൮. സപ്പുരിസസുത്തം

൩൮. ‘‘സപ്പുരിസോ, ഭിക്ഖവേ, കുലേ ജായമാനോ ബഹുനോ ജനസ്സ അത്ഥായ ഹിതായ സുഖായ ഹോതി – മാതാപിതൂനം അത്ഥായ ഹിതായ സുഖായ ഹോതി, പുത്തദാരസ്സ അത്ഥായ ഹിതായ സുഖായ ഹോതി, ദാസകമ്മകരപോരിസസ്സ അത്ഥായ ഹിതായ സുഖായ ഹോതി, മിത്താമച്ചാനം അത്ഥായ ഹിതായ സുഖായ ഹോതി, പുബ്ബപേതാനം അത്ഥായ ഹിതായ സുഖായ ഹോതി, രഞ്ഞോ അത്ഥായ ഹിതായ സുഖായ ഹോതി, ദേവതാനം അത്ഥായ ഹിതായ സുഖായ ഹോതി, സമണബ്രാഹ്മണാനം അത്ഥായ ഹിതായ സുഖായ ഹോതി.

‘‘സേയ്യഥാപി, ഭിക്ഖവേ, മഹാമേഘോ സബ്ബസസ്സാനി സമ്പാദേന്തോ ബഹുനോ ജനസ്സ അത്ഥായ ഹിതായ സുഖായ [ഹിതായ…പേ… (സ്യാ. ക.)] ഹോതി; ഏവമേവം ഖോ, ഭിക്ഖവേ, സപ്പുരിസോ കുലേ ജായമാനോ ബഹുനോ ജനസ്സ അത്ഥായ ഹിതായ സുഖായ ഹോതി – മാതാപിതൂനം അത്ഥായ ഹിതായ സുഖായ ഹോതി, പുത്തദാരസ്സ അത്ഥായ ഹിതായ സുഖായ ഹോതി, ദാസകമ്മകരപോരിസസ്സ അത്ഥായ ഹിതായ സുഖായ ഹോതി, മിത്താമച്ചാനം അത്ഥായ ഹിതായ സുഖായ ഹോതി, പുബ്ബപേതാനം അത്ഥായ ഹിതായ സുഖായ ഹോതി, രഞ്ഞോ അത്ഥായ ഹിതായ സുഖായ ഹോതി, ദേവതാനം അത്ഥായ ഹിതായ സുഖായ ഹോതി, സമണബ്രാഹ്മണാനം അത്ഥായ ഹിതായ സുഖായ ഹോതീ’’തി.

‘‘ബഹൂനം [ബഹുന്നം (സീ. പീ.)] വത അത്ഥായ, സപ്പഞ്ഞോ ഘരമാവസം;

മാതരം പിതരം പുബ്ബേ, രത്തിന്ദിവമതന്ദിതോ.

‘‘പൂജേതി സഹധമ്മേന, പുബ്ബേകതമനുസ്സരം;

അനാഗാരേ പബ്ബജിതേ, അപചേ ബ്രഹ്മചാരയോ [ബ്രഹ്മചാരിനോ (സ്യാ.)].

‘‘നിവിട്ഠസദ്ധോ പൂജേതി, ഞത്വാ ധമ്മേ ച പേസലോ [പേസലേ (ക.)];

രഞ്ഞോ ഹിതോ ദേവഹിതോ, ഞാതീനം സഖിനം ഹിതോ.

‘‘സബ്ബേസം [സബ്ബേസു (ക.)] സോ [സ (സ്യാ. പീ. ക.)] ഹിതോ ഹോതി, സദ്ധമ്മേ സുപ്പതിട്ഠിതോ;

വിനേയ്യ മച്ഛേരമലം, സ ലോകം ഭജതേ സിവ’’ന്തി. അട്ഠമം;