໒໐. ສມຸຏ຺ຐາປນວາໂຣ

໓໑໔. ວິວາທາຘິກຣຓໍ ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ ສມຸຏ຺ຐາເປຕິ? ວິວາທາຘິກຣຓໍ ຈຕຸນ຺ນໍ ອຘິກຣຓານໍ ນ ກຕມໍ ອຘິກຣຓໍ ສມຸຏ຺ຐາເປຕິ; ອປິຈ, ວິວາທາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ. ຍຖາ ກຖໍ ວິຍ? [ຈູຬວ. ໒໑໕; ປຣິ. ໓໔໘ ອາທໂຍ] ອິຘ ຠິກ຺ຂູ ວິວທນ຺ຕິ – ‘‘ຘມ຺ໂມຕິ ວາ, ອຘມ຺ໂມຕິ ວາ, ວິນໂຍຕິ ວາ, ອວິນໂຍຕິ ວາ, ອຠາສິຕໍ ອລປິຕໍ ຕຖາຄເຕນາຕິ ວາ, ຠາສິຕໍ ລປິຕໍ ຕຖາຄເຕນາຕິ ວາ, ອນາຈິຓ຺ຓໍ ຕຖາຄເຕນາຕິ ວາ, ອາຈິຓ຺ຓໍ ຕຖາຄເຕນາຕິ ວາ, ອປຎ຺ຎຕ຺ຕໍ ຕຖາຄເຕນາຕິ ວາ, ປຎ຺ຎຕ຺ຕໍ ຕຖາຄເຕນາຕິ ວາ, ອາປຕ຺ຕີຕິ ວາ, ອນາປຕ຺ຕີຕິ ວາ, ລຫຸກາ ອາປຕ຺ຕີຕິ ວາ, ຄຣຸກາ ອາປຕ຺ຕີຕິ ວາ, ສາວເສສາ ອາປຕ຺ຕີຕິ ວາ, ອນວເສສາ ອາປຕ຺ຕີຕິ ວາ, ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ’’. ຍໍ ຕຕ຺ຖ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ນານາວາໂທ ອຎ຺ຎຖາວາໂທ ວິປຈ຺ຈຕາຍ ໂວຫາໂຣ ເມຘກໍ [ເມຘຄໍ (ກ.)], ອິທໍ ວຸຈ຺ຈຕິ ວິວາທາຘິກຣຓໍ. ວິວາທາຘິກຣເຓ ສງ຺ໂຆ ວິວທຕິ. ວິວາທາຘິກຣຓໍ ວິວທມາໂນ ອນຸວທຕິ. ອນຸວາທາຘິກຣຓໍ ອນຸວທມາໂນ ອາປຕ຺ຕິໍ ອາປຊ຺ຊຕິ ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ ກິຈ຺ຈາຘິກຣຓໍ. ເອວໍ ວິວາທາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ.

໓໑໕. ອນຸວາທາຘິກຣຓໍ ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ ສມຸຏ຺ຐາເປຕິ? ອນຸວາທາຘິກຣຓໍ ຈຕຸນ຺ນໍ ອຘິກຣຓານໍ ນ ກຕມໍ ອຘິກຣຓໍ ສມຸຏ຺ຐາເປຕິ; ອປິຈ, ອນຸວາທາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ. ຍຖາ ກຖໍ ວິຍ? [ຈູຬວ. ໒໑໕; ປຣິ. ໓໔໘ ອາທໂຍ] ອິຘ ຠິກ຺ຂູ ຠິກ຺ຂຸໍ ອນຸວທນ຺ຕິ ສີລວິປຕ຺ຕິຍາ ວາ ອາຈາຣວິປຕ຺ຕິຍາ ວາ ທິຏ຺ຐິວິປຕ຺ຕິຍາ ວາ ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ, ອິທໍ ວຸຈ຺ຈຕິ ອນຸວາທາຘິກຣຓໍ. ອນຸວາທາຘິກຣເຓ ສງ຺ໂຆ ວິວທຕິ. ວິວາທາຘິກຣຓໍ ວິວທມາໂນ ອນຸວທຕິ. ອນຸວາທາຘິກຣຓໍ ອນຸວທມາໂນ ອາປຕ຺ຕິໍ ອາປຊ຺ຊຕິ ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ ກິຈ຺ຈາຘິກຣຓໍ. ເອວໍ ອນຸວາທາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ.

໓໑໖. ອາປຕ຺ຕາຘິກຣຓໍ ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ ສມຸຏ຺ຐາເປຕິ? ອາປຕ຺ຕາຘິກຣຓໍ ຈຕຸນ຺ນໍ ອຘິກຣຓານໍ ນ ກຕມໍ ອຘິກຣຓໍ ສມຸຏ຺ຐາເປຕິ; ອປິຈ, ອາປຕ຺ຕາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ. ຍຖາ ກຖໍ ວິຍ? ປຎ຺ຈປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ, ສຕ຺ຕປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ, ອິທໍ ວຸຈ຺ຈຕິ ອາປຕ຺ຕາຘິກຣຓໍ. ອາປຕ຺ຕາຘິກຣເຓ ສງ຺ໂຆ ວິວທຕິ. ວິວາທາຘິກຣຓໍ ວິວທມາໂນ ອນຸວທຕິ. ອນຸວາທາຘິກຣຓໍ ອນຸວທມາໂນ ອາປຕ຺ຕິໍ ອາປຊ຺ຊຕິ ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ ກິຈ຺ຈາຘິກຣຓໍ. ເອວໍ ອາປຕ຺ຕາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ.

໓໑໗. ກິຈ຺ຈາຘິກຣຓໍ ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ ສມຸຏ຺ຐາເປຕິ? ກິຈ຺ຈາຘິກຣຓໍ ຈຕຸນ຺ນໍ ອຘິກຣຓານໍ ນ ກຕມໍ ອຘິກຣຓໍ ສມຸຏ຺ຐາເປຕິ, ອປິຈ ກິຈ຺ຈາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ. ຍຖາ ກຖໍ ວິຍ? ຍາ ສງ຺ຆສ຺ສ ກິຈ຺ຈຍຕາ ກຣຓີຍຕາ ອປໂລກນກມ຺ມໍ ຎຕ຺ຕິກມ຺ມໍ ຎຕ຺ຕິທຸຕິຍກມ຺ມໍ ຎຕ຺ຕິຈຕຸຕ຺ຖກມ຺ມໍ, ອິທໍ ວຸຈ຺ຈຕິ ກິຈ຺ຈາຘິກຣຓໍ. ກິຈ຺ຈາຘິກຣເຓ ສງ຺ໂຆ ວິວທຕິ. ວິວາທາຘິກຣຓໍ ວິວທມາໂນ ອນຸວທຕິ. ອນຸວາທາຘິກຣຓໍ ອນຸວທມາໂນ ອາປຕ຺ຕິໍ ອາປຊ຺ຊຕິ ອາປຕ຺ຕາຘິກຣຓໍ. ຕາຍ ອາປຕ຺ຕິຍາ ສງ຺ໂຆ ກມ຺ມໍ ກໂຣຕິ ກິຈ຺ຈາຘິກຣຓໍ. ເອວໍ ກິຈ຺ຈາຘິກຣຓປຈ຺ຈຍາ ຈຕ຺ຕາໂຣ ອຘິກຣຓາ ຊາຍນ຺ຕິ.

ສມຸຏ຺ຐາປນວາໂຣ ນິຏ຺ຐິໂຕ ວີສຕິໂມ.