໔. ວິປຕ຺ຕິປຈ຺ຈຍວາໂຣ

໒໘໔. ສີລວິປຕ຺ຕິປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ສີລວິປຕ຺ຕິປຈ຺ຈຍາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ – ຠິກ຺ຂຸນີ ຊານໍ ປາຣາຊິກໍ ຘມ຺ມໍ ປຏິຈ຺ຉາເທຕິ, ອາປຕ຺ຕິ ປາຣາຊິກສ຺ສ; ເວມຕິກາ ປຏິຈ຺ຉາເທຕິ, ອາປຕ຺ຕິ ຖຸລ຺ລຈ຺ຈຍສ຺ສ; ຠິກ຺ຂຸ ສງ຺ຆາທິເສສໍ ປຏິຈ຺ຉາເທຕິ, ອາປຕ຺ຕິ ປາຈິຕ຺ຕິຍສ຺ສ; ອຕ຺ຕໂນ ທຸຏ຺ຐຸລ຺ລໍ ອາປຕ຺ຕິໍ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ – ສີລວິປຕ຺ຕິປຈ຺ຈຍາ ອິມາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຈຕູຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໘໕. ອາຈາຣວິປຕ຺ຕິປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອາຈາຣວິປຕ຺ຕິປຈ຺ຈຍາ ເອກໍ ອາປຕ຺ຕິໍ ອາປຊ຺ຊຕິ. ອາຈາຣວິປຕ຺ຕິໍ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ – ອາຈາຣວິປຕ຺ຕິປຈ຺ຈຍາ ອິມໍ ເອກໍ ອາປຕ຺ຕິໍ ອາປຊ຺ຊຕິ.

ສາ ອາປຕ຺ຕິ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊຕິ …ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕິ? ສາ ອາປຕ຺ຕິ ຈຕຸນ຺ນໍ ວິປຕ຺ຕີນໍ ເອກໍ ວິປຕ຺ຕິໍ ຠຊຕິ – ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ເອເກນ ອາປຕ຺ຕິກ຺ຂນ຺ເຘນ ສງ຺ຄຫິຕາ – ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ. ຈຕຸນ຺ນໍ ອຘິກຣຓານໍ ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໘໖. ທິຏ຺ຐິວິປຕ຺ຕິປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ທິຏ຺ຐິວິປຕ຺ຕິປຈ຺ຈຍາ ທ຺ເວ ອາປຕ຺ຕິໂຍ ອາປຊ຺ຊຕິ. ປາປິກາຍ ທິຏ຺ຐິຍາ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊຕິ, ຎຕ຺ຕິຍາ ທຸກ຺ກຏໍ [ຎຕ຺ຕິຍາ ທຸກ຺ກຏໍ, ທ຺ວີຫິ ກມ຺ມວາຈາຫິ ທຸກ຺ກຏາ (ສ຺ຍາ. ກ.)]; ກມ຺ມວາຈາປຣິໂຍສາເນ ອາປຕ຺ຕິ ປາຈິຕ຺ຕິຍສ຺ສ – ທິຏ຺ຐິວິປຕ຺ຕິປຈ຺ຈຍາ ອິມາ ທ຺ເວ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ເອກໍ ວິປຕ຺ຕິໍ ຠຊນ຺ຕິ – ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ທ຺ວີຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໘໗. ອາຊີວວິປຕ຺ຕິປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອາຊີວວິປຕ຺ຕິປຈ຺ຈຍາ ຉ ອາປຕ຺ຕິໂຍ ອາປຊ຺ຊຕິ – ອາຊີວເຫຕຸ ອາຊີວກາຣຓາ ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ, ອາປຕ຺ຕິ ປາຣາຊິກສ຺ສ; ອາຊີວເຫຕຸ ອາຊີວກາຣຓາ ສຎ຺ຈຣິຕ຺ຕໍ ສມາປຊ຺ຊຕິ, ອາປຕ຺ຕິ ສງ຺ຆາທິເສສສ຺ສ; ອາຊີວເຫຕຸ ອາຊີວກາຣຓາ ‘‘ໂຍ ເຕ ວິຫາເຣ ວສຕິ, ໂສ ຠິກ຺ຂຸ ອຣຫາ’’ຕິ ຠຓຕິ, ປຏິວິຊານນ຺ຕສ຺ສ ອາປຕ຺ຕິ ຖຸລ຺ລຈ຺ຈຍສ຺ສ; ອາຊີວເຫຕຸ ອາຊີວກາຣຓາ ຠິກ຺ຂຸ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ; ອາຊີວເຫຕຸ ອາຊີວກາຣຓາ ຠິກ຺ຂຸນີ ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ປາຏິເທສນີຍສ຺ສ; ອາຊີວເຫຕຸ ອາຊີວກາຣຓາ ສູປໍ ວາ ໂອທນໍ ວາ ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ທຸກ຺ກຏສ຺ສ – ອາຊີວວິປຕ຺ຕິປຈ຺ຈຍາ ອິມາ ຉ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ. ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຉຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ປາຏິເທສນີຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ສມຸຏ຺ຐນ຺ຕິ, ນ ວາຈໂຕ ນ ຈິຕ຺ຕໂຕ; ສິຍາ ວາຈໂຕ ສມຸຏ຺ຐນ຺ຕິ, ນ ກາຍໂຕ ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ສມຸຏ຺ຐນ຺ຕິ, ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

ວິປຕ຺ຕິປຈ຺ຈຍວາໂຣ ນິຏ຺ຐິໂຕ ຈຕຸຕ຺ໂຖ.