໕. ອຘິກຣຓປຈ຺ຈຍວາໂຣ

໒໘໘. ວິວາທາຘິກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ວິວາທາຘິກຣຓປຈ຺ຈຍາ ທ຺ເວ ອາປຕ຺ຕິໂຍ ອາປຊ຺ຊຕິ – ອຸປສມ຺ປນ຺ນໍ ໂອມສຕິ, ອາປຕ຺ຕິ ປາຈິຕ຺ຕິຍສ຺ສ; ອນຸປສມ຺ປນ຺ນໍ ໂອມສຕິ, ອາປຕ຺ຕິ ທຸກ຺ກຏສ຺ສ – ວິວາທາຘິກຣຓປຈ຺ຈຍາ ອິມາ ທ຺ເວ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ເອກໍ ວິປຕ຺ຕິໍ ຠຊນ຺ຕິ – ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ທ຺ວີຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໘໙. ອນຸວາທາຘິກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອນຸວາທາຘິກຣຓປຈ຺ຈຍາ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສຕິ, ອາປຕ຺ຕິ ສງ຺ຆາທິເສສສ຺ສ; ອມູລເກນ ສງ຺ຆາທິເສເສນ ອນຸທ຺ຘໍເສຕິ, ອາປຕ຺ຕິ ປາຈິຕ຺ຕິຍສ຺ສ; ອມູລິກາຍ ອາຈາຣວິປຕ຺ຕິຍາ ອນຸທ຺ຘໍເສຕິ, ອາປຕ຺ຕິ ທຸກ຺ກຏສ຺ສ – ອນຸວາທາຘິກຣຓປຈ຺ຈຍາ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຕີຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐນ຺ຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໙໐. ອາປຕ຺ຕາຘິກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ອາປຕ຺ຕາຘິກຣຓປຈ຺ຈຍາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ. ຠິກ຺ຂຸນີ ຊານໍ ປາຣາຊິກໍ ຘມ຺ມໍ ປຏິຈ຺ຉາເທຕິ, ອາປຕ຺ຕິ ປາຣາຊິກສ຺ສ; ເວມຕິກາ ປຏິຈ຺ຉາເທຕິ, ອາປຕ຺ຕິ ຖຸລ຺ລຈ຺ຈຍສ຺ສ; ຠິກ຺ຂຸ ສງ຺ຆາທິເສສໍ ປຏິຈ຺ຉາເທຕິ; ອາປຕ຺ຕິ ປາຈິຕ຺ຕິຍສ຺ສ; ອາຈາຣວິປຕ຺ຕິໍ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ – ອາປຕ຺ຕາຘິກຣຓປຈ຺ຈຍາ ອິມາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ຈຕູຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

໒໙໑. ກິຈ຺ຈາຘິກຣຓປຈ຺ຈຍາ ກຕິ ອາປຕ຺ຕິໂຍ ອາປຊ຺ຊຕິ? ກິຈ຺ຈາຘິກຣຓປຈ຺ຈຍາ ປຎ຺ຈ ອາປຕ຺ຕິໂຍ ອາປຊ຺ຊຕິ. ອຸກ຺ຂິຕ຺ຕານຸວຕ຺ຕິກາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊຕິ, ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ປາຣາຊິກສ຺ສ. ເຠທການຸວຕ຺ຕກາ ຠິກ຺ຂູ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕິ, ອາປຕ຺ຕິ ສງ຺ຆາທິເສສສ຺ສ; ປາປິກາຍ ທິຏ຺ຐິຍາ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊຕິ, ອາປຕ຺ຕິ ປາຈິຕ຺ຕິຍສ຺ສ – ກິຈ຺ຈາຘິກຣຓປຈ຺ຈຍາ ອິມາ ປຎ຺ຈ ອາປຕ຺ຕິໂຍ ອາປຊ຺ຊຕິ.

ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ…ເປ… ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຕາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ທ຺ເວ ວິປຕ຺ຕິໂຍ ຠຊນ຺ຕິ – ສິຍາ ສີລວິປຕ຺ຕິໍ, ສິຍາ ອາຈາຣວິປຕ຺ຕິໍ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ປຎ຺ຈຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ – ສິຍາ ປາຣາຊິກາປຕ຺ຕິກ຺ຂນ຺ເຘນ, ສິຍາ ສງ຺ຆາທິເສສາປຕ຺ຕິກ຺ຂນ຺ເຘນ, ສິຍາ ຖຸລ຺ລຈ຺ຈຍາປຕ຺ຕິກ຺ຂນ຺ເຘນ, ສິຍາ ປາຈິຕ຺ຕິຍາປຕ຺ຕິກ຺ຂນ຺ເຘນ, ສິຍາ ທຸກ຺ກຏາປຕ຺ຕິກ຺ຂນ຺ເຘນ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐນ຺ຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ, ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ຕີຫິ ສມເຖຫິ ສມ຺ມນ຺ຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ.

ຐເປຕ຺ວາ ສຕ຺ຕ ອາປຕ຺ຕິໂຍ ສຕ຺ຕ ອາປຕ຺ຕິກ຺ຂນ຺ເຘ, ອວເສສາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ກຕິ ວິປຕ຺ຕິໂຍ ຠຊນ຺ຕິ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕິຫິ ອາປຕ຺ຕິກ຺ຂນ຺ເຘຫິ ສງ຺ຄຫິຕາ? ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐນ຺ຕິ? ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ? ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມນ຺ຕິ? ຐເປຕ຺ວາ ສຕ຺ຕ ອາປຕ຺ຕິໂຍ ສຕ຺ຕ ອາປຕ຺ຕິກ຺ຂນ຺ເຘ ອວເສສາ ອາປຕ຺ຕິໂຍ ຈຕຸນ຺ນໍ ວິປຕ຺ຕີນໍ ນ ກຕມໍ ວິປຕ຺ຕິໍ ຠຊນ຺ຕິ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ນ ກຕເມນ ອາປຕ຺ຕິກ຺ຂນ຺ເຘນ ສງ຺ຄຫິຕາ. ຉນ຺ນໍ ອາປຕ຺ຕິສມຸຏ຺ຐານານໍ ນ ກຕເມນ ອາປຕ຺ຕິສມຸຏ຺ຐາເນນ ສມຸຏ຺ຐນ຺ຕິ. ຈຕຸນ຺ນໍ ອຘິກຣຓານໍ ນ ກຕມໍ ອຘິກຣຓໍ. ສຕ຺ຕນ຺ນໍ ສມຖານໍ ນ ກຕເມນ ສມເຖນ ສມ຺ມນ຺ຕິ. ຕໍ ກິສ຺ສ ເຫຕຸ? ຐເປຕ຺ວາ ສຕ຺ຕ ອາປຕ຺ຕິໂຍ ສຕ຺ຕ ອາປຕ຺ຕິກ຺ຂນ຺ເຘ, ນຕ຺ຖຎ຺ຎາ ອາປຕ຺ຕິໂຍຕິ.

ອຘິກຣຓປຈ຺ຈຍວາໂຣ ນິຏ຺ຐິໂຕ ປຎ຺ຈໂມ.

ອນ຺ຕຣເປຍ຺ຍາລໍ [ອນນ຺ຕຣເປຍ຺ຍາລໍ (ສີ. ສ຺ຍາ.)] ນິຏ຺ຐິຕໍ.

ຕສ຺ສຸທ຺ທານໍ –

ກຕິປຸຈ຺ຉາ ສມຸຏ຺ຐານາ, ກຕາປຕ຺ຕິ ຕເຖວ ຈ;

ສມຸຏ຺ຐານາ ວິປຕ຺ຕິ ຈ, ຕຖາຘິກຣເຓນ ຈາຕິ.