലാഭായ പരിസക്കതി, ന ഭിക്ഖൂനം അനത്ഥായ പരിസക്കതി, ന ഭിക്ഖൂനം അവാസായ പരിസക്കതി, ന ഭിക്ഖൂ അക്കോസതി പരിഭാസതി, ന ഭിക്ഖൂ ഭിക്ഖൂഹി ഭേദേതി, ബുദ്ധസ്സ വണ്ണം ഭാസതി, ധമ്മസ്സ വണ്ണം ഭാസതി, സങ്ഘസ്സ വണ്ണം ഭാസതി. ഇമേഹി ഖോ, ഭിക്ഖവേ, അട്ഠഹങ്ഗേഹി സമന്നാഗതസ്സ ഉപാസകസ്സ ആകങ്ഖമാനോ സങ്ഘോ പത്തം ഉക്കുജ്ജേയ്യാ’’തി. സത്തമം.