൨. പുണ്ണിയസുത്തം

൮൨. അഥ ഖോ ആയസ്മാ പുണ്ണിയോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ പുണ്ണിയോ ഭഗവന്തം ഏതദവോച – ‘‘കോ നു ഖോ, ഭന്തേ, ഹേതു കോ പച്ചയോ യേന അപ്പേകദാ തഥാഗതം ധമ്മദേസനാ പടിഭാതി, അപ്പേകദാ ന പടിഭാതീ’’തി? ‘‘സദ്ധോ ച, പുണ്ണിയ, ഭിക്ഖു ഹോതി, നോ ചുപസങ്കമിതാ; നേവ തഥാഗതം ധമ്മദേസനാ പടിഭാതി. യതോ ച ഖോ, പുണ്ണിയ, ഭിക്ഖു സദ്ധോ ച ഹോതി, ഉപസങ്കമിതാ ച; ഏവം തഥാഗതം ധമ്മദേസനാ പടിഭാതി. സദ്ധോ ച, പുണ്ണിയ, ഭിക്ഖു ഹോതി, ഉപസങ്കമിതാ ച, നോ ച പയിരുപാസിതാ…പേ… പയിരുപാസിതാ ച, നോ ച പരിപുച്ഛിതാ… പരിപുച്ഛിതാ ച, നോ ച ഓഹിതസോതോ ധമ്മം സുണാതി… ഓഹിതസോതോ ച ധമ്മം സുണാതി, നോ ച സുത്വാ ധമ്മം ധാരേതി… സുത്വാ ച ധമ്മം ധാരേതി, നോ ച ധാതാനം ധമ്മാനം അത്ഥം ഉപപരിക്ഖതി… ധാതാനഞ്ച ധമ്മാനം അത്ഥം ഉപപരിക്ഖതി, നോ ച അത്ഥമഞ്ഞായ ധമ്മമഞ്ഞായ ധമ്മാനുധമ്മപ്പടിപന്നോ ഹോതി. നേവ താവ തഥാഗതം ധമ്മദേസനാ പടിഭാതി.

‘‘യതോ ച ഖോ, പുണ്ണിയ, ഭിക്ഖു സദ്ധോ ച ഹോതി, ഉപസങ്കമിതാ ച, പയിരുപാസിതാ ച, പരിപുച്ഛിതാ ച, ഓഹിതസോതോ ച ധമ്മം സുണാതി, സുത്വാ ച ധമ്മം ധാരേതി, ധാതാനഞ്ച ധമ്മാനം അത്ഥം ഉപപരിക്ഖതി, അത്ഥമഞ്ഞായ ധമ്മമഞ്ഞായ ധമ്മാനുധമ്മപ്പടിപന്നോ ച ഹോതി; ഏവം തഥാഗതം ധമ്മദേസനാ പടിഭാതി. ഇമേഹി ഖോ, പുണ്ണിയ, അട്ഠഹി ധമ്മേഹി സമന്നാഗതാ [സമന്നാഗതോ (സീ. പീ.), സമന്നാഗതം (സ്യാ. ക.)] ഏകന്തപടിഭാനാ [ഏകന്തപടിഭാനം (സബ്ബത്ഥ) അ. നി. ൧൦.൮൩ പന പസ്സിതബ്ബം] തഥാഗതം ധമ്മദേസനാ ഹോതീ’’തി. ദുതിയം.