໑. ສຕ຺ຕນຄເຣສຸ ປຎ຺ຎຕ຺ຕສິກ຺ຂາປທໍ

໓໓໕. ເອກໍສໍ ຈີວຣໍ ກຕ຺ວາ, ປຄ຺ຄຓ຺ຫິຕ຺ວານ ອຎ຺ຊລິໍ;

ອາສີສມານຣູໂປວ [ອາສິໍສມານຣູໂປວ (ສີ. ສ຺ຍາ.)], ກິສ຺ສ ຕ຺ວໍ ອິຘ ມາຄໂຕ.

ທ຺ວີສຸ ວິນເຍສຸ ເຍ ປຎ຺ຎຕ຺ຕາ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ;

ກຕິ ເຕ ສິກ຺ຂາປທາ ໂຫນ຺ຕິ;

ກຕິສຸ ນຄເຣສຸ ປຎ຺ຎຕ຺ຕາ.

ຠທ຺ທໂກ ເຕ ອຸມ຺ມງ຺ໂຄ, ໂຍນິໂສ ປຣິປຸຈ຺ຉສິ;

ຕຄ຺ຆ ເຕ ອຫມກ຺ຂິສ຺ສໍ, ຍຖາສິ ກຸສໂລ ຕຖາ.

ທ຺ວີສຸ ວິນເຍສຸ ເຍ ປຎ຺ຎຕ຺ຕາ;

ອຸທ຺ເທສໍ ອາຄຈ຺ຉນ຺ຕິ ອຸໂປສເຖສຸ;

ອຑ຺ຒຸຑ຺ຒສຕານິ ເຕ ໂຫນ຺ຕິ;

ສຕ຺ຕສຸ ນຄເຣສຸ ປຎ຺ຎຕ຺ຕາ.

ກຕເມສຸ ສຕ຺ຕສຸ ນຄເຣສຸ ປຎ຺ຎຕ຺ຕາ;

ອິງ຺ຆ ເມ ຕ຺ວໍ ພ຺ຍາກຣ ນໍ [ອິງ຺ຆ ເມ ຕໍ ພ຺ຍາກຣ (ກ.)];

ຕໍ ວຈນປຖໍ [ຕວ ວຈນປຖໍ (ສ຺ຍາ.)] ນິສາມຍິຕ຺ວາ;

ປຏິປຊ຺ເຊມ ຫິຕາຍ ໂນ ສິຍາ.

ເວສາລິຍໍ ຣາຊຄເຫ, ສາວຕ຺ຖິຍຎ຺ຈ ອາຬວິຍໍ;

ໂກສມ຺ພິຍຎ຺ຈ ສກ຺ເກສຸ, ຠຄ຺ເຄສຸ ເຈວ ປຎ຺ຎຕ຺ຕາ.

ກຕິ ເວສາລິຍໍ ປຎ຺ຎຕ຺ຕາ, ກຕິ ຣາຊຄເຫ ກຕາ;

ສາວຕ຺ຖິຍໍ ກຕິ ໂຫນ຺ຕິ, ກຕິ ອາຬວິຍໍ ກຕາ.

ກຕິ ໂກສມ຺ພິຍໍ ປຎ຺ຎຕ຺ຕາ, ກຕິ ສກ຺ເກສຸ ວຸຈ຺ຈນ຺ຕິ;

ກຕິ ຠຄ຺ເຄສຸ ປຎ຺ຎຕ຺ຕາ, ຕໍ ເມ ອກ຺ຂາຫິ ປຸຈ຺ຉິໂຕ.

ທສ ເວສາລິຍໍ ປຎ຺ຎຕ຺ຕາ, ເອກວີສ ຣາຊຄເຫ ກຕາ;

ຉອູນ ຕີຓິສຕານິ, ສພ຺ເພ ສາວຕ຺ຖິຍໍ ກຕາ.

ຉ ອາຬວິຍໍ ປຎ຺ຎຕ຺ຕາ, ອຏ຺ຐ ໂກສມ຺ພິຍໍ ກຕາ;

ອຏ຺ຐ ສກ຺ເກສຸ ວຸຈ຺ຈນ຺ຕິ, ຕໂຍ ຠຄ຺ເຄສຸ ປຎ຺ຎຕ຺ຕາ.

ເຍ ເວສາລິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ [ຍຖາກຖໍ (ສີ. ສ຺ຍາ. ເອວມຸປຣິປິ)];

ເມຖຸນວິຄ຺ຄຫຸຕ຺ຕຣິ, ອຕິເຣກຎ຺ຈ ກາຬກໍ.

ຠູຕໍ ປຣມ຺ປຣຠຕ຺ຕໍ, ທນ຺ຕໂປເນນ [ທນ຺ຕໂປເຓນ (ກ.)] ອເຈລໂກ;

ຠິກ຺ຂຸນີສຸ ຈ ອກ຺ໂກໂສ, ທເສເຕ ເວສາລິຍໍ ກຕາ.

ເຍ ຣາຊຄເຫ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ອທິນ຺ນາທານໍ ຣາຊຄເຫ, ທ຺ເວ ອນຸທ຺ຘໍສນາ ທ຺ເວປິ ຈ ເຠທາ.

ອນ຺ຕຣວາສກໍ ຣູປິຍໍ ສຸຕ຺ຕໍ, ອຸຊ຺ຌາປເນນ ຈ ປາຈິຕປິຓ຺ຑໍ;

ຄຓໂຠຊນໍ ວິກາເລ ຈ, ຈາຣິຕ຺ຕໍ ນຫານໍ ອູນວີສຕິ.

ຈີວຣໍ ທຕ຺ວາ ໂວສາສນ຺ຕິ, ເອເຕ ຣາຊຄເຫ ກຕາ;

ຄິຣຄ຺ຄຈຣິຍາ ຕຕ຺ເຖວ, ຉນ຺ທທາເນນ ເອກວີສຕິ.

ເຍ ສາວຕ຺ຖິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ປາຣາຊິການິ ຈຕ຺ຕາຣິ, ສງ຺ຆາທິເສສາ ຠວນ຺ຕິ ໂສຬສ.

ອນິຍຕາ ຈ ທ຺ເວ ໂຫນ຺ຕິ, ນິສ຺ສຄ຺ຄິຍາ ຈຕຸວີສຕິ;

ຉປຎ຺ຎາສສຕຎ຺ເຈວ, ຂຸທ຺ທການິ ປວຸຈ຺ຈນ຺ຕິ.

ທສເຍວ ຈ ຄາຣຍ຺ຫາ, ທ຺ເວສຕ຺ຕຕິ ຈ ເສຂິຍາ;

ຉອູນ ຕີຓິສຕານິ, ສພ຺ເພ ສາວຕ຺ຖິຍໍ ກຕາ.

ເຍ ອາຬວິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ກຸຏິໂກສິຍເສຍ຺ຍາ ຈ, ຂຓເນ ຄຈ຺ຉ ເທວເຕ;

ສປ຺ປາຓກຎ຺ຈ ສິຎ຺ຈນ຺ຕິ, ຉ ເອເຕ ອາຬວິຍໍ ກຕາ.

ເຍ ໂກສມ຺ພິຍໍ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ມຫາວິຫາໂຣ ໂທວຈສ຺ສໍ, ອຎ຺ຎໍ ທ຺ວາຣໍ ສຸຣາຍ ຈ;

ອນາທຣິຍໍ ສຫຘມ຺ໂມ, ປໂຍປາເນນ ອຏ຺ຐມໍ.

ເຍ ສກ຺ເກສຸ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ເອຬກໂລມານິ ປຕ຺ໂຕ ຈ, ໂອວາໂທ ເຈວ ເຠສຊ຺ຊໍ.

ສູຈິ ອາຣຎ຺ຎິໂກ ເຈວ, ອຏ຺ເຐເຕ [ຉ ເອເຕ (ສພ຺ພຕ຺ຖ)] ກາປິລວຕ຺ຖເວ;

ອຸທກສຸທ຺ຘິຍາ ໂອວາໂທ, ຠິກ຺ຂຸນີສຸ ປວຸຈ຺ຈນ຺ຕິ.

ເຍ ຠຄ຺ເຄສຸ ປຎ຺ຎຕ຺ຕາ, ເຕ ສຸໂຓຫິ ຍຖາຕຖໍ;

ສມາທຫິຕ຺ວາ ວິສິພ຺ເພນ຺ຕິ, ສາມິເສນ ສສິຕ຺ຖກໍ.

ປາຣາຊິການິ ຈຕ຺ຕາຣິ, ສງ຺ຆາທິເສສານິ ຠວນ຺ຕິ;

ສຕ຺ຕ ຈ ນິສ຺ສຄ຺ຄິຍານິ, ອຏ຺ຐ ທ຺ວຕ຺ຕິໍສ ຂຸທ຺ທກາ.

ທ຺ເວ ຄາຣຍ຺ຫາ ຕໂຍ ເສກ຺ຂາ, ຉປ຺ປຎ຺ຎາສ ສິກ຺ຂາປທາ;

ຉສຸ ນຄເຣສຸ ປຎ຺ຎຕ຺ຕາ, ພຸທ຺ເຘນາທິຈ຺ຈພນ຺ຘຸນາ.

ຉອູນ ຕີຓິສຕານິ, ສພ຺ເພ ສາວຕ຺ຖິຍໍ ກຕາ;

ກາຣຸຓິເກນ ພຸທ຺ເຘນ, ໂຄຕເມນ ຍສສ຺ສິນາ.