(൧൧) ൧. ആസാദുപ്പജഹവഗ്ഗോ

൧൧൯. ‘‘ദ്വേമാ, ഭിക്ഖവേ, ആസാ ദുപ്പജഹാ. കതമാ ദ്വേ? ലാഭാസാ ച ജീവിതാസാ ച. ഇമാ ഖോ, ഭിക്ഖവേ, ദ്വേ ആസാ ദുപ്പജഹാ’’തി.

൧൨൦. ‘‘ദ്വേമേ, ഭിക്ഖവേ, പുഗ്ഗലാ ദുല്ലഭാ ലോകസ്മിം. കതമേ ദ്വേ? യോ ച പുബ്ബകാരീ, യോ ച കതഞ്ഞൂ കതവേദീ. ഇമേ ഖോ, ഭിക്ഖവേ, ദ്വേ പുഗ്ഗലാ ദുല്ലഭാ ലോകസ്മി’’ന്തി.

൧൨൧. ‘‘ദ്വേമേ, ഭിക്ഖവേ, പുഗ്ഗലാ ദുല്ലഭാ ലോകസ്മിം. കതമേ ദ്വേ? തിത്തോ ച തപ്പേതാ ച. ഇമേ ഖോ, ഭിക്ഖവേ, ദ്വേ പുഗ്ഗലാ ദുല്ലഭാ ലോകസ്മി’’ന്തി.

൧൨൨. ‘‘ദ്വേമേ, ഭിക്ഖവേ, പുഗ്ഗലാ ദുത്തപ്പയാ. കതമേ ദ്വേ? യോ ച ലദ്ധം ലദ്ധം നിക്ഖിപതി, യോ ച ലദ്ധം ലദ്ധം വിസ്സജ്ജേതി. ഇമേ ഖോ, ഭിക്ഖവേ, ദ്വേ പുഗ്ഗലാ ദുത്തപ്പയാ’’തി.

൧൨൩. ‘‘ദ്വേമേ, ഭിക്ഖവേ, പുഗ്ഗലാ സുതപ്പയാ. കതമേ ദ്വേ? യോ ച ലദ്ധം ലദ്ധം ന നിക്ഖിപതി, യോ ച ലദ്ധം ലദ്ധം ന വിസ്സജ്ജേതി. ഇമേ ഖോ, ഭിക്ഖവേ, ദ്വേ പുഗ്ഗലാ സുതപ്പയാ’’തി.

൧൨൪. ‘‘ദ്വേമേ, ഭിക്ഖവേ, പച്ചയാ രാഗസ്സ ഉപ്പാദായ. കതമേ ദ്വേ? സുഭനിമിത്തഞ്ച അയോനിസോ ച മനസികാരോ. ഇമേ ഖോ, ഭിക്ഖവേ, ദ്വേ പച്ചയാ രാഗസ്സ ഉപ്പാദായാ’’തി.

൧൨൫. ‘‘ദ്വേമേ, ഭിക്ഖവേ, പച്ചയാ ദോസസ്സ ഉപ്പാദായ. കതമേ ദ്വേ? പടിഘനിമിത്തഞ്ച അയോനിസോ ച മനസികാരോ. ഇമേ ഖോ, ഭിക്ഖവേ, ദ്വേ പച്ചയാ ദോസസ്സ ഉപ്പാദായാ’’തി.

൧൨൬. ‘‘ദ്വേമേ, ഭിക്ഖവേ, പച്ചയാ മിച്ഛാദിട്ഠിയാ ഉപ്പാദായ. കതമേ ദ്വേ? പരതോ ച ഘോസോ അയോനിസോ ച മനസികാരോ. ഇമേ ഖോ, ഭിക്ഖവേ, ദ്വേ പച്ചയാ മിച്ഛാദിട്ഠിയാ ഉപ്പാദായാ’’തി.

൧൨൭. ‘‘ദ്വേമേ, ഭിക്ഖവേ, പച്ചയാ സമ്മാദിട്ഠിയാ ഉപ്പാദായ. കതമേ ദ്വേ? പരതോ ച ഘോസോ, യോനിസോ ച മനസികാരോ. ഇമേ ഖോ, ഭിക്ഖവേ, ദ്വേ പച്ചയാ സമ്മാദിട്ഠിയാ ഉപ്പാദായാ’’തി.

൧൨൮. ‘‘ദ്വേമാ, ഭിക്ഖവേ, ആപത്തിയോ. കതമാ ദ്വേ? ലഹുകാ ച ആപത്തി, ഗരുകാ ച ആപത്തി. ഇമാ ഖോ, ഭിക്ഖവേ, ദ്വേ ആപത്തിയോ’’തി.

൧൨൯. ‘‘ദ്വേമാ, ഭിക്ഖവേ, ആപത്തിയോ. കതമാ ദ്വേ? ദുട്ഠുല്ലാ ച ആപത്തി, അദുട്ഠുല്ലാ ച ആപത്തി. ഇമാ ഖോ, ഭിക്ഖവേ, ദ്വേ ആപത്തിയോ’’തി.

൧൩൦. ‘‘ദ്വേമാ, ഭിക്ഖവേ, ആപത്തിയോ. കതമാ ദ്വേ? സാവസേസാ ച ആപത്തി, അനവസേസാ ച ആപത്തി. ഇമാ ഖോ, ഭിക്ഖവേ, ദ്വേ ആപത്തിയോ’’തി.

ആസാദുപ്പജഹവഗ്ഗോ പഠമോ.