൫. പഠമസുഖസുത്തം

൬൫. ഏകം സമയം ആയസ്മാ സാരിപുത്തോ മഗധേസു വിഹരതി നാലകഗാമകേ. അഥ ഖോ സാമണ്ഡകാനി പരിബ്ബാജകോ യേനായസ്മാ സാരിപുത്തോ തേനുപസങ്കമി; ഉപസങ്കമിത്വാ ആയസ്മതാ സാരിപുത്തേന സദ്ധിം സമ്മോദി. സമ്മോദനീയം കഥം സാരണീയം വീതിസാരേത്വാ ഏകമന്തം നിസീദി. ഏകമന്തം നിസിന്നോ ഖോ സാമണ്ഡകാനി പരിബ്ബാജകോ ആയസ്മന്തം സാരിപുത്തം ഏതദവോച –

‘‘കിം നു ഖോ, ആവുസോ സാരിപുത്ത, സുഖം, കിം ദുക്ഖ’’ന്തി? ‘‘അഭിനിബ്ബത്തി ഖോ, ആവുസോ, ദുക്ഖാ, അനഭിനിബ്ബത്തി സുഖാ. അഭിനിബ്ബത്തിയാ, ആവുസോ, സതി ഇദം ദുക്ഖം പാടികങ്ഖം – സീതം ഉണ്ഹം ജിഘച്ഛാ പിപാസാ ഉച്ചാരോ പസ്സാവോ അഗ്ഗിസമ്ഫസ്സോ ദണ്ഡസമ്ഫസ്സോ സത്ഥസമ്ഫസ്സോ ഞാതീപി മിത്താപി സങ്ഗമ്മ സമാഗമ്മ രോസേന്തി. അഭിനിബ്ബത്തിയാ, ആവുസോ, സതി ഇദം ദുക്ഖം പാടികങ്ഖം. അനഭിനിബ്ബത്തിയാ, ആവുസോ, സതി ഇദം സുഖം പാടികങ്ഖം – ന സീതം ന ഉണ്ഹം ന ജിഘച്ഛാ ന പിപാസാ ന ഉച്ചാരോ ന പസ്സാവോ ന അഗ്ഗിസമ്ഫസ്സോ ന ദണ്ഡസമ്ഫസ്സോ ന സത്ഥസമ്ഫസ്സോ ഞാതീപി മിത്താപി സങ്ഗമ്മ സമാഗമ്മ ന രോസേന്തി. അനഭിനിബ്ബത്തിയാ, ആവുസോ, സതി ഇദം സുഖം പാടികങ്ഖ’’ന്തി. പഞ്ചമം.