൪. വാസേട്ഠസുത്തം

൪൪. ഏകം സമയം ഭഗവാ വേസാലിയം വിഹരതി മഹാവനേ കൂടാഗാരസാലായം. അഥ ഖോ വാസേട്ഠോ ഉപാസകോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നം ഖോ വാസേട്ഠം ഉപാസകം ഭഗവാ ഏതദവോച – ‘‘അട്ഠങ്ഗസമന്നാഗതോ, വാസേട്ഠ, ഉപോസഥോ ഉപവുത്ഥോ മഹപ്ഫലോ ഹോതി…പേ… അനിന്ദിതാ സഗ്ഗമുപേന്തി ഠാന’’ന്തി.

ഏവം വുത്തേ വാസേട്ഠോ ഉപാസകോ ഭഗവന്തം ഏതദവോച – ‘‘പിയാ മേ, ഭന്തേ, ഞാതിസാലോഹിതാ അട്ഠങ്ഗസമന്നാഗതം ഉപോസഥം ഉപവസേയ്യും, പിയാനമ്പി മേ അസ്സ ഞാതിസാലോഹിതാനം ദീഘരത്തം ഹിതായ സുഖായ. സബ്ബേ ചേപി, ഭന്തേ, ഖത്തിയാ അട്ഠങ്ഗസമന്നാഗതം ഉപോസഥം ഉപവസേയ്യും, സബ്ബേസമ്പിസ്സ ഖത്തിയാനം ദീഘരത്തം ഹിതായ സുഖായ. സബ്ബേ ചേപി, ഭന്തേ, ബ്രാഹ്മണാ…പേ… വേസ്സാ … സുദ്ദാ അട്ഠങ്ഗസമന്നാഗതം ഉപോസഥം ഉപവസേയ്യും, സബ്ബേസമ്പിസ്സ സുദ്ദാനം ദീഘരത്തം ഹിതായ സുഖായാ’’തി.

‘‘ഏവമേതം, വാസേട്ഠ, ഏവമേതം, വാസേട്ഠ! സബ്ബേ ചേപി, വാസേട്ഠ, ഖത്തിയാ അട്ഠങ്ഗസമന്നാഗതം ഉപോസഥം ഉപവസേയ്യും, സബ്ബേസമ്പിസ്സ ഖത്തിയാനം ദീഘരത്തം ഹിതായ സുഖായ. സബ്ബേ ചേപി, വാസേട്ഠ, ബ്രാഹ്മണാ…പേ… വേസ്സാ… സുദ്ദാ അട്ഠങ്ഗസമന്നാഗതം ഉപോസഥം ഉപവസേയ്യും, സബ്ബേസമ്പിസ്സ സുദ്ദാനം ദീഘരത്തം ഹിതായ സുഖായ. സദേവകോ ചേപി, വാസേട്ഠ, ലോകോ സമാരകോ സബ്രഹ്മകോ സസ്സമണബ്രാഹ്മണീ പജാ സദേവമനുസ്സാ അട്ഠങ്ഗസമന്നാഗതം ഉപോസഥം ഉപവസേയ്യും [ഉപവസേയ്യ (?)], സദേവകസ്സപിസ്സ [സദേവകസ്സ (സബ്ബത്ഥ) അ. നി. ൪.൧൯൩; മ. നി. ൩.൬൪ പസ്സിതബ്ബം] ലോകസ്സ സമാരകസ്സ സബ്രഹ്മകസ്സ സസ്സമണബ്രാഹ്മണിയാ പജായ സദേവമനുസ്സായ ദീഘരത്തം ഹിതായ സുഖായ. ഇമേ ചേപി, വാസേട്ഠ, മഹാസാലാ അട്ഠങ്ഗസമന്നാഗതം ഉപോസഥം ഉപവസേയ്യും, ഇമേസമ്പിസ്സ മഹാസാലാനം ദീഘരത്തം ഹിതായ സുഖായ ( ) [(സചേ ചേതേയ്യും) കത്ഥചി അത്ഥി. അ. നി. ൪.൧൯൩ പസ്സിതബ്ബം]. കോ പന വാദോ മനുസ്സഭൂതസ്സാ’’തി! ചതുത്ഥം.