൩. വിനയപേയ്യാലം

൨൦൧. ‘‘ദ്വേമേ, ഭിക്ഖവേ, അത്ഥവസേ പടിച്ച തഥാഗതേന സാവകാനം സിക്ഖാപദം പഞ്ഞത്തം. കതമേ ദ്വേ? സങ്ഘസുട്ഠുതായ സങ്ഘഫാസുതായ… ദുമ്മങ്കൂനം പുഗ്ഗലാനം നിഗ്ഗഹായ, പേസലാനം ഭിക്ഖൂനം ഫാസുവിഹാരായ… ദിട്ഠധമ്മികാനം ആസവാനം സംവരായ, സമ്പരായികാനം ആസവാനം പടിഘാതായ… ദിട്ഠധമ്മികാനം വേരാനം സംവരായ, സമ്പരായികാനം വേരാനം പടിഘാതായ… ദിട്ഠധമ്മികാനം വജ്ജാനം സംവരായ, സമ്പരായികാനം വജ്ജാനം പടിഘാതായ… ദിട്ഠധമ്മികാനം ഭയാനം സംവരായ, സമ്പരായികാനം ഭയാനം പടിഘാതായ… ദിട്ഠധമ്മികാനം അകുസലാനം ധമ്മാനം സംവരായ, സമ്പരായികാനം അകുസലാനം ധമ്മാനം പടിഘാതായ… ഗിഹീനം അനുകമ്പായ, പാപിച്ഛാനം ഭിക്ഖൂനം പക്ഖുപച്ഛേദായ… അപ്പസന്നാനം പസാദായ, പസന്നാനം ഭിയ്യോഭാവായ… സദ്ധമ്മട്ഠിതിയാ വിനയാനുഗ്ഗഹായ. ഇമേ ഖോ, ഭിക്ഖവേ, ദ്വേ അത്ഥവസേ പടിച്ച തഥാഗതേന സാവകാനം സിക്ഖാപദം പഞ്ഞത്ത’’ന്തി.

൨൦൨-൨൩൦. ‘‘ദ്വേമേ, ഭിക്ഖവേ, അത്ഥവസേ പടിച്ച തഥാഗതേന സാവകാനം പാതിമോക്ഖം പഞ്ഞത്തം…പേ… പാതിമോക്ഖുദ്ദേസോ പഞ്ഞത്തോ… പാതിമോക്ഖട്ഠപനം പഞ്ഞത്തം… പവാരണാ പഞ്ഞത്താ… പവാരണട്ഠപനം പഞ്ഞത്തം… തജ്ജനീയകമ്മം പഞ്ഞത്തം… നിയസ്സകമ്മം പഞ്ഞത്തം… പബ്ബാജനീയകമ്മം പഞ്ഞത്തം… പടിസാരണീയകമ്മം പഞ്ഞത്തം… ഉക്ഖേപനീയകമ്മം പഞ്ഞത്തം… പരിവാസദാനം പഞ്ഞത്തം… മൂലായ പടികസ്സനം പഞ്ഞത്തം… മാനത്തദാനം പഞ്ഞത്തം… അബ്ഭാനം പഞ്ഞത്തം… ഓസാരണീയം പഞ്ഞത്തം… നിസ്സാരണീയം പഞ്ഞത്തം… ഉപസമ്പദാ പഞ്ഞത്താ… ഞത്തികമ്മം പഞ്ഞത്തം… ഞത്തിദുതിയകമ്മം പഞ്ഞത്തം… ഞത്തിചതുത്ഥകമ്മം പഞ്ഞത്തം… അപഞ്ഞത്തേ പഞ്ഞത്തം… പഞ്ഞത്തേ അനുപഞ്ഞത്തം… സമ്മുഖാവിനയോ പഞ്ഞത്തോ… സതിവിനയോ പഞ്ഞത്തോ… അമൂള്ഹവിനയോ പഞ്ഞത്തോ… പടിഞ്ഞാതകരണം പഞ്ഞത്തം… യേഭുയ്യസികാ പഞ്ഞത്താ… തസ്സപാപിയസികാ പഞ്ഞത്താ… തിണവത്ഥാരകോ പഞ്ഞത്തോ. കതമേ ദ്വേ? സങ്ഘസുട്ഠുതായ, സങ്ഘഫാസുതായ… ദുമ്മങ്കൂനം പുഗ്ഗലാനം നിഗ്ഗഹായ, പേസലാനം ഭിക്ഖൂനം ഫാസുവിഹാരായ… ദിട്ഠധമ്മികാനം ആസവാനം സംവരായ, സമ്പരായികാനം ആസവാനം പടിഘാതായ… ദിട്ഠധമ്മികാനം വേരാനം സംവരായ, സമ്പരായികാനം വേരാനം പടിഘാതായ… ദിട്ഠധമ്മികാനം വജ്ജാനം സംവരായ, സമ്പരായികാനം വജ്ജാനം പടിഘാതായ… ദിട്ഠധമ്മികാനം ഭയാനം സംവരായ, സമ്പരായികാനം ഭയാനം പടിഘാതായ… ദിട്ഠധമ്മികാനം അകുസലാനം ധമ്മാനം സംവരായ, സമ്പരായികാനം അകുസലാനം ധമ്മാനം പടിഘാതായ… ഗിഹീനം അനുകമ്പായ, പാപിച്ഛാനം ഭിക്ഖൂനം പക്ഖുപച്ഛേദായ… അപ്പസന്നാനം പസാദായ, പസന്നാനം ഭിയ്യോഭാവായ… സദ്ധമ്മട്ഠിതിയാ, വിനയാനുഗ്ഗഹായ. ഇമേ ഖോ, ഭിക്ഖവേ, ദ്വേ അത്ഥവസേ പടിച്ച തഥാഗതേന സാവകാനം തിണവത്ഥാരകോ പഞ്ഞത്തോ’’തി.

വിനയപേയ്യാലം നിട്ഠിതം.