໘. ຕພ຺ຠາຄິຍວາໂຣ

໒໙໘. ກຕິ ສມຖາ ວິວາທາຘິກຣຓສ຺ສ ຕພ຺ຠາຄິຍາ? ກຕິ ສມຖາ ວິວາທາຘິກຣຓສ຺ສ ອຎ຺ຎຠາຄິຍາ? ກຕິ ສມຖາ ອນຸວາທາຘິກຣຓສ຺ສ ຕພ຺ຠາຄິຍາ? ກຕິ ສມຖາ ອນຸວາທາຘິກຣຓສ຺ສ ອຎ຺ຎຠາຄິຍາ? ກຕິ ສມຖາ ອາປຕ຺ຕາຘິກຣຓສ຺ສ ຕພ຺ຠາຄິຍາ? ກຕິ ສມຖາ ອາປຕ຺ຕາຘິກຣຓສ຺ສ ອຎ຺ຎຠາຄິຍາ? ກຕິ ສມຖາ ກິຈ຺ຈາຘິກຣຓສ຺ສ ຕພ຺ຠາຄິຍາ? ກຕິ ສມຖາ ກິຈ຺ຈາຘິກຣຓສ຺ສ ອຎ຺ຎຠາຄິຍາ?

ທ຺ເວ ສມຖາ ວິວາທາຘິກຣຓສ຺ສ ຕພ຺ຠາຄິຍາ – ສມ຺ມຸຂາວິນໂຍ, ເຍຠຸຍ຺ຍສິກາ. ປຎ຺ຈ ສມຖາ ວິວາທາຘິກຣຓສ຺ສ ອຎ຺ຎຠາຄິຍາ – ສຕິວິນໂຍ, ອມູຬ຺ຫວິນໂຍ, ປຏິຎ຺ຎາຕກຣຓໍ, ຕສ຺ສປາປິຍສິກາ, ຕິຓວຕ຺ຖາຣໂກ.

ຈຕ຺ຕາໂຣ ສມຖາ ອນຸວາທາຘິກຣຓສ຺ສ ຕພ຺ຠາຄິຍາ – ສມ຺ມຸຂາວິນໂຍ, ສຕິວິນໂຍ, ອມູຬ຺ຫວິນໂຍ, ຕສ຺ສປາປິຍສິກາ. ຕໂຍ ສມຖາ ອນຸວາທາຘິກຣຓສ຺ສ ອຎ຺ຎຠາຄິຍາ – ເຍຠຸຍ຺ຍສິກາ, ປຏິຎ຺ຎາຕກຣຓໍ, ຕິຓວຕ຺ຖາຣໂກ.

ຕໂຍ ສມຖາ ອາປຕ຺ຕາຘິກຣຓສ຺ສ ຕພ຺ຠາຄິຍາ – ສມ຺ມຸຂາວິນໂຍ, ປຏິຎ຺ຎາຕກຣຓໍ, ຕິຓວຕ຺ຖາຣໂກ. ຈຕ຺ຕາໂຣ ສມຖາ ອາປຕ຺ຕາຘິກຣຓສ຺ສ ອຎ຺ຎຠາຄິຍາ – ເຍຠຸຍ຺ຍສິກາ, ສຕິວິນໂຍ, ອມູຬ຺ຫວິນໂຍ, ຕສ຺ສປາປິຍສິກາ.

ເອໂກ ສມໂຖ ກິຈ຺ຈາຘິກຣຓສ຺ສ ຕພ຺ຠາຄິໂຍ – ສມ຺ມຸຂາວິນໂຍ. ຉ ສມຖາ ກິຈ຺ຈາຘິກຣຓສ຺ສ ອຎ຺ຎຠາຄິຍາ – ເຍຠຸຍ຺ຍສິກາ, ສຕິວິນໂຍ, ອມູຬ຺ຫວິນໂຍ, ປຏິຎ຺ຎາຕກຣຓໍ, ຕສ຺ສປາປິຍສິກາ, ຕິຓວຕ຺ຖາຣໂກ.

ຕພ຺ຠາຄິຍວາໂຣ ນິຏ຺ຐິໂຕ ອຏ຺ຐໂມ.