൧൦. ദുതിയപമാദാദിവഗ്ഗോ

൯൮. ‘‘അജ്ഝത്തികം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അനത്ഥായ സംവത്തതി യഥയിദം, ഭിക്ഖവേ, പമാദോ. പമാദോ, ഭിക്ഖവേ, മഹതോ അനത്ഥായ സംവത്തതീ’’തി. പഠമം.

൯൯. ‘‘അജ്ഝത്തികം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അത്ഥായ സംവത്തതി യഥയിദം, ഭിക്ഖവേ, അപ്പമാദോ. അപ്പമാദോ, ഭിക്ഖവേ, മഹതോ അത്ഥായ സംവത്തതീ’’തി. ദുതിയം.

൧൦൦. ‘‘അജ്ഝത്തികം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അനത്ഥായ സംവത്തതി യഥയിദം, ഭിക്ഖവേ, കോസജ്ജം. കോസജ്ജം, ഭിക്ഖവേ, മഹതോ അനത്ഥായ സംവത്തതീ’’തി. തതിയം.

൧൦൧. ‘‘അജ്ഝത്തികം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അത്ഥായ സംവത്തതി യഥയിദം, ഭിക്ഖവേ, വീരിയാരമ്ഭോ. വീരിയാരമ്ഭോ, ഭിക്ഖവേ, മഹതോ അത്ഥായ സംവത്തതീ’’തി. ചതുത്ഥം.

൧൦൨-൧൦൯. ‘‘അജ്ഝത്തികം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അനത്ഥായ സംവത്തതി യഥയിദം, ഭിക്ഖവേ, മഹിച്ഛതാ…പേ… അപ്പിച്ഛതാ… അസന്തുട്ഠിതാ… സന്തുട്ഠിതാ… അയോനിസോമനസികാരോ… യോനിസോമനസികാരോ… അസമ്പജഞ്ഞം… സമ്പജഞ്ഞം… ദ്വാദസമം.

൧൧൦. ‘‘ബാഹിരം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അനത്ഥായ സംവത്തതി യഥയിദം, ഭിക്ഖവേ, പാപമിത്തതാ. പാപമിത്തതാ, ഭിക്ഖവേ, മഹതോ അനത്ഥായ സംവത്തതീ’’തി. തേരസമം.

൧൧൧. ‘‘ബാഹിരം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അത്ഥായ സംവത്തതി യഥയിദം, ഭിക്ഖവേ, കല്യാണമിത്തതാ. കല്യാണമിത്തതാ, ഭിക്ഖവേ, മഹതോ അത്ഥായ സംവത്തതീ’’തി. ചുദ്ദസമം.

൧൧൨. ‘‘അജ്ഝത്തികം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അനത്ഥായ സംവത്തതി യഥയിദം, ഭിക്ഖവേ, അനുയോഗോ അകുസലാനം ധമ്മാനം, അനനുയോഗോ കുസലാനം ധമ്മാനം. അനുയോഗോ, ഭിക്ഖവേ, അകുസലാനം ധമ്മാനം, അനനുയോഗോ കുസലാനം ധമ്മാനം മഹതോ അനത്ഥായ സംവത്തതീ’’തി. പന്നരസമം.

൧൧൩. ‘‘അജ്ഝത്തികം, ഭിക്ഖവേ, അങ്ഗന്തി കരിത്വാ നാഞ്ഞം ഏകങ്ഗമ്പി സമനുപസ്സാമി യം ഏവം മഹതോ അത്ഥായ സംവത്തതി യഥയിദം, ഭിക്ഖവേ, അനുയോഗോ കുസലാനം ധമ്മാനം, അനനുയോഗോ അകുസലാനം ധമ്മാനം. അനുയോഗോ, ഭിക്ഖവേ, കുസലാനം ധമ്മാനം, അനനുയോഗോ അകുസലാനം ധമ്മാനം മഹതോ അത്ഥായ സംവത്തതീ’’തി. സോളസമം.

൧൧൪. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യോ ഏവം സദ്ധമ്മസ്സ സമ്മോസായ അന്തരധാനായ സംവത്തതി യഥയിദം, ഭിക്ഖവേ, പമാദോ. പമാദോ, ഭിക്ഖവേ, സദ്ധമ്മസ്സ സമ്മോസായ അന്തരധാനായ സംവത്തതീ’’തി. സത്തരസമം.

൧൧൫. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യോ ഏവം സദ്ധമ്മസ്സ ഠിതിയാ അസമ്മോസായ അനന്തരധാനായ സംവത്തതി യഥയിദം, ഭിക്ഖവേ, അപ്പമാദോ. അപ്പമാദോ, ഭിക്ഖവേ, സദ്ധമ്മസ്സ ഠിതിയാ അസമ്മോസായ അനന്തരധാനായ സംവത്തതീ’’തി. അട്ഠാരസമം.

൧൧൬. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യോ ഏവം സദ്ധമ്മസ്സ സമ്മോസായ അന്തരധാനായ സംവത്തതി യഥയിദം, ഭിക്ഖവേ, കോസജ്ജം. കോസജ്ജം, ഭിക്ഖവേ, സദ്ധമ്മസ്സ സമ്മോസായ അന്തരധാനായ സംവത്തതീ’’തി. ഏകൂനവീസതിമം.

൧൧൭. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യോ ഏവം സദ്ധമ്മസ്സ ഠിതിയാ അസമ്മോസായ അനന്തരധാനായ സംവത്തതി യഥയിദം, ഭിക്ഖവേ, വീരിയാരമ്ഭോ. വീരിയാരമ്ഭോ, ഭിക്ഖവേ, സദ്ധമ്മസ്സ ഠിതിയാ അസമ്മോസായ അനന്തരധാനായ സംവത്തതീ’’തി. വീസതിമം.

൧൧൮-൧൨൮. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യോ ഏവം സദ്ധമ്മസ്സ സമ്മോസായ അന്തരധാനായ സംവത്തതി യഥയിദം, ഭിക്ഖവേ, മഹിച്ഛതാ…പേ… അപ്പിച്ഛതാ… അസന്തുട്ഠിതാ… സന്തുട്ഠിതാ… അയോനിസോമനസികാരോ… യോനിസോമനസികാരോ… അസമ്പജഞ്ഞം… സമ്പജഞ്ഞം … പാപമിത്തതാ… കല്യാണമിത്തതാ… അനുയോഗോ അകുസലാനം ധമ്മാനം, അനനുയോഗോ കുസലാനം ധമ്മാനം. അനുയോഗോ, ഭിക്ഖവേ, അകുസലാനം ധമ്മാനം, അനനുയോഗോ കുസലാനം ധമ്മാനം സദ്ധമ്മസ്സ സമ്മോസായ അന്തരധാനായ സംവത്തതീ’’തി. ഏകത്തിംസതിമം.

൧൨൯. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യോ ഏവം സദ്ധമ്മസ്സ ഠിതിയാ അസമ്മോസായ അനന്തരധാനായ സംവത്തതി യഥയിദം, ഭിക്ഖവേ, അനുയോഗോ കുസലാനം ധമ്മാനം, അനനുയോഗോ അകുസലാനം ധമ്മാനം. അനുയോഗോ, ഭിക്ഖവേ, കുസലാനം ധമ്മാനം, അനനുയോഗോ അകുസലാനം ധമ്മാനം സദ്ധമ്മസ്സ ഠിതിയാ അസമ്മോസായ അനന്തരധാനായ സംവത്തതീ’’തി. ചതുക്കോടികം നിട്ഠിതം. ബാത്തിംസതിമം.

൧൩൦. ‘‘യേ തേ, ഭിക്ഖവേ, ഭിക്ഖൂ അധമ്മം ധമ്മോതി ദീപേന്തി തേ, ഭിക്ഖവേ, ഭിക്ഖൂ ബഹുജനഅഹിതായ പടിപന്നാ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ അപുഞ്ഞം പസവന്തി, തേ ചിമം [തേപിമം (സീ.)] സദ്ധമ്മം അന്തരധാപേന്തീ’’തി. തേത്തിംസതിമം.

൧൩൧. ‘‘യേ തേ, ഭിക്ഖവേ, ഭിക്ഖൂ ധമ്മം അധമ്മോതി ദീപേന്തി തേ, ഭിക്ഖവേ, ഭിക്ഖൂ ബഹുജനഅഹിതായ പടിപന്നാ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ അപുഞ്ഞം പസവന്തി, തേ ചിമം സദ്ധമ്മം അന്തരധാപേന്തീ’’തി. ചതുത്തിംസതിമം.

൧൩൨-൧൩൯. ‘‘യേ തേ, ഭിക്ഖവേ, ഭിക്ഖൂ അവിനയം വിനയോതി ദീപേന്തി…പേ… വിനയം അവിനയോതി ദീപേന്തി…പേ… അഭാസിതം അലപിതം തഥാഗതേന ഭാസിതം ലപിതം തഥാഗതേനാതി ദീപേന്തി…പേ… ഭാസിതം ലപിതം തഥാഗതേന അഭാസിതം അലപിതം തഥാഗതേനാതി ദീപേന്തി…പേ… അനാചിണ്ണം തഥാഗതേന ആചിണ്ണം തഥാഗതേനാതി ദീപേന്തി…പേ… ആചിണ്ണം തഥാഗതേന അനാചിണ്ണം തഥാഗതേനാതി ദീപേന്തി…പേ… അപഞ്ഞത്തം തഥാഗതേന പഞ്ഞത്തം തഥാഗതേനാതി ദീപേന്തി…പേ… പഞ്ഞത്തം തഥാഗതേന അപഞ്ഞത്തം തഥാഗതേനാതി ദീപേന്തി തേ, ഭിക്ഖവേ, ഭിക്ഖൂ ബഹുജനഅഹിതായ പടിപന്നാ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം. ബഹുഞ്ച തേ, ഭിക്ഖവേ, ഭിക്ഖൂ അപുഞ്ഞം പസവന്തി, തേ ചിമം സദ്ധമ്മം അന്തരധാപേന്തീ’’തി. ദ്വാചത്താലീസതിമം.

ദുതിയപമാദാദിവഗ്ഗോ ദസമോ.