൧൨. അനാപത്തിവഗ്ഗോ

൧൫൦. ‘‘യേ തേ, ഭിക്ഖവേ, ഭിക്ഖൂ അനാപത്തിം ആപത്തീതി ദീപേന്തി തേ, ഭിക്ഖവേ, ഭിക്ഖൂ ബഹുജനഅഹിതായ പടിപന്നാ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ അപുഞ്ഞം പസവന്തി, തേ ചിമം സദ്ധമ്മം അന്തരധാപേന്തീ’’തി. പഠമം.

൧൫൧. ‘‘യേ തേ, ഭിക്ഖവേ, ഭിക്ഖൂ ആപത്തിം അനാപത്തീതി ദീപേന്തി തേ, ഭിക്ഖവേ, ഭിക്ഖൂ ബഹുജനഅഹിതായ പടിപന്നാ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ അപുഞ്ഞം പസവന്തി, തേ ചിമം സദ്ധമ്മം അന്തരധാപേന്തീ’’തി. ദുതിയം.

൧൫൨-൧൫൯. ‘‘യേ തേ, ഭിക്ഖവേ, ഭിക്ഖൂ ലഹുകം ആപത്തിം ഗരുകാ ആപത്തീതി ദീപേന്തി…പേ… ഗരുകം ആപത്തിം ലഹുകാ ആപത്തീതി ദീപേന്തി…പേ… ദുട്ഠുല്ലം ആപത്തിം അദുട്ഠുല്ലാ ആപത്തീതി ദീപേന്തി…പേ… അദുട്ഠുല്ലം ആപത്തിം ദുട്ഠുല്ലാ ആപത്തീതി ദീപേന്തി…പേ… സാവസേസം ആപത്തിം അനവസേസാ ആപത്തീതി ദീപേന്തി…പേ… അനവസേസം ആപത്തിം സാവസേസാ ആപത്തീതി ദീപേന്തി…പേ… സപ്പടികമ്മം ആപത്തിം അപ്പടികമ്മാ ആപത്തീതി ദീപേന്തി…പേ… അപ്പടികമ്മം ആപത്തിം സപ്പടികമ്മാ ആപത്തീതി ദീപേന്തി തേ, ഭിക്ഖവേ, ഭിക്ഖൂ ബഹുജനഅഹിതായ പടിപന്നാ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ അപുഞ്ഞം പസവന്തി, തേ ചിമം സദ്ധമ്മം അന്തരധാപേന്തീ’’തി. ദസമം.

൧൬൦. ‘‘യേ തേ, ഭിക്ഖവേ, ഭിക്ഖൂ അനാപത്തിം അനാപത്തീതി ദീപേന്തി തേ, ഭിക്ഖവേ, ഭിക്ഖൂ ബഹുജനഹിതായ പടിപന്നാ ബഹുജനസുഖായ, ബഹുനോ ജനസ്സ അത്ഥായ ഹിതായ സുഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ പുഞ്ഞം പസവന്തി, തേ ചിമം സദ്ധമ്മം ഠപേന്തീ’’തി. ഏകാദസമം.

൧൬൧. ‘‘യേ തേ, ഭിക്ഖവേ, ഭിക്ഖൂ ആപത്തിം ആപത്തീതി ദീപേന്തി തേ, ഭിക്ഖവേ, ഭിക്ഖൂ ബഹുജനഹിതായ പടിപന്നാ ബഹുജനസുഖായ, ബഹുനോ ജനസ്സ അത്ഥായ ഹിതായ സുഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ പുഞ്ഞം പസവന്തി, തേ ചിമം സദ്ധമ്മം ഠപേന്തീ’’തി. ദ്വാദസമം.

൧൬൨-൧൬൯. ‘‘യേ തേ, ഭിക്ഖവേ, ഭിക്ഖൂ ലഹുകം ആപത്തിം ലഹുകാ ആപത്തീതി ദീപേന്തി… ഗരുകം ആപത്തിം ഗരുകാ ആപത്തീതി ദീപേന്തി… ദുട്ഠുല്ലം ആപത്തിം ദുട്ഠുല്ലാ ആപത്തീതി ദീപേന്തി… അദുട്ഠുല്ലം ആപത്തിം അദുട്ഠുല്ലാ ആപത്തീതി ദീപേന്തി… സാവസേസം ആപത്തിം സാവസേസാ ആപത്തീതി ദീപേന്തി… അനവസേസം ആപത്തിം അനവസേസാ ആപത്തീതി ദീപേന്തി… സപ്പടികമ്മം ആപത്തിം സപ്പടികമ്മാ ആപത്തീതി ദീപേന്തി… അപ്പടികമ്മം ആപത്തിം അപ്പടികമ്മാ ആപത്തീതി ദീപേന്തി തേ, ഭിക്ഖവേ, ഭിക്ഖൂ ബഹുജനഹിതായ പടിപന്നാ ബഹുജനസുഖായ, ബഹുനോ ജനസ്സ അത്ഥായ ഹിതായ സുഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ പുഞ്ഞം പസവന്തി, തേ ചിമം സദ്ധമ്മം ഠപേന്തീ’’തി. വീസതിമം.

അനാപത്തിവഗ്ഗോ ദ്വാദസമോ.