໓. ປາຈິຕ຺ຕິຍາທິປຎ຺ຫາ

໔໘໑. ອຘິຏ຺ຐິຕໍ ຣຊນາຍ ຣຕ຺ຕໍ;

ກປ຺ປກຕມ຺ປິ ສນ຺ຕໍ;

ປຣິຠຸຎ຺ຊນ຺ຕສ຺ສ ອາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອຕ຺ຖງ຺ຄເຕ ສູຣິເຍ ຠິກ຺ຂຸ ມໍສານິ ຂາທຕິ;

ນ ອຸມ຺ມຕ຺ຕໂກ ນ ຈ ປນ ຂິຕ຺ຕຈິຕ຺ໂຕ;

ນ ຈາປິ ໂສ ເວທນາຏ຺ໂຏ ຠເວຍ຺ຍ;

ນ ຈສ຺ສ ໂຫຕິ ອາປຕ຺ຕິ;

ໂສ ຈ ຘມ຺ໂມ ສຸຄເຕນ ເທສິໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ຣຕ຺ຕຈິຕ຺ໂຕ ນ ຈ ປນ ເຖຍ຺ຍຈິຕ຺ໂຕ;

ນ ຈາປິ ໂສ ປຣໍ ມຣຓາຍ ເຈຕຍິ;

ສລາກໍ ເທນ຺ຕສ຺ສ ໂຫຕິ ເຉຊ຺ຊໍ;

ປຏິຄ຺ຄຓ຺ຫນ຺ຕສ຺ສ ຖຸລ຺ລຈ຺ຈຍໍ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ຈາປິ ອາຣຎ຺ຎກໍ ສາສງ຺ກສມ຺ມຕໍ;

ນ ຈາປິ ສງ຺ເຆນ ສມ຺ມຸຕິ ທິນ຺ນາ;

ນ ຈສ຺ສ ກຖິນໍ ອຕ຺ຖຕໍ ຕຕ຺ເຖວ;

ຈີວຣໍ ນິກ຺ຂິປິຕ຺ວາ ຄຈ຺ເຉຍ຺ຍ ອຑ຺ຒໂຍຊນໍ;

ຕຕ຺ເຖວ ອຣຸຓໍ ອຸຄ຺ຄຈ຺ຉນ຺ຕສ຺ສ ອນາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ກາຍິການິ ນ ວາຈສິການິ;

ສພ຺ພານິ ນານາວຕ຺ຖຸການິ;

ອປຸພ຺ພໍ ອຈຣິມໍ ອາປຊ຺ເຊຍ຺ຍ ເອກໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ວາຈສິການິ ນ ກາຍິການິ;

ສພ຺ພານິ ນານາວຕ຺ຖຸການິ;

ອປຸພ຺ພໍ ອຈຣິມໍ ອາປຊ຺ເຊຍ຺ຍ ເອກໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຕິສ຺ສິຕ຺ຖິໂຍ ເມຖຸນໍ ຕໍ ນ ເສເວ;

ຕໂຍ ປຸຣິເສ ຕໂຍ ອນຣິຍປຓ຺ຑເກ;

ນ ຈາຈເຣ ເມຖຸນໍ ພ຺ຍຎ຺ຊນສ຺ມິໍ;

ເຉຊ຺ຊໍ ສິຍາ ເມຖຸນຘມ຺ມປຈ຺ຈຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ມາຕຣໍ ຈີວຣໍ ຍາເຈ, ໂນ ຈ ສງ຺ເຆ [ໂນ ສໍຆສ຺ສ (ກ.), ໂນ ຈ ສໍຆສ຺ສ (ສ຺ຍາ.), ໂນ ເຈ ສໍຆສ຺ສ (ສີ.)] ປຣິຓຕໍ;

ເກນສ຺ສ ໂຫຕິ ອາປຕ຺ຕິ, ອນາປຕ຺ຕິ ຈ ຎາຕເກ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ກຸທ຺ໂຘ ອາຣາຘໂກ ໂຫຕິ, ກຸທ຺ໂຘ ໂຫຕິ ຄຣຫິໂຍ;

ອຖ ໂກ ນາມ ໂສ ຘມ຺ໂມ, ເຍນ ກຸທ຺ໂຘ ປສໍສິໂຍ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຕຸຏ຺ໂຐ ອາຣາຘໂກ ໂຫຕິ, ຕຸຏ຺ໂຐ ໂຫຕິ ຄຣຫິໂຍ;

ອຖ ໂກ ນາມ ໂສ ຘມ຺ໂມ, ເຍນ ຕຸຏ຺ໂຐ ຄຣຫິໂຍ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ສງ຺ຆາທິເສສໍ ຖຸລ຺ລຈ຺ຈຍໍ;

ປາຈິຕ຺ຕິຍໍ ປາຏິເທສນີຍໍ;

ທຸກ຺ກຏໍ ອາປຊ຺ເຊຍ຺ຍ ເອກໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອຸໂຠ ປຣິປຸຓ຺ຓວີສຕິວສ຺ສາ;

ອຸຠິນ຺ນໍ ເອກຸປຊ຺ຌາໂຍ;

ເອກາຈຣິໂຍ ເອກາ ກມ຺ມວາຈາ;

ເອໂກ ອຸປສມ຺ປນ຺ໂນ ເອໂກ ອນຸປສມ຺ປນ຺ໂນ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອກປ຺ປກຕໍ ນາປິ ຣຊນາຍ ຣຕ຺ຕໍ;

ເຕນ ນິວຕ຺ໂຖ ເຍນ ກາມໍ ວເຊຍ຺ຍ;

ນ ຈສ຺ສ ໂຫຕິ ອາປຕ຺ຕິ;

ໂສ ຈ ຘມ຺ໂມ ສຸຄເຕນ ເທສິໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ເທຕິ ນ ປຏິຄ຺ຄຓ຺ຫາຕິ, ປຏິຄ຺ຄໂຫ ເຕນ ນ ວິຊ຺ຊຕິ;

ອາປຊ຺ຊຕິ ຄຣຸກໍ ນ ລຫຸກໍ, ຕຎ຺ຈ ປຣິໂຠຄປຈ຺ຈຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ເທຕິ ນ ປຏິຄ຺ຄຓ຺ຫາຕິ, ປຏິຄ຺ຄໂຫ ເຕນ ນ ວິຊ຺ຊຕິ;

ອາປຊ຺ຊຕິ ລຫຸກໍ ນ ຄຣຸກໍ, ຕຎ຺ຈ ປຣິໂຠຄປຈ຺ຈຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອາປຊ຺ຊຕິ ຄຣຸກໍ ສາວເສສໍ;

ຉາເທຕິ ອນາທຣິຍໍ ປຏິຈ຺ຈ;

ນ ຠິກ຺ຂຸນີ ໂນ ຈ ຜຸເສຍ຺ຍ ວຊ຺ຊໍ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ເສທໂມຈນຄາຖາ ນິຏ຺ຐິຕາ.