൮. ഥേരസുത്തം

൮൮. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഥേരോ ഭിക്ഖു ബഹുജനഅഹിതായ പടിപന്നോ ഹോതി ബഹുജനഅസുഖായ ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം.

‘‘കതമേഹി പഞ്ചഹി? ഥേരോ ഹോതി രത്തഞ്ഞൂ ചിരപബ്ബജിതോ; ഞാതോ ഹോതി യസസ്സീ സഗഹട്ഠപബ്ബജിതാനം [ഗഹട്ഠപബ്ബജിതാനം (സീ.)] ബഹുജനപരിവാരോ; ലാഭീ ഹോതി ചീവരപിണ്ഡപാതസേനാസനഗിലാനപ്പച്ചയഭേസജ്ജപരിക്ഖാരാനം; ബഹുസ്സുതോ ഹോതി സുതധരോ സുതസന്നിചയോ, യേ തേ ധമ്മാ ആദികല്യാണാ മജ്ഝേകല്യാണാ പരിയോസാനകല്യാണാ സാത്ഥം സബ്യഞ്ജനം കേവലപരിപുണ്ണം പരിസുദ്ധം ബ്രഹ്മചരിയം അഭിവദന്തി, തഥാരൂപാസ്സ ധമ്മാ ബഹുസ്സുതാ ഹോന്തി ധാതാ വചസാ പരിചിതാ മനസാനുപേക്ഖിതാ ദിട്ഠിയാ അപ്പടിവിദ്ധാ; മിച്ഛാദിട്ഠികോ ഹോതി വിപരീതദസ്സനോ, സോ ബഹുജനം സദ്ധമ്മാ വുട്ഠാപേത്വാ അസദ്ധമ്മേ പതിട്ഠാപേതി. ഥേരോ ഭിക്ഖു രത്തഞ്ഞൂ ചിരപബ്ബജിതോ ഇതിപിസ്സ ദിട്ഠാനുഗതിം ആപജ്ജന്തി, ഞാതോ ഥേരോ ഭിക്ഖു യസസ്സീ സഗഹട്ഠപബ്ബജിതാനം ബഹുജനപരിവാരോ ഇതിപിസ്സ ദിട്ഠാനുഗതിം ആപജ്ജന്തി, ലാഭീ ഥേരോ ഭിക്ഖു ചീവരപിണ്ഡപാതസേനാസനഗിലാനപ്പച്ചയഭേസജ്ജപരിക്ഖാരാനം ഇതിപിസ്സ ദിട്ഠാനുഗതിം ആപജ്ജന്തി, ബഹുസ്സുതോ ഥേരോ ഭിക്ഖു സുതധരോ സുതസന്നിചയോ ഇതിപിസ്സ ദിട്ഠാനുഗതിം ആപജ്ജന്തി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഥേരോ ഭിക്ഖു ബഹുജനഅഹിതായ പടിപന്നോ ഹോതി ബഹുജനഅസുഖായ ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഥേരോ ഭിക്ഖു ബഹുജനഹിതായ പടിപന്നോ ഹോതി ബഹുജനസുഖായ ബഹുനോ ജനസ്സ അത്ഥായ ഹിതായ സുഖായ ദേവമനുസ്സാനം.

‘‘കതമേഹി പഞ്ചഹി? ഥേരോ ഹോതി രത്തഞ്ഞൂ ചിരപബ്ബജിതോ; ഞാതോ ഹോതി യസസ്സീ സഗഹട്ഠപബ്ബജിതാനം ബഹുജനപരിവാരോ; ലാഭീ ഹോതി ചീവരപിണ്ഡപാതസേനാസനഗിലാനപ്പച്ചയഭേസജ്ജപരിക്ഖാരാനം; ബഹുസ്സുതോ ഹോതി സുതധരോ സുതസന്നിചയോ, യേ തേ ധമ്മാ ആദികല്യാണാ മജ്ഝേകല്യാണാ പരിയോസാനകല്യാണാ സാത്ഥം സബ്യഞ്ജനം കേവലപരിപുണ്ണം പരിസുദ്ധം ബ്രഹ്മചരിയം അഭിവദന്തി, തഥാരൂപാസ്സ ധമ്മാ ബഹുസ്സുതാ ഹോന്തി ധാതാ വചസാ പരിചിതാ മനസാനുപേക്ഖിതാ ദിട്ഠിയാ സുപ്പടിവിദ്ധാ; സമ്മാദിട്ഠികോ ഹോതി അവിപരീതദസ്സനോ, സോ ബഹുജനം അസദ്ധമ്മാ വുട്ഠാപേത്വാ സദ്ധമ്മേ പതിട്ഠാപേതി. ഥേരോ ഭിക്ഖു രത്തഞ്ഞൂ ചിരപബ്ബജിതോ ഇതിപിസ്സ ദിട്ഠാനുഗതിം ആപജ്ജന്തി, ഞാതോ ഥേരോ ഭിക്ഖു യസസ്സീ സഗഹട്ഠപബ്ബജിതാനം ബഹുജനപരിവാരോ ഇതിപിസ്സ ദിട്ഠാനുഗതിം ആപജ്ജന്തി, ലാഭീ ഥേരോ ഭിക്ഖു ചീവരപിണ്ഡപാതസേനാസനഗിലാനപ്പച്ചയഭേസജ്ജപരിക്ഖാരാനം ഇതിപിസ്സ ദിട്ഠാനുഗതിം ആപജ്ജന്തി, ബഹുസ്സുതോ ഥേരോ ഭിക്ഖു സുതധരോ സുതസന്നിചയോ ഇതിപിസ്സ ദിട്ഠാനുഗതിം ആപജ്ജന്തി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഥേരോ ഭിക്ഖു ബഹുജനഹിതായ പടിപന്നോ ഹോതി ബഹുജനസുഖായ ബഹുനോ ജനസ്സ അത്ഥായ ഹിതായ സുഖായ ദേവമനുസ്സാന’’ന്തി. അട്ഠമം.