ເສທໂມຈນຄາຖາ

໑. ອວິປ຺ປວາສປຎ຺ຫາ

໔໗໙. ອສໍວາໂສ ຠິກ຺ຂູຫິ ຈ ຠິກ຺ຂຸນີຫິ ຈ;

ສມ຺ໂຠໂຄ ເອກຈ຺ໂຈ ຕຫິໍ ນ ລພ຺ຠຕິ;

ອວິປ຺ປວາເສນ ອນາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອວິສ຺ສຊ຺ຊິຍໍ ອເວຠງ຺ຄິຍໍ;

ປຎ຺ຈ ວຸຕ຺ຕາ ມເຫສິນາ;

ວິສ຺ສຊ຺ຊນ຺ຕສ຺ສ ປຣິຠຸຎ຺ຊນ຺ຕສ຺ສ ອນາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ທສ ປຸຄ຺ຄເລ ນ ວທາມິ, ເອກາທສ ວິວຊ຺ຊິຍ;

ວຸຑ຺ຒໍ ວນ຺ທນ຺ຕສ຺ສ ອາປຕ຺ຕິ, ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ອຸກ຺ຂິຕ຺ຕໂກ ນ ຈ ປນ ປາຣິວາສິໂກ;

ນ ສງ຺ຆຠິນ຺ໂນ ນ ຈ ປນ ປກ຺ຂສງ຺ກນ຺ໂຕ;

ສມານສໍວາສກຠູມິຍາ ຐິໂຕ;

ກຖໍ ນຸ ສິກ຺ຂາຍ ອສາຘາຣໂຓ ສິຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອຸເປຕິ ຘມ຺ມໍ ປຣິປຸຈ຺ຉມາໂນ, ກຸສລໍ ອຕ຺ຖູປສຎ຺ຫິຕໍ;

ນ ຊີວຕິ ນ ມໂຕ ນ ນິພ຺ພຸໂຕ, ຕໍ ປຸຄ຺ຄລໍ ກຕມໍ ວທນ຺ຕິ ພຸທ຺ຘາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອຸພ຺ຠກ຺ຂເກ ນ ວທາມິ, ອໂຘ ນາຠິໍ ວິວຊ຺ຊິຍ;

ເມຖຸນຘມ຺ມປຈ຺ຈຍາ, ກຖໍ ປາຣາຊິໂກ ສິຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຠິກ຺ຂຸ ສຎ຺ຎາຈິກາຍ ກຸຏິໍ ກໂຣຕິ;

ອເທສິຕວຕ຺ຖຸກໍ ປມາຓາຕິກ຺ກນ຺ຕໍ;

ສາຣມ຺ຠໍ ອປຣິກ຺ກມນໍ ອນາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຠິກ຺ຂຸ ສຎ຺ຎາຈິກາຍ ກຸຏິໍ ກໂຣຕິ;

ເທສິຕວຕ຺ຖຸກໍ ປມາຓິກໍ;

ອນາຣມ຺ຠໍ ສປຣິກ຺ກມນໍ ອາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ກາຍິກໍ ກິຎ຺ຈິ ປໂຍຄມາຈເຣ;

ນ ຈາປິ ວາຈາຍ ປເຣ ຠເຓຍ຺ຍ;

ອາປຊ຺ເຊຍ຺ຍ ຄຣຸກໍ ເຉຊ຺ຊວຕ຺ຖຸໍ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ກາຍິກໍ ວາຈສິກຎ຺ຈ ກິຎ຺ຈິ;

ມນສາປິ ສນ຺ໂຕ ນ ກເຣຍ຺ຍ ປາປໍ;

ໂສ ນາສິໂຕ ກິນ຺ຕິ ສຸນາສິໂຕ ຠເວ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອນາລປນ຺ໂຕ ມນຸເຊນ ເກນຈິ;

ວາຈາຄິຣໍ ໂນ ຈ ປເຣ ຠເຓຍ຺ຍ;

ອາປຊ຺ເຊຍ຺ຍ ວາຈສິກໍ ນ ກາຍິກໍ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ສິກ຺ຂາປທາ ພຸທ຺ຘວເຣນ ວຓ຺ຓິຕາ;

ສງ຺ຆາທິເສສາ ຈຕຸໂຣ ຠເວຍ຺ຍຸໍ;

ອາປຊ຺ເຊຍ຺ຍ ເອກປໂຍເຄນ ສພ຺ເພ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອຸໂຠ ເອກໂຕ ອຸປສມ຺ປນ຺ນາ;

ອຸຠິນ຺ນໍ ຫຕ຺ຖໂຕ ຈີວຣໍ ປຏິຄ຺ຄຓ຺ເຫຍ຺ຍ;

ສິຍາ ອາປຕ຺ຕິໂຍ ນານາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຈຕຸໂຣ ຊນາ ສໍວິຘາຍ;

ຄຣຸຠຓ຺ຑໍ ອວາຫຣຸໍ;

ຕໂຍ ປາຣາຊິກາ ເອໂກ ນ ປາຣາຊິໂກ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

໒. ປາຣາຊິກາທິປຎ຺ຫາ

໔໘໐. ອິຕ຺ຖີ ຈ ອພ຺ຠນ຺ຕເຣ ສິຍາ,

ຠິກ຺ຂຸ ຈ ພຫິທ຺ຘາ ສິຍາ;

ຉິທ຺ທໍ ຕສ຺ມິໍ ຆເຣ ນຕ຺ຖິ;

ເມຖຸນຘມ຺ມປຈ຺ຈຍາ;

ກຖໍ ປາຣາຊິໂກ ສິຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ເຕລໍ ມຘຸໍ ຜາຓິຕຎ຺ຈາປິ ສປ຺ປິໍ;

ສາມໍ ຄເຫຕ຺ວານ ນິກ຺ຂິເປຍ຺ຍ;

ອວີຕິວຕ຺ເຕ ສຕ຺ຕາເຫ;

ສຕິ ປຈ຺ຈເຍ ປຣິຠຸຎ຺ຊນ຺ຕສ຺ສ ອາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນິສ຺ສຄ຺ຄິເຍນ ອາປຕ຺ຕິ;

ສຸທ຺ຘເກນ ປາຈິຕ຺ຕິຍໍ;

ອາປຊ຺ຊນ຺ຕສ຺ສ ເອກໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຠິກ຺ຂູ ສິຍາ ວີສຕິຍາ ສມາຄຕາ;

ກມ຺ມໍ ກເຣຍ຺ຍຸໍ ສມຄ຺ຄສຎ຺ຎິໂນ;

ຠິກ຺ຂຸ ສິຍາ ທ຺ວາທສໂຍຊເນ ຐິໂຕ;

ກມ຺ມຎ຺ຈ ຕໍ ກຸປ຺ເປຍ຺ຍ ວຄ຺ຄປຈ຺ຈຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ປທວີຕິຫາຣມຕ຺ເຕນ ວາຈາຍ ຠຓິເຕນ ຈ;

ສພ຺ພານິ ຄຣຸການິ ສປ຺ປຏິກມ຺ມານິ;

ຈຕຸສຏ຺ຐິ ອາປຕ຺ຕິໂຍ ອາປຊ຺ເຊຍ຺ຍ ເອກໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນິວຕ຺ໂຖ ອນ຺ຕຣວາສເກນ;

ທິຄຸຓໍ ສງ຺ຆາຏິໍ ປາຣຸໂຕ;

ສພ຺ພານິ ຕານິ ນິສ຺ສຄ຺ຄິຍານິ ໂຫນ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ຈາປິ ຎຕ຺ຕິ ນ ຈ ປນ ກມ຺ມວາຈາ;

ນ ເຈຫິ ຠິກ຺ຂູຕິ ຊິໂນ ອໂວຈ;

ສຣຓຄມນມ຺ປິ ນ ຕສ຺ສ ອຕ຺ຖິ;

ອຸປສມ຺ປທາ ຈສ຺ສ ອກຸປ຺ປາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອິຕ຺ຖິໍ ຫເນ ນ ມາຕຣໍ, ປຸຣິສຎ຺ຈ ນ ປິຕຣໍ ຫເນ;

ຫເນຍ຺ຍ ອນຣິຍໍ ມນ຺ໂທ, ເຕນ ຈານນ຺ຕຣໍ ຜຸເສ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອິຕ຺ຖິໍ ຫເນ ຈ ມາຕຣໍ, ປຸຣິສຎ຺ຈ ປິຕຣໍ ຫເນ;

ມາຕຣໍ ປິຕຣໍ ຫນ຺ຕ຺ວາ, ນ ເຕນານນ຺ຕຣໍ ຜຸເສ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອໂຈທຍິຕ຺ວາ ອສ຺ສາຣຍິຕ຺ວາ;

ອສມ຺ມຸຂີຠູຕສ຺ສ ກເຣຍ຺ຍ ກມ຺ມໍ;

ກຕຎ຺ຈ ກມ຺ມໍ ສຸກຕໍ ຠເວຍ຺ຍ;

ກາຣໂກ ຈ ສງ຺ໂຆ ອນາປຕ຺ຕິໂກ ສິຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ໂຈທຍິຕ຺ວາ ສາຣຍິຕ຺ວາ;

ສມ຺ມຸຂີຠູຕສ຺ສ ກເຣຍ຺ຍ ກມ຺ມໍ;

ກຕຎ຺ຈ ກມ຺ມໍ ອກຕໍ ຠເວຍ຺ຍ;

ກາຣໂກ ຈ ສງ຺ໂຆ ສາປຕ຺ຕິໂກ ສິຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຉິນ຺ທນ຺ຕສ຺ສ ອາປຕ຺ຕິ, ຉິນ຺ທນ຺ຕສ຺ສ ອນາປຕ຺ຕິ;

ຉາເທນ຺ຕສ຺ສ ອາປຕ຺ຕິ, ຉາເທນ຺ຕສ຺ສ ອນາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ສຈ຺ຈໍ ຠຓນ຺ໂຕ ຄຣຸກໍ, ມຸສາ ຈ ລຫຸ ຠາສໂຕ;

ມຸສາ ຠຓນ຺ໂຕ ຄຣຸກໍ, ສຈ຺ຈຎ຺ຈ ລຫຸ ຠາສໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

໓. ປາຈິຕ຺ຕິຍາທິປຎ຺ຫາ

໔໘໑. ອຘິຏ຺ຐິຕໍ ຣຊນາຍ ຣຕ຺ຕໍ;

ກປ຺ປກຕມ຺ປິ ສນ຺ຕໍ;

ປຣິຠຸຎ຺ຊນ຺ຕສ຺ສ ອາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ອຕ຺ຖງ຺ຄເຕ ສູຣິເຍ ຠິກ຺ຂຸ ມໍສານິ ຂາທຕິ;

ນ ອຸມ຺ມຕ຺ຕໂກ ນ ຈ ປນ ຂິຕ຺ຕຈິຕ຺ໂຕ;

ນ ຈາປິ ໂສ ເວທນາຏ຺ໂຏ ຠເວຍ຺ຍ;

ນ ຈສ຺ສ ໂຫຕິ ອາປຕ຺ຕິ;

ໂສ ຈ ຘມ຺ໂມ ສຸຄເຕນ ເທສິໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ຣຕ຺ຕຈິຕ຺ໂຕ ນ ຈ ປນ ເຖຍ຺ຍຈິຕ຺ໂຕ;

ນ ຈາປິ ໂສ ປຣໍ ມຣຓາຍ ເຈຕຍິ;

ສລາກໍ ເທນ຺ຕສ຺ສ ໂຫຕິ ເຉຊ຺ຊໍ;

ປຏິຄ຺ຄຓ຺ຫນ຺ຕສ຺ສ ຖຸລ຺ລຈ຺ຈຍໍ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ນ ຈາປິ ອາຣຎ຺ຎກໍ ສາສງ຺ກສມ຺ມຕໍ;

ນ ຈາປິ ສງ຺ເຆນ ສມ຺ມຸຕິ ທິນ຺ນາ;

ນ ຈສ຺ສ ກຖິນໍ ອຕ຺ຖຕໍ ຕຕ຺ເຖວ;

ຈີວຣໍ ນິກ຺ຂິປິຕ຺ວາ ຄຈ຺ເຉຍ຺ຍ ອຑ຺ຒໂຍຊນໍ;

ຕຕ຺ເຖວ ອຣຸຓໍ ອຸຄ຺ຄຈ຺ຉນ຺ຕສ຺ສ ອນາປຕ຺ຕິ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ກາຍິການິ ນ ວາຈສິການິ;

ສພ຺ພານິ ນານາວຕ຺ຖຸການິ;

ອປຸພ຺ພໍ ອຈຣິມໍ ອາປຊ຺ເຊຍ຺ຍ ເອກໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ວາຈສິການິ ນ ກາຍິການິ;

ສພ຺ພານິ ນານາວຕ຺ຖຸການິ;

ອປຸພ຺ພໍ ອຈຣິມໍ ອາປຊ຺ເຊຍ຺ຍ ເອກໂຕ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ຕິສ຺ສິຕ຺ຖິໂຍ ເມຖຸນໍ ຕໍ ນ ເສເວ;

ຕໂຍ ປຸຣິເສ ຕໂຍ ອນຣິຍປຓ຺ຑເກ;

ນ ຈາຈເຣ ເມຖຸນໍ ພ຺ຍຎ຺ຊນສ຺ມິໍ;

ເຉຊ຺ຊໍ ສິຍາ ເມຖຸນຘມ຺ມປຈ຺ຈຍາ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ມາຕຣໍ ຈີວຣໍ ຍາເຈ, ໂນ ຈ ສງ຺ເຆ [ໂນ ສໍຆສ຺ສ (ກ.), ໂນ ຈ ສໍຆສ຺ສ (ສ຺ຍາ.), ໂນ ເຈ ສໍຆສ຺ສ (ສີ.)] ປຣິຓຕໍ;

ເກນສ຺ສ ໂຫຕິ ອາປຕ຺ຕິ, ອນາປຕ຺ຕິ ຈ ຎາຕເກ;

ປຎ຺ຫາ ເມສາ ກຸສເລຫິ ຈິນ຺ຕິຕາ.

ກຸທ຺ໂຘ ອາຣາຘໂກ ໂຫຕິ, ກຸທ຺ໂຘ ໂຫຕິ ຄຣຫິໂຍ;