໑໐. ທສກວາໂຣ

໓໓໐. ທສ ອາຆາຕວຕ຺ຖູນິ. ທສ ອາຆາຕປຏິວິນຍາ. ທສ ວິນີຕວຕ຺ຖູນິ. ທສວຕ຺ຖຸກາ ມິຈ຺ຉາທິຏ຺ຐິ. ທສວຕ຺ຖຸກາ ສມ຺ມາທິຏ຺ຐິ. ທສ ອນ຺ຕຄ຺ຄາຫິກາ ທິຏ຺ຐິ. ທສ ມິຈ຺ຉຕ຺ຕາ. ທສ ສມ຺ມຕ຺ຕາ. ທສ ອກຸສລກມ຺ມປຖາ. ທສ ກຸສລກມ຺ມປຖາ. ທສ ອຘມ຺ມິກາ ສລາກຄ຺ຄາຫາ. ທສ ຘມ຺ມິກາ ສລາກຄ຺ຄາຫາ. ສາມເຓຣານໍ ທສ ສິກ຺ຂາປທານິ. ທສຫງ຺ເຄຫິ ສມນ຺ນາຄໂຕ ສາມເຓໂຣ ນາເສຕພ຺ໂພ.

ທສຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອຕ຺ຕໂນ ຠາສປຣິຍນ຺ຕໍ ນ ອຸຄ຺ຄຓ຺ຫາຕິ, ປຣສ຺ສ ຠາສປຣິຍນ຺ຕໍ ນ ອຸຄ຺ຄຓ຺ຫາຕິ, ອຕ຺ຕໂນ ຠາສປຣິຍນ຺ຕໍ ອນຸຄ຺ຄເຫຕ຺ວາ ປຣສ຺ສ ຠາສປຣິຍນ຺ຕໍ ອນຸຄ຺ຄເຫຕ຺ວາ ອຘມ຺ເມນ ກາເຣຕິ, ອປ຺ປຏິຎ຺ຎາຍ ອາປຕ຺ຕິໍ ນ ຊານາຕິ, ອາປຕ຺ຕິຍາ ມູລໍ ນ ຊານາຕິ, ອາປຕ຺ຕິສມຸທຍໍ ນ ຊານາຕິ, ອາປຕ຺ຕິນິໂຣຘໍ ນ ຊານາຕິ, ອາປຕ຺ຕິນິໂຣຘຄາມິນິໍ ປຏິປທໍ ນ ຊານາຕິ.

ທສຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ອຕ຺ຕໂນ ຠາສປຣິຍນ຺ຕໍ ອຸຄ຺ຄຓ຺ຫາຕິ, ປຣສ຺ສ ຠາສປຣິຍນ຺ຕໍ ອຸຄ຺ຄຓ຺ຫາຕິ, ອຕ຺ຕໂນ ຠາສປຣິຍນ຺ຕໍ ອຸຄ຺ຄເຫຕ຺ວາ ປຣສ຺ສ ຠາສປຣິຍນ຺ຕໍ ອຸຄ຺ຄເຫຕ຺ວາ ຘມ຺ເມນ ກາເຣຕິ, ປຏິຎ຺ຎາຍ ອາປຕ຺ຕິໍ ຊານາຕິ, ອາປຕ຺ຕິຍາ ມູລໍ ຊານາຕິ, ອາປຕ຺ຕິສມຸທຍໍ ຊານາຕິ, ອາປຕ຺ຕິນິໂຣຘໍ ຊານາຕິ, ອາປຕ຺ຕິນິໂຣຘຄາມິນິໍ ປຏິປທໍ ຊານາຕິ.

ອປເຣຫິປິ ທສຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອຘິກຣຓໍ ນ ຊານາຕິ, ອຘິກຣຓສ຺ສ ມູລໍ ນ ຊານາຕິ, ອຘິກຣຓສມຸທຍໍ ນ ຊານາຕິ, ອຘິກຣຓນິໂຣຘໍ ນ ຊານາຕິ, ອຘິກຣຓນິໂຣຘຄາມິນິໍ ປຏິປທໍ ນ ຊານາຕິ, ວຕ຺ຖຸໍ ນ ຊານາຕິ, ນິທານໍ [ອຸທ຺ທານໍ (ກ.)] ນ ຊານາຕິ, ປຎ຺ຎຕ຺ຕິໍ ນ ຊານາຕິ, ອນຸປຎ຺ຎຕ຺ຕິໍ ນ ຊານາຕິ, ອນຸສນ຺ຘິວຈນປຖໍ ນ ຊານາຕິ.

ທສຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ອຘິກຣຓໍ ຊານາຕິ, ອຘິກຣຓສ຺ສ ມູລໍ ຊານາຕິ, ອຘິກຣຓສມຸທຍໍ ຊານາຕິ, ອຘິກຣຓນິໂຣຘໍ ຊານາຕິ, ອຘິກຣຓນິໂຣຘຄາມິນິໍ ປຏິປທໍ ຊານາຕິ, ວຕ຺ຖຸໍ ຊານາຕິ, ນິທານໍ ຊານາຕິ, ປຎ຺ຎຕ຺ຕິໍ ຊານາຕິ, ອນຸປຎ຺ຎຕ຺ຕິໍ ຊານາຕິ, ອນຸສນ຺ຘິວຈນປຖໍ ຊານາຕິ.

ອປເຣຫິປິ ທສຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ຎຕ຺ຕິໍ ນ ຊານາຕິ, ຎຕ຺ຕິຍາ ກຣຓໍ ນ ຊານາຕິ, ນ ປຸພ຺ພກຸສໂລ ໂຫຕິ, ນ ອປຣກຸສໂລ ໂຫຕິ, ອກາລຎ຺ຎູ ຈ ໂຫຕິ, ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ນ ຊານາຕິ, ອາຈຣິຍປຣມ຺ປຣາ ໂຂ ປນສ຺ສ ນ ສຸຄ຺ຄຫິຕາ ໂຫຕິ ນ ສຸມນສິກຕາ ນ ສູປຘາຣິຕາ.

ທສຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ຎຕ຺ຕິໍ ຊານາຕິ, ຎຕ຺ຕິຍາ ກຣຓໍ ຊານາຕິ, ປຸພ຺ພກຸສໂລ ໂຫຕິ, ອປຣກຸສໂລ ໂຫຕິ, ກາລຎ຺ຎູ ຈ ໂຫຕິ, ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ອາຈຣິຍປຣມ຺ປຣາ ໂຂ ປນສ຺ສ ສຸຄ຺ຄຫິຕາ ໂຫຕິ ສຸມນສິກຕາ ສູປຘາຣິຕາ.

ອປເຣຫິປິ ທສຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ນ ຊານາຕິ, ອຸຠຍານິ ໂຂ ປນສ຺ສ ປາຕິໂມກ຺ຂານິ ວິຕ຺ຖາເຣນ ນ ສ຺ວາຄຕານິ ໂຫນ຺ຕິ ນ ສຸວິຠຕ຺ຕານິ ນ ສຸປ຺ປວຕ຺ຕີນິ ນ ສຸວິນິຈ຺ຉິຕານິ ສຸຕ຺ຕໂສ ອນຸພ຺ຍຎ຺ຊນໂສ, ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ນ ຊານາຕິ, ອຘິກຣເຓ ຈ ນ ວິນິຈ຺ຉຍກຸສໂລ ໂຫຕິ.

ທສຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ອຸຠຍານິ ໂຂ ປນສ຺ສ ປາຕິໂມກ຺ຂານິ ວິຕ຺ຖາເຣນ ສ຺ວາຄຕານິ ໂຫນ຺ຕິ ສຸວິຠຕ຺ຕານິ ສຸປ຺ປວຕ຺ຕີນິ ສຸວິນິຈ຺ຉິຕານິ ສຸຕ຺ຕໂສ ອນຸພ຺ຍຎ຺ຊນໂສ, ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ອຘິກຣເຓ ຈ ວິນິຈ຺ຉຍກຸສໂລ ໂຫຕິ.

[ອ. ນິ. ໑໐.໓໓] ທສຫງ຺ເຄຫິ ສມນ຺ນາຄໂຕ ຠິກ຺ຂຸ ອຸພ຺ພາຫິກາຍ ສມ຺ມນ຺ນິຕພ຺ໂພ. ທສ ອຕ຺ຖວເສ ປຏິຈ຺ຈ ຕຖາຄເຕນ ສາວການໍ ສິກ຺ຂາປທໍ ປຎ຺ຎຕ຺ຕໍ. ທສ ອາທີນວາ ຣາຊນ຺ເຕປຸຣປ຺ປເວສເນ. ທສ ທານວຕ຺ຖູນິ. ທສ ຣຕນານິ. ທສວຄ຺ໂຄ ຠິກ຺ຂຸສງ຺ໂຆ. ທສວຄ຺ເຄນ ຄເຓນ ອຸປສມ຺ປາເທຕພ຺ພໍ. ທສ ປໍສຸກູລານິ. ທສ ຈີວຣຘາຣຓາ [ຈີວຣຘາຣຓານິ (ສ຺ຍາ.)]. ທສາຫປຣມໍ ອຕິເຣກຈີວຣໍ ຘາເຣຕພ຺ພໍ. ທສ ສຸກ຺ການິ. ທສ ອິຕ຺ຖິໂຍ. ທສ ຠຣິຍາໂຍ. ເວສາລິຍາ ທສ ວຕ຺ຖູນິ ທີເປນ຺ຕິ. ທສ ປຸຄ຺ຄລາ ອວນ຺ທິຍາ. ທສ ອກ຺ໂກສວຕ຺ຖູນິ. ທສຫາກາເຣຫິ ເປສຸຎ຺ຎໍ ອຸປສໍຫຣຕິ. ທສ ເສນາສນານິ. ທສ ວຣານິ ຍາຈິໍສຸ. ທສ ອຘມ຺ມິການິ ປາຕິໂມກ຺ຂຏ຺ຐປນານິ. ທສ ຘມ຺ມິການິ ປາຕິໂມກ຺ຂຏ຺ຐປນານິ. ທສານິສໍສາ ຍາຄຸຍາ. ທສ ມໍສາ ອກປ຺ປິຍາ. ທສ ປຣມານິ. ທສວສ຺ເສນ ຠິກ຺ຂຸນາ ພ຺ຍຕ຺ເຕນ ປຏິພເລນ ປພ຺ພາເຊຕພ຺ພໍ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ. ທສວສ຺ສາຍ ຠິກ຺ຂຸນິຍາ ພ຺ຍຕ຺ຕາຍ ປຏິພລາຍ ປພ຺ພາເຊຕພ຺ພໍ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓຣີ ອຸປຏ຺ຐາເປຕພ຺ພາ. ທສວສ຺ສາຍ ຠິກ຺ຂຸນິຍາ ພ຺ຍຕ຺ຕາຍ ປຏິພລາຍ ວຸຏ຺ຐາປນສມ຺ມຸຕິ ສາທິຕພ຺ພາ. ທສວສ຺ສາຍ ຄິຫິຄຕາຍ ສິກ຺ຂາ ທາຕພ຺ພາຕິ.

ທສກໍ ນິຏ຺ຐິຕໍ.

ຕສ຺ສຸທ຺ທານໍ –

ອາຆາຕໍ ວິນຍໍ ວຕ຺ຖຸ, ມິຈ຺ຉາ ສມ຺ມາ ຈ ອນ຺ຕຄາ;

ມິຈ຺ຉຕ຺ຕາ ເຈວ ສມ຺ມຕ຺ຕາ, ອກຸສລາ ກຸສລາປິ ຈ.

ສລາກາ ອຘມ຺ມາ ຘມ຺ມາ, ສາມເຓຣາ ຈ ນາສນາ;

ຠາສາຘິກຣຓຎ຺ເຈວ, ຎຕ຺ຕິລຫຸກເມວ ຈ.

ລຫຸກາ ຄຣຸກາ ເອເຕ, ກຓ຺ຫສຸກ຺ກາ ວິຊານຖ;

ອຸພ຺ພາຫິກາ ຈ ສິກ຺ຂາ ຈ, ອນ຺ເຕປຸເຣ ຈ ວຕ຺ຖູນິ.

ຣຕນໍ ທສວຄ຺ໂຄ ຈ, ຕເຖວ ອຸປສມ຺ປທາ;

ປໍສຸກູລຘາຣຓາ ຈ, ທສາຫສຸກ຺ກອິຕ຺ຖິໂຍ.

ຠຣິຍາ ທສ ວຕ຺ຖູນິ, ອວນ຺ທິຍກ຺ໂກເສນ ຈ;

ເປສຸຎ຺ຎຎ຺ເຈວ ເສນານິ, ວຣານິ ຈ ອຘມ຺ມິກາ.

ຘມ຺ມິກາ ຍາຄຸມໍສາ ຈ, ປຣມາ ຠິກ຺ຂຸ ຠິກ຺ຂຸນີ;

ວຸຏ຺ຐາປນາ ຄິຫິຄຕາ, ທສກາ ສຸປ຺ປກາສິຕາຕິ.