൮. ദുതിയഇദ്ധിപാദസുത്തം

൬൮. ‘‘പുബ്ബേവാഹം, ഭിക്ഖവേ, സമ്ബോധാ അനഭിസമ്ബുദ്ധോ ബോധിസത്തോവ സമാനോ പഞ്ച ധമ്മേ ഭാവേസിം, പഞ്ച ധമ്മേ ബഹുലീകാസിം [ബഹുലിമകാസിം (ക.), ബഹുലമകാസിം (ക.)]. കതമേ പഞ്ച? ഛന്ദസമാധിപധാനസങ്ഖാരസമന്നാഗതം ഇദ്ധിപാദം ഭാവേസിം, വീരിയസമാധി… ചിത്തസമാധി… വീമംസാസമാധിപധാനസങ്ഖാരസമന്നാഗതം ഇദ്ധിപാദം ഭാവേസിം, ഉസ്സോള്ഹിഞ്ഞേവ പഞ്ചമിം. സോ ഖോ അഹം, ഭിക്ഖവേ, ഇമേസം ഉസ്സോള്ഹിപഞ്ചമാനം ധമ്മാനം ഭാവിതത്താ ബഹുലീകതത്താ യസ്സ യസ്സ അഭിഞ്ഞാസച്ഛികരണീയസ്സ ധമ്മസ്സ ചിത്തം അഭിനിന്നാമേസിം അഭിഞ്ഞാസച്ഛികിരിയായ, തത്ര തത്രേവ സക്ഖിഭബ്ബതം പാപുണിം സതി സതി ആയതനേ.

‘‘സോ സചേ ആകങ്ഖിം – ‘അനേകവിഹിതം ഇദ്ധിവിധം പച്ചനുഭവേയ്യം…പേ… യാവ ബ്രഹ്മലോകാപി കായേന വസം വത്തേയ്യ’ന്തി, തത്ര തത്രേവ സക്ഖിഭബ്ബതം പാപുണിം സതി സതി ആയതനേ.

‘‘സോ സചേ ആകങ്ഖിം…പേ… ‘ആസവാനം ഖയാ അനാസവം ചേതോവിമുത്തിം പഞ്ഞാവിമുത്തിം ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരേയ്യ’ന്തി, തത്ര തത്രേവ സക്ഖിഭബ്ബതം പാപുണിം സതി സതി ആയതനേ’’തി. അട്ഠമം.