൭. മഹാലിസുത്തം

൪൭. ഏകം സമയം ഭഗവാ വേസാലിയം വിഹരതി മഹാവനേ കൂടാഗാരസാലായം. അഥ ഖോ മഹാലി ലിച്ഛവി യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ മഹാലി ലിച്ഛവി ഭഗവന്തം ഏതദവോച – ‘‘കോ നു ഖോ, ഭന്തേ ഹേതു, കോ പച്ചയോ പാപസ്സ കമ്മസ്സ കിരിയായ പാപസ്സ കമ്മസ്സ പവത്തിയാ’’തി? ‘‘ലോഭോ ഖോ, മഹാലി, ഹേതു, ലോഭോ പച്ചയോ പാപസ്സ കമ്മസ്സ കിരിയായ പാപസ്സ കമ്മസ്സ പവത്തിയാ. ദോസോ ഖോ, മഹാലി, ഹേതു, ദോസോ പച്ചയോ പാപസ്സ കമ്മസ്സ കിരിയായ പാപസ്സ കമ്മസ്സ പവത്തിയാ. മോഹോ ഖോ, മഹാലി, ഹേതു, മോഹോ പച്ചയോ പാപസ്സ കമ്മസ്സ കിരിയായ പാപസ്സ കമ്മസ്സ പവത്തിയാ. അയോനിസോ മനസികാരോ ഖോ, മഹാലി, ഹേതു, അയോനിസോ മനസികാരോ പച്ചയോ പാപസ്സ കമ്മസ്സ കിരിയായ പാപസ്സ കമ്മസ്സ പവത്തിയാ. മിച്ഛാപണിഹിതം ഖോ, മഹാലി, ചിത്തം ഹേതു, മിച്ഛാപണിഹിതം ചിത്തം പച്ചയോ പാപസ്സ കമ്മസ്സ കിരിയായ പാപസ്സ കമ്മസ്സ പവത്തിയാതി. അയം ഖോ, മഹാലി, ഹേതു, അയം പച്ചയോ പാപസ്സ കമ്മസ്സ കിരിയായ പാപസ്സ കമ്മസ്സ പവത്തിയാ’’തി.

‘‘കോ പന, ഭന്തേ, ഹേതു കോ പച്ചയോ കല്യാണസ്സ കമ്മസ്സ കിരിയായ കല്യാണസ്സ കമ്മസ്സ പവത്തിയാ’’തി? ‘‘അലോഭോ ഖോ, മഹാലി, ഹേതു, അലോഭോ പച്ചയോ കല്യാണസ്സ കമ്മസ്സ കിരിയായ കല്യാണസ്സ കമ്മസ്സ പവത്തിയാ. അദോസോ ഖോ, മഹാലി, ഹേതു, അദോസോ പച്ചയോ കല്യാണസ്സ കമ്മസ്സ കിരിയായ കല്യാണസ്സ കമ്മസ്സ പവത്തിയാ. അമോഹോ ഖോ, മഹാലി, ഹേതു, അമോഹോ പച്ചയോ കല്യാണസ്സ കമ്മസ്സ കിരിയായ കല്യാണസ്സ കമ്മസ്സ പവത്തിയാ. യോനിസോ മനസികാരോ ഖോ, മഹാലി, ഹേതു, യോനിസോ മനസികാരോ പച്ചയോ കല്യാണസ്സ കമ്മസ്സ കിരിയായ കല്യാണസ്സ കമ്മസ്സ പവത്തിയാ. സമ്മാപണിഹിതം ഖോ, മഹാലി, ചിത്തം ഹേതു, സമ്മാപണിഹിതം ചിത്തം പച്ചയോ കല്യാണസ്സ കമ്മസ്സ കിരിയായ കല്യാണസ്സ കമ്മസ്സ പവത്തിയാ. അയം ഖോ, മഹാലി, ഹേതു, അയം പച്ചയോ കല്യാണസ്സ കമ്മസ്സ കിരിയായ കല്യാണസ്സ കമ്മസ്സ പവത്തിയാ. ഇമേ ച, മഹാലി, ദസ ധമ്മാ ലോകേ ന സംവിജ്ജേയ്യും, നയിധ പഞ്ഞായേഥ അധമ്മചരിയാവിസമചരിയാതി വാ ധമ്മചരിയാസമചരിയാതി വാ. യസ്മാ ച ഖോ, മഹാലി, ഇമേ ദസ ധമ്മാ ലോകേ സംവിജ്ജന്തി, തസ്മാ പഞ്ഞായതി അധമ്മചരിയാവിസമചരിയാതി വാ ധമ്മചരിയാസമചരിയാതി വാ’’തി. സത്തമം.