൬. അച്ഛരാസങ്ഘാതവഗ്ഗോ

൫൧. ‘‘പഭസ്സരമിദം, ഭിക്ഖവേ, ചിത്തം. തഞ്ച ഖോ ആഗന്തുകേഹി ഉപക്കിലേസേഹി ഉപക്കിലിട്ഠം. തം അസ്സുതവാ പുഥുജ്ജനോ യഥാഭൂതം നപ്പജാനാതി. തസ്മാ ‘അസ്സുതവതോ പുഥുജ്ജനസ്സ ചിത്തഭാവനാ നത്ഥീ’തി വദാമീ’’തി. പഠമം.

൫൨. ‘‘പഭസ്സരമിദം, ഭിക്ഖവേ, ചിത്തം. തഞ്ച ഖോ ആഗന്തുകേഹി ഉപക്കിലേസേഹി വിപ്പമുത്തം. തം സുതവാ അരിയസാവകോ യഥാഭൂതം പജാനാതി. തസ്മാ ‘സുതവതോ അരിയസാവകസ്സ ചിത്തഭാവനാ അത്ഥീ’തി വദാമീ’’തി. ദുതിയം.

൫൩. ‘‘അച്ഛരാസങ്ഘാതമത്തമ്പി ചേ, ഭിക്ഖവേ, ഭിക്ഖു മേത്താചിത്തം [മേത്തം ചിത്തം (സീ.), മേത്തചിത്തം (സ്യാ. കം. പീ. ക.)] ആസേവതി; അയം വുച്ചതി, ഭിക്ഖവേ – ‘ഭിക്ഖു അരിത്തജ്ഝാനോ വിഹരതി സത്ഥുസാസനകരോ ഓവാദപതികരോ, അമോഘം രട്ഠപിണ്ഡം ഭുഞ്ജതി’. കോ പന വാദോ യേ നം ബഹുലീകരോന്തീ’’തി! തതിയം.

൫൪. ‘‘അച്ഛരാസങ്ഘാതമത്തമ്പി ചേ, ഭിക്ഖവേ, ഭിക്ഖു മേത്താചിത്തം ഭാവേതി; അയം വുച്ചതി, ഭിക്ഖവേ – ‘ഭിക്ഖു അരിത്തജ്ഝാനോ വിഹരതി സത്ഥുസാസനകരോ ഓവാദപതികരോ, അമോഘം രട്ഠപിണ്ഡം ഭുഞ്ജതി’. കോ പന വാദോ യേ നം ബഹുലീകരോന്തീ’’തി! ചതുത്ഥം.

൫൫. ‘‘അച്ഛരാസങ്ഘാതമത്തമ്പി ചേ, ഭിക്ഖവേ, ഭിക്ഖു മേത്താചിത്തം മനസി കരോതി; അയം വുച്ചതി, ഭിക്ഖവേ – ‘ഭിക്ഖു അരിത്തജ്ഝാനോ വിഹരതി സത്ഥുസാസനകരോ ഓവാദപതികരോ അമോഘം രട്ഠപിണ്ഡം ഭുഞ്ജതി’. കോ പന വാദോ യേ നം ബഹുലീകരോന്തീ’’തി! പഞ്ചമം.

൫൬. ‘‘യേ കേചി, ഭിക്ഖവേ, ധമ്മാ അകുസലാ അകുസലഭാഗിയാ അകുസലപക്ഖികാ, സബ്ബേ തേ മനോപുബ്ബങ്ഗമാ. മനോ തേസം ധമ്മാനം പഠമം ഉപ്പജ്ജതി, അന്വദേവ അകുസലാ ധമ്മാ’’തി. ഛട്ഠം.

൫൭. ‘‘യേ കേചി, ഭിക്ഖവേ, ധമ്മാ കുസലാ കുസലഭാഗിയാ കുസലപക്ഖികാ, സബ്ബേ തേ മനോപുബ്ബങ്ഗമാ. മനോ തേസം ധമ്മാനം പഠമം ഉപ്പജ്ജതി, അന്വദേവ കുസലാ ധമ്മാ’’തി. സത്തമം.

൫൮. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ അകുസലാ ധമ്മാ ഉപ്പജ്ജന്തി ഉപ്പന്നാ വാ കുസലാ ധമ്മാ പരിഹായന്തി യഥയിദം, ഭിക്ഖവേ, പമാദോ. പമത്തസ്സ, ഭിക്ഖവേ, അനുപ്പന്നാ ചേവ അകുസലാ ധമ്മാ ഉപ്പജ്ജന്തി ഉപ്പന്നാ ച കുസലാ ധമ്മാ പരിഹായന്തീ’’തി. അട്ഠമം.

൫൯. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ കുസലാ ധമ്മാ ഉപ്പജ്ജന്തി ഉപ്പന്നാ വാ അകുസലാ ധമ്മാ പരിഹായന്തി യഥയിദം, ഭിക്ഖവേ, അപ്പമാദോ. അപ്പമത്തസ്സ, ഭിക്ഖവേ, അനുപ്പന്നാ ചേവ കുസലാ ധമ്മാ ഉപ്പജ്ജന്തി ഉപ്പന്നാ ച അകുസലാ ധമ്മാ പരിഹായന്തീ’’തി. നവമം.

൬൦. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ അകുസലാ ധമ്മാ ഉപ്പജ്ജന്തി ഉപ്പന്നാ വാ കുസലാ ധമ്മാ പരിഹായന്തി യഥയിദം, ഭിക്ഖവേ, കോസജ്ജം. കുസീതസ്സ, ഭിക്ഖവേ, അനുപ്പന്നാ ചേവ അകുസലാ ധമ്മാ ഉപ്പജ്ജന്തി ഉപ്പന്നാ ച കുസലാ ധമ്മാ പരിഹായന്തീ’’തി. ദസമം.

അച്ഛരാസങ്ഘാതവഗ്ഗോ ഛട്ഠോ.