ອຸໂປສຖາທິປຸຈ຺ຉາວິສ຺ສຊ຺ຊນາ

ອາທິມຊ຺ຌນ຺ຕປຸຈ຺ຉນໍ

໓໓໒. ອຸໂປສຖກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ປວາຣຓາກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ຕຊ຺ຊນີຍກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ນິຍສ຺ສກມ຺ມສ຺ສ…ເປ… ປພ຺ພາຊນີຍກມ຺ມສ຺ສ…ເປ… ປຏິສາຣຓີຍກມ຺ມສ຺ສ…ເປ… ອຸກ຺ເຂປນີຍກມ຺ມສ຺ສ…ເປ… ປຣິວາສທານສ຺ສ…ເປ… ມູລາຍປຏິກສ຺ສນາຍ…ເປ… ມານຕ຺ຕທານສ຺ສ…ເປ… ອພ຺ຠານສ຺ສ…ເປ… ອຸປສມ຺ປທາກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ຕຊ຺ຊນີຍກມ຺ມສ຺ສ ປຏິປ຺ປສ຺ສທ຺ຘິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ນິຍສ຺ສກມ຺ມສ຺ສ ປຏິປ຺ປສ຺ສທ຺ຘິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ປພ຺ພາຊນີຍກມ຺ມສ຺ສ ປຏິປ຺ປສ຺ສທ຺ຘິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ປຏິສາຣຓີຍກມ຺ມສ຺ສ ປຏິປ຺ປສ຺ສທ຺ຘິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ອຸກ຺ເຂປນີຍກມ຺ມສ຺ສ ປຏິປ຺ປສ຺ສທ຺ຘິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ສຕິວິນຍສ຺ສ ໂກ ອາທິ, ກິໍ ມຊ຺ເຊ, ກິໍ ປຣິໂຍສານໍ? ອມູຬ຺ຫວິນຍສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ຕສ຺ສປາປິຍສິກາຍ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ຕິຓວຕ຺ຖາຣກສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ຠິກ຺ຂຸໂນວາທກສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ຕິຈີວເຣນ ອວິປ຺ປວາສສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ສນ຺ຖຕສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ຣູປິຍຉຑ຺ຑກສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ສາຏິຍຄ຺ຄາຫາປກສມ຺ມຸຕິໂຍ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ປຕ຺ຕຄ຺ຄາຫາປກສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ທຓ຺ຑສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ສິກ຺ກາສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ? ທຓ຺ຑສິກ຺ກາສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານໍ?

ອາທິມຊ຺ຌນ຺ຕວິສ຺ສຊ຺ຊນາ

໓໓໓. ອຸໂປສຖກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ອຸໂປສຖກມ຺ມສ຺ສ ສາມຄ຺ຄີ ອາທິ, ກິຣິຍາ ມຊ຺ເຌ, ນິຏ຺ຐານໍ ປຣິໂຍສານໍ.

ປວາຣຓາກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ປວາຣຓາກມ຺ມສ຺ສ ສາມຄ຺ຄີ ອາທິ, ກິຣິຍາ ມຊ຺ເຌ, ນິຏ຺ຐານໍ ປຣິໂຍສານໍ.

ຕຊ຺ຊນີຍກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ຕຊ຺ຊນີຍກມ຺ມສ຺ສ ວຕ຺ຖຸ ຈ ປຸຄ຺ຄໂລ ຈ ອາທິ, ຎຕ຺ຕິ ມຊ຺ເຌ, ກມ຺ມວາຈາ ປຣິໂຍສານໍ.

ນິຍສ຺ສກມ຺ມສ຺ສ…ເປ… ປພ຺ພາຊນີຍກມ຺ມສ຺ສ…ເປ… ປຏິສາຣຓີຍກມ຺ມສ຺ສ…ເປ… ອຸກ຺ເຂປນີຍກມ຺ມສ຺ສ…ເປ… ປຣິວາສທານສ຺ສ…ເປ… ມູລາຍປຏິກສ຺ສນາຍ…ເປ… ມານຕ຺ຕທານສ຺ສ…ເປ… ອພ຺ຠານສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ອພ຺ຠານສ຺ສ ວຕ຺ຖຸ ຈ ປຸຄ຺ຄໂລ ຈ ອາທິ, ຎຕ຺ຕິ ມຊ຺ເຌ, ກມ຺ມວາຈາ ປຣິໂຍສານໍ.

ອຸປສມ຺ປທາກມ຺ມສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ອຸປສມ຺ປທາກມ຺ມສ຺ສ ປຸຄ຺ຄໂລ ອາທິ, ຎຕ຺ຕິ ມຊ຺ເຌ, ກມ຺ມວາຈາ ປຣິໂຍສານໍ.

ຕຊ຺ຊນີຍກມ຺ມສ຺ສ ປຏິປ຺ປສ຺ສທ຺ຘິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ຕຊ຺ຊນີຍກມ຺ມສ຺ສ ປຏິປ຺ປສ຺ສທ຺ຘິຍາ ສມ຺ມາວຕ຺ຕນາ ອາທິ, ຎຕ຺ຕິ ມຊ຺ເຌ, ກມ຺ມວາຈາ ປຣິໂຍສານໍ.

ນິຍສ຺ສກມ຺ມສ຺ສ…ເປ… ປພ຺ພາຊນີຍກມ຺ມສ຺ສ…ເປ… ປຏິສາຣຓີຍກມ຺ມສ຺ສ…ເປ… ອຸກ຺ເຂປນີຍກມ຺ມສ຺ສ ປຏິປ຺ປສ຺ສທ຺ຘິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ອຸກ຺ເຂປນີຍກມ຺ມສ຺ສ ປຏິປ຺ປສ຺ສທ຺ຘິຍາ ສມ຺ມາວຕ຺ຕນາ ອາທິ, ຎຕ຺ຕິ ມຊ຺ເຌ, ກມ຺ມວາຈາ ປຣິໂຍສານໍ.

ສຕິວິນຍສ຺ສ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ສຕິວິນຍສ຺ສ ວຕ຺ຖຸ ຈ ປຸຄ຺ຄໂລ ຈ ອາທິ, ຎຕ຺ຕິ ມຊ຺ເຌ, ກມ຺ມວາຈາ ປຣິໂຍສານໍ.

ອມູຬ຺ຫວິນຍສ຺ສ …ເປ… ຕສ຺ສປາປິຍສິກາຍ…ເປ… ຕິຓວຕ຺ຖາຣກສ຺ສ…ເປ… ຠິກ຺ຂຸໂນວາທກສມ຺ມຸຕິຍາ…ເປ… ຕິຈີວເຣນ ອວິປ຺ປວາສສມ຺ມຸຕິຍາ…ເປ… ສນ຺ຖຕສມ຺ມຸຕິຍາ…ເປ… ຣູປິຍຉຑ຺ຑກສມ຺ມຸຕິຍາ…ເປ… ສາຏິຍຄ຺ຄາຫາປກສມ຺ມຸຕິຍາ…ເປ… ປຕ຺ຕຄ຺ຄາຫາປກສມ຺ມຸຕິຍາ…ເປ… ທຓ຺ຑສມ຺ມຸຕິຍາ…ເປ… ສິກ຺ກາສມ຺ມຸຕິຍາ…ເປ… ທຓ຺ຑສິກ຺ກາສມ຺ມຸຕິຍາ ໂກ ອາທິ, ກິໍ ມຊ຺ເຌ, ກິໍ ປຣິໂຍສານນ຺ຕິ? ທຓ຺ຑສິກ຺ກາສມ຺ມຸຕິຍາ ວຕ຺ຖຸ ຈ ປຸຄ຺ຄໂລ ຈ ອາທິ, ຎຕ຺ຕິ ມຊ຺ເຌ, ກມ຺ມວາຈາ ປຣິໂຍສານໍ.

ອຸໂປສຖາທິປຸຈ຺ຉາວິສ຺ສຊ຺ຊນາ ນິຏ຺ຐິຕາ.