ເອກຸຕ຺ຕຣິກນໂຍ

໑. ເອກກວາໂຣ

໓໒໑. ອາປຕ຺ຕິກຣາ ຘມ຺ມາ ຊານິຕພ຺ພາ. ອນາປຕ຺ຕິກຣາ ຘມ຺ມາ ຊານິຕພ຺ພາ. ອາປຕ຺ຕິ ຊານິຕພ຺ພາ. ອນາປຕ຺ຕິ ຊານິຕພ຺ພາ. ລຫຸກາ ອາປຕ຺ຕິ ຊານິຕພ຺ພາ. ຄຣຸກາ ອາປຕ຺ຕິ ຊານິຕພ຺ພາ. ສາວເສສາ ອາປຕ຺ຕິ ຊານິຕພ຺ພາ. ອນວເສສາ ອາປຕ຺ຕິ ຊານິຕພ຺ພາ. ທຸຏ຺ຐຸລ຺ລາ ອາປຕ຺ຕິ ຊານິຕພ຺ພາ. ອທຸຏ຺ຐຸລ຺ລາ ອາປຕ຺ຕິ ຊານິຕພ຺ພາ. ສປ຺ປຏິກມ຺ມາ ອາປຕ຺ຕິ ຊານິຕພ຺ພາ. ອປ຺ປຏິກມ຺ມາ ອາປຕ຺ຕິ ຊານິຕພ຺ພາ. ເທສນາຄາມິນີ ອາປຕ຺ຕິ ຊານິຕພ຺ພາ. ອເທສນາຄາມິນີ ອາປຕ຺ຕິ ຊານິຕພ຺ພາ. ອນ຺ຕຣາຍິກາ ອາປຕ຺ຕິ ຊານິຕພ຺ພາ. ອນນ຺ຕຣາຍິກາ ອາປຕ຺ຕິ ຊານິຕພ຺ພາ. ສາວຊ຺ຊປຎ຺ຎຕ຺ຕິ ອາປຕ຺ຕິ ຊານິຕພ຺ພາ. ອນວຊ຺ຊປຎ຺ຎຕ຺ຕິ ອາປຕ຺ຕິ ຊານິຕພ຺ພາ. ກິຣິຍໂຕ ສມຸຏ຺ຐິຕາ ອາປຕ຺ຕິ ຊານິຕພ຺ພາ. ອກິຣິຍໂຕ ສມຸຏ຺ຐິຕາ ອາປຕ຺ຕິ ຊານິຕພ຺ພາ. ກິຣິຍາກິຣິຍໂຕ ສມຸຏ຺ຐິຕາ ອາປຕ຺ຕິ ຊານິຕພ຺ພາ. ປຸພ຺ພາປຕ຺ຕິ ຊານິຕພ຺ພາ. ອປຣາປຕ຺ຕິ ຊານິຕພ຺ພາ. ປຸພ຺ພາປຕ຺ຕີນໍ ອນ຺ຕຣາປຕ຺ຕິ ຊານິຕພ຺ພາ. ອປຣາປຕ຺ຕີນໍ ອນ຺ຕຣາປຕ຺ຕິ ຊານິຕພ຺ພາ. ເທສິຕາ ຄຓນູປຄາ ອາປຕ຺ຕິ ຊານິຕພ຺ພາ. ເທສິຕາ ນ ຄຓນູປຄາ ອາປຕ຺ຕິ ຊານິຕພ຺ພາ. ປຎ຺ຎຕ຺ຕິ ຊານິຕພ຺ພາ. ອນຸປຎ຺ຎຕ຺ຕິ ຊານິຕພ຺ພາ. ອນຸປ຺ປນ຺ນປຎ຺ຎຕ຺ຕິ ຊານິຕພ຺ພາ. ສພ຺ພຕ຺ຖປຎ຺ຎຕ຺ຕິ ຊານິຕພ຺ພາ. ປເທສປຎ຺ຎຕ຺ຕິ ຊານິຕພ຺ພາ. ສາຘາຣຓປຎ຺ຎຕ຺ຕິ ຊານິຕພ຺ພາ. ອສາຘາຣຓປຎ຺ຎຕ຺ຕິ ຊານິຕພ຺ພາ. ເອກໂຕປຎ຺ຎຕ຺ຕິ ຊານິຕພ຺ພາ. ອຸຠໂຕປຎ຺ຎຕ຺ຕິ ຊານິຕພ຺ພາ. ຖຸລ຺ລວຊ຺ຊາ ອາປຕ຺ຕິ ຊານິຕພ຺ພາ. ອຖຸລ຺ລວຊ຺ຊາ ອາປຕ຺ຕິ ຊານິຕພ຺ພາ. ຄິຫິປຏິສໍຍຸຕ຺ຕາ ອາປຕ຺ຕິ ຊານິຕພ຺ພາ. ນ ຄິຫິປຏິສໍຍຸຕ຺ຕາ ອາປຕ຺ຕິ ຊານິຕພ຺ພາ. ນິຍຕາ ອາປຕ຺ຕິ ຊານິຕພ຺ພາ. ອນິຍຕາ ອາປຕ຺ຕິ ຊານິຕພ຺ພາ. ອາທິກໂຣ ປຸຄ຺ຄໂລ ຊານິຕພ຺ໂພ. ອນາທິກໂຣ ປຸຄ຺ຄໂລ ຊານິຕພ຺ໂພ. ອຘິຈ຺ຈາປຕ຺ຕິໂກ ປຸຄ຺ຄໂລ ຊານິຕພ຺ໂພ. ອຠິຓ຺ຫາປຕ຺ຕິໂກ ປຸຄ຺ຄໂລ ຊານິຕພ຺ໂພ. ໂຈທໂກ ປຸຄ຺ຄໂລ ຊານິຕພ຺ໂພ. ຈຸທິຕໂກ ປຸຄ຺ຄໂລ ຊານິຕພ຺ໂພ. ອຘມ຺ມໂຈທໂກ ປຸຄ຺ຄໂລ ຊານິຕພ຺ໂພ. ອຘມ຺ມຈຸທິຕໂກ ປຸຄ຺ຄໂລ ຊານິຕພ຺ໂພ. ຘມ຺ມໂຈທໂກ ປຸຄ຺ຄໂລ ຊານິຕພ຺ໂພ. ຘມ຺ມຈຸທິຕໂກ ປຸຄ຺ຄໂລ ຊານິຕພ຺ໂພ. ນິຍໂຕ ປຸຄ຺ຄໂລ ຊານິຕພ຺ໂພ. ອນິຍໂຕ ປຸຄ຺ຄໂລ ຊານິຕພ຺ໂພ. ອຠພ຺ພາປຕ຺ຕິໂກ ປຸຄ຺ຄໂລ ຊານິຕພ຺ໂພ. ຠພ຺ພາປຕ຺ຕິໂກ ປຸຄ຺ຄໂລ ຊານິຕພ຺ໂພ. ອຸກ຺ຂິຕ຺ຕໂກ ປຸຄ຺ຄໂລ ຊານິຕພ຺ໂພ. ອນຸກ຺ຂິຕ຺ຕໂກ ປຸຄ຺ຄໂລ ຊານິຕພ຺ໂພ. ນາສິຕໂກ ປຸຄ຺ຄໂລ ຊານິຕພ຺ໂພ. ອນາສິຕໂກ ປຸຄ຺ຄໂລ ຊານິຕພ຺ໂພ. ສມານສໍວາສໂກ ປຸຄ຺ຄໂລ ຊານິຕພ຺ໂພ. ອສມານສໍວາສໂກ ປຸຄ຺ຄໂລ ຊານິຕພ຺ໂພ. ຐປນໍ ຊານິຕພ຺ພນ຺ຕິ.

ເອກກໍ ນິຏ຺ຐິຕໍ.

ຕສ຺ສຸທ຺ທານໍ –

ກຣາ ອາປຕ຺ຕິ ລຫຸກາ, ສາວເສສາ ຈ ທຸຏ຺ຐຸລ຺ລາ;

ປຏິກມ຺ມເທສນາ ຈ, ອນ຺ຕຣາ ວຊ຺ຊກິຣິຍໍ.

ກິຣິຍາກິຣິຍໍ ປຸພ຺ພາ, ອນ຺ຕຣາ ຄຓນູປຄາ;

ປຎ຺ຎຕ຺ຕິ ອນານຸປ຺ປນ຺ນ, ສພ຺ພສາຘາຣຓາ ຈ ເອກໂຕ [ປຎ຺ຎຕ຺ຕານຸປ຺ປນ຺ນາ ສພ຺ພາ, ສາຘາຣຓາ ຈ ເອກໂຕ (ສ຺ຍາ.)].

ຖຸລ຺ລຄິຫິນິຍຕາ ຈ, ອາທິ ອຘິຈ຺ຈໂຈທໂກ;

ອຘມ຺ມຘມ຺ມນິຍໂຕ, ອຠພ຺ໂພກ຺ຂິຕ຺ຕນາສິຕາ;

ສມານໍ ຐປນຎ຺ເຈວ, ອຸທ຺ທານໍ ເອກເກ ອິທນ຺ຕິ.

໒. ທຸກວາໂຣ

໓໒໒. ອຕ຺ຖາປຕ຺ຕິ ສຎ຺ຎາ ວິໂມກ຺ຂາ, ອຕ຺ຖາປຕ຺ຕິ ໂນ ສຎ຺ຎາວິໂມກ຺ຂາ. ອຕ຺ຖາປຕ຺ຕິ ລທ຺ຘສມາປຕ຺ຕິກສ຺ສ, ອຕ຺ຖາປຕ຺ຕິ ນ ລທ຺ຘສມາປຕ຺ຕິກສ຺ສ. ອຕ຺ຖາປຕ຺ຕິ ສທ຺ຘມ຺ມປຏິສຎ຺ຎຸຕ຺ຕາ, ອຕ຺ຖາປຕ຺ຕິ ອສທ຺ຘມ຺ມປຏິສຎ຺ຎຸຕ຺ຕາ. ອຕ຺ຖາປຕ຺ຕິ ສປຣິກ຺ຂາຣປຏິສຎ຺ຎຸຕ຺ຕາ, ອຕ຺ຖາປຕ຺ຕິ ປຣປຣິກ຺ຂາຣປຏິສຎ຺ຎຸຕ຺ຕາ. ອຕ຺ຖາປຕ຺ຕິ ສປຸຄ຺ຄລປຏິສຎ຺ຎຸຕ຺ຕາ, ອຕ຺ຖາປຕ຺ຕິ ປຣປຸຄ຺ຄລປຏິສຎ຺ຎຸຕ຺ຕາ. ອຕ຺ຖິ ສຈ຺ຈໍ ຠຓນ຺ໂຕ ຄຣຸກໍ ອາປຕ຺ຕິໍ ອາປຊ຺ຊຕິ, ມຸສາ ຠຓນ຺ໂຕ ລຫຸກໍ. ອຕ຺ຖິ ມຸສາ ຠຓນ຺ໂຕ ຄຣຸກໍ ອາປຕ຺ຕິໍ ອາປຊ຺ຊຕິ, ສຈ຺ຈໍ ຠຓນ຺ໂຕ ລຫຸກໍ. ອຕ຺ຖາປຕ຺ຕິ ຠູມິຄໂຕ ອາປຊ຺ຊຕິ, ໂນ ເວຫາສຄໂຕ. ອຕ຺ຖາປຕ຺ຕິ ເວຫາສຄໂຕ ອາປຊ຺ຊຕິ, ໂນ ຠູມິຄໂຕ. ອຕ຺ຖາປຕ຺ຕິ ນິກ຺ຂມນ຺ໂຕ ອາປຊ຺ຊຕິ, ໂນ ປວິສນ຺ໂຕ. ອຕ຺ຖາປຕ຺ຕິ ປວິສນ຺ໂຕ ອາປຊ຺ຊຕິ, ໂນ ນິກ຺ຂມນ຺ໂຕ. ອຕ຺ຖາປຕ຺ຕິ ອາທິຍນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ອນາທິຍນ຺ໂຕ ອາປຊ຺ຊຕິ. ອຕ຺ຖາປຕ຺ຕິ ສມາທິຍນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ສມາທິຍນ຺ໂຕ ອາປຊ຺ຊຕິ. ອຕ຺ຖາປຕ຺ຕິ ກໂຣນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ກໂຣນ຺ໂຕ ອາປຊ຺ຊຕິ. ອຕ຺ຖາປຕ຺ຕິ ເທນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ເທນ຺ໂຕ ອາປຊ຺ຊຕິ. (ອຕ຺ຖາປຕ຺ຕິ ເທເສນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ເທເສນ຺ໂຕ ອາປຊ຺ຊຕິ.) [( ) (ນຕ຺ຖິ ກຕ຺ຖຈິ)] ອຕ຺ຖາປຕ຺ຕິ ປຏິຄ຺ຄຓ຺ຫນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ປຏິຄ຺ຄຓ຺ຫນ຺ໂຕ ອາປຊ຺ຊຕິ. ອຕ຺ຖາປຕ຺ຕິ ປຣິໂຠເຄນ ອາປຊ຺ຊຕິ, ອຕ຺ຖາປຕ຺ຕິ ນ ປຣິໂຠເຄນ ອາປຊ຺ຊຕິ. ອຕ຺ຖາປຕ຺ຕິ ຣຕ຺ຕິໍ ອາປຊ຺ຊຕິ, ໂນ ທິວາ. ອຕ຺ຖາປຕ຺ຕິ ທິວາ ອາປຊ຺ຊຕິ, ໂນ ຣຕ຺ຕິໍ. ອຕ຺ຖາປຕ຺ຕິ ອຣຸຓຸຄ຺ເຄ ອາປຊ຺ຊຕິ, ອຕ຺ຖາປຕ຺ຕິ ນ ອຣຸຓຸຄ຺ເຄ ອາປຊ຺ຊຕິ. ອຕ຺ຖາປຕ຺ຕິ ຉິນ຺ທນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ຉິນ຺ທນ຺ໂຕ ອາປຊ຺ຊຕິ. ອຕ຺ຖາປຕ຺ຕິ ຉາເທນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ຉາເທນ຺ໂຕ ອາປຊ຺ຊຕິ. ອຕ຺ຖາປຕ຺ຕິ ຘາເຣນ຺ໂຕ ອາປຊ຺ຊຕິ, ອຕ຺ຖາປຕ຺ຕິ ນ ຘາເຣນ຺ໂຕ ອາປຊ຺ຊຕິ.

ທ຺ເວ ອຸໂປສຖາ – ຈາຕຸທ຺ທສິໂກ ຈ ປນ຺ນຣສິໂກ ຈ. ທ຺ເວ ປວາຣຓາ – ຈາຕຸທ຺ທສິກາ ຈ ປນ຺ນຣສິກາ ຈ. ທ຺ເວ ກມ຺ມານິ – ອປໂລກນກມ຺ມໍ, ຎຕ຺ຕິກມ຺ມໍ. ອປຣານິປິ ທ຺ເວ ກມ຺ມານິ – ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ. ທ຺ເວ ກມ຺ມວຕ຺ຖູນິ – ອປໂລກນກມ຺ມສ຺ສ ວຕ຺ຖຸ, ຎຕ຺ຕິກມ຺ມສ຺ສ ວຕ຺ຖຸ. ອປຣານິປິ ທ຺ເວ ກມ຺ມວຕ຺ຖູນິ – ຎຕ຺ຕິທຸຕິຍກມ຺ມສ຺ສ ວຕ຺ຖຸ, ຎຕ຺ຕິຈຕຸຕ຺ຖກມ຺ມສ຺ສ ວຕ຺ຖຸ. ທ຺ເວ ກມ຺ມໂທສາ – ອປໂລກນກມ຺ມສ຺ສ ໂທໂສ, ຎຕ຺ຕິກມ຺ມສ຺ສ ໂທໂສ. ອປເຣປິ ທ຺ເວ ກມ຺ມໂທສາ – ຎຕ຺ຕິທຸຕິຍກມ຺ມສ຺ສ ໂທໂສ, ຎຕ຺ຕິຈຕຸຕ຺ຖກມ຺ມສ຺ສ ໂທໂສ. ທ຺ເວ ກມ຺ມສມ຺ປຕ຺ຕິໂຍ – ອປໂລກນກມ຺ມສ຺ສ ສມ຺ປຕ຺ຕິ, ຎຕ຺ຕິກມ຺ມສ຺ສ ສມ຺ປຕ຺ຕິ. ອປຣາປິ ທ຺ເວ ກມ຺ມສມ຺ປຕ຺ຕິໂຍ – ຎຕ຺ຕິທຸຕິຍກມ຺ມສ຺ສ ສມ຺ປຕ຺ຕິ, ຎຕ຺ຕິຈຕຸຕ຺ຖກມ຺ມສ຺ສ ສມ຺ປຕ຺ຕິ. ທ຺ເວ ນານາສໍວາສກຠູມິໂຍ – ອຕ຺ຕນາ ວາ ອຕ຺ຕານໍ ນານາສໍວາສກໍ ກໂຣຕິ, ສມຄ຺ໂຄ ວາ ນໍ ສງ຺ໂຆ ອຸກ຺ຂິປຕິ ອທສ຺ສເນ ວາ ອປ຺ປຏິກມ຺ເມ ວາ ອປ຺ປຏິນິສ຺ສຄ຺ເຄ ວາ. ທ຺ເວ ສມານສໍວາສກຠູມິໂຍ – ອຕ຺ຕນາ ວາ ອຕ຺ຕານໍ ສມານສໍວາສກໍ ກໂຣຕິ, ສມຄ຺ໂຄ ວາ ນໍ ສງ຺ໂຆ ອຸກ຺ຂິຕ຺ຕໍ ໂອສາເຣຕິ ທສ຺ສເນ ວາ ປຏິກມ຺ເມ ວາ ປຏິນິສ຺ສຄ຺ເຄ ວາ. ທ຺ເວ ປາຣາຊິກາ – ຠິກ຺ຂູນຎ຺ຈ ຠິກ຺ຂຸນີນຎ຺ຈ. ທ຺ເວ ສງ຺ຆາທິເສສາ, ທ຺ເວ ຖຸລ຺ລຈ຺ຈຍາ, ທ຺ເວ ປາຈິຕ຺ຕິຍາ, ທ຺ເວ ປາຏິເທສນີຍາ, ທ຺ເວ ທຸກ຺ກຏາ, ທ຺ເວ ທຸພ຺ຠາສິຕາ – ຠິກ຺ຂູນຎ຺ຈ ຠິກ຺ຂຸນີນຎ຺ຈ. ສຕ຺ຕ ອາປຕ຺ຕິໂຍ, ສຕ຺ຕ ອາປຕ຺ຕິກ຺ຂນ຺ຘາ. ທ຺ວີຫາກາເຣຫິ ສງ຺ໂຆ ຠິຊ຺ຊຕິ – ກມ຺ເມນ ວາ ສລາກຄ຺ຄາເຫນ ວາ.

ທ຺ເວ ປຸຄ຺ຄລາ ນ ອຸປສມ຺ປາເທຕພ຺ພາ – ອທ຺ຘານຫີໂນ, ອງ຺ຄຫີໂນ. ອປເຣປິ ທ຺ເວ ປຸຄ຺ຄລາ ນ ອຸປສມ຺ປາເທຕພ຺ພາ – ວຕ຺ຖຸວິປນ຺ໂນ, ກຣຓທຸກ຺ກຏໂກ. ອປເຣປິ ທ຺ເວ ປຸຄ຺ຄລາ ນ ອຸປສມ຺ປາເທຕພ຺ພາ – ອປຣິປູໂຣ ປຣິປູໂຣ ໂນ ຈ ຍາຈຕິ. ທ຺ວິນ຺ນໍ ປຸຄ຺ຄລານໍ ນິສ຺ສາຍ ນ ວຕ຺ຖພ຺ພໍ – ອລຊ຺ຊິສ຺ສ ຈ ພາລສ຺ສ ຈ. ທ຺ວິນ຺ນໍ ປຸຄ຺ຄລານໍ ນິສ຺ສໂຍ ນ ທາຕພ຺ໂພ – ອລຊ຺ຊິສ຺ສ ຈ ລຊ຺ຊິໂນ ຈ ນ ຍາຈຕິ. ທ຺ວິນ຺ນໍ ປຸຄ຺ຄລານໍ ນິສ຺ສໂຍ ທາຕພ຺ໂພ – ພາລສ຺ສ ຈ ລຊ຺ຊິສ຺ສ ຈ ຍາຈຕິ. ທ຺ເວ ປຸຄ຺ຄລາ ອຠພ຺ພາ ອາປຕ຺ຕິໍ ອາປຊ຺ຊິຕຸໍ – ພຸທ຺ຘາ ຈ ປຈ຺ເຈກພຸທ຺ຘາ ຈ. ທ຺ເວ ປຸຄ຺ຄລາ ຠພ຺ພາ, ອາປຕ຺ຕິໍ ອາປຊ຺ຊິຕຸໍ – ຠິກ຺ຂູ ຈ ຠິກ຺ຂຸນິໂຍ ຈ. ທ຺ເວ ປຸຄ຺ຄລາ ອຠພ຺ພາ ສຎ຺ຈິຈ຺ຈ ອາປຕ຺ຕິໍ ອາປຊ຺ຊິຕຸໍ – ຠິກ຺ຂູ ຈ ຠິກ຺ຂຸນິໂຍ ຈ ອຣິຍປຸຄ຺ຄລາ. ທ຺ເວ ປຸຄ຺ຄລາ ຠພ຺ພາ ສຎ຺ຈິຈ຺ຈ ອາປຕ຺ຕິໍ ອາປຊ຺ຊິຕຸໍ – ຠິກ຺ຂູ ຈ ຠິກ຺ຂຸນິໂຍ ຈ ປຸຖຸຊ຺ຊນາ. ທ຺ເວ ປຸຄ຺ຄລາ ອຠພ຺ພາ ສຎ຺ຈິຈ຺ຈ ສາຕິສາຣໍ ວຕ຺ຖຸໍ ອຊ຺ຌາຈຣິຕຸໍ – ຠິກ຺ຂູ ຈ ຠິກ຺ຂຸນິໂຍ ຈ ອຣິຍປຸຄ຺ຄລາ. ທ຺ເວ ປຸຄ຺ຄລາ ຠພ຺ພາ ສຎ຺ຈິຈ຺ຈ ສາຕິສາຣໍ ວຕ຺ຖຸໍ ອຊ຺ຌາຈຣິຕຸໍ – ຠິກ຺ຂູ ຈ ຠິກ຺ຂຸນິໂຍ ຈ ປຸຖຸຊ຺ຊນາ.

ທ຺ເວ ປຏິກ຺ໂກສາ – ກາເຍນ ວາ ປຏິກ຺ໂກສຕິ ວາຈາຍ ວາ ປຏິກ຺ໂກສຕິ. ທ຺ເວ ນິສ຺ສາຣຓາ – ອຕ຺ຖິ ປຸຄ຺ຄໂລ ອປ຺ປຕ຺ໂຕ ນິສ຺ສາຣຓໍ ຕໍ ເຈ ສງ຺ໂຆ ນິສ຺ສາເຣຕິ ເອກຈ຺ໂຈ ສຸນິສ຺ສາຣິໂຕ, ເອກຈ຺ໂຈ ທຸນ຺ນິສ຺ສາຣິໂຕ. ທ຺ເວ ໂອສາຣຓາ – ອຕ຺ຖິ ປຸຄ຺ຄໂລ ອປ຺ປຕ຺ໂຕ ໂອສາຣຓໍ ຕໍ ເຈ ສງ຺ໂຆ ໂອສາເຣຕິ ເອກຈ຺ໂຈ ໂສສາຣິໂຕ, ເອກຈ຺ໂຈ ໂທສາຣິໂຕ. ທ຺ເວ ປຏິຎ຺ຎາ – ກາເຍນ ວາ ປຏິຊານາຕິ ວາຈາຍ ວາ ປຏິຊານາຕິ. ທ຺ເວ ປຏິຄ຺ຄຫາ – ກາເຍນ ວາ ປຏິຄ຺ຄຓ຺ຫາຕິ ກາຍປຏິພທ຺ເຘນ ວາ ປຏິຄ຺ຄຓ຺ຫາຕິ. ທ຺ເວ ປຏິກ຺ເຂປາ – ກາເຍນ ວາ ປຏິກ຺ຂິປຕິ ວາຈາຍ ວາ ປຏິກ຺ຂິປຕິ. ທ຺ເວ ອຸປຆາຕິກາ – ສິກ຺ຂູປຆາຕິກາ ຈ ໂຠຄູປຆາຕິກາ ຈ. ທ຺ເວ ໂຈທນາ – ກາເຍນ ວາ ໂຈເທຕິ ວາຈາຍ ວາ ໂຈເທຕິ. ທ຺ເວ ກຖິນສ຺ສ ປລິໂພຘາ – ອາວາສປລິໂພໂຘ ຈ ຈີວຣປລິໂພໂຘ ຈ. ທ຺ເວ ກຖິນສ຺ສ ອປລິໂພຘາ – ອາວາສອປລິໂພໂຘ ຈ ຈີວຣອປລິໂພໂຘ ຈ. ທ຺ເວ ຈີວຣານິ – ຄຫປຕິກຎ຺ຈ ປໍສຸກູລຎ຺ຈ. ທ຺ເວ ປຕ຺ຕາ – ອໂຍປຕ຺ໂຕ ມຕ຺ຕິກາປຕ຺ໂຕ. ທ຺ເວ ມຓ຺ຑລານິ – ຕິປຸມຍໍ, ສີສມຍໍ. ທ຺ເວ ປຕ຺ຕສ຺ສ ອຘິຏ຺ຐານາ – ກາເຍນ ວາ ອຘິຏ຺ເຐຕິ ວາຈາຍ ວາ ອຘິຏ຺ເຐຕິ. ທ຺ເວ ຈີວຣສ຺ສ ອຘິຏ຺ຐານາ – ກາເຍນ ວາ ອຘິຏ຺ເຐຕິ ວາຈາຍ ວາ ອຘິຏ຺ເຐຕິ. ທ຺ເວ ວິກປ຺ປນາ – ສມ຺ມຸຂາວິກປ຺ປນາ ຈ ປຣມ຺ມຸຂາວິກປ຺ປນາ ຈ. ທ຺ເວ ວິນຍາ – ຠິກ຺ຂູນຎ຺ຈ ຠິກ຺ຂຸນີນຎ຺ຈ. ທ຺ເວ ເວນຍິກາ – ປຎ຺ຎຕ຺ຕຎ຺ຈ ປຎ຺ຎຕ຺ຕານຸໂລມຎ຺ຈ. ທ຺ເວ ວິນຍສ຺ສ ສລ຺ເລຂາ – ອກປ຺ປິເຍ ເສຕຸຆາໂຕ, ກປ຺ປິເຍ ມຕ຺ຕກາຣິຕາ. ທ຺ວີຫາກາເຣຫິ ອາປຕ຺ຕິໍ ອາປຊ຺ຊຕິ – ກາເຍນ ວາ ອາປຊ຺ຊຕິ ວາຈາຍ ວາ ອາປຊ຺ຊຕິ. ທ຺ວີຫາກາເຣຫິ ອາປຕ຺ຕິຍາ ວຸຏ຺ຐາຕິ – ກາເຍນ ວາ ວຸຏ຺ຐາຕິ ວາຈາຍ ວາ ວຸຏ຺ຐາຕິ. ທ຺ເວ ປຣິວາສາ – ປຏິຈ຺ຉນ຺ນປຣິວາໂສ, ອປ຺ປຏິຈ຺ຉນ຺ນປຣິວາໂສ. ອປເຣປິ ທ຺ເວ ປຣິວາສາ – ສຸທ຺ຘນ຺ຕປຣິວາໂສ ສໂມຘານປຣິວາໂສ. ທ຺ເວ ມານຕ຺ຕາ – ປຏິຈ຺ຉນ຺ນມານຕ຺ຕໍ, ອປ຺ປຏິຈ຺ຉນ຺ນມານຕ຺ຕໍ. ອປເຣປິ ທ຺ເວ ມານຕ຺ຕາ – ປກ຺ຂມານຕ຺ຕໍ, ສໂມຘານມານຕ຺ຕໍ. ທ຺ວິນ຺ນໍ ປຸຄ຺ຄລານໍ ຣຕ຺ຕິຈ຺ເຉໂທ – ປາຣິວາສິກສ຺ສ ຈ ມານຕ຺ຕຈາຣິກສ຺ສ ຈ. ທ຺ເວ ອນາທຣິຍານິ – ປຸຄ຺ຄລານາທຣິຍຎ຺ຈ ຘມ຺ມານາທຣິຍຎ຺ຈ. ທ຺ເວ ໂລຓານິ – ຊາຕິມຎ຺ຈ ກາຣິມຎ຺ຈ [ຊາຕິມຍຎ຺ຈ ຂາຣິມຍຎ຺ຈ (ສ຺ຍາ.)]. ອປຣານິປິ ທ຺ເວ ໂລຓານິ – ສາມຸທ຺ທໍ ກາຬໂລຓໍ. ອປຣານິປິ ທ຺ເວ ໂລຓານິ – ສິນ຺ຘວໍ, ອຸພ຺ຠິທໍ [ອຸພ຺ຠິຣໍ (ອິຕິປິ)]. ອປຣານິປິ ທ຺ເວ ໂລຓານິ – ໂຣມກໍ, ປກ຺ກາລກໍ. ທ຺ເວ ປຣິໂຠຄາ – ອພ຺ຠນ຺ຕຣປຣິໂຠໂຄ ຈ ພາຫິຣປຣິໂຠໂຄ ຈ. ທ຺ເວ ອກ຺ໂກສາ – ຫີໂນ ຈ ອກ຺ໂກໂສ ອຸກ຺ກຏ຺ໂຐ ຈ ອກ຺ໂກໂສ. ທ຺ວີຫາກາເຣຫິ ເປສຸຎ຺ຎໍ ໂຫຕິ – ປິຍກມ຺ຍສ຺ສ ວາ ເຠທາຘິປ຺ປາຍສ຺ສ ວາ. ທ຺ວີຫາກາເຣຫິ ຄຓໂຠຊນໍ ປສວຕິ – ນິມນ຺ຕນໂຕ ວາ ວິຎ຺ຎຕ຺ຕິໂຕ ວາ. ທ຺ເວ ວສ຺ສູປນາຍິກາ – ປຸຣິມິກາ, ປຈ຺ຉິມິກາ. ທ຺ເວ ອຘມ຺ມິການິ ປາຕິໂມກ຺ຂຏ຺ຐປນານິ. ທ຺ເວ ຘມ຺ມິການິ ປາຕິໂມກ຺ຂຏ຺ຐປນານິ.

[ອ. ນິ. ໒.໙໙ ອາທໂຍ] ທ຺ເວ ປຸຄ຺ຄລາ ພາລາ – ໂຍ ຈ ອນາຄຕໍ ຠາຣໍ ວຫຕິ, ໂຍ ຈ ອາຄຕໍ ຠາຣໍ ນ ວຫຕິ. ທ຺ເວ ປຸຄ຺ຄລາ ປຓ຺ຑິຕາ – ໂຍ ຈ ອນາຄຕໍ ຠາຣໍ ນ ວຫຕິ, ໂຍ ຈ ອາຄຕໍ ຠາຣໍ ວຫຕິ. ອປເຣປິ ທ຺ເວ ປຸຄ຺ຄລາ ພາລາ – ໂຍ ຈ ອກປ຺ປິເຍ ກປ຺ປິຍສຎ຺ຎີ, ໂຍ ຈ ກປ຺ປິເຍ ອກປ຺ປິຍສຎ຺ຎີ. ທ຺ເວ ປຸຄ຺ຄລາ ປຓ຺ຑິຕາ – ໂຍ ຈ ອກປ຺ປິເຍ ອກປ຺ປິຍສຎ຺ຎີ, ໂຍ ຈ ກປ຺ປິເຍ ກປ຺ປິຍສຎ຺ຎີ. ອປເຣປິ ທ຺ເວ ປຸຄ຺ຄລາ ພາລາ – ໂຍ ຈ ອນາປຕ຺ຕິຍາ ອາປຕ຺ຕິສຎ຺ຎີ, ໂຍ ຈ ອາປຕ຺ຕິຍາ ອນາປຕ຺ຕິສຎ຺ຎີ. ທ຺ເວ ປຸຄ຺ຄລາ ປຓ຺ຑິຕາ – ໂຍ ຈ ອາປຕ຺ຕິຍາ ອາປຕ຺ຕິສຎ຺ຎີ, ໂຍ ຈ ອນາປຕ຺ຕິຍາ ອນາປຕ຺ຕິສຎ຺ຎີ. ອປເຣປິ ທ຺ເວ ປຸຄ຺ຄລາ ພາລາ – ໂຍ ຈ ອຘມ຺ເມ ຘມ຺ມສຎ຺ຎີ, ໂຍ ຈ ຘມ຺ເມ ອຘມ຺ມສຎ຺ຎີ. ທ຺ເວ ປຸຄ຺ຄລາ ປຓ຺ຑິຕາ – ໂຍ ຈ ອຘມ຺ເມ ອຘມ຺ມສຎ຺ຎີ, ໂຍ ຈ ຘມ຺ເມ ຘມ຺ມສຎ຺ຎີ. ອປເຣປິ ທ຺ເວ ປຸຄ຺ຄລາ ພາລາ – ໂຍ ຈ ອວິນເຍ ວິນຍສຎ຺ຎີ, ໂຍ ຈ ວິນເຍ ອວິນຍສຎ຺ຎີ. ທ຺ເວ ປຸຄ຺ຄລາ ປຓ຺ຑິຕາ – ໂຍ ຈ ອວິນເຍ ອວິນຍສຎ຺ຎີ, ໂຍ ຈ ວິນເຍ ວິນຍສຎ຺ຎີ.

[ອ. ນິ. ໒.໑໐໙] ທ຺ວິນ຺ນໍ ປຸຄ຺ຄລານໍ ອາສວາ ວຑ຺ຒນ຺ຕິ – ໂຍ ຈ ນ ກຸກ຺ກຸຈ຺ຈາຍິຕພ຺ພໍ ກຸກ຺ກຸຈ຺ຈາຍຕິ, ໂຍ ຈ ກຸກ຺ກຸຈ຺ຈາຍິຕພ຺ພໍ ກຸກ຺ກຸຈ຺ຈາຍຕິ. ທ຺ວິນ຺ນໍ ປຸຄ຺ຄລານໍ ອາສວາ ນ ວຑ຺ຒນ຺ຕິ – ໂຍ ຈ ກຸກ຺ກຸຈ຺ຈາຍິຕພ຺ພໍ ນ ກຸກ຺ກຸຈ຺ຈາຍຕິ, ໂຍ ຈ ກຸກ຺ກຸຈ຺ຈາຍິຕພ຺ພໍ ກຸກ຺ກຸຈ຺ຈາຍຕິ. ອປເຣສມ຺ປິ ທ຺ວິນ຺ນໍ ປຸຄ຺ຄລານໍ ອາສວາ ວຑ຺ຒນ຺ຕິ – ໂຍ ຈ ອກປ຺ປິເຍ ກປ຺ປິຍສຎ຺ຎີ, ໂຍ ຈ ກປ຺ປິເຍ ອກປ຺ປິຍສຎ຺ຎີ. ທ຺ວິນ຺ນໍ ປຸຄ຺ຄລານໍ ອາສວາ ນ ວຑ຺ຒນ຺ຕິ – ໂຍ ຈ ອກປ຺ປິເຍ ອກປ຺ປິຍສຎ຺ຎີ, ໂຍ ຈ ກປ຺ປິເຍ ກປ຺ປິຍສຎ຺ຎີ. ອປເຣສມ຺ປິ ທ຺ວິນ຺ນໍ ປຸຄ຺ຄລານໍ ອາສວາ ວຑ຺ຒນ຺ຕິ – ໂຍ ຈ ອນາປຕ຺ຕິຍາ ອາປຕ຺ຕິສຎ຺ຎີ, ໂຍ ຈ ອາປຕ຺ຕິຍາ ອນາປຕ຺ຕິສຎ຺ຎີ. ທ຺ວິນ຺ນໍ ປຸຄ຺ຄລານໍ ອາສວາ ນ ວຑ຺ຒນ຺ຕິ – ໂຍ ຈ ອນາປຕ຺ຕິຍາ ອນາປຕ຺ຕິສຎ຺ຎີ, ໂຍ ຈ ອາປຕ຺ຕິຍາ ອາປຕ຺ຕິສຎ຺ຎີ. ອປເຣສມ຺ປິ ທ຺ວິນ຺ນໍ ປຸຄ຺ຄລານໍ ອາສວາ ວຑ຺ຒນ຺ຕິ – ໂຍ ຈ ອຘມ຺ເມ ຘມ຺ມສຎ຺ຎີ, ໂຍ ຈ ຘມ຺ເມ ອຘມ຺ມສຎ຺ຎີ. ທ຺ວິນ຺ນໍ ປຸຄ຺ຄລານໍ ອາສວາ ນ ວຑ຺ຒນ຺ຕິ – ໂຍ ຈ ອຘມ຺ເມ ອຘມ຺ມສຎ຺ຎີ, ໂຍ ຈ ຘມ຺ເມ ຘມ຺ມສຎ຺ຎີ. ອປເຣສມ຺ປິ ທ຺ວິນ຺ນໍ ປຸຄ຺ຄລານໍ ອາສວາ ວຑ຺ຒນ຺ຕິ – ໂຍ ຈ ອວິນເຍ ວິນຍສຎ຺ຎີ, ໂຍ ຈ ວິນເຍ ອວິນຍສຎ຺ຎີ. ທ຺ວິນ຺ນໍ ປຸຄ຺ຄລານໍ ອາສວາ ນ ວຑ຺ຒນ຺ຕິ – ໂຍ ຈ ອວິນເຍ ອວິນຍສຎ຺ຎີ, ໂຍ ຈ ວິນເຍ ວິນຍສຎ຺ຎີ.

ທຸກາ ນິຏ຺ຐິຕາ.

ຕສ຺ສຸທ຺ທານໍ –

ສຎ຺ຎາ ລທ຺ຘາ ຈ ສທ຺ຘມ຺ມາ, ປຣິກ຺ຂາຣາ ຈ ປຸຄ຺ຄລາ;

ສຈ຺ຈໍ ຠູມິ ນິກ຺ຂມນ຺ໂຕ, ອາທິຍນ຺ໂຕ ສມາທິຍໍ.

ກໂຣນ຺ໂຕ ເທນ຺ໂຕ ຄຓ຺ຫນ຺ໂຕ, ປຣິໂຠເຄນ ຣຕ຺ຕິ ຈ;

ອຣຸຓາຉິນ຺ທໍ ຉາເທນ຺ໂຕ, ຘາເຣນ຺ໂຕ ຈ ອຸໂປສຖາ.

ປວາຣຓາ ກມ຺ມາປຣາ, ວຕ຺ຖຸ ອປຣາ ໂທສາ ຈ;

ອປຣາ ທ຺ເວ ຈ ສມ຺ປຕ຺ຕິ, ນານາ ສມານເມວ ຈ.

ປາຣາຊິສງ຺ຆຖຸລ຺ລຈ຺ຈຍ, ປາຈິຕ຺ຕິ ປາຏິເທສນາ;

ທຸກ຺ກຏາ ທຸພ຺ຠາສິຕາ ເຈວ, ສຕ຺ຕ ອາປຕ຺ຕິກ຺ຂນ຺ຘາ ຈ.

ຠິຊ຺ຊຕິ ອຸປສມ຺ປທາ, ຕເຖວ ອປເຣ ທຸເວ;

ນ ວຕ຺ຖພ຺ພໍ ນ ທາຕພ຺ພໍ, ອຠພ຺ພາຠພ຺ພເມວ ຈ.

ສຎ຺ຈິຈ຺ຈ ສາຕິສາຣາ ຈ, ປຏິກ຺ໂກສາ ນິສ຺ສາຣຓາ;

ໂອສາຣຓາ ປຏິຎ຺ຎາ ຈ, ປຏິຄ຺ຄຫາ ປຏິກ຺ຂິປາ.

ອຸປຆາຕິ ໂຈທນາ ຈ, ກຖິນາ ຈ ທຸເວ ຕຖາ;

ຈີວຣາ ປຕ຺ຕມຓ຺ຑລາ, ອຘິຏ຺ຐານາ ຕເຖວ ທ຺ເວ.

ວິກປ຺ປນາ ຈ ວິນຍາ, ເວນຍິກາ ຈ ສລ຺ເລຂາ;

ອາປຊ຺ຊຕິ ຈ ວຸຏ຺ຐາຕິ, ປຣິວາສາປເຣ ທຸເວ.

ທ຺ເວ ມານຕ຺ຕາ ອປເຣ ຈ, ຣຕ຺ຕິຈ຺ເຉໂທ ອນາທຣິ;

ທ຺ເວ ໂລຓາ ຕໂຍ ອປເຣ, ປຣິໂຠຄກ຺ໂກເສນ ຈ.

ເປສຸຎ຺ໂຎ ຈ ຄຓາວສ຺ສ, ຐປນາ ຠາຣກປ຺ປິຍໍ;

ອນາປຕ຺ຕິ ອຘມ຺ມຘມ຺ມາ, ວິນເຍ ອາສເວ ຕຖາຕິ.

໓. ຕິກວາໂຣ

໓໒໓. ອຕ຺ຖາປຕ຺ຕິ ຕິຏ຺ຐນ຺ເຕ ຠຄວຕິ ອາປຊ຺ຊຕິ, ໂນ ປຣິນິພ຺ພຸເຕ; ອຕ຺ຖາປຕ຺ຕິ ປຣິນິພ຺ພຸເຕ ຠຄວຕິ ອາປຊ຺ຊຕິ, ໂນ ຕິຏ຺ຐນ຺ເຕ; ອຕ຺ຖາປຕ຺ຕິ ຕິຏ຺ຐນ຺ເຕປິ ຠຄວຕິ ອາປຊ຺ຊຕິ ປຣິນິພ຺ພຸເຕປິ. ອຕ຺ຖາປຕ຺ຕິ ກາເລ ອາປຊ຺ຊຕິ, ໂນ ວິກາເລ; ອຕ຺ຖາປຕ຺ຕິ ວິກາເລ ອາປຊ຺ຊຕິ, ໂນ ກາເລ; ອຕ຺ຖາປຕ຺ຕິ ກາເລ ເຈວ ອາປຊ຺ຊຕິ ວິກາເລ ຈ. ອຕ຺ຖາປຕ຺ຕິ ຣຕ຺ຕິໍ ອາປຊ຺ຊຕິ, ໂນ ທິວາ; ອຕ຺ຖາປຕ຺ຕິ ທິວາ ອາປຊ຺ຊຕິ, ໂນ ຣຕ຺ຕິໍ; ອຕ຺ຖາປຕ຺ຕິ ຣຕ຺ຕິຎ຺ເຈວ ອາປຊ຺ຊຕິ ທິວາ ຈ. ອຕ຺ຖາປຕ຺ຕິ ທສວສ຺ໂສ ອາປຊ຺ຊຕິ, ໂນ ອູນທສວສ຺ໂສ; ອຕ຺ຖາປຕ຺ຕິ ອູນທສວສ຺ໂສ ອາປຊ຺ຊຕິ, ໂນ ທສວສ຺ໂສ; ອຕ຺ຖາປຕ຺ຕິ ທສວສ຺ໂສ ເຈວ ອາປຊ຺ຊຕິ ອູນທສວສ຺ໂສ ຈ. ອຕ຺ຖາປຕ຺ຕິ ປຎ຺ຈວສ຺ໂສ ອາປຊ຺ຊຕິ, ໂນ ອູນປຎ຺ຈວສ຺ໂສ; ອຕ຺ຖາປຕ຺ຕິ ອູນປຎ຺ຈວສ຺ໂສ ອາປຊ຺ຊຕິ, ໂນ ປຎ຺ຈວສ຺ໂສ; ອຕ຺ຖາປຕ຺ຕິ ປຎ຺ຈວສ຺ໂສ ເຈວ ອາປຊ຺ຊຕິ ອູນປຎ຺ຈວສ຺ໂສ ຈ. ອຕ຺ຖາປຕ຺ຕິ ກຸສລຈິຕ຺ໂຕ ອາປຊ຺ຊຕິ; ອຕ຺ຖາປຕ຺ຕິ ອກຸສລຈິຕ຺ໂຕ ອາປຊ຺ຊຕິ; ອຕ຺ຖາປຕ຺ຕິ ອພ຺ຍາກຕຈິຕ຺ໂຕ ອາປຊ຺ຊຕິ. ອຕ຺ຖາປຕ຺ຕິ ສຸຂເວທນາສມງ຺ຄີ ອາປຊ຺ຊຕິ; ອຕ຺ຖາປຕ຺ຕິ ທຸກ຺ຂເວທນາສມງ຺ຄີ ອາປຊ຺ຊຕິ; ອຕ຺ຖາປຕ຺ຕິ ອທຸກ຺ຂມສຸຂເວທນາສມງ຺ຄີ ອາປຊ຺ຊຕິ. ຕີຓິ ໂຈທນາວຕ຺ຖູນິ – ທິຏ຺ເຐນ, ສຸເຕນ, ປຣິສງ຺ກາຍ. ຕໂຍ ສລາກຄ຺ຄາຫາ – ຄຸຬ຺ຫໂກ, ວິວຏໂກ [ວິວຏ຺ຏໂກ (ກ.)], ສກຓ຺ຓຊປ຺ປໂກ. ຕໂຍ ປຏິກ຺ເຂປາ – ມຫິຈ຺ຉຕາ, ອສນ຺ຕຸຏ຺ຐິຕາ [ອສນ຺ຕຸຏ຺ຐຕາ (ສ຺ຍາ.)], ອສລ຺ເລຂຕາ. ຕໂຍ ອນຸຎ຺ຎາຕາ – ອປ຺ປິຈ຺ຉຕາ, ສນ຺ຕຸຏ຺ຐິຕາ, ສລ຺ເລຂຕາ. ອປເຣປິ ຕໂຍ ປຏິກ຺ເຂປາ – ມຫິຈ຺ຉຕາ, ອສນ຺ຕຸຏ຺ຐິຕາ, ອມຕ຺ຕຎ຺ຎຸຕາ. ຕໂຍ ອນຸຎ຺ຎາຕາ – ອປ຺ປິຈ຺ຉຕາ, ສນ຺ຕຸຏ຺ຐິຕາ, ມຕ຺ຕຎ຺ຎຸຕາ. ຕິສ຺ໂສ ປຎ຺ຎຕ຺ຕິໂຍ – ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕິ. ອປຣາປິ ຕິສ຺ໂສ ປຎ຺ຎຕ຺ຕິໂຍ – ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕິ, ສາຘາຣຓປຎ຺ຎຕ຺ຕິ. ອປຣາປິ ຕິສ຺ໂສ ປຎ຺ຎຕ຺ຕິໂຍ – ອສາຘາຣຓປຎ຺ຎຕ຺ຕິ, ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕິ.

ອຕ຺ຖາປຕ຺ຕິ ພາໂລ ອາປຊ຺ຊຕິ, ໂນ ປຓ຺ຑິໂຕ; ອຕ຺ຖາປຕ຺ຕິ ປຓ຺ຑິໂຕ ອາປຊ຺ຊຕິ, ໂນ ພາໂລ; ອຕ຺ຖາປຕ຺ຕິ ພາໂລ ເຈວ ອາປຊ຺ຊຕິ ປຓ຺ຑິໂຕ ຈ. ອຕ຺ຖາປຕ຺ຕິ ກາເຬ ອາປຊ຺ຊຕິ, ໂນ ຊຸຓ຺ເຫ; ອຕ຺ຖາປຕ຺ຕິ ຊຸຓ຺ເຫ ອາປຊ຺ຊຕິ, ໂນ ກາເຬ; ອຕ຺ຖາປຕ຺ຕິ ກາເຬ ເຈວ ອາປຊ຺ຊຕິ ຊຸຓ຺ເຫ ຈ. ອຕ຺ຖິ ກາເຬ ກປ຺ປຕິ, ໂນ ຊຸຓ຺ເຫ; ອຕ຺ຖິ ຊຸຓ຺ເຫ ກປ຺ປຕິ, ໂນ ກາເຬ; ອຕ຺ຖິ ກາເຬ ເຈວ ກປ຺ປຕິ ຊຸຓ຺ເຫ ຈ. ອຕ຺ຖາປຕ຺ຕິ ເຫມນ຺ເຕ ອາປຊ຺ຊຕິ, ໂນ ຄິມ຺ເຫ ໂນ ວສ຺ເສ; ອຕ຺ຖາປຕ຺ຕິ ຄິມ຺ເຫ ອາປຊ຺ຊຕິ, ໂນ ເຫມນ຺ເຕ ໂນ ວສ຺ເສ; ອຕ຺ຖາປຕ຺ຕິ ວສ຺ເສ ອາປຊ຺ຊຕິ, ໂນ ເຫມນ຺ເຕ ໂນ ຄິມ຺ເຫ. ອຕ຺ຖາປຕ຺ຕິ ສງ຺ໂຆ ອາປຊ຺ຊຕິ, ນ ຄໂຓ ນ ປຸຄ຺ຄໂລ; ອຕ຺ຖາປຕ຺ຕິ ຄໂຓ ອາປຊ຺ຊຕິ, ນ ສງ຺ໂຆ ນ ປຸຄ຺ຄໂລ; ອຕ຺ຖາປຕ຺ຕິ ປຸຄ຺ຄໂລ ອາປຊ຺ຊຕິ, ນ ສງ຺ໂຆ ນ ຄໂຓ. ອຕ຺ຖິ ສງ຺ຆສ຺ສ ກປ຺ປຕິ, ນ ຄຓສ຺ສ ນ ປຸຄ຺ຄລສ຺ສ; ອຕ຺ຖິ ຄຓສ຺ສ ກປ຺ປຕິ, ນ ສງ຺ຆສ຺ສ ນ ປຸຄ຺ຄລສ຺ສ; ອຕ຺ຖິ ປຸຄ຺ຄລສ຺ສ ກປ຺ປຕິ, ນ ສງ຺ຆສ຺ສ ນ ຄຓສ຺ສ. ຕິສ຺ໂສ ຉາທນາ ວຕ຺ຖຸໍ ຉາເທຕິ, ໂນ ອາປຕ຺ຕິໍ; ອາປຕ຺ຕິໍ ຉາເທຕິ, ໂນ ວຕ຺ຖຸໍ; ວຕ຺ຖຸຎ຺ເຈວ ຉາເທຕິ ອາປຕ຺ຕິຎ຺ຈ. ຕິສ຺ໂສ ປຏິຈ຺ຉາທິໂຍ – ຊນ຺ຕາຆຣປຏິຈ຺ຉາທິ, ອຸທກປຏິຈ຺ຉາທິ, ວຕ຺ຖປຏິຈ຺ຉາທິ. [ອ. ນິ. ໓.໑໓໒] ຕີຓິ ປຏິຈ຺ຉນ຺ນານິ ວຫນ຺ຕິ, ໂນ ວິວຏານິ – ມາຕຸຄາໂມ ປຏິຈ຺ຉນ຺ໂນ ວຫຕິ, ໂນ ວິວໂຏ; ພ຺ຣາຫ຺ມຓານໍ ມນ຺ຕາ ປຏິຈ຺ຉນ຺ນາ ວຫນ຺ຕິ, ໂນ ວິວຏາ; ມິຈ຺ຉາທິຏ຺ຐິ ປຏິຈ຺ຉນ຺ນາ ວຫຕິ, ໂນ ວິວຏາ. ຕີຓິ ວິວຏານິ ວິໂຣຈນ຺ຕິ, ໂນ ປຏິຈ຺ຉນ຺ນານິ – ຈນ຺ທມຓ຺ຑລໍ ວິວຏໍ ວິໂຣຈຕິ, ໂນ ປຏິຈ຺ຉນ຺ນໍ; ສູຣິຍມຓ຺ຑລໍ ວິວຏໍ ວິໂຣຈຕິ, ໂນ ປຏິຈ຺ຉນ຺ນໍ; ຕຖາຄຕປ຺ປເວທິໂຕ ຘມ຺ມວິນໂຍ ວິວໂຏ ວິໂຣຈຕິ, ໂນ ປຏິຈ຺ຉນ຺ໂນ. ຕໂຍ ເສນາສນຄ຺ຄາຫາ – ປຸຣິມໂກ, ປຈ຺ຉິມໂກ, ອນ຺ຕຣາມຸຕ຺ຕໂກ. ອຕ຺ຖາປຕ຺ຕິ ຄິລາໂນ ອາປຊ຺ຊຕິ, ໂນ ອຄິລາໂນ; ອຕ຺ຖາປຕ຺ຕິ ອຄິລາໂນ ອາປຊ຺ຊຕິ, ໂນ ຄິລາໂນ; ອຕ຺ຖາປຕ຺ຕິ ຄິລາໂນ ເຈວ ອາປຊ຺ຊຕິ ອຄິລາໂນ ຈ.

ຕີຓິ ອຘມ຺ມິການິ ປາຕິໂມກ຺ຂຏ຺ຐປນານິ. ຕີຓິ ຘມ຺ມິການິ ປາຕິໂມກ຺ຂຏ຺ຐປນານິ. ຕໂຍ ປຣິວາສາ – ປຏິຈ຺ຉນ຺ນປຣິວາໂສ, ອປ຺ປຏິຈ຺ຉນ຺ນປຣິວາໂສ, ສຸທ຺ຘນ຺ຕປຣິວາໂສ. ຕໂຍ ມານຕ຺ຕາ – ປຏິຈ຺ຉນ຺ນມານຕ຺ຕໍ, ອປ຺ປຏິຈ຺ຉນ຺ນມານຕ຺ຕໍ, ປກ຺ຂມານຕ຺ຕໍ. ຕໂຍ ປາຣິວາສິກສ຺ສ ຠິກ຺ຂຸໂນ ຣຕ຺ຕິຈ຺ເຉທາ – ສຫວາໂສ, ວິປ຺ປວາໂສ, ອນາໂຣຈນາ. ອຕ຺ຖາປຕ຺ຕິ ອນ຺ໂຕ ອາປຊ຺ຊຕິ, ໂນ ພຫິ; ອຕ຺ຖາປຕ຺ຕິ ພຫິ ອາປຊ຺ຊຕິ, ໂນ ອນ຺ໂຕ; ອຕ຺ຖາປຕ຺ຕິ ອນ຺ໂຕ ເຈວ ອາປຊ຺ຊຕິ ພຫິ ຈ. ອຕ຺ຖາປຕ຺ຕິ ອນ຺ໂຕສີມາຍ ອາປຊ຺ຊຕິ, ໂນ ພຫິສີມາຍ; ອຕ຺ຖາປຕ຺ຕິ ພຫິສີມາຍ ອາປຊ຺ຊຕິ, ໂນ ອນ຺ໂຕສີມາຍ; ອຕ຺ຖາປຕ຺ຕິ ອນ຺ໂຕສີມາຍ ເຈວ ອາປຊ຺ຊຕິ ພຫິສີມາຍ ຈ. ຕີຫາກາເຣຫິ ອາປຕ຺ຕິໍ ອາປຊ຺ຊຕິ – ກາເຍນ ອາປຊ຺ຊຕິ, ວາຈາຍ ອາປຊ຺ຊຕິ, ກາເຍນ ວາຈາຍ ອາປຊ຺ຊຕິ. ອປເຣຫິປິ ຕີຫາກາເຣຫິ ອາປຕ຺ຕິໍ ອາປຊ຺ຊຕິ – ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ. ຕີຫາກາເຣຫິ ອາປຕ຺ຕິຍາ ວຸຏ຺ຐາຕິ – ກາເຍນ ວຸຏ຺ຐາຕິ, ວາຈາຍ ວຸຏ຺ຐາຕິ, ກາເຍນ ວາຈາຍ ວຸຏ຺ຐາຕິ. ອປເຣຫິປິ ຕີຫາກາເຣຫິ ອາປຕ຺ຕິຍາ ວຸຏ຺ຐາຕິ – ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ. ຕີຓິ ອຘມ຺ມິການິ ອມູຬ຺ຫວິນຍສ຺ສ ທານານິ. ຕີຓິ ຘມ຺ມິການິ ອມູຬ຺ຫວິນຍສ຺ສ ທານານິ.

[ຈູຬວ. ໖] ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ຕຊ຺ຊນີຍກມ຺ມໍ ກເຣຍ຺ຍ – ຠຓ຺ຑນກາຣໂກ ໂຫຕິ ກລຫກາຣໂກ ວິວາທກາຣໂກ ຠສ຺ສກາຣໂກ ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ, ອາປຕ຺ຕິພຫຸໂລ ອນປທາໂນ ຄິຫິສໍສຏ຺ໂຐ ວິຫຣຕິ ອນນຸໂລມິເກຫິ ຄິຫິສໍສຄ຺ເຄຫິ. [ຈູຬວ. ໑໕] ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ນິຍສ຺ສກມ຺ມໍ ກເຣຍ຺ຍ – ຠຓ຺ຑນກາຣໂກ ໂຫຕິ…ເປ… ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ, ອາປຕ຺ຕິພຫຸໂລ ອນປທາໂນ ຄິຫິສໍສຏ຺ໂຐ ວິຫຣຕິ ອນນຸໂລມິເກຫິ ຄິຫິສໍສຄ຺ເຄຫິ. [ຈູຬວ. ໒໗] ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ປພ຺ພາຊນີຍກມ຺ມໍ ກເຣຍ຺ຍ – ຠຓ຺ຑນກາຣໂກ ໂຫຕິ…ເປ… ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ, ອາປຕ຺ຕິພຫຸໂລ ອນປທາໂນ ກຸລທູກໂກ ໂຫຕິ ປາປສມາຈາໂຣ ປາປສມາຈາຣາ ທິສ຺ສນ຺ຕິ ເຈວ ສຸຍ຺ຍນ຺ຕິ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ປຏິສາຣຓີຍກມ຺ມໍ ກເຣຍ຺ຍ – ຠຓ຺ຑນກາຣໂກ ໂຫຕິ…ເປ… ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ, ອາປຕ຺ຕິ ພຫຸໂລ ອນປທາໂນ ຄິຫີ ອກ຺ໂກສຕິ ປຣິຠາສຕິ. [ຈູຬວ. ໕໐] ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ອາປຕ຺ຕິຍາ ອທສ຺ສເນ ອຸກ຺ເຂປນີຍກມ຺ມໍ ກເຣຍ຺ຍ – ຠຓ຺ຑນກາຣໂກ ໂຫຕິ…ເປ… ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ, ອາປຕ຺ຕິພຫຸໂລ ອນປທາໂນ ອາປຕ຺ຕິໍ ອາປຊ຺ຊິຕ຺ວາ ນ ອິຈ຺ຉຕິ ອາປຕ຺ຕິໍ ປສ຺ສິຕຸໍ. [ຈູຬວ. ໕໙] ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ອາປຕ຺ຕິຍາ ອປ຺ປຏິກມ຺ເມ ອຸກ຺ເຂປນີຍກມ຺ມໍ ກເຣຍ຺ຍ – ຠຓ຺ຑນກາຣໂກ ໂຫຕິ…ເປ… ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ, ອາປຕ຺ຕິພຫຸໂລ ອນປທາໂນ ອາປຕ຺ຕິໍ ອາປຊ຺ຊິຕ຺ວາ ນ ອິຈ຺ຉຕິ ອາປຕ຺ຕິໍ ປຏິກາຕຸໍ. [ຈູຬວ. ໖໙] ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ເຂປນີຍກມ຺ມໍ ກເຣຍ຺ຍ – ຠຓ຺ຑນກາຣໂກ ໂຫຕິ…ເປ… ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ, ອາປຕ຺ຕິພຫຸໂລ ອນປທາໂນ ນ ອິຈ຺ຉຕິ ປາປິກໍ ທິຏ຺ຐິໍ ປຏິນິສ຺ສຊ຺ຊິຕຸໍ.

ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອາກງ຺ຂມາໂນ ສງ຺ໂຆ ອາຄາຬ຺ຫາຍ ເຈເຕຍ຺ຍ – ຠຓ຺ຑນກາຣໂກ ໂຫຕິ ກລຫກາຣໂກ ວິວາທກາຣໂກ ຠສ຺ສກາຣໂກ ສງ຺ເຆ ອຘິກຣຓກາຣໂກ, ພາໂລ ໂຫຕິ ອພ຺ຍຕ຺ໂຕ ອາປຕ຺ຕິພຫຸໂລ ອນປທາໂນ, ຄິຫິສໍສຏ຺ໂຐ ວິຫຣຕິ ອນນຸໂລມິເກຫິ ຄິຫິສໍສຄ຺ເຄຫິ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ອຘິສີເລ ສີລວິປນ຺ໂນ ໂຫຕິ, ອຊ຺ຌາຈາເຣ ອາຈາຣວິປນ຺ໂນ ໂຫຕິ, ອຕິທິຏ຺ຐິຍາ ທິຏ຺ຐິວິປນ຺ໂນ ໂຫຕິ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ກາຍິເກນ ທເວນ ສມນ຺ນາຄໂຕ ໂຫຕິ, ວາຈສິເກນ ທເວນ ສມນ຺ນາຄໂຕ ໂຫຕິ, ກາຍິກວາຈສິເກນ ທເວນ ສມນ຺ນາຄໂຕ ໂຫຕິ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ກາຍິເກນ ອນາຈາເຣນ ສມນ຺ນາຄໂຕ ໂຫຕິ, ວາຈສິເກນ ອນາຈາເຣນ ສມນ຺ນາຄໂຕ ໂຫຕິ, ກາຍິກວາຈສິເກນ ອນາຈາເຣນ ສມນ຺ນາຄໂຕ ໂຫຕິ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ກາຍິເກນ ອຸປຆາຕິເກນ ສມນ຺ນາຄໂຕ ໂຫຕິ, ວາຈສິເກນ ອຸປຆາຕິເກນ ສມນ຺ນາຄໂຕ ໂຫຕິ, ກາຍິກວາຈສິເກນ ອຸປຆາຕິເກນ ສມນ຺ນາຄໂຕ ໂຫຕິ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ກາຍິເກນ ມິຈ຺ຉາຊີເວນ ສມນ຺ນາຄໂຕ ໂຫຕິ, ວາຈສິເກນ ມິຈ຺ຉາຊີເວນ ສມນ຺ນາຄໂຕ ໂຫຕິ, ກາຍິກວາຈສິເກນ ມິຈ຺ຉາຊີເວນ ສມນ຺ນາຄໂຕ ໂຫຕິ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ອາປຕ຺ຕິໍ ອາປນ຺ໂນ ກມ຺ມກໂຕ ອຸປສມ຺ປາເທຕິ, ນິສ຺ສຍໍ ເທຕິ, ສາມເຓຣໍ ອຸປຏ຺ຐາເປຕິ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ຍາຍ ອາປຕ຺ຕິຍາ ສງ຺ເຆນ ກມ຺ມໍ ກຕໍ ໂຫຕິ ຕໍ ອາປຕ຺ຕິໍ ອາປຊ຺ຊຕິ, ອຎ຺ຎໍ ວາ ຕາທິສິກໍ, ຕໂຕ ວາ ປາປິຏ຺ຐຕຣໍ. ອປເຣຫິປິ ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ກາຕພ຺ພໍ – ພຸທ຺ຘສ຺ສ ອວຓ຺ຓໍ ຠາສຕິ, ຘມ຺ມສ຺ສ ອວຓ຺ຓໍ ຠາສຕິ, ສງ຺ຆສ຺ສ ອວຓ຺ຓໍ ຠາສຕິ.

ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ສງ຺ຆມຊ຺ເຌ ອຸໂປສຖໍ ຐເປນ຺ຕສ຺ສ – ‘‘ອລໍ, ຠິກ຺ຂຸ, ມາ ຠຓ຺ຑນໍ ມາ ກລຫໍ ມາ ວິຄ຺ຄຫໍ ມາ ວິວາທ’’ນ຺ຕິ ໂອມທ຺ທິຕ຺ວາ ສງ຺ເຆນ ອຸໂປສໂຖ ກາຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ສງ຺ຆມຊ຺ເຌ ປວາຣຓໍ ຐເປນ຺ຕສ຺ສ – ‘‘ອລໍ, ຠິກ຺ຂຸ, ມາ ຠຓ຺ຑນໍ ມາ ກລຫໍ ມາ ວິຄ຺ຄຫໍ ມາ ວິວາທ’’ນ຺ຕິ ໂອມທ຺ທິຕ຺ວາ ສງ຺ເຆນ ປວາເຣຕພ຺ພໍ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ນ ກາຈິ ສງ຺ຆສມ຺ມຸຕິ ທາຕພ຺ພາ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄເຕນ ຠິກ຺ຂຸນາ ສງ຺ເຆ ນ ໂວຫຣິຕພ຺ພໍ [ສໍໂຆ ນ ໂວຫຣິຕພ຺ໂພ (ສ຺ຍາ.)] – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄໂຕ ຠິກ຺ຂຸ ນ ກິສ຺ມິໍ ຈິ ປຈ຺ເຈກຏ຺ຐາເນ ຐເປຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ນິສ຺ສາຍ ນ ວຕ຺ຖພ຺ພໍ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ນິສ຺ສໂຍ ນ ທາຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ໂອກາສກມ຺ມໍ ກາຣາເປນ຺ຕສ຺ສ ນາລໍ ໂອກາສກມ຺ມໍ ກາຕຸໍ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ສວຈນີຍໍ ນາທາຕພ຺ພໍ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ວິນໂຍ ນ ປຸຈ຺ຉິຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄເຕນ ຠິກ຺ຂຸນາ ວິນໂຍ ນ ປຸຈ຺ຉິຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ວິນໂຍ ນ ວິສ຺ສຊ຺ເຊຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄເຕນ ຠິກ຺ຂຸນາ ວິນໂຍ ນ ວິສ຺ສຊ຺ເຊຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອນຸໂຍໂຄ ນ ທາຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄເຕນ ຠິກ຺ຂຸນາ ສທ຺ຘິໍ ວິນໂຍ ນ ສາກຈ຺ຉິຕພ຺ໂພ [ສາກຈ຺ຉາຕພ຺ໂພ (ກ.)] – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ. ຕີຫງ຺ເຄຫິ ສມນ຺ນາຄເຕນ ຠິກ຺ຂຸນາ ນ ອຸປສມ຺ປາເທຕພ຺ພໍ ນ ນິສ຺ສໂຍ ທາຕພ຺ໂພ ນ ສາມເຓໂຣ ອຸປຏ຺ຐາເປຕພ຺ໂພ – ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ.

ຕໂຍ ອຸໂປສຖາ – ຈາຕຸທ຺ທສິໂກ, ປນ຺ນຣສິໂກ, ສາມຄ຺ຄິອຸໂປສໂຖ. ອປເຣປິ ຕໂຍ ອຸໂປສຖາ – ສງ຺ເຆອຸໂປສໂຖ, ຄເຓອຸໂປສໂຖ, ປຸຄ຺ຄເລອຸໂປສໂຖ. ອປເຣປິ ຕໂຍ ອຸໂປສຖາ – ສຸຕ຺ຕຸທ຺ເທໂສອຸໂປສໂຖ, ປາຣິສຸທ຺ຘິອຸໂປສໂຖ, ອຘິຏ຺ຐານຸໂປສໂຖ. ຕິສ຺ໂສ ປວາຣຓາ – ຈາຕຸທ຺ທສິກາ, ປນ຺ນຣສິກາ, ສາມຄ຺ຄິປວາຣຓາ. ອປຣາປິ ຕິສ຺ໂສ ປວາຣຓາ – ສງ຺ເຆປວາຣຓາ, ຄເຓປວາຣຓາ, ປຸຄ຺ຄເລປວາຣຓາ. ອປຣາປິ ຕິສ຺ໂສ ປວາຣຓາ – ເຕວາຈິກາປວາຣຓາ, ທ຺ເວວາຈິກາປວາຣຓາ, ສມານວສ຺ສິກາປວາຣຓາ.

ຕໂຍ ອາປາຍິກາ ເນຣຍິກາ – ອິທມປ຺ປຫາຍ, ໂຍ ຈ ອພ຺ຣຫ຺ມຈາຣີ ພ຺ຣຫ຺ມຈາຣິປຏິຎ຺ໂຎ, ໂຍ ຈ ສຸທ຺ຘໍ ພ຺ຣຫ຺ມຈາຣິໍ ປຣິສຸທ຺ຘພ຺ຣຫ຺ມຈຣິຍໍ ຈຣນ຺ຕໍ ອມູລເກນ ອພ຺ຣຫ຺ມຈຣິເຍນ ອນຸທ຺ຘໍເສຕິ, ໂຍ ຈາຍໍ ເອວໍວາທີ ເອວໍທິຏ຺ຐິ [ເອວໍທິຏ຺ຐີ (ສີ.)] – ‘‘ນຕ຺ຖິ ກາເມສຸ ໂທໂສ’’ຕິ ໂສ ກາເມສຸ ປາຕພ຺ຍຕໍ ອາປຊ຺ຊຕິ. [ອ. ນິ. ໓.໗໐] ຕີຓິ ອກຸສລມູລານິ – ໂລໂຠ ອກຸສລມູລໍ, ໂທໂສ ອກຸສລມູລໍ, ໂມໂຫ ອກຸສລມູລໍ. [ອ. ນິ. ໓.໗໐] ຕີຓິ ກຸສລມູລານິ – ອໂລໂຠ ກຸສລມູລໍ, ອໂທໂສ ກຸສລມູລໍ, ອໂມໂຫ ກຸສລມູລໍ. ຕີຓິ ທຸຈ຺ຈຣິຕານິ – ກາຍທຸຈ຺ຈຣິຕໍ, ວຈີທຸຈ຺ຈຣິຕໍ, ມໂນທຸຈ຺ຈຣິຕໍ. ຕີຓິ ສຸຈຣິຕານິ – ກາຍສຸຈຣິຕໍ, ວຈີສຸຈຣິຕໍ, ມໂນສຸຈຣິຕໍ. ຕໂຍ ອຕ຺ຖວເສ ປຏິຈ຺ຈ ຠຄວຕາ ກຸເລສຸ ຕິກໂຠຊນໍ ປຎ຺ຎຕ຺ຕໍ – ທຸມ຺ມງ຺ກູນໍ ປຸຄ຺ຄລານໍ ນິຄ຺ຄຫາຍ, ເປສລານໍ ຠິກ຺ຂູນໍ ຜາສຸວິຫາຣາຍ, ‘‘ມາ ປາປິຈ຺ຉາ ປກ຺ຂໍ ນິສ຺ສາຍ ສງ຺ຆໍ ຠິນ຺ເທຍ຺ຍຸ’’ນ຺ຕິ ກຸລານຸທ຺ທຍຕາຍ ຈ. [ຈູຬວ. ໓໕໐] ຕີຫິ ອສທ຺ຘມ຺ເມຫິ ອຠິຠູໂຕ ປຣິຍາທິນ຺ນຈິຕ຺ໂຕ ເທວທຕ຺ໂຕ ອາປາຍິໂກ ເນຣຍິໂກ ກປ຺ປຏ຺ໂຐ ອເຕກິຈ຺ໂຉ ປາປິຈ຺ຉຕາ ປາປມິຕ຺ຕຕາ ໂອຣມຕ຺ຕເກນ ວິເສສາຘິຄເມນ ອນ຺ຕຣາ ໂວສານໍ ອາປາທິ. ຕິສ຺ໂສ ສມ຺ມຸຕິໂຍ – ທຓ຺ຑສມ຺ມຸຕິ, ສິກ຺ກາສມ຺ມຸຕິ, ທຓ຺ຑສິກ຺ກາສມ຺ມຸຕິ. ຕິສ຺ໂສ ປາທຸກາ ຘຸວຏ຺ຐານິກາ ອສງ຺ກມນີຍາ – ວຈ຺ຈປາທຸກາ, ປສ຺ສາວປາທຸກາ, ອາຈມນປາທຸກາ. ຕິສ຺ໂສ ປາທຆໍສນິໂຍ – ສກ຺ຂຣໍ, ກຖລາ, ສມຸທ຺ທເຜຓໂກຕິ.

ຕິກໍ ນິຏ຺ຐິຕໍ.

ຕສ຺ສຸທ຺ທານໍ –

ຕິຏ຺ຐນ຺ເຕ ກາເລ ຣຕ຺ຕິຎ຺ຈ, ທສ ປຎ຺ຈ ກຸສເລນ;

ເວທນາ ໂຈທນາ ວຕ຺ຖຸ, ສລາກາ ທ຺ເວ ປຏິກ຺ຂິປາ.

ປຎ຺ຎຕ຺ຕິ ອປເຣ ທ຺ເວ ຈ, ພາໂລ ກາເຬ ຈ ກປ຺ປຕິ;

ເຫມນ຺ເຕ ສງ຺ໂຆ ສງ຺ຆສ຺ສ, ຉາທນາ ຈ ປຏິຈ຺ຉາທິ.

ປຏິຈ຺ຉນ຺ນາ ວິວຏາ ຈ, ເສນາສນຄິລາຍນາ;

ປາຕິໂມກ຺ຂໍ ປຣິວາສໍ, ມານຕ຺ຕາ ປາຣິວາສິກາ.

ອນ຺ໂຕ ອນ຺ໂຕ ຈ ສີມາຍ, ອາປຊ຺ຊຕິ ປຸນາປເຣ;

ວຸຏ຺ຐາຕິ ອປເຣ ເຈວ, ອມູຬ຺ຫວິນຍາ ທຸເວ.

ຕຊ຺ຊນີຍາ ນິຍສ຺ສາ ຈ, ປພ຺ພາຊປຏິສາຣຓີ;

ອທສ຺ສນາ ປຏິກມ຺ເມ, ອນິສ຺ສຄ຺ເຄ ຈ ທິຏ຺ຐິຍາ.

ອາຄາຬ຺ຫກມ຺ມາຘິສີເລ, ທວານາຈາຣ ຆາຕິກາ;

ອາຊີວາປນ຺ນາ ຕາທິສິກາ, ອວຓ຺ຓຸໂປສເຖນ ຈ.

ປວາຣຓາ ສມ຺ມຸຕິ ຈ, ໂວຫາຣປຈ຺ເຈເກນ ຈ;

ນ ວຕ຺ຖພ຺ພໍ ນ ທາຕພ຺ພໍ, ໂອກາສໍ ນ ກເຣ ຕຖາ.

ນ ກເຣ ສວຈນີຍໍ, ນ ປຸຈ຺ຉິຕພ຺ພກາ ທຸເວ;

ນ ວິສ຺ສຊ຺ເຊ ທຸເວ ເຈວ, ອນຸໂຍຄມ຺ປິ ໂນ ທເທ.

ສາກຈ຺ຉາ ອຸປສມ຺ປທາ, ນິສ຺ສຍສາມເຓຣາ ຈ;

ອຸໂປສຖຕິກາ ຕີຓິ, ປວາຣຓຕິກາ ຕໂຍ.

ອາປາຍິກາ ອກຸສລາ, ກຸສລາ ຈຣິຕາ ທຸເວ;

ຕິກໂຠຊນສທ຺ຘມ຺ເມ, ສມ຺ມຸຕິ ປາທຸເກນ ຈ;

ປາທຆໍສນິກາ ເຈວ, ອຸທ຺ທານໍ ຕິກເກ ອິທນ຺ຕິ.

໔. ຈຕຸກ຺ກວາໂຣ

໓໒໔. ອຕ຺ຖາປຕ຺ຕິ ສກວາຈາຍ ອາປຊ຺ຊຕິ, ປຣວາຈາຍ ວຸຏ຺ຐາຕິ; ອຕ຺ຖາປຕ຺ຕິ ປຣວາຈາຍ ອາປຊ຺ຊຕິ, ສກວາຈາຍ ວຸຏ຺ຐາຕິ; ອຕ຺ຖາປຕ຺ຕິ ສກວາຈາຍ ອາປຊ຺ຊຕິ, ສກວາຈາຍ ວຸຏ຺ຐາຕິ; ອຕ຺ຖາປຕ຺ຕິ ປຣວາຈາຍ ອາປຊ຺ຊຕິ, ປຣວາຈາຍ ວຸຏ຺ຐາຕິ. ອຕ຺ຖາປຕ຺ຕິ ກາເຍນ ອາປຊ຺ຊຕິ, ວາຈາຍ ວຸຏ຺ຐາຕິ; ອຕ຺ຖາປຕ຺ຕິ ວາຈາຍ ອາປຊ຺ຊຕິ, ກາເຍນ ວຸຏ຺ຐາຕິ; ອຕ຺ຖາປຕ຺ຕິ ກາເຍນ ອາປຊ຺ຊຕິ, ກາເຍນ ວຸຏ຺ຐາຕິ; ອຕ຺ຖາປຕ຺ຕິ ວາຈາຍ ອາປຊ຺ຊຕິ, ວາຈາຍ ວຸຏ຺ຐາຕິ. ອຕ຺ຖາປຕ຺ຕິ ປສຸຕ຺ໂຕ ອາປຊ຺ຊຕິ, ປຏິພຸທ຺ໂຘ ວຸຏ຺ຐາຕິ; ອຕ຺ຖາປຕ຺ຕິ ປຏິພຸທ຺ໂຘ ອາປຊ຺ຊຕິ, ປສຸຕ຺ໂຕ ວຸຏ຺ຐາຕິ; ອຕ຺ຖາປຕ຺ຕິ ປສຸຕ຺ໂຕ ອາປຊ຺ຊຕິ, ປສຸຕ຺ໂຕ ວຸຏ຺ຐາຕິ; ອຕ຺ຖາປຕ຺ຕິ ປຏິພຸທ຺ໂຘ ອາປຊ຺ຊຕິ, ປຏິພຸທ຺ໂຘ ວຸຏ຺ຐາຕິ. ອຕ຺ຖາປຕ຺ຕິ ອຈິຕ຺ຕໂກ ອາປຊ຺ຊຕິ, ສຈິຕ຺ຕໂກ ວຸຏ຺ຐາຕິ; ອຕ຺ຖາປຕ຺ຕິ ສຈິຕ຺ຕໂກ ອາປຊ຺ຊຕິ, ອຈິຕ຺ຕໂກ ວຸຏ຺ຐາຕິ; ອຕ຺ຖາປຕ຺ຕິ ອຈິຕ຺ຕໂກ ອາປຊ຺ຊຕິ, ອຈິຕ຺ຕໂກ ວຸຏ຺ຐາຕິ; ອຕ຺ຖາປຕ຺ຕິ ສຈິຕ຺ຕໂກ ອາປຊ຺ຊຕິ, ສຈິຕ຺ຕໂກ ວຸຏ຺ຐາຕິ. ອຕ຺ຖາປຕ຺ຕິ ອາປຊ຺ຊນ຺ໂຕ ເທເສຕິ; ເທເສນ຺ໂຕ ອາປຊ຺ຊຕິ; ອຕ຺ຖາປຕ຺ຕິ ອາປຊ຺ຊນ຺ໂຕ ວຸຏ຺ຐາຕິ; ວຸຏ຺ຐຫນ຺ໂຕ ອາປຊ຺ຊຕິ. ອຕ຺ຖາປຕ຺ຕິ ກມ຺ເມນ ອາປຊ຺ຊຕິ, ອກມ຺ເມນ ວຸຏ຺ຐາຕິ; ອຕ຺ຖາປຕ຺ຕິ ອກມ຺ເມນ ອາປຊ຺ຊຕິ, ກມ຺ເມນ ວຸຏ຺ຐາຕິ; ອຕ຺ຖາປຕ຺ຕິ ກມ຺ເມນ ອາປຊ຺ຊຕິ, ກມ຺ເມນ ວຸຏ຺ຐາຕິ; ອຕ຺ຖາປຕ຺ຕິ ອກມ຺ເມນ ອາປຊ຺ຊຕິ, ອກມ຺ເມນ ວຸຏ຺ຐາຕິ.

[ອ. ນິ. ໔.໒໕໐; ທີ. ນິ. ໓.໓໑໓; ວິຠ. ໙໓໙] ຈຕ຺ຕາໂຣ ອນຣິຍໂວຫາຣາ – ອທິຏ຺ເຐ ທິຏ຺ຐວາທິຕາ, ອສ຺ສຸເຕ ສຸຕວາທິຕາ, ອມຸເຕ ມຸຕວາທິຕາ, ອວິຎ຺ຎາເຕ ວິຎ຺ຎາຕວາທິຕາ. ຈຕ຺ຕາໂຣ ອຣິຍໂວຫາຣາ – ອທິຏ຺ເຐ ອທິຏ຺ຐວາທິຕາ, ອສ຺ສຸເຕ ອສ຺ສຸຕວາທິຕາ, ອມຸເຕ ອມຸຕວາທິຕາ, ອວິຎ຺ຎາເຕ ອວິຎ຺ຎາຕວາທິຕາ. ອປເຣປິ ຈຕ຺ຕາໂຣ ອນຣິຍໂວຫາຣາ – ທິຏ຺ເຐ ອທິຏ຺ຐວາທິຕາ, ສຸເຕ ອສ຺ສຸຕວາທິຕາ, ມຸເຕ ອມຸຕວາທິຕາ, ວິຎ຺ຎາເຕ ອວິຎ຺ຎາຕວາທິຕາ. ຈຕ຺ຕາໂຣ ອຣິຍໂວຫາຣາ – ທິຏ຺ເຐ ທິຏ຺ຐວາທິຕາ, ສຸເຕ ສຸຕວາທິຕາ, ມຸເຕ ມຸຕວາທິຕາ, ວິຎ຺ຎາເຕ ວິຎ຺ຎາຕວາທິຕາ.

ຈຕ຺ຕາໂຣ ປາຣາຊິກາ ຠິກ຺ຂູນໍ ຠິກ຺ຂຸນີຫິ ສາຘາຣຓາ; ຈຕ຺ຕາໂຣ ປາຣາຊິກາ ຠິກ຺ຂຸນີນໍ ຠິກ຺ຂູຫິ ອສາຘາຣຓາ. ຈຕ຺ຕາໂຣ ປຣິກ຺ຂາຣາ – ອຕ຺ຖິ ປຣິກ຺ຂາໂຣ ຣກ຺ຂິຕພ຺ໂພ ໂຄເປຕພ຺ໂພ ມມາຍິຕພ຺ໂພ ປຣິຠຸຎ຺ຊິຕພ຺ໂພ; ອຕ຺ຖິ ປຣິກ຺ຂາໂຣ ຣກ຺ຂິຕພ຺ໂພ ໂຄເປຕພ຺ໂພ ມມາຍິຕພ຺ໂພ, ນ ປຣິຠຸຎ຺ຊິຕພ຺ໂພ; ອຕ຺ຖິ ປຣິກ຺ຂາໂຣ ຣກ຺ຂິຕພ຺ໂພ ໂຄເປຕພ຺ໂພ, ນ ມມາຍິຕພ຺ໂພ ນ ປຣິຠຸຎ຺ຊິຕພ຺ໂພ; ອຕ຺ຖິ ປຣິກ຺ຂາໂຣ ນ ຣກ຺ຂິຕພ຺ໂພ ນ ໂຄເປຕພ຺ໂພ, ນ ມມາຍິຕພ຺ໂພ ນ ປຣິຠຸຎ຺ຊິຕພ຺ໂພ. ອຕ຺ຖາປຕ຺ຕິ ສມ຺ມຸຂາ ອາປຊ຺ຊຕິ, ປຣມ຺ມຸຂາ ວຸຏ຺ຐາຕິ; ອຕ຺ຖາປຕ຺ຕິ ປຣມ຺ມຸຂາ ອາປຊ຺ຊຕິ, ສມ຺ມຸຂາ ວຸຏ຺ຐາຕິ; ອຕ຺ຖາປຕ຺ຕິ ສມ຺ມຸຂາ ອາປຊ຺ຊຕິ, ສມ຺ມຸຂາ ວຸຏ຺ຐາຕິ; ອຕ຺ຖາປຕ຺ຕິ ປຣມ຺ມຸຂາ ອາປຊ຺ຊຕິ, ປຣມ຺ມຸຂາ ວຸຏ຺ຐາຕິ. ອຕ຺ຖາປຕ຺ຕິ ອຊານນ຺ໂຕ ອາປຊ຺ຊຕິ, ຊານນ຺ໂຕ ວຸຏ຺ຐາຕິ; ອຕ຺ຖາປຕ຺ຕິ ຊານນ຺ໂຕ ອາປຊ຺ຊຕິ, ອຊານນ຺ໂຕ ວຸຏ຺ຐາຕິ; ອຕ຺ຖາປຕ຺ຕິ ອຊານນ຺ໂຕ ອາປຊ຺ຊຕິ, ອຊານນ຺ໂຕ ວຸຏ຺ຐາຕິ; ອຕ຺ຖາປຕ຺ຕິ ຊານນ຺ໂຕ ອາປຊ຺ຊຕິ, ຊານນ຺ໂຕ ວຸຏ຺ຐາຕິ.

ຈຕູຫາກາເຣຫິ ອາປຕ຺ຕິໍ ອາປຊ຺ຊຕິ – ກາເຍນ ອາປຊ຺ຊຕິ, ວາຈາຍ ອາປຊ຺ຊຕິ, ກາເຍນ ວາຈາຍ ອາປຊ຺ຊຕິ, ກມ຺ມວາຈາຍ ອາປຊ຺ຊຕິ. ອປເຣຫິປິ ຈຕູຫາກາເຣຫິ ອາປຕ຺ຕິໍ ອາປຊ຺ຊຕິ – ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ, ລິງ຺ຄປາຕຸຠາເວນ. ຈຕູຫາກາເຣຫິ ອາປຕ຺ຕິຍາ ວຸຏ຺ຐາຕິ – ກາເຍນ ວຸຏ຺ຐາຕິ, ວາຈາຍ ວຸຏ຺ຐາຕິ, ກາເຍນ ວາຈາຍ ວຸຏ຺ຐາຕິ, ກມ຺ມວາຈາຍ ວຸຏ຺ຐາຕິ. ອປເຣຫິປິ ຈຕູຫາກາເຣຫິ ອາປຕ຺ຕິຍາ ວຸຏ຺ຐາຕິ – ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ, ລິງ຺ຄປາຕຸຠາເວນ. ສຫ ປຏິລາເຠນ ປຸຣິມໍ ຊຫຕິ, ປຈ຺ຉິເມ ປຕິຏ຺ຐາຕິ, ວິຎ຺ຎຕ຺ຕິໂຍ ປຏິປ຺ປສ຺ສມ຺ຠນ຺ຕິ, ປຓ຺ຓຕ຺ຕິໂຍ ນິຣຸຊ຺ຌນ຺ຕິ. ສຫ ປຏິລາເຠນ ປຈ຺ຉິມໍ ຊຫຕິ, ປຸຣິເມ ປຕິຏ຺ຐາຕິ, ວິຎ຺ຎຕ຺ຕິໂຍ ປຏິປ຺ປສ຺ສມ຺ຠນ຺ຕິ, ປຓ຺ຓຕ຺ຕິໂຍ ນິຣຸຊ຺ຌນ຺ຕິ. ຈຕສ຺ໂສ ໂຈທນາ – ສີລວິປຕ຺ຕິຍາ ໂຈເທຕິ, ອາຈາຣວິປຕ຺ຕິຍາ ໂຈເທຕິ, ທິຏ຺ຐິວິປຕ຺ຕິຍາ ໂຈເທຕິ, ອາຊີວວິປຕ຺ຕິຍາ ໂຈເທຕິ. ຈຕ຺ຕາໂຣ ປຣິວາສາ – ປຏິຈ຺ຉນ຺ນປຣິວາໂສ, ອປ຺ປຏິຈ຺ຉນ຺ນປຣິວາໂສ, ສຸທ຺ຘນ຺ຕປຣິວາໂສ, ສໂມຘານປຣິວາໂສ. ຈຕ຺ຕາໂຣ ມານຕ຺ຕາ – ປຏິຈ຺ຉນ຺ນມານຕ຺ຕໍ, ອປ຺ປຏິຈ຺ຉນ຺ນມານຕ຺ຕໍ, ປກ຺ຂມານຕ຺ຕໍ, ສໂມຘານມານຕ຺ຕໍ. ຈຕ຺ຕາໂຣ ມານຕ຺ຕຈາຣິກສ຺ສ ຠິກ຺ຂຸໂນ ຣຕ຺ຕິຈ຺ເຉທາ – ສຫວາໂສ, ວິປ຺ປວາໂສ, ອນາໂຣຈນາ, ອູເນ ຄເຓ ຈຣຕິ. ຈຕ຺ຕາໂຣ ສາມຸກ຺ກໍສາ. ຈຕ຺ຕາໂຣ ປຏິຄ຺ຄຫິຕປຣິໂຠຄາ – ຍາວກາລິກໍ, ຍາມກາລິກໍ, ສຕ຺ຕາຫກາລິກໍ, ຍາວຊີວິກໍ. ຈຕ຺ຕາຣິ ມຫາວິກຏານິ – ຄູໂຖ, ມຸຕ຺ຕໍ, ຉາຣິກາ, ມຕ຺ຕິກາ. ຈຕ຺ຕາຣິ ກມ຺ມານິ – ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ. ອປຣານິປິ ຈຕ຺ຕາຣິ ກມ຺ມານິ – ອຘມ຺ເມນ ວຄ຺ຄກມ຺ມໍ, ອຘມ຺ເມນ ສມຄ຺ຄກມ຺ມໍ, ຘມ຺ເມນ ວຄ຺ຄກມ຺ມໍ, ຘມ຺ເມນ ສມຄ຺ຄກມ຺ມໍ. ຈຕສ຺ໂສ ວິປຕ຺ຕິໂຍ – ສີລວິປຕ຺ຕິ, ອາຈາຣວິປຕ຺ຕິ, ທິຏ຺ຐິວິປຕ຺ຕິ, ອາຊີວວິປຕ຺ຕິ. ຈຕ຺ຕາຣິ ອຘິກຣຓານິ – ວິວາທາຘິກຣຓໍ, ອນຸວາທາຘິກຣຓໍ, ອາປຕ຺ຕາຘິກຣຓໍ, ກິຈ຺ຈາຘິກຣຓໍ. [ອ. ນິ. ໔.໒໑໑] ຈຕ຺ຕາໂຣ ປຣິສທູສນາ – ຠິກ຺ຂຸ ທຸສ຺ສີໂລ ປາປຘມ຺ໂມ ປຣິສທູສໂນ, ຠິກ຺ຂຸນີ ທຸສ຺ສີລາ ປາປຘມ຺ມາ ປຣິສທູສນາ, ອຸປາສໂກ ທຸສ຺ສີໂລ ປາປຘມ຺ໂມ ປຣິສທູສໂນ, ອຸປາສິກາ ທຸສ຺ສີລາ ປາປຘມ຺ມາ ປຣິສທູສນາ. ຈຕ຺ຕາໂຣ ປຣິສໂສຠນາ [ປຣິສໂສຠຓາ (ສ຺ຍາ. ກ.)] – ຠິກ຺ຂຸ ສີລວາ ກລ຺ຍາຓຘມ຺ໂມ ປຣິສໂສຠໂນ, ຠິກ຺ຂຸນີ ສີລວຕີ ກລ຺ຍາຓຘມ຺ມາ ປຣິສໂສຠນາ, ອຸປາສໂກ ສີລວາ ກລ຺ຍາຓຘມ຺ໂມ ປຣິສໂສຠໂນ, ອຸປາສິກາ ສີລວຕີ ກລ຺ຍາຓຘມ຺ມາ ປຣິສໂສຠນາ.

ອຕ຺ຖາປຕ຺ຕິ ອາຄນ຺ຕຸໂກ ອາປຊ຺ຊຕິ, ໂນ ອາວາສິໂກ; ອຕ຺ຖາປຕ຺ຕິ ອາວາສິໂກ ອາປຊ຺ຊຕິ, ໂນ ອາຄນ຺ຕຸໂກ; ອຕ຺ຖາປຕ຺ຕິ ອາຄນ຺ຕຸໂກ ເຈວ ອາປຊ຺ຊຕິ ອາວາສິໂກ ຈ ອຕ຺ຖາປຕ຺ຕິ ເນວ ອາຄນ຺ຕຸໂກ ອາປຊ຺ຊຕິ, ໂນ ອາວາສິໂກ. ອຕ຺ຖາປຕ຺ຕິ ຄມິໂກ ອາປຊ຺ຊຕິ, ໂນ ອາວາສິໂກ; ອຕ຺ຖາປຕ຺ຕິ ອາວາສິໂກ ອາປຊ຺ຊຕິ, ໂນ ຄມິໂກ; ອຕ຺ຖາປຕ຺ຕິ ຄມິໂກ ເຈວ ອາປຊ຺ຊຕິ ອາວາສິໂກ ຈ; ອຕ຺ຖາປຕ຺ຕິ ເນວ ຄມິໂກ ອາປຊ຺ຊຕິ ໂນ ອາວາສິໂກ. ອຕ຺ຖິ ວຕ຺ຖຸນານຕ຺ຕຕາ ໂນ ອາປຕ຺ຕິນານຕ຺ຕຕາ, ອຕ຺ຖິ ອາປຕ຺ຕິນານຕ຺ຕຕາ ໂນ ວຕ຺ຖຸນານຕ຺ຕຕາ, ອຕ຺ຖິ ວຕ຺ຖຸນານຕ຺ຕຕາ ເຈວ ອາປຕ຺ຕິນານຕ຺ຕຕາ ຈ, ອຕ຺ຖິ ເນວ ວຕ຺ຖຸນານຕ຺ຕຕາ ໂນ ອາປຕ຺ຕິນານຕ຺ຕຕາ. ອຕ຺ຖິ ວຕ຺ຖຸສຠາຄຕາ ໂນ ອາປຕ຺ຕິສຠາຄຕາ, ອຕ຺ຖິ ອາປຕ຺ຕິສຠາຄຕາ ໂນ ວຕ຺ຖຸສຠາຄຕາ, ອຕ຺ຖິ ວຕ຺ຖຸສຠາຄຕາ ເຈວ ອາປຕ຺ຕິສຠາຄຕາ ຈ ອຕ຺ຖິ ເນວ ວຕ຺ຖຸສຠາຄຕາ ໂນ ອາປຕ຺ຕິສຠາຄຕາ. ອຕ຺ຖາປຕ຺ຕິ ອຸປຊ຺ຌາໂຍ ອາປຊ຺ຊຕິ ໂນ ສທ຺ຘິວິຫາຣິໂກ, ອຕ຺ຖາປຕ຺ຕິ ສທ຺ຘິວິຫາຣິໂກ ອາປຊ຺ຊຕິ ໂນ ອຸປຊ຺ຌາໂຍ, ອຕ຺ຖາປຕ຺ຕິ ອຸປຊ຺ຌາໂຍ ເຈວ ອາປຊ຺ຊຕິ ສທ຺ຘິວິຫາຣິໂກ ຈ, ອຕ຺ຖາປຕ຺ຕິ ເນວ ອຸປຊ຺ຌາໂຍ ອາປຊ຺ຊຕິ ໂນ ສທ຺ຘິວິຫາຣິໂກ. ອຕ຺ຖາປຕ຺ຕິ ອາຈຣິໂຍ ອາປຊ຺ຊຕິ ໂນ ອນ຺ເຕວາສິໂກ, ອຕ຺ຖາປຕ຺ຕິ ອນ຺ເຕວາສິໂກ ອາປຊ຺ຊຕິ ໂນ ອາຈຣິໂຍ, ອຕ຺ຖາປຕ຺ຕິ ອາຈຣິໂຍ ເຈວ ອາປຊ຺ຊຕິ ອນ຺ເຕວາສິໂກ ຈ, ອຕ຺ຖາປຕ຺ຕິ ເນວ ອາຈຣິໂຍ ອາປຊ຺ຊຕິ ໂນ ອນ຺ເຕວາສິໂກ. ຈຕ຺ຕາໂຣ ປຈ຺ຈຍາ ອນາປຕ຺ຕິ ວສ຺ສຈ຺ເຉທສ຺ສ – ສງ຺ໂຆ ວາ ຠິນ຺ໂນ ໂຫຕິ, ສງ຺ຆໍ ວາ ຠິນ຺ທິຕຸກາມາ ໂຫນ຺ຕິ, ຊີວິຕນ຺ຕຣາໂຍ ວາ ໂຫຕິ, ພ຺ຣຫ຺ມຈຣິຍນ຺ຕຣາໂຍ ວາ ໂຫຕິ. ຈຕ຺ຕາຣິ ວຈີທຸຈ຺ຈຣິຕານິ – ມຸສາວາໂທ, ປິສຸຓາ ວາຈາ, ຜຣຸສາ ວາຈາ, ສມ຺ຜປ຺ປລາໂປ. ຈຕ຺ຕາຣິ ວຈີສຸຈຣິຕານິ – ສຈ຺ຈວາຈາ, ອປິສຸຓາ ວາຈາ, ສຓ຺ຫາ ວາຈາ, ມນ຺ຕາ ຠາສາ. ອຕ຺ຖິ ອາທິຍນ຺ໂຕ ຄຣຸກໍ ອາປຕ຺ຕິໍ ອາປຊ຺ຊຕິ, ປໂຍເຊນ຺ໂຕ ລຫຸກໍ; ອຕ຺ຖິ ອາທິຍນ຺ໂຕ ລຫຸກໍ ອາປຕ຺ຕິໍ ອາປຊ຺ຊຕິ, ປໂຍເຊນ຺ໂຕ ຄຣຸກໍ, ອຕ຺ຖິ ອາທິຍນ຺ໂຕປິ ປໂຍເຊນ຺ໂຕປິ ຄຣຸກໍ ອາປຕ຺ຕິໍ ອາປຊ຺ຊຕິ; ອຕ຺ຖິ ອາທິຍນ຺ໂຕປິ ປໂຍເຊນ຺ໂຕປິ ລຫຸກໍ ອາປຕ຺ຕິໍ ອາປຊ຺ຊຕິ.

ອຕ຺ຖິ ປຸຄ຺ຄໂລ ອຠິວາທນາຣໂຫ, ໂນ ປຈ຺ຈຸຏ຺ຐານາຣໂຫ; ອຕ຺ຖິ ປຸຄ຺ຄໂລ ປຈ຺ຈຸຏ຺ຐານາຣໂຫ, ໂນ ອຠິວາທນາຣໂຫ; ອຕ຺ຖິ ປຸຄ຺ຄໂລ ອຠິວາທນາຣໂຫ ເຈວ ປຈ຺ຈຸຏ຺ຐານາຣໂຫ ຈ; ອຕ຺ຖິ ປຸຄ຺ຄໂລ ເນວ ອຠິວາທນາຣໂຫ ໂນ ປຈ຺ຈຸຏ຺ຐານາຣໂຫ. ອຕ຺ຖິ ປຸຄ຺ຄໂລ ອາສນາຣໂຫ, ໂນ ອຠິວາທນາຣໂຫ; ອຕ຺ຖິ ປຸຄ຺ຄໂລ ອຠິວາທນາຣໂຫ, ໂນ ອາສນາຣໂຫ; ອຕ຺ຖິ ປຸຄ຺ຄໂລ ອາສນາຣໂຫ ເຈວ ອຠິວາທນາຣໂຫ ຈ; ອຕ຺ຖິ ປຸຄ຺ຄໂລ ເນວ ອາສນາຣໂຫ ໂນ ອຠິວາທນາຣໂຫ. ອຕ຺ຖາປຕ຺ຕິ ກາເລ ອາປຊ຺ຊຕິ, ໂນ ວິກາເລ; ອຕ຺ຖາປຕ຺ຕິ ວິກາເລ ອາປຊ຺ຊຕິ, ໂນ ກາເລ; ອຕ຺ຖາປຕ຺ຕິ ກາເລ ເຈວ ອາປຊ຺ຊຕິ ວິກາເລ ຈ; ອຕ຺ຖາປຕ຺ຕິ ເນວ ກາເລ ອາປຊ຺ຊຕິ ໂນ ວິກາເລ. ອຕ຺ຖິ ປຏິຄ຺ຄຫິຕໍ ກາເລ ກປ຺ປຕິ, ໂນ ວິກາເລ; ອຕ຺ຖິ ປຏິຄ຺ຄຫິຕໍ ວິກາເລ ກປ຺ປຕິ, ໂນ ກາເລ; ອຕ຺ຖິ ປຏິຄ຺ຄຫິຕໍ ກາເລ ເຈວ ກປ຺ປຕິ ວິກາເລ ຈ; ອຕ຺ຖິ ປຏິຄ຺ຄຫິຕໍ ເນວ ກາເລ ກປ຺ປຕິ ໂນ ວິກາເລ. ອຕ຺ຖາປຕ຺ຕິ ປຈ຺ຈນ຺ຕິເມສຸ ຊນປເທສຸ ອາປຊ຺ຊຕິ, ໂນ ມຊ຺ຌິເມສຸ; ອຕ຺ຖາປຕ຺ຕິ ມຊ຺ຌິເມສຸ ຊນປເທສຸ ອາປຊ຺ຊຕິ, ໂນ ປຈ຺ຈນ຺ຕິເມສຸ; ອຕ຺ຖາປຕ຺ຕິ ປຈ຺ຈນ຺ຕິເມສຸ ເຈວ ຊນປເທສຸ ອາປຊ຺ຊຕິ ມຊ຺ຌິເມສຸ ຈ; ອຕ຺ຖາປຕ຺ຕິ ເນວ ປຈ຺ຈນ຺ຕິເມສຸ ຊນປເທສຸ ອາປຊ຺ຊຕິ ໂນ ມຊ຺ຌິເມສຸ. ອຕ຺ຖິ ປຈ຺ຈນ຺ຕິເມສຸ ຊນປເທສຸ ກປ຺ປຕິ, ໂນ ມຊ຺ຌິເມສຸ; ອຕ຺ຖິ ມຊ຺ຌິເມສຸ ຊນປເທສຸ ກປ຺ປຕິ, ໂນ ປຈ຺ຈນ຺ຕິເມສຸ; ອຕ຺ຖິ ປຈ຺ຈນ຺ຕິເມສຸ ເຈວ ຊນປເທສຸ ກປ຺ປຕິ ມຊ຺ຌິເມສຸ ຈ; ອຕ຺ຖິ ເນວ ປຈ຺ຈນ຺ຕິເມສຸ ຊນປເທສຸ ກປ຺ປຕິ ໂນ ມຊ຺ຌິເມສຸ. ອຕ຺ຖາປຕ຺ຕິ ອນ຺ໂຕ ອາປຊ຺ຊຕິ, ໂນ ພຫິ; ອຕ຺ຖາປຕ຺ຕິ ພຫິ ອາປຊ຺ຊຕິ, ໂນ ອນ຺ໂຕ; ອຕ຺ຖາປຕ຺ຕິ ອນ຺ໂຕ ເຈວ ອາປຊ຺ຊຕິ ພຫິ ຈ; ອຕ຺ຖາປຕ຺ຕິ ເນວ ອນ຺ໂຕ ອາປຊ຺ຊຕິ ໂນ ພຫິ. ອຕ຺ຖາປຕ຺ຕິ ອນ຺ໂຕສີມາຍ ອາປຊ຺ຊຕິ, ໂນ ພຫິສີມາຍ; ອຕ຺ຖາປຕ຺ຕິ ພຫິສີມາຍ ອາປຊ຺ຊຕິ, ໂນ ອນ຺ໂຕສີມາຍ; ອຕ຺ຖາປຕ຺ຕິ ອນ຺ໂຕສີມາຍ ເຈວ ອາປຊ຺ຊຕິ ພຫິສີມາຍ ຈ; ອຕ຺ຖາປຕ຺ຕິ ເນວ ອນ຺ໂຕສີມາຍ ອາປຊ຺ຊຕິ ໂນ ພຫິສີມາຍ. ອຕ຺ຖາປຕ຺ຕິ ຄາເມ ອາປຊ຺ຊຕິ, ໂນ ອຣຎ຺ເຎ; ອຕ຺ຖາປຕ຺ຕິ ອຣຎ຺ເຎ ອາປຊ຺ຊຕິ, ໂນ ຄາເມ; ອຕ຺ຖາປຕ຺ຕິ ຄາເມ ເຈວ ອາປຊ຺ຊຕິ ອຣຎ຺ເຎ ຈ; ອຕ຺ຖາປຕ຺ຕິ ເນວ ຄາເມ ອາປຊ຺ຊຕິ ໂນ ອຣຎ຺ເຎ.

ຈຕສ຺ໂສ ໂຈທນາ – ວຕ຺ຖຸສນ຺ທສ຺ສນາ, ອາປຕ຺ຕິສນ຺ທສ຺ສນາ, ສໍວາສປຏິກ຺ເຂໂປ, ສາມີຈິປຏິກ຺ເຂໂປ. ຈຕ຺ຕາໂຣ ປຸພ຺ພກິຈ຺ຈາ. ຈຕ຺ຕາໂຣ ປຕ຺ຕກລ຺ລາ. ຈຕ຺ຕາຣິ ອນຎ຺ຎປາຈິຕ຺ຕິຍານິ. ຈຕສ຺ໂສ ຠິກ຺ຂຸສມ຺ມຸຕິໂຍ. [ອ. ນິ. ໔.໑໗; ວິຠ. ໙໓໙; ທີ. ນິ. ໓.໓໑໑] ຈຕ຺ຕາຣິ ອຄຕິຄມນານິ – ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ຈຕ຺ຕາຣິ ນາຄຕິຄມນານິ – ນ ຉນ຺ທາຄຕິໍ ຄຈ຺ຉຕິ, ນ ໂທສາຄຕິໍ ຄຈ຺ຉຕິ, ນ ໂມຫາຄຕິໍ ຄຈ຺ຉຕິ, ນ ຠຍາຄຕິໍ ຄຈ຺ຉຕິ. ຈຕູຫງ຺ເຄຫິ ສມນ຺ນາຄໂຕ ອລຊ຺ຊີ ຠິກ຺ຂຸ ສງ຺ຆໍ ຠິນ຺ທຕິ – ຉນ຺ທາຄຕິໍ ຄຈ຺ຉນ຺ໂຕ, ໂທສາຄຕິໍ ຄຈ຺ຉນ຺ໂຕ, ໂມຫາຄຕິໍ ຄຈ຺ຉນ຺ໂຕ, ຠຍາຄຕິໍ ຄຈ຺ຉນ຺ໂຕ. ຈຕູຫງ຺ເຄຫິ ສມນ຺ນາຄໂຕ ເປສໂລ ຠິກ຺ຂຸ ຠິນ຺ນໍ ສງ຺ຆໍ ສມຄ຺ຄໍ ກໂຣຕິ – ນ ຉນ຺ທາຄຕິໍ ຄຈ຺ຉນ຺ໂຕ, ນ ໂທສາຄຕິໍ ຄຈ຺ຉນ຺ໂຕ, ນ ໂມຫາຄຕິໍ ຄຈ຺ຉນ຺ໂຕ, ນ ຠຍາຄຕິໍ ຄຈ຺ຉນ຺ໂຕ. ຈຕູຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ວິນໂຍ ນ ປຸຈ຺ຉິຕພ຺ໂພ – ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ຈຕູຫງ຺ເຄຫິ ສມນ຺ນາຄເຕນ ຠິກ຺ຂຸນາ ວິນໂຍ ນ ປຸຈ຺ຉິຕພ຺ໂພ – ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ຈຕູຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ວິນໂຍ ນ ວິສ຺ສຊ຺ເຊຕພ຺ໂພ – ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ຈຕູຫງ຺ເຄຫິ ສມນ຺ນາຄເຕນ ຠິກ຺ຂຸນາ ວິນໂຍ ນ ວິສ຺ສຊ຺ເຊຕພ຺ໂພ – ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ຈຕູຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ອນຸໂຍໂຄ ນ ທາຕພ຺ໂພ – ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ຈຕູຫງ຺ເຄຫິ ສມນ຺ນາຄເຕ ຠິກ຺ຂຸນາ ສທ຺ຘິໍ ວິນໂຍ ນ ສາກຈ຺ຉິຕພ຺ໂພ – ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ອຕ຺ຖາປຕ຺ຕິ ຄິລາໂນ ອາປຊ຺ຊຕິ, ໂນ ອຄິລາໂນ; ອຕ຺ຖາປຕ຺ຕິ ອຄິລາໂນ ອາປຊ຺ຊຕິ, ໂນ ຄິລາໂນ; ອຕ຺ຖາປຕ຺ຕິ ຄິລາໂນ ເຈວ ອາປຊ຺ຊຕິ ອຄິລາໂນ ຈ; ອຕ຺ຖາປຕ຺ຕິ ເນວ ຄິລາໂນ ອາປຊ຺ຊຕິ ໂນ ອຄິລາໂນ. ຈຕ຺ຕາຣິ ອຘມ຺ມິການິ ປາຕິໂມກ຺ຂຏ຺ຐປນານິ. ຈຕ຺ຕາຣິ ຘມ຺ມິການິ ປາຕິໂມກ຺ຂຏ຺ຐປນານິ.

ຈຕຸກ຺ກໍ ນິຏ຺ຐິຕໍ.

ຕສ຺ສຸທ຺ທານໍ –

ສກວາຈາຍ ກາເຍນ, ປສຸຕ຺ໂຕ ຈ ອຈິຕ຺ຕໂກ;

ອາປຊ຺ຊນ຺ໂຕ ຈ ກມ຺ເມນ, ໂວຫາຣາ ຈຕຸໂຣ ຕຖາ.

ຠິກ຺ຂູນໍ ຠິກ຺ຂຸນີນຎ຺ຈ, ປຣິກ຺ຂາໂຣ ຈ ສມ຺ມຸຂາ;

ອຊານກາເຍ ມຊ຺ເຌ ຈ, ວຸຏ຺ຐາຕິ ທຸວິຘາ ຕຖາ.

ປຏິລາເຠນ ໂຈທນາ, ປຣິວາສາ ຈ ວຸຈ຺ຈຕິ;

ມານຕ຺ຕຈາຣິກາ ຈາປິ, ສາມຸກ຺ກໍສາ ປຏິຄ຺ຄຫິ.

ມຫາວິກຏກມ຺ມານິ, ປຸນ ກມ຺ເມ ວິປຕ຺ຕິໂຍ;

ອຘິກຣຓາ ທຸສ຺ສີລາ ຈ, ໂສຠນາຄນ຺ຕຸເກນ ຈ.

ຄມິໂກ ວຕ຺ຖຸນານຕ຺ຕາ, ສຠາຄຸປຊ຺ຌາເຍນ ຈ;

ອາຈຣິໂຍ ປຈ຺ຈຍາ ວາ, ທຸຈ຺ຈຣິຕໍ ສຸຈຣິຕໍ.

ອາທິຍນ຺ໂຕ ປຸຄ຺ຄໂລ ຈ, ອຣໂຫ ອາສເນນ ຈ;

ກາເລ ຈ ກປ຺ປຕິ ເຈວ, ປຈ຺ຈນ຺ຕິເມສຸ ກປ຺ປຕິ.

ອນ຺ໂຕ ອນ຺ໂຕ ຈ ສີມາຍ, ຄາເມ ຈ ໂຈທນາຍ ຈ;

ປຸພ຺ພກິຈ຺ຈໍ ປຕ຺ຕກລ຺ລໍ, ອນຎ຺ຎາ ສມ຺ມຸຕິໂຍ ຈ.

ອຄຕິ ນາຄຕິ ເຈວ, ອລຊ຺ຊີ ເປສເລນ ຈ;

ປຸຈ຺ຉິຕພ຺ພາ ທຸເວ ເຈວ, ວິສ຺ສຊ຺ເຊຍ຺ຍາ ຕຖາ ທຸເວ;

ອນຸໂຍໂຄ ຈ ສາກຈ຺ຉາ, ຄິລາໂນ ຐປເນນ ຈາຕິ.

໕. ປຎ຺ຈກວາໂຣ

໓໒໕. ປຎ຺ຈ ອາປຕ຺ຕິໂຍ. ປຎ຺ຈ ອາປຕ຺ຕິກ຺ຂນ຺ຘາ. ປຎ຺ຈ ວິນີຕວຕ຺ຖູນິ. ປຎ຺ຈ ກມ຺ມານິ ອານນ຺ຕຣິການິ. ປຎ຺ຈ ປຸຄ຺ຄລາ ນິຍຕາ. ປຎ຺ຈ ເຉທນກາ ອາປຕ຺ຕິໂຍ. ປຎ຺ຈຫາກາເຣຫິ ອາປຕ຺ຕິໍ ອາປຊ຺ຊຕິ. ປຎ຺ຈ ອາປຕ຺ຕິໂຍ. ມຸສາວາທປຈ຺ຈຍາ ປຎ຺ຈຫາກາເຣຫິ ກມ຺ມໍ ນ ອຸເປຕິ – ສຍໍ ວາ ກມ຺ມໍ ນ ກໂຣຕິ, ປຣໍ ວາ ນ ອຊ຺ເຌສຕິ, ຉນ຺ທໍ ວາ ປາຣິສຸທ຺ຘິໍ ວາ ນ ເທຕິ, ກຍິຣມາເນ ກມ຺ເມ ປຏິກ຺ໂກສຕິ, ກເຕ ວາ ປນ ກມ຺ເມ ອຘມ຺ມທິຏ຺ຐິ ໂຫຕິ. ປຎ຺ຈຫາກາເຣຫິ ກມ຺ມໍ ອຸເປຕິ – ສຍໍ ວາ ກມ຺ມໍ ກໂຣຕິ, ປຣໍ ວາ ອຊ຺ເຌສຕິ, ຉນ຺ທໍ ວາ ປາຣິສຸທ຺ຘິໍ ວາ ເທຕິ, ກຍິຣມາເນ ກມ຺ເມ ນປ຺ປຏິກ຺ໂກສຕິ, ກເຕ ວາ ປນ ກມ຺ເມ ຘມ຺ມທິຏ຺ຐິ ໂຫຕິ. ປຎ຺ຈ ປິຓ຺ຑປາຕິກສ຺ສ ຠິກ຺ຂຸໂນ ກປ຺ປນ຺ຕິ – ອນາມນ຺ຕຈາໂຣ, ຄຓໂຠຊນໍ, ປຣມ຺ປຣໂຠຊນໍ, ອນຘິຏ຺ຐານໍ, ອວິກປ຺ປນາ. [ອ. ນິ. ໕.໑໐໒] ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ອຸສ຺ສງ຺ກິຕປຣິສງ຺ກິໂຕ ໂຫຕິ – ປາປຠິກ຺ຂຸປິ ອກຸປ຺ປຘມ຺ໂມປິ ເວສິຍາໂຄຈໂຣ ວາ ໂຫຕິ, ວິຘວາໂຄຈໂຣ ວາ ໂຫຕິ, ຖຸລ຺ລກຸມາຣິໂຄຈໂຣ ວາ ໂຫຕິ, ປຓ຺ຑກໂຄຈໂຣ ວາ ໂຫຕິ, ຠິກ຺ຂຸນິໂຄຈໂຣ ວາ ໂຫຕິ. ປຎ຺ຈ ເຕລານິ – ຕິລເຕລໍ, ສາສປເຕລໍ, ມຘຸກເຕລໍ, ເອຣຓ຺ຑກເຕລໍ, ວສາເຕລໍ. ປຎ຺ຈ ວສານິ – ອຈ຺ຉວສໍ, ມຈ຺ຉວສໍ, ສຸສຸກາວສໍ, ສູກຣວສໍ, ຄທ຺ຣຠວສໍ. [ອ. ນິ. ໕.໑໓໐; ທີ. ນິ. ໓.໓໑໖] ປຎ຺ຈ ພ຺ຍສນານິ – ຎາຕິພ຺ຍສນໍ, ໂຠຄພ຺ຍສນໍ, ໂຣຄພ຺ຍສນໍ, ສີລພ຺ຍສນໍ, ທິຏ຺ຐິພ຺ຍສນໍ. [ອ. ນິ. ໕.໑໓໐; ທີ. ນິ. ໓.໓໑໖] ປຎ຺ຈ ສມ຺ປທາ – ຎາຕິສມ຺ປທາ, ໂຠຄສມ຺ປທາ, ອໂຣຄສມ຺ປທາ, ສີລສມ຺ປທາ, ທິຏ຺ຐິສມ຺ປທາ. ປຎ຺ຈ ນິສ຺ສຍປຏິປ຺ປສ຺ສທ຺ຘິໂຍ ອຸປຊ຺ຌາຍມ຺ຫາ – ອຸປຊ຺ຌາໂຍ ປກ຺ກນ຺ໂຕ ວາ ໂຫຕິ, ວິພ຺ຠນ຺ໂຕ ວາ, ກາລງ຺ກໂຕ ວາ, ປກ຺ຂສງ຺ກນ຺ໂຕ ວາ, ອາຓຕ຺ຕິເຍວ ປຎ຺ຈມີ. ປຎ຺ຈ ປຸຄ຺ຄລາ ນ ອຸປສມ຺ປາເທຕພ຺ພາ – ອທ຺ຘານຫີໂນ, ອງ຺ຄຫີໂນ, ວຕ຺ຖຸວິປນ຺ໂນ, ກຣຓທຸກ຺ກຏໂກ, ອປຣິປູໂຣ. ປຎ຺ຈ ປໍສຸກູລານິ – ໂສສານິກໍ, ປາປຓິກໍ, ອຸນ຺ທູຣກ຺ຂາຍິກໍ, ອຸປຈິກກ຺ຂາຍິກໍ, ອຄ຺ຄິທຑ຺ຒໍ. ອປຣານິປິ ປຎ຺ຈ ປໍສຸກູລານິ – ໂຄຂາຍິກໍ, ອຊກ຺ຂາຍິກໍ, ຖູປຈີວຣໍ, ອາຠິເສກິກໍ, ຄຕປຏິຍາຄຕໍ [ຠຕປຏິຍາຠຕໍ (ກ.)]. ປຎ຺ຈ ອວຫາຣາ – ເຖຍ຺ຍາວຫາໂຣ, ປສຍ຺ຫາວຫາໂຣ, ປຣິກປ຺ປາວຫາໂຣ, ປຏິຈ຺ຉນ຺ນາວຫາໂຣ, ກຸສາວຫາໂຣ. ປຎ຺ຈ ມຫາໂຈຣາ ສນ຺ໂຕ ສໍວິຊ຺ຊມານາ ໂລກສ຺ມິໍ. ປຎ຺ຈ ອວິສ຺ສຊ຺ຊນິຍານິ. ປຎ຺ຈ ອເວຠງ຺ຄິຍານິ. ປຎ຺ຈາປຕ຺ຕິໂຍ ກາຍໂຕ ສມຸຏ຺ຐນ຺ຕິ, ນ ວາຈໂຕ ນ ຈິຕ຺ຕໂຕ. ປຎ຺ຈາປຕ຺ຕິໂຍ ກາຍໂຕ ຈ ວາຈໂຕ ຈ ສມຸຏ຺ຐນ຺ຕິ, ຈິຕ຺ຕໂຕ. ປຎ຺ຈາປຕ຺ຕິໂຍ ເທສນາຄາມິນິໂຍ. ປຎ຺ຈ ສງ຺ຆາ. ປຎ຺ຈ ປາຕິໂມກ຺ຂຸທ຺ເທສາ. ສພ຺ພປຈ຺ຈນ຺ຕິເມສຸ ຊນປເທສຸ ວິນຍຘຣປຎ຺ຈເມນ ຄເຓນ ອຸປສມ຺ປາເທຕພ຺ພໍ. ປຎ຺ຈານິສໍສາ ກຖິນຕ຺ຖາເຣ. ປຎ຺ຈ ກມ຺ມານິ. ຍາວຕຕິຍເກ ປຎ຺ຈ ອາປຕ຺ຕິໂຍ. ປຎ຺ຈຫາກາເຣຫິ ອທິນ຺ນໍ ອາທິຍນ຺ຕສ຺ສ ອາປຕ຺ຕິ ປາຣາຊິກສ຺ສ. ປຎ຺ຈຫາກາເຣຫິ ອທິນ຺ນໍ ອາທິຍນ຺ຕສ຺ສ ອາປຕ຺ຕິ ຖຸລ຺ລຈ຺ຈຍສ຺ສ. ປຎ຺ຈຫາກາເຣຫິ ອທິນ຺ນໍ ອາທິຍນ຺ຕສ຺ສ ອາປຕ຺ຕິ ທຸກ຺ກຏສ຺ສ. ປຎ຺ຈ ອກປ຺ປິຍານິ ນ ປຣິຠຸຎ຺ຊິຕພ຺ພານິ – ອທິນ຺ນຎ຺ຈ ໂຫຕິ, ອວິທິຕຎ຺ຈ ໂຫຕິ, ອກປ຺ປິຍຎ຺ຈ ໂຫຕິ, ອປ຺ປຏິຄ຺ຄຫິຕຎ຺ຈ ໂຫຕິ, ອກຕາຕິຣິຕ຺ຕຎ຺ຈ ໂຫຕິ. ປຎ຺ຈ ກປ຺ປິຍານິ ປຣິຠຸຎ຺ຊິຕພ຺ພານິ – ທິນ຺ນຎ຺ຈ ໂຫຕິ, ວິທິຕຎ຺ຈ ໂຫຕິ, ກປ຺ປິຍຎ຺ຈ ໂຫຕິ, ປຏິຄ຺ຄຫິຕຎ຺ຈ ໂຫຕິ, ກຕາຕິຣິຕ຺ຕຎ຺ຈ ໂຫຕິ. ປຎ຺ຈ ທານານິ ອປຸຎ຺ຎານິ ປຸຎ຺ຎສມ຺ມຕານິ ໂລກສ຺ມິໍ [ໂລກສ຺ສ (ສ຺ຍາ.)] – ມຊ຺ຊທານໍ, ສມຊ຺ຊທານໍ, ອິຕ຺ຖິທານໍ, ອຸສຠທານໍ, ຈິຕ຺ຕກມ຺ມທານໍ. ປຎ຺ຈ ອຸປ຺ປນ຺ນາ ທຸປ຺ປຏິວິໂນທຍາ [ວິໂນທິຍາ (ສ຺ຍາ.)] – ອຸປ຺ປນ຺ໂນ ຣາໂຄ ທຸປ຺ປຏິວິໂນທໂຍ, ອຸປ຺ປນ຺ໂນ ໂທໂສ ທຸປ຺ປຏິວິໂນທໂຍ, ອຸປ຺ປນ຺ໂນ ໂມໂຫ ທຸປ຺ປຏິວິໂນທໂຍ, ອຸປ຺ປນ຺ນໍ ປຏິຠານໍ ທຸປ຺ປຏິວິໂນທຍໍ, ອຸປ຺ປນ຺ນໍ ຄມິຍຈິຕ຺ຕໍ ທຸປ຺ປຏິວິໂນທຍໍ. ປຎ຺ຈານິສໍສາ ສມ຺ມຊ຺ຊນິຍາ – ສກຈິຕ຺ຕໍ ປສີທຕິ, ປຣຈິຕ຺ຕໍ ປສີທຕິ, ເທວຕາ ອຕ຺ຕມນາ ໂຫນ຺ຕິ, ປາສາທິກສໍວຕ຺ຕນິກກມ຺ມໍ ອຸປຈິນຕິ, ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ອປເຣປິ ປຎ຺ຈານິສໍສາ ສມ຺ມຊ຺ຊນິຍາ – ສກຈິຕ຺ຕໍ ປສີທຕິ, ປຣຈິຕ຺ຕໍ ປສີທຕິ, ເທວຕາ ອຕ຺ຕມນາ ໂຫນ຺ຕິ, ສຕ຺ຖຸສາສນໍ ກຕໍ ໂຫຕິ, ປຈ຺ຉິມາ ຊນຕາ ທິຏ຺ຐານຸຄຕິໍ ອາປຊ຺ຊຕິ.

ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ‘‘ພາໂລ’’ ຕ຺ເວວ ສງ຺ຂໍ ຄຈ຺ຉຕິ – ອຕ຺ຕໂນ ຠາສປຣິຍນ຺ຕໍ ນ ອຸຄ຺ຄຓ຺ຫາຕິ, ປຣສ຺ສ ຠາສປຣິຍນ຺ຕໍ ນ ອຸຄ຺ຄຓ຺ຫາຕິ, ອຕ຺ຕໂນ ຠາສປຣິຍນ຺ຕໍ ນ ອຸຄ຺ຄເຫຕ຺ວາ ປຣສ຺ສ ຠາສປຣິຍນ຺ຕໍ ນ ອຸຄ຺ຄເຫຕ຺ວາ ອຘມ຺ເມນ ກາເຣຕິ ອປ຺ປຏິຎ຺ຎາຍ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ‘‘ປຓ຺ຑິໂຕ’’ ຕ຺ເວວ ສງ຺ຂໍ ຄຈ຺ຉຕິ – ອຕ຺ຕໂນ ຠາສປຣິຍນ຺ຕໍ ອຸຄ຺ຄຓ຺ຫາຕິ, ປຣສ຺ສ ຠາສປຣິຍນ຺ຕໍ ອຸຄ຺ຄຓ຺ຫາຕິ, ອຕ຺ຕໂນ ຠາສປຣິຍນ຺ຕໍ ອຸຄ຺ຄເຫຕ຺ວາ ປຣສ຺ສ ຠາສປຣິຍນ຺ຕໍ ອຸຄ຺ຄເຫຕ຺ວາ ຘມ຺ເມນ ກາເຣຕິ ປຏິຎ຺ຎາຍ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕິໍ ນ ຊານາຕິ, ອາປຕ຺ຕິຍາ ມູລໍ ນ ຊານາຕິ, ອາປຕ຺ຕິສມຸທຍໍ ນ ຊານາຕິ, ອາປຕ຺ຕິນິໂຣຘໍ ນ ຊານາຕິ, ອາປຕ຺ຕິນິໂຣຘຄາມິນິໍ ປຏິປທໍ ນ ຊານາຕິ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕິໍ ຊານາຕິ, ອາປຕ຺ຕິຍາ ມູລໍ ຊານາຕິ, ອາປຕ຺ຕິສມຸທຍໍ ຊານາຕິ, ອາປຕ຺ຕິນິໂຣຘໍ ຊານາຕິ, ອາປຕ຺ຕິນິໂຣຘຄາມິນິໍ ປຏິປທໍ ຊານາຕິ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອຘິກຣຓໍ ນ ຊານາຕິ, ອຘິກຣຓສ຺ສ ມູລໍ ນ ຊານາຕິ, ອຘິກຣຓສມຸທຍໍ ນ ຊານາຕິ, ອຘິກຣຓນິໂຣຘໍ ນ ຊານາຕິ, ອຘິກຣຓນິໂຣຘຄາມິນິໍ ປຏິປທໍ ນ ຊານາຕິ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ອຘິກຣຓໍ ຊານາຕິ, ອຘິກຣຓສ຺ສ ມູລໍ ຊານາຕິ, ອຘິກຣຓສມຸທຍໍ ຊານາຕິ, ອຘິກຣຓນິໂຣຘໍ ຊານາຕິ, ອຘິກຣຓນິໂຣຘຄາມິນິໍ ປຏິປທໍ ຊານາຕິ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ວຕ຺ຖຸໍ ນ ຊານາຕິ, ນິທານໍ ນ ຊານາຕິ, ປຎ຺ຎຕ຺ຕິໍ ນ ຊານາຕິ, ອນຸປຎ຺ຎຕ຺ຕິໍ ນ ຊານາຕິ, ອນຸສນ຺ຘິວຈນປຖໍ ນ ຊານາຕິ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ວຕ຺ຖຸໍ ຊານາຕິ, ນິທານໍ ຊານາຕິ, ປຎ຺ຎຕ຺ຕິໍ ຊານາຕິ, ອນຸປຎ຺ຎຕ຺ຕິໍ ຊານາຕິ, ອນຸສນ຺ຘິວຈນປຖໍ ຊານາຕິ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ຎຕ຺ຕິໍ ນ ຊານາຕິ, ຎຕ຺ຕິຍາ ກຣຓໍ ນ ຊານາຕິ, ນ ປຸພ຺ພກຸສໂລ ໂຫຕິ, ນ ອປຣກຸສໂລ ໂຫຕິ, ອກາລຎ຺ຎູ ຈ ໂຫຕິ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ຎຕ຺ຕິໍ ຊານາຕິ, ຎຕ຺ຕິຍາ ກຣຓໍ ຊານາຕິ, ປຸພ຺ພກຸສໂລ ໂຫຕິ, ອປຣກຸສໂລ ໂຫຕິ, ກາລຎ຺ຎູ ຈ ໂຫຕິ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ນ ຊານາຕິ, ອາຈຣິຍປຣມ຺ປຣາ ໂຂ ປນສ຺ສ ນ ສຸຄ຺ຄຫິຕາ ໂຫຕິ ນ ສຸມນສິກຕາ ນ ສູປຘາຣິຕາ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ອາຈຣິຍປຣມ຺ປຣາ ໂຂ ປນສ຺ສ ສຸຄ຺ຄຫິຕາ ໂຫຕິ ສຸມນສິກຕາ ສູປຘາຣິຕາ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ອຸຠຍານິ ໂຂ ປນສ຺ສ ປາຕິໂມກ຺ຂານິ ນ ວິຕ຺ຖາເຣນ ສ຺ວາຄຕານິ ໂຫນ຺ຕິ ນ ສຸວິຠຕ຺ຕານິ ນ ສຸປ຺ປວຕ຺ຕີນິ ນ ສຸວິນິຈ຺ຉິຕານິ ສຸຕ຺ຕໂສ ອນຸພ຺ຍຎ຺ຊນໂສ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ອຸຠຍານິ ໂຂ ປນສ຺ສ ປາຕິໂມກ຺ຂານິ ວິຕ຺ຖາເຣນ ສ຺ວາຄຕານິ ໂຫນ຺ຕິ ສຸວິຠຕ຺ຕານິ ສຸປ຺ປວຕ຺ຕີນິ ສຸວິນິຈ຺ຉິຕານິ ສຸຕ຺ຕໂສ ອນຸພ຺ຍຎ຺ຊນໂສ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ພາໂລ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ນ ຊານາຕິ, ອຘິກຣເຓ ຈ ນ ວິນິຈ຺ຉຍກຸສໂລ ໂຫຕິ. ປຎ຺ຈຫງ຺ເຄຫິ ສມນ຺ນາຄໂຕ ວິນຍຘໂຣ ປຓ຺ຑິໂຕ ຕ຺ເວວ ສງ຺ຂໍ ຄຈ຺ຉຕິ – ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ອຘິກຣເຓ ຈ ວິນິຈ຺ຉຍກຸສໂລ ໂຫຕິ.

[ອ. ນິ. ໕.໑໘໑; ປຣິ. ໔໔໓] ປຎ຺ຈ ອາຣຎ຺ຎິກາ – ມນ຺ທຕ຺ຕາ ໂມມູຫຕ຺ຕາ ອາຣຎ຺ຎິໂກ ໂຫຕິ, ປາປິຈ຺ໂຉ ອິຈ຺ຉາປກໂຕ ອາຣຎ຺ຎິໂກ ໂຫຕິ, ອຸມ຺ມາທາ ຈິຕ຺ຕກ຺ເຂປາ ອາຣຎ຺ຎິໂກ ໂຫຕິ, ວຓ຺ຓິຕໍ ພຸທ຺ເຘຫິ ພຸທ຺ຘສາວເກຫີຕິ ອາຣຎ຺ຎິໂກ ໂຫຕິ, ອປິ ຈ ອປ຺ປິຈ຺ຉຎ຺ເຎວ ນິສ຺ສາຍ ສນ຺ຕຸຏ຺ຐິຎ຺ເຎວ ນິສ຺ສາຍ ສລ຺ເລຂຎ຺ເຎວ ນິສ຺ສາຍ ປວິເວກຎ຺ເຎວ ນິສ຺ສາຍ ອິທມຕ຺ຖິຕຎ຺ເຎວ [ອິທມຏ຺ຐິຕຎ຺ເຎວ (ສີ. ສ຺ຍາ.)] ນິສ຺ສາຍ ອາຣຎ຺ຎິໂກ ໂຫຕິ. ປຎ຺ຈ ປິຓ຺ຑປາຕິກາ…ເປ… ປຎ຺ຈ ປໍສຸກູລິກາ…ເປ… ປຎ຺ຈ ຣຸກ຺ຂມູລິກາ…ເປ… ປຎ຺ຈ ໂສສານິກາ…ເປ… ປຎ຺ຈ ອພ຺ໂຠກາສິກາ…ເປ… ປຎ຺ຈ ເຕຈີວຣິກາ…ເປ… ປຎ຺ຈ ສປທານຈາຣິກາ…ເປ… ປຎ຺ຈ ເນສຊ຺ຊິກາ…ເປ… ປຎ຺ຈ ຍຖາສນ຺ຖຕິກາ…ເປ… ປຎ຺ຈ ເອກາສນິກາ…ເປ… ປຎ຺ຈ ຂລຸປຈ຺ຉາຠຕ຺ຕິກາ…ເປ… ປຎ຺ຈ ປຕ຺ຕປິຓ຺ຑິກາ – ມນ຺ທຕ຺ຕາ ໂມມູຫຕ຺ຕາ ປຕ຺ຕປິຓ຺ຑິໂກ ໂຫຕິ, ປາປິຈ຺ໂຉ ອິຈ຺ຉາປກໂຕ ປຕ຺ຕປິຓ຺ຑິໂກ ໂຫຕິ, ອຸມ຺ມາທາ ຈິຕ຺ຕກ຺ເຂປາ ປຕ຺ຕປິຓ຺ຑິໂກ ໂຫຕິ, ວຓ຺ຓິຕໍ ພຸທ຺ເຘຫິ ພຸທ຺ຘສາວເກຫີຕິ ປຕ຺ຕປິຓ຺ຑິໂກ ໂຫຕິ, ອປິ ຈ ອປ຺ປິຈ຺ຉຎ຺ເຎວ ນິສ຺ສາຍ ສນ຺ຕຸຏ຺ຐິຎ຺ເຎວ ນິສ຺ສາຍ ສລ຺ເລຂຎ຺ເຎວ ນິສ຺ສາຍ ປວິເວກຎ຺ເຎວ ນິສ຺ສາຍ ອິທມຕ຺ຖິຕຎ຺ເຎວ ນິສ຺ສາຍ ປຕ຺ຕປິຓ຺ຑິໂກ ໂຫຕິ.

[ປຣິ. ໔໑໗] ປຎ຺ຈຫງ຺ເຄຫິ ສມນ຺ນາຄເຕນ ຠິກ຺ຂຸນາ ນານິສ຺ສິເຕນ ວຕ຺ຖພ຺ພໍ – ອຸໂປສຖໍ ນ ຊານາຕິ, ອຸໂປສຖກມ຺ມໍ ນ ຊານາຕິ, ປາຕິໂມກ຺ຂໍ ນ ຊານາຕິ, ປາຕິໂມກ຺ຂຸທ຺ເທສໍ ນ ຊານາຕິ, ອູນປຎ຺ຈວສ຺ໂສ ໂຫຕິ. ປຎ຺ຈຫງ຺ເຄຫິ ສມນ຺ນາຄເຕນ ຠິກ຺ຂຸນາ ອນິສ຺ສິເຕນ ວຕ຺ຖພ຺ພໍ – ອຸໂປສຖໍ ຊານາຕິ, ອຸໂປສຖກມ຺ມໍ ຊານາຕິ, ປາຕິໂມກ຺ຂໍ ຊານາຕິ, ປາຕິໂມກ຺ຂຸທ຺ເທສໍ ຊານາຕິ, ປຎ຺ຈວສ຺ໂສ ວາ ໂຫຕິ ອຕິເຣກປຎ຺ຈວສ຺ໂສ ວາ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄເຕນ ຠິກ຺ຂຸນາ ນານິສ຺ສິເຕນ ວຕ຺ຖພ຺ພໍ – ປວາຣຓໍ ນ ຊານາຕິ, ປວາຣຓາກມ຺ມໍ ນ ຊານາຕິ, ປາຕິໂມກ຺ຂໍ ນ ຊານາຕິ, ປາຕິໂມກ຺ຂຸທ຺ເທສໍ ນ ຊານາຕິ, ອູນປຎ຺ຈວສ຺ໂສ ໂຫຕິ. ປຎ຺ຈຫງ຺ເຄຫິ ສມນ຺ນາຄເຕນ ຠິກ຺ຂຸນາ ອນິສ຺ສິເຕນ ວຕ຺ຖພ຺ພໍ – ປວາຣຓໍ ຊານາຕິ, ປວາຣຓາກມ຺ມໍ ຊານາຕິ, ປາຕິໂມກ຺ຂໍ ຊານາຕິ, ປາຕິໂມກ຺ຂຸທ຺ເທສໍ ຊານາຕິ, ປຎ຺ຈວສ຺ໂສ ວາ ໂຫຕິ ອຕິເຣກປຎ຺ຈວສ຺ໂສ ວາ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄເຕນ ຠິກ຺ຂຸນາ ນານິສ຺ສິເຕນ ວຕ຺ຖພ຺ພໍ – ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ນ ຊານາຕິ, ອູນປຎ຺ຈວສ຺ໂສ ໂຫຕິ. ປຎ຺ຈຫງ຺ເຄຫິ ສມນ຺ນາຄເຕນ ຠິກ຺ຂຸນາ ອນິສ຺ສິເຕນ ວຕ຺ຖພ຺ພໍ – ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ປຎ຺ຈວສ຺ໂສ ວາ ໂຫຕິ ອຕິເຣກປຎ຺ຈວສ຺ໂສ ວາ. ປຎ຺ຈຫງ຺ເຄຫິ ສມນ຺ນາຄຕາຍ ຠິກ຺ຂຸນິຍາ ນານິສ຺ສິຕາຍ ວຕ຺ຖພ຺ພໍ – ອຸໂປສຖໍ ນ ຊານາຕິ, ອຸໂປສຖກມ຺ມໍ ນ ຊານາຕິ, ປາຕິໂມກ຺ຂໍ ນ ຊານາຕິ, ປາຕິໂມກ຺ຂຸທ຺ເທສໍ ນ ຊານາຕິ, ອູນປຎ຺ຈວສ຺ສາ ໂຫຕິ. ປຎ຺ຈຫງ຺ເຄຫິ ສມນ຺ນາຄຕາຍ ຠິກ຺ຂຸນິຍາ ອນິສ຺ສິຕາຍ ວຕ຺ຖພ຺ພໍ – ອຸໂປສຖໍ ຊານາຕິ, ອຸໂປສຖກມ຺ມໍ ຊານາຕິ, ປາຕິໂມກ຺ຂໍ ຊານາຕິ, ປາຕິໂມກ຺ຂຸທ຺ເທສໍ ຊານາຕິ, ປຎ຺ຈວສ຺ສາ ວາ ໂຫຕິ ອຕິເຣກປຎ຺ຈວສ຺ສາ ວາ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄຕາຍ ຠິກ຺ຂຸນິຍາ ນານິສ຺ສິຕາຍ ວຕ຺ຖພ຺ພໍ – ປວາຣຓໍ ນ ຊານາຕິ, ປວາຣຓາກມ຺ມໍ ນ ຊານາຕິ, ປາຕິໂມກ຺ຂໍ ນ ຊານາຕິ, ປາຕິໂມກ຺ຂຸທ຺ເທສໍ ນ ຊານາຕິ, ອູນປຎ຺ຈວສ຺ສາ ໂຫຕິ. ປຎ຺ຈຫງ຺ເຄຫິ ສມນ຺ນາຄຕາຍ ຠິກ຺ຂຸນິຍາ ອນິສ຺ສິຕາຍ ວຕ຺ຖພ຺ພໍ – ປວາຣຓໍ ຊານາຕິ, ປວາຣຓາກມ຺ມໍ ຊານາຕິ, ປາຕິໂມກ຺ຂໍ ຊານາຕິ, ປາຕິໂມກ຺ຂຸທ຺ເທສໍ ຊານາຕິ, ປຎ຺ຈວສ຺ສາ ວາ ໂຫຕິ ອຕິເຣກປຎ຺ຈວສ຺ສາ ວາ. ອປເຣຫິປິ ປຎ຺ຈຫງ຺ເຄຫິ ສມນ຺ນາຄຕາຍ ຠິກ຺ຂຸນິຍາ ນານິສ຺ສິຕາຍ ວຕ຺ຖພ຺ພໍ – ອາປຕ຺ຕານາປຕ຺ຕິໍ ນ ຊານາຕິ, ລຫຸກຄຣຸກໍ ອາປຕ຺ຕິໍ ນ ຊານາຕິ, ສາວເສສານວເສສໍ ອາປຕ຺ຕິໍ ນ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ນ ຊານາຕິ, ອູນປຎ຺ຈວສ຺ສາ ໂຫຕິ. ປຎ຺ຈຫງ຺ເຄຫິ ສມນ຺ນາຄຕາຍ ຠິກ຺ຂຸນິຍາ ອນິສ຺ສິຕາຍ ວຕ຺ຖພ຺ພໍ – ອາປຕ຺ຕານາປຕ຺ຕິໍ ຊານາຕິ, ລຫຸກຄຣຸກໍ ອາປຕ຺ຕິໍ ຊານາຕິ, ສາວເສສານວເສສໍ ອາປຕ຺ຕິໍ ຊານາຕິ, ທຸຏ຺ຐຸລ຺ລາທຸຏ຺ຐຸລ຺ລໍ ອາປຕ຺ຕິໍ ຊານາຕິ, ປຎ຺ຈວສ຺ສາ ວາ ໂຫຕິ ອຕິເຣກປຎ຺ຈວສ຺ສາ ວາ.

ປຎ຺ຈ ອາທີນວາ ອປາສາທິເກ – ອຕ຺ຕາປິ ອຕ຺ຕານໍ ອຸປວທຕິ, ອນຸວິຈ຺ຈປິ ວິຎ຺ຎູ ຄຣຫນ຺ຕິ, ປາປໂກ ກິຕ຺ຕິສທ຺ໂທ ອພ຺ຠຸຄ຺ຄຈ຺ຉຕິ, ສມ຺ມູຬ຺ໂຫ ກາລໍ ກໂຣຕິ, ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ປຎ຺ຈານິສໍສາ ປາສາທິເກ – ອຕ຺ຕາປິ ອຕ຺ຕານໍ ນ ອຸປວທຕິ, ອນຸວິຈ຺ຈປິ ວິຎ຺ຎູ ປສໍສນ຺ຕິ, ກລ຺ຍາໂຓ ກິຕ຺ຕິສທ຺ໂທ ອພ຺ຠຸຄ຺ຄຈ຺ຉຕິ, ອສມ຺ມູຬ຺ໂຫ ກາລໍ ກໂຣຕິ, ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ອປເຣປິ ປຎ຺ຈ ອາທີນວາ ອປາສາທິເກ – ອປ຺ປສນ຺ນາ ນ ປສີທນ຺ຕິ, ປສນ຺ນານໍ ເອກຈ຺ຈານໍ ອຎ຺ຎຖຕ຺ຕໍ ໂຫຕິ, ສຕ຺ຖຸສາສນໍ ອກຕໍ ໂຫຕິ, ປຈ຺ຉິມາ ຊນຕາ ທິຏ຺ຐານຸຄຕິໍ ນາປຊ຺ຊຕິ, ຈິຕ຺ຕມສ຺ສ ນ ປສີທຕິ. ປຎ຺ຈານິສໍສາ ປາສາທິເກ – ອປ຺ປສນ຺ນາ ປສີທນ຺ຕິ, ປສນ຺ນານໍ ຠິຍ຺ໂຍຠາວາຍ ໂຫຕິ, ສຕ຺ຖຸສາສນໍ ກຕໍ ໂຫຕິ, ປຈ຺ຉິມາ ຊນຕາ ທິຏ຺ຐານຸຄຕິໍ ອາປຊ຺ຊຕິ, ຈິຕ຺ຕມສ຺ສ ປສີທຕິ. ປຎ຺ຈ ອາທີນວາ ກຸລູປເກ – ອນາມນ຺ຕຈາເຣ ອາປຊ຺ຊຕິ, ຣໂຫ ນິສຊ຺ຊາຍ ອາປຊ຺ຊຕິ, ປຏິຈ຺ຉນ຺ເນ ອາສເນ ອາປຊ຺ຊຕິ, ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສນ຺ໂຕ ອາປຊ຺ຊຕິ, ກາມສງ຺ກປ຺ປພຫຸໂລ ຈ ວິຫຣຕິ. ປຎ຺ຈ ອາທີນວາ ກຸລູປກສ຺ສ ຠິກ຺ຂຸໂນ – ອຕິເວລໍ ກຸເລສຸ ສໍສຏ຺ຐສ຺ສ ວິຫຣໂຕ ມາຕຸຄາມສ຺ສ ອຠິຓ຺ຫທສ຺ສນໍ, ທສ຺ສເນ ສຕິ ສໍສຄ຺ໂຄ, ສໍສຄ຺ເຄ ສຕິ ວິສ຺ສາໂສ, ວິສ຺ສາເສ ສຕິ ໂອຕາໂຣ, ໂອຕິຓ຺ຓຈິຕ຺ຕສ຺ເສຕໍ ຠິກ຺ຂຸໂນ ປາຏິກງ຺ຂໍ ອນຠິຣໂຕ ວາ ພ຺ຣຫ຺ມຈຣິຍໍ ຈຣິສ຺ສຕິ ອຎ຺ຎຕຣໍ ວາ ສໍກິລິຏ຺ຐໍ ອາປຕ຺ຕິໍ ອາປຊ຺ຊິສ຺ສຕິ ສິກ຺ຂໍ ວາ ປຈ຺ຈກ຺ຂາຍ ຫີນາຍາວຕ຺ຕິສ຺ສຕິ.

[ປາຈິ. ໙໒] ປຎ຺ຈ ພີຊຊາຕານິ – ມູລພີຊໍ, ຂນ຺ຘພີຊໍ, ຜຬຸພີຊໍ, ອຄ຺ຄພີຊໍ, ພີຊພີຊຎ຺ເຎວ [ພີຊພີຊເມວ (ກ.)] ປຎ຺ຈມໍ. ປຎ຺ຈຫິ ສມຓກປ຺ເປຫິ ຜລໍ ປຣິຠຸຎ຺ຊິຕພ຺ພໍ – ອຄ຺ຄິປຣິຊິຕໍ, ສຕ຺ຖປຣິຊິຕໍ, ນຂປຣິຊິຕໍ, ອພີຊໍ, ນິພ຺ພຕ຺ຕພີຊຎ຺ເຎວ [ນິພ຺ພຏ຺ຏພີຊຎ຺ເຎວ (ສີ.), ນິພ຺ພຏພີຊຎ຺ເຎວ (ສ຺ຍາ.), ນິປ຺ປຏ຺ຏພີຊຎ຺ເຎວ (ກ.)] ປຎ຺ຈມໍ. ປຎ຺ຈ ວິສຸທ຺ຘິໂຍ – ນິທານໍ ອຸທ຺ທິສິຕ຺ວາ ອວເສສໍ ສຸເຕນ ສາເວຕພ຺ພໍ, ອຍໍ ປຐມາ ວິສຸທ຺ຘິ; ນິທານໍ ອຸທ຺ທິສິຕ຺ວາ ຈຕ຺ຕາຣິ ປາຣາຊິການິ ອຸທ຺ທິສິຕ຺ວາ ອວເສສໍ ສຸເຕນ ສາເວຕພ຺ພໍ, ອຍໍ ທຸຕິຍາ ວິສຸທ຺ຘິ; ນິທານໍ ອຸທ຺ທິສິຕ຺ວາ ຈຕ຺ຕາຣິ ປາຣາຊິການິ ອຸທ຺ທິສິຕ຺ວາ ເຕຣສ ສງ຺ຆາທິເສເສ ອຸທ຺ທິສິຕ຺ວາ ອວເສສໍ ສຸເຕນ ສາເວຕພ຺ພໍ, ອຍໍ ຕຕິຍາ ວິສຸທ຺ຘິ; ນິທານໍ ອຸທ຺ທິສິຕ຺ວາ ຈຕ຺ຕາຣິ ປາຣາຊິການິ ອຸທ຺ທິສິຕ຺ວາ ເຕຣສ ສງ຺ຆາທິເສເສ ອຸທ຺ທິສິຕ຺ວາ ທ຺ເວ ອນິຍເຕ ອຸທ຺ທິສິຕ຺ວາ ອວເສສໍ ສຸເຕນ ສາເວຕພ຺ພໍ, ອຍໍ ຈຕຸຕ຺ຖາ ວິສຸທ຺ຘິ; ວິຕ຺ຖາເຣເນວ ປຎ຺ຈມີ. ອປຣາປິ ປຎ຺ຈ ວິສຸທ຺ຘິໂຍ – ສຸຕ຺ຕຸທ຺ເທໂສ, ປາຣິສຸທ຺ຘິອຸໂປສໂຖ, ອຘິຏ຺ຐານຸໂປສໂຖ, ປວາຣຓາ, ສາມຄ຺ຄີອຸໂປສໂຖເຍວ ປຎ຺ຈໂມ. ປຎ຺ຈານິສໍສາ ວິນຍຘເຣ – ອຕ຺ຕໂນ ສີລກ຺ຂນ຺ໂຘ ສຸຄຸຕ຺ໂຕ ໂຫຕິ ສຸຣກ຺ຂິໂຕ, ກຸກ຺ກຸຈ຺ຈປກຕານໍ ປຏິສຣຓໍ ໂຫຕິ, ວິສາຣໂທ ສງ຺ຆມຊ຺ເຌ ໂວຫຣຕິ, ປຈ຺ຈຕ຺ຖິເກ ສຫຘມ຺ເມນ ສຸນິຄ຺ຄຫິຕໍ ນິຄ຺ຄຓ຺ຫາຕິ, ສທ຺ຘມ຺ມຏ຺ຐິຕິຍາ ປຏິປນ຺ໂນ ໂຫຕິ. ປຎ຺ຈ ອຘມ຺ມິການິ ປາຕິໂມກ຺ຂຏ຺ຐປນານິ. ປຎ຺ຈ ຘມ຺ມິການິ ປາຕິໂມກ຺ຂຏ຺ຐປນານີຕິ.

ປຎ຺ຈກໍ ນິຏ຺ຐິຕໍ.

ຕສ຺ສຸທ຺ທານໍ –

ອາປຕ຺ຕິ ອາປຕ຺ຕິກ຺ຂນ຺ຘາ, ວິນີຕານນ຺ຕເຣນ ຈ;

ປຸຄ຺ຄລາ ເຉທນາ ເຈວ, ອາປຊ຺ຊຕິ ຈ ປຈ຺ຈຍາ.

ນ ອຸເປຕິ ອຸເປຕິ ຈ, ກປ຺ປນ຺ຕຸສງ຺ກິເຕລຎ຺ຈ;

ວສໍ ພ຺ຍສນາ ສມ຺ປທາ, ປສ຺ສທ຺ຘິ ປຸຄ຺ຄເລນ ຈ.

ໂສສານິກໍ ຂາຍິຕຎ຺ຈ, ເຖຍ຺ຍໍ ໂຈໂຣ ຈ ວຸຈ຺ຈຕິ;

ອວິສ຺ສຊ຺ຊິ ອເວຠງ຺ຄິ, ກາຍໂຕ ກາຍວາຈໂຕ.

ເທສນາ ສງ຺ຆໍ ອຸທ຺ເທສໍ, ປຈ຺ຈນ຺ຕິກຖິເນນ ຈ;

ກມ຺ມານິ ຍາວຕຕິຍໍ, ປາຣາຊິຖຸລ຺ລທຸກ຺ກຏໍ.

ອກປ຺ປິຍໍ ກປ຺ປິຍຎ຺ຈ, ອປຸຎ຺ຎທຸວິໂນທຍາ;

ສມ຺ມຊ຺ຊນີ ອປເຣ ຈ, ຠາສໍ ອາປຕ຺ຕິເມວ ຈ.

ອຘິກຣຓໍ ວຕ຺ຖຸ ຎຕ຺ຕິ, ອາປຕ຺ຕາ ອຸຠຍານິ ຈ;

ລຫຸກຏ຺ຐມກາ ເອເຕ, ກຓ຺ຫສຸກ຺ກາ ວິຊານຖ.

ອຣຎ຺ຎໍ ປິຓ຺ຑປາຕຎ຺ຈ, ປໍສຸຣຸກ຺ຂສຸສານິກາ;

ອພ຺ໂຠກາໂສ ຈີວຣຎ຺ຈ, ສປທາໂນ ນິສຊ຺ຊິໂກ.

ສນ຺ຖຕິ ຂລຸ ປຈ຺ຉາປິ, ປຕ຺ຕປິຓ຺ຑິກເມວ ຈ;

ອຸໂປສຖໍ ປວາຣຓໍ, ອາປຕ຺ຕານາປຕ຺ຕິປິ ຈ.

ກຓ຺ຫສຸກ຺ກປທາ ເອເຕ, ຠິກ຺ຂຸນີນມ຺ປິ ເຕ ຕຖາ;

ອປາສາທິກປາສາທິ, ຕເຖວ ອປເຣ ທຸເວ.

ກຸລູປເກ ອຕິເວລໍ, ພີຊໍ ສມຓກປ຺ປິ ຈ;

ວິສຸທ຺ຘິ ອປເຣ ເຈວ, ວິນຍາຘມ຺ມິເກນ ຈ;

ຘມ຺ມິກາ ຈ ຕຖາ ວຸຕ຺ຕາ, ນິຏ຺ຐິຕາ ສຸທ຺ຘິປຎ຺ຈກາຕິ.

໖. ຉກ຺ກວາໂຣ

໓໒໖. [ທີ. ນິ. ໓.໓໒໔] ຉ ອຄາຣວາ. ຉ ຄາຣວາ. ຉ ວິນີຕວຕ຺ຖູນິ. ຉ ສາມີຈິໂຍ. ຉ ອາປຕ຺ຕິສມຸຏ຺ຐານາ. ຉຈ຺ເຉທນກາ ອາປຕ຺ຕິໂຍ. ຉຫາກາເຣຫິ ອາປຕ຺ຕິໍ ອາປຊ຺ຊຕິ. ຉານິສໍສາ ວິນຍຘເຣ. ຉ ປຣມານິ. ຉາຣຕ຺ຕໍ ຕິຈີວເຣນ ວິປ຺ປວສິຕພ຺ພໍ. ຉ ຈີວຣານິ. ຉ ຣຊນານິ. ຉ ອາປຕ຺ຕິໂຍ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ ນ ວາຈໂຕ. ຉ ອາປຕ຺ຕິໂຍ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ ນ ກາຍໂຕ. ຉ ອາປຕ຺ຕິໂຍ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຉ ກມ຺ມານິ. ຉ ວິວາທມູລານິ. ຉ ອນຸວາທມູລານິ. ຉ ສາຣຓີຍາ ຘມ຺ມາ ທີຆໂສ. ຉ ວິທຕ຺ຖິໂຍ, ສຸຄຕວິທຕ຺ຖິຍາ, ຕິຣິຍໍ ຉ ວິທຕ຺ຖິໂຍ. ຉ ນິສ຺ສຍປຏິປ຺ປສ຺ສທ຺ຘິໂຍ ອາຈຣິຍມ຺ຫາ. ຉ ນຫາເນ ອນຸປຎ຺ຎຕ຺ຕິໂຍ – ວິປ຺ປກຕຈີວຣໍ ອາທາຍ ປກ຺ກມຕິ, ວິປ຺ປກຕຈີວຣໍ ສມາທາຍ ປກ຺ກມຕິ.

[ມຫາວ. ໘໕ ອາທໂຍ] ຉຫງ຺ເຄຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ – ອເສກ຺ເຂນ ສີລກ຺ຂນ຺ເຘນ ສມນ຺ນາຄໂຕ ໂຫຕິ, ອເສກ຺ເຂນ ສມາຘິກ຺ຂນ຺ເຘນ ສມນ຺ນາຄໂຕ ໂຫຕິ, ອເສກ຺ເຂນ ປຎ຺ຎກ຺ຂນ຺ເຘນ ສມນ຺ນາຄໂຕ ໂຫຕິ, ອເສກ຺ເຂນ ວິມຸຕ຺ຕິກ຺ຂນ຺ເຘນ ສມນ຺ນາຄໂຕ ໂຫຕິ, ອເສກ຺ເຂນ ວິມຸຕ຺ຕິຎາຓທສ຺ສນກ຺ຂນ຺ເຘນ ສມນ຺ນາຄໂຕ ໂຫຕິ, ທສວສ຺ໂສ ວາ ໂຫຕິ ອຕິເຣກທສວສ຺ໂສ ວາ.

ອປເຣຫິປິ ຉຫງ຺ເຄຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ – ອຕ຺ຕນາ ອເສກ຺ເຂນ ສີລກ຺ຂນ຺ເຘ ສມນ຺ນາຄໂຕ ໂຫຕິ, ປຣໍ ອເສກ຺ເຂ ສີລກ຺ຂນ຺ເຘ ສມາທເປຕາ; ອຕ຺ຕນາ ອເສກ຺ເຂນ ສມາຘິກ຺ຂນ຺ເຘນ ສມນ຺ນາຄໂຕ ໂຫຕິ, ປຣໍ ອເສກ຺ເຂ ສມາຘິກ຺ຂນ຺ເຘ ສມາທເປຕາ; ອຕ຺ຕນາ ອເສກ຺ເຂນ ປຎ຺ຎກ຺ຂນ຺ເຘນ ສມນ຺ນາຄໂຕ ໂຫຕິ, ປຣໍ ອເສກ຺ເຂ ປຎ຺ຎກ຺ຂນ຺ເຘ ສມາທເປຕາ; ອຕ຺ຕນາ ອເສກ຺ເຂນ ວິມຸຕ຺ຕິກ຺ຂນ຺ເຘນ ສມນ຺ນາຄໂຕ ໂຫຕິ, ປຣໍ ອເສກ຺ເຂ ວິມຸຕ຺ຕິກ຺ຂນ຺ເຘ ສມາທເປຕາ; ອຕ຺ຕນາ ອເສກ຺ເຂນ ວິມຸຕ຺ຕິຎາຓທສ຺ສນກ຺ຂນ຺ເຘນ ສມນ຺ນາຄໂຕ ໂຫຕິ, ປຣໍ ອເສກ຺ເຂ ວິມຸຕ຺ຕິຎາຓທສ຺ສນກ຺ຂນ຺ເຘ ສມາທເປຕາ; ທສວສ຺ໂສ ວາ ໂຫຕິ ອຕິເຣກທສວສ຺ໂສ ວາ.

ອປເຣຫິປິ ຉຫງ຺ເຄຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ – ສທ຺ໂຘ ໂຫຕິ, ຫິຣິມາ ໂຫຕິ, ໂອຕ຺ຕປ຺ປີ ໂຫຕິ, ອາຣທ຺ຘວີຣິໂຍ ໂຫຕິ, ອຸປຏ຺ຐິຕສ຺ສຕິ ໂຫຕິ, ທສວສ຺ໂສ ວາ ໂຫຕິ ອຕິເຣກທສວສ຺ໂສ ວາ.

ອປເຣຫິປິ ຉຫງ຺ເຄຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ – ນ ອຘິສີເລ ສີລວິປນ຺ໂນ ໂຫຕິ, ນ ອຊ຺ຌາຈາເຣ ອາຈາຣວິປນ຺ໂນ ໂຫຕິ, ນ ອຕິທິຏ຺ຐິຍາ ທິຏ຺ຐິວິປນ຺ໂນ ໂຫຕິ, ພຫຸສ຺ສຸໂຕ ໂຫຕິ, ປຎ຺ຎວາ ໂຫຕິ, ທສວສ຺ໂສ ວາ ໂຫຕິ ອຕິເຣກທສວສ຺ໂສ ວາ.

ອປເຣຫິປິ ຉຫງ຺ເຄຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ – ປຏິພໂລ ໂຫຕິ ອນ຺ເຕວາສິໍ ວາ ສທ຺ຘິວິຫາຣິໍ ວາ ຄິລານໍ ອຸປຏ຺ຐາຕຸໍ ວາ ອຸປຏ຺ຐາເປຕຸໍ ວາ, ອນຠິຣຕໍ ວູປກາເສຕຸໍ ວາ ວູປກາສາເປຕຸໍ ວາ [ອນຠິຣຕິໍ (ກ.)], ອຸປ຺ປນ຺ນໍ ກຸກ຺ກຸຈ຺ຈໍ ຘມ຺ມໂຕ ວິໂນເທຕຸໍ [ວິໂນເທຕຸໍ ວາ ວິໂນທາເປຕຸໍ ວາ (ສ຺ຍາ.) ມຫາວ. ໘໕], ອາປຕ຺ຕິໍ ຊານາຕິ, ອາປຕ຺ຕິວຸຏ຺ຐານໍ ຊານາຕິ, ທສວສ຺ໂສ ວາ ໂຫຕິ ອຕິເຣກທສວສ຺ໂສ ວາ.

ອປເຣຫິປິ ຉຫງ຺ເຄຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ – ປຏິພໂລ ໂຫຕິ ອນ຺ເຕວາສິໍ ວາ ສທ຺ຘິວິຫາຣິໍ ວາ ອາຠິສມາຈາຣິກາຍ ສິກ຺ຂາຍ ສິກ຺ຂາເປຕຸໍ, ອາທິພ຺ຣຫ຺ມຈາຣິຍກາຍ ສິກ຺ຂາຍ ວິເນຕຸໍ, ອຠິຘມ຺ເມ ວິເນຕຸໍ, ອຠິວິນເຍ ວິເນຕຸໍ, ອຸປ຺ປນ຺ນໍ ທິຏ຺ຐິຄຕໍ ຘມ຺ມໂຕ ວິເວເຈຕຸໍ, ທສວສ຺ໂສ ວາ ໂຫຕິ ອຕິເຣກທສວສ຺ໂສ ວາ.

ອປເຣຫິປິ ຉຫງ຺ເຄຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ ນິສ຺ສໂຍ ທາຕພ຺ໂພ ສາມເຓໂຣ ອຸປຏ຺ຐາເປຕພ຺ໂພ – ອາປຕ຺ຕິໍ ຊານາຕິ, ອນາປຕ຺ຕິໍ ຊານາຕິ, ລຫຸກໍ ອາປຕ຺ຕິໍ ຊານາຕິ, ຄຣຸກໍ ອາປຕ຺ຕິໍ ຊານາຕິ, ອຸຠຍານິ ໂຂ ປນສ຺ສ ປາຕິໂມກ຺ຂານິ ວິຕ຺ຖາເຣນ ສ຺ວາຄຕານິ ໂຫນ຺ຕິ ສຸວິຠຕ຺ຕານິ ສຸປ຺ປວຕ຺ຕີນິ ສຸວິນິຈ຺ຉິຕານິ ສຸຕ຺ຕໂສ ອນຸພ຺ຍຎ຺ຊນໂສ, ທສວສ຺ໂສ ວາ ໂຫຕິ ອຕິເຣກທສວສ຺ໂສ ວາ.

ຉ ອຘມ຺ມິການິ ປາຕິໂມກ຺ຂຏ຺ຐປນານິ, ຉ ຘມ຺ມິການິ ປາຕິໂມກ຺ຂຏ຺ຐປນານີຕິ.

ຉກ຺ກໍ ນິຏ຺ຐິຕໍ.

ຕສ຺ສຸທ຺ທານໍ –

ອຄາຣວາ ຄາຣວາ ຈ, ວິນີຕາ ສາມີຈິປິ ຈ;

ສມຸຏ຺ຐານາ ເຉທນາ ເຈວ, ອາກາຣານິສໍເສນ ຈ.

ປຣມານິ ຈ ຉາຣຕ຺ຕໍ, ຈີວຣໍ ຣຊນານິ ຈ;

ກາຍໂຕ ຈິຕ຺ຕໂຕ ຈາປິ, ວາຈໂຕ ຈິຕ຺ຕໂຕປິ ຈ.

ກາຍວາຈາຈິຕ຺ຕໂຕ ຈ, ກມ຺ມວິວາທເມວ ຈ;

ອນຸວາທາ ທີຆໂສ ຈ, ຕິຣິຍໍ ນິສ຺ສເຍນ ຈ.

ອນຸປຎ຺ຎຕ຺ຕິ ອາທາຍ, ສມາທາຍ ຕເຖວ ຈ;

ອເສກ຺ເຂ ສມາທເປຕາ, ສທ຺ໂຘ ອຘິສີເລນ ຈ;