൧൯. കായഗതാസതിവഗ്ഗോ

൫൬൩. ‘‘യസ്സ കസ്സചി, ഭിക്ഖവേ, മഹാസമുദ്ദോ ചേതസാ ഫുടോ അന്തോഗധാ തസ്സ കുന്നദിയോ യാ കാചി സമുദ്ദങ്ഗമാ; ഏവമേവം, ഭിക്ഖവേ, യസ്സ കസ്സചി കായഗതാ സതി ഭാവിതാ ബഹുലീകതാ അന്തോഗധാ തസ്സ കുസലാ ധമ്മാ യേ കേചി വിജ്ജാഭാഗിയാ’’തി.

൫൬൪-൫൭൦. ‘‘ഏകധമ്മോ, ഭിക്ഖവേ, ഭാവിതോ ബഹുലീകതോ മഹതോ സംവേഗായ സംവത്തതി… മഹതോ അത്ഥായ സംവത്തതി… മഹതോ യോഗക്ഖേമായ സംവത്തതി… സതിസമ്പജഞ്ഞായ സംവത്തതി… ഞാണദസ്സനപ്പടിലാഭായ സംവത്തതി… ദിട്ഠധമ്മസുഖവിഹാരായ സംവത്തതി… വിജ്ജാവിമുത്തിഫലസച്ഛികിരിയായ സംവത്തതി. കതമോ ഏകധമ്മോ? കായഗതാ സതി. അയം ഖോ, ഭിക്ഖവേ, ഏകധമ്മോ ഭാവിതോ ബഹുലീകതോ മഹതോ സംവേഗായ സംവത്തതി… മഹതോ അത്ഥായ സംവത്തതി… മഹതോ യോഗക്ഖേമായ സംവത്തതി… സതിസമ്പജഞ്ഞായ സംവത്തതി… ഞാണദസ്സനപ്പടിലാഭായ സംവത്തതി… ദിട്ഠധമ്മസുഖവിഹാരായ സംവത്തതി… വിജ്ജാവിമുത്തിഫലസച്ഛികിരിയായ സംവത്തതീ’’തി.

൫൭൧. ‘‘ഏകധമ്മേ, ഭിക്ഖവേ, ഭാവിതേ ബഹുലീകതേ കായോപി പസ്സമ്ഭതി, ചിത്തമ്പി പസ്സമ്ഭതി, വിതക്കവിചാരാപി വൂപസമ്മന്തി, കേവലാപി വിജ്ജാഭാഗിയാ ധമ്മാ ഭാവനാപാരിപൂരിം ഗച്ഛന്തി. കതമസ്മിം ഏകധമ്മേ? കായഗതായ സതിയാ. ഇമസ്മിം ഖോ, ഭിക്ഖവേ, ഏകധമ്മേ ഭാവിതേ ബഹുലീകതേ കായോപി പസ്സമ്ഭതി, ചിത്തമ്പി പസ്സമ്ഭതി, വിതക്കവിചാരാപി വൂപസമ്മന്തി, കേവലാപി വിജ്ജാഭാഗിയാ ധമ്മാ ഭാവനാപാരിപൂരിം ഗച്ഛന്തീ’’തി.

൫൭൨. ‘‘ഏകധമ്മേ, ഭിക്ഖവേ, ഭാവിതേ ബഹുലീകതേ അനുപ്പന്നാ ചേവ അകുസലാ ധമ്മാ നുപ്പജ്ജന്തി, ഉപ്പന്നാ ച അകുസലാ ധമ്മാ പഹീയന്തി. കതമസ്മിം ഏകധമ്മേ? കായഗതായ സതിയാ. ഇമസ്മിം ഖോ, ഭിക്ഖവേ, ഏകധമ്മേ ഭാവിതേ ബഹുലീകതേ അനുപ്പന്നാ ചേവ അകുസലാ ധമ്മാ നുപ്പജ്ജന്തി, ഉപ്പന്നാ ച അകുസലാ ധമ്മാ പഹീയന്തീ’’തി.

൫൭൩. ‘‘ഏകധമ്മേ, ഭിക്ഖവേ, ഭാവിതേ ബഹുലീകതേ അനുപ്പന്നാ ചേവ കുസലാ ധമ്മാ ഉപ്പജ്ജന്തി, ഉപ്പന്നാ ച കുസലാ ധമ്മാ ഭിയ്യോഭാവായ വേപുല്ലായ സംവത്തന്തി. കതമസ്മിം ഏകധമ്മേ? കായഗതായ സതിയാ. ഇമസ്മിം ഖോ, ഭിക്ഖവേ, ഏകധമ്മേ ഭാവിതേ ബഹുലീകതേ അനുപ്പന്നാ ചേവ കുസലാ ധമ്മാ ഉപ്പജ്ജന്തി, ഉപ്പന്നാ ച കുസലാ ധമ്മാ ഭിയ്യോഭാവായ വേപുല്ലായ സംവത്തന്തീ’’തി.

൫൭൪. ‘‘ഏകധമ്മേ, ഭിക്ഖവേ, ഭാവിതേ ബഹുലീകതേ അവിജ്ജാ പഹീയതി, വിജ്ജാ ഉപ്പജ്ജതി, അസ്മിമാനോ പഹീയതി, അനുസയാ സമുഗ്ഘാതം ഗച്ഛന്തി, സംയോജനാ പഹീയന്തി. കതമസ്മിം ഏകധമ്മേ? കായഗതായ സതിയാ. ഇമസ്മിം ഖോ, ഭിക്ഖവേ, ഏകധമ്മേ ഭാവിതേ ബഹുലീകതേ അവിജ്ജാ പഹീയതി, വിജ്ജാ ഉപ്പജ്ജതി, അസ്മിമാനോ പഹീയതി, അനുസയാ സമുഗ്ഘാതം ഗച്ഛന്തി, സംയോജനാ പഹീയന്തീ’’തി.

൫൭൫-൫൭൬. ‘‘ഏകധമ്മോ, ഭിക്ഖവേ, ഭാവിതോ ബഹുലീകതോ പഞ്ഞാപഭേദായ സംവത്തതി… അനുപാദാപരിനിബ്ബാനായ സംവത്തതി. കതമോ ഏകധമ്മോ? കായഗതാ സതി. അയം ഖോ, ഭിക്ഖവേ, ഏകധമ്മോ ഭാവിതോ ബഹുലീകതോ പഞ്ഞാപഭേദായ സംവത്തതി… അനുപാദാപരിനിബ്ബാനായ സംവത്തതീ’’തി.

൫൭൭-൫൭൯. ‘‘ഏകധമ്മേ, ഭിക്ഖവേ, ഭാവിതേ ബഹുലീകതേ അനേകധാതുപടിവേധോ ഹോതി… നാനാധാതുപടിവേധോ ഹോതി… അനേകധാതുപടിസമ്ഭിദാ ഹോതി. കതമസ്മിം ഏകധമ്മേ? കായഗതായ സതിയാ. ഇമസ്മിം ഖോ, ഭിക്ഖവേ, ഏകധമ്മേ ഭാവിതേ ബഹുലീകതേ അനേകധാതുപടിവേധോ ഹോതി… നാനാധാതുപടിവേധോ ഹോതി… അനേകധാതുപടിസമ്ഭിദാ ഹോതീ’’തി.

൫൮൦-൫൮൩. ‘‘ഏകധമ്മോ, ഭിക്ഖവേ, ഭാവിതോ ബഹുലീകതോ സോതാപത്തിഫലസച്ഛികിരിയായ സംവത്തതി… സകദാഗാമിഫലസച്ഛികിരിയായ സംവത്തതി… അനാഗാമിഫലസച്ഛികിരിയായ സംവത്തതി… അരഹത്തഫലസച്ഛികിരിയായ സംവത്തതി. കതമോ ഏകധമ്മോ? കായഗതാ സതി. അയം ഖോ, ഭിക്ഖവേ, ഏകധമ്മോ ഭാവിതോ ബഹുലീകതോ സോതാപത്തിഫലസച്ഛികിരിയായ സംവത്തതി… സകദാഗാമിഫലസച്ഛികിരിയായ സംവത്തതി… അനാഗാമിഫലസച്ഛികിരിയായ സംവത്തതി… അരഹത്തഫലസച്ഛികിരിയായ സംവത്തതീ’’തി.

൫൮൪-൫൯൯. ‘‘ഏകധമ്മോ, ഭിക്ഖവേ, ഭാവിതോ ബഹുലീകതോ പഞ്ഞാപടിലാഭായ സംവത്തതി… പഞ്ഞാവുദ്ധിയാ സംവത്തതി… പഞ്ഞാവേപുല്ലായ സംവത്തതി… മഹാപഞ്ഞതായ സംവത്തതി… പുഥുപഞ്ഞതായ സംവത്തതി… വിപുലപഞ്ഞതായ സംവത്തതി… ഗമ്ഭീരപഞ്ഞതായ സംവത്തതി… അസാമന്തപഞ്ഞതായ [അസമത്ഥപഞ്ഞതായ (സ്യാ. കം.), അസമത്തപഞ്ഞതായ (ക.), അസമന്തപഞ്ഞതായ (ടീകാ) പടി. മ. അട്ഠ. ൨.൩.൧ പസ്സിതബ്ബം] സംവത്തതി… ഭൂരിപഞ്ഞതായ സംവത്തതി… പഞ്ഞാബാഹുല്ലായ സംവത്തതി… സീഘപഞ്ഞതായ സംവത്തതി… ലഹുപഞ്ഞതായ സംവത്തതി… ഹാസപഞ്ഞതായ [ഹാസുപഞ്ഞതായ (സീ. പീ.)] സംവത്തതി… ജവനപഞ്ഞതായ സംവത്തതി… തിക്ഖപഞ്ഞതായ സംവത്തതി… നിബ്ബേധികപഞ്ഞതായ സംവത്തതി. കതമോ ഏകധമ്മോ? കായഗതാ സതി. അയം ഖോ, ഭിക്ഖവേ, ഏകധമ്മോ ഭാവിതോ ബഹുലീകതോ പഞ്ഞാപടിലാഭായ സംവത്തതി… പഞ്ഞാവുദ്ധിയാ സംവത്തതി… പഞ്ഞാവേപുല്ലായ സംവത്തതി… മഹാപഞ്ഞതായ സംവത്തതി… പുഥുപഞ്ഞതായ സംവത്തതി… വിപുലപഞ്ഞതായ സംവത്തതി… ഗമ്ഭീരപഞ്ഞതായ സംവത്തതി… അസാമന്തപഞ്ഞതായ സംവത്തതി… ഭൂരിപഞ്ഞതായ സംവത്തതി… പഞ്ഞാബാഹുല്ലായ സംവത്തതി… സീഘപഞ്ഞതായ സംവത്തതി… ലഹുപഞ്ഞതായ സംവത്തതി… ഹാസപഞ്ഞതായ സംവത്തതി… ജവനപഞ്ഞതായ സംവത്തതി… തിക്ഖപഞ്ഞതായ സംവത്തതി… നിബ്ബേധികപഞ്ഞതായ സംവത്തതീ’’തി.

കായഗതാസതിവഗ്ഗോ ഏകൂനവീസതിമോ.