8. Sumanāveḷiyattheraapadānaṃ

64. ‘‘Vessabhussa bhagavato, lokajeṭṭhassa tādino;

Sabbe janā samāgamma, mahāpūjaṃ karonti te.

65. ‘‘Sudhāya piṇḍaṃ katvāna, āveḷaṃ sumanāyahaṃ;

Sīhāsanassa purato, abhiropesahaṃ tadā.

66. ‘‘Sabbe janā samāgamma, pekkhanti pupphamuttamaṃ;

Kenidaṃ pūjitaṃ pupphaṃ, buddhaseṭṭhassa tādino.

67. ‘‘Tena cittappasādena, nimmānaṃ upapajjahaṃ;

Anubhomi [anubhosiṃ (sī.)] sakaṃ kammaṃ, pubbe sukatamattano.

68. ‘‘Yaṃ yaṃ yonupapajjāmi, devattaṃ atha mānusaṃ;

Sabbesānaṃ piyo homi, pupphapūjāyidaṃ phalaṃ.

69. ‘‘Nābhijānāmi kāyena, vācāya uda cetasā;

Saṃyatānaṃ tapassīnaṃ, kataṃ akkositaṃ mayā.

70. ‘‘Tena sucaritenāhaṃ, cittassa paṇidhīhi ca;

Sabbesaṃ pūjito homi, anakkosassidaṃ phalaṃ.

71. ‘‘Ito ekādase kappe, sahassārosi khattiyo;

Sattaratanasampanno, cakkavattī mahabbalo.

72. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sumanāveḷiyo thero imā gāthāyo abhāsitthāti.

Sumanāveḷiyattherassāpadānaṃ aṭṭhamaṃ.