(൨൦) ൫. അപരപുഗ്ഗലവഗ്ഗോ

നസേവിതബ്ബാദിസുത്താനി

൧൯൯. ‘‘ദസഹി, ഭിക്ഖവേ, ധമ്മേഹി സമന്നാഗതോ പുഗ്ഗലോ ന സേവിതബ്ബോ. കതമേഹി ദസഹി? പാണാതിപാതീ ഹോതി, അദിന്നാദായീ ഹോതി, കാമേസുമിച്ഛാചാരീ ഹോതി, മുസാവാദീ ഹോതി, പിസുണവാചോ ഹോതി, ഫരുസവാചോ ഹോതി, സമ്ഫപ്പലാപീ ഹോതി, അഭിജ്ഝാലു ഹോതി, ബ്യാപന്നചിത്തോ ഹോതി, മിച്ഛാദിട്ഠികോ ഹോതി – ഇമേഹി ഖോ, ഭിക്ഖവേ, ദസഹി ധമ്മേഹി സമന്നാഗതോ പുഗ്ഗലോ ന സേവിതബ്ബോ.

‘‘ദസഹി, ഭിക്ഖവേ, ധമ്മേഹി സമന്നാഗതോ പുഗ്ഗലോ സേവിതബ്ബോ. കതമേഹി ദസഹി? പാണാതിപാതാ പടിവിരതോ ഹോതി, അദിന്നാദാനാ പടിവിരതോ ഹോതി, കാമേസുമിച്ഛാചാരാ പടിവിരതോ ഹോതി, മുസാവാദാ പടിവിരതോ ഹോതി, പിസുണായ വാചായ പടിവിരതോ ഹോതി, ഫരുസായ വാചായ പടിവിരതോ ഹോതി, സമ്ഫപ്പലാപാ പടിവിരതോ ഹോതി, അനഭിജ്ഝാലു ഹോതി, അബ്യാപന്നചിത്തോ ഹോതി, സമ്മാദിട്ഠികോ ഹോതി – ഇമേഹി ഖോ, ഭിക്ഖവേ, ദസഹി ധമ്മേഹി സമന്നാഗതോ പുഗ്ഗലോ സേവിതബ്ബോ’’.

൨൦൦-൨൦൯. ‘‘ദസഹി, ഭിക്ഖവേ, ധമ്മേഹി സമന്നാഗതോ പുഗ്ഗലോ ന ഭജിതബ്ബോ…പേ… ഭജിതബ്ബോ… ന പയിരുപാസിതബ്ബോ… പയിരുപാസിതബ്ബോ… ന പുജ്ജോ ഹോതി… പുജ്ജോ ഹോതി… ന പാസംസോ ഹോതി… പാസംസോ ഹോതി… അഗാരവോ ഹോതി… ഗാരവോ ഹോതി… അപ്പതിസ്സോ ഹോതി… സപ്പതിസ്സോ ഹോതി… ന ആരാധകോ ഹോതി… ആരാധകോ ഹോതി… ന വിസുജ്ഝതി… വിസുജ്ഝതി… മാനം നാധിഭോതി [നാഭിഭോതി (സീ.) അ. നി. ൧൦.൧൫൬-൧൬൬] … മാനം അധിഭോതി… പഞ്ഞായ ന വഡ്ഢതി… പഞ്ഞായ വഡ്ഢതി…പേ….

൨൧൦. ‘‘ദസഹി, ഭിക്ഖവേ, ധമ്മേഹി സമന്നാഗതോ പുഗ്ഗലോ ബഹും അപുഞ്ഞം പസവതി… ബഹും പുഞ്ഞം പസവതി. കതമേഹി ദസഹി? പാണാതിപാതാ പടിവിരതോ ഹോതി, അദിന്നാദാനാ പടിവിരതോ ഹോതി, കാമേസുമിച്ഛാചാരാ പടിവിരതോ ഹോതി, മുസാവാദാ പടിവിരതോ ഹോതി, പിസുണായ വാചായ പടിവിരതോ ഹോതി, ഫരുസായ വാചായ പടിവിരതോ ഹോതി, സമ്ഫപ്പലാപാ പടിവിരതോ ഹോതി, അനഭിജ്ഝാലു ഹോതി, അബ്യാപന്നചിത്തോ ഹോതി, സമ്മാദിട്ഠികോ ഹോതി – ഇമേഹി ഖോ, ഭിക്ഖവേ, ദസഹി ധമ്മേഹി സമന്നാഗതോ പുഗ്ഗലോ ബഹും പുഞ്ഞം പസവതീ’’തി.

അപരപുഗ്ഗലവഗ്ഗോ പഞ്ചമോ.