໒. ນປ຺ປຏິປ຺ປສ຺ສມ຺ຠນວຄ຺ໂຄ

໔໒໐. ‘‘ກຕິຫິ ນຸ ໂຂ, ຠນ຺ເຕ, ອງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພ’’ນ຺ຕິ?

‘‘ປຎ຺ຈຫຸປາລິ, ອງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພໍ. ກຕເມຫິ ປຎ຺ຈຫິ? ອາປຕ຺ຕິໍ ອາປນ຺ໂນ ກມ຺ມກໂຕ ອຸປສມ຺ປາເທຕິ, ນິສ຺ສຍໍ ເທຕິ, ສາມເຓຣໍ ອຸປຏ຺ຐາເປຕິ, ຠິກ຺ຂຸໂນວາທກສມ຺ມຸຕິໍ ສາທິຍຕິ, ສມ຺ມໂຕປິ ຠິກ຺ຂຸນິໂຍ ໂອວທຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພໍ.

[ຈູຬວ. ໘-໙, ໑໘, ໓໐-໓໑, ໔໓, ໕໓, ໖໒, ໗໒] ‘‘ອປເຣຫິປິ, ອຸປາລິ, ປຎ຺ຈຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພໍ. ກຕເມຫິ ປຎ຺ຈຫິ? ຍາຍ ອາປຕ຺ຕິຍາ ສງ຺ເຆນ ກມ຺ມໍ ກຕໍ ໂຫຕິ ຕໍ ອາປຕ຺ຕິໍ ອາປຊ຺ຊຕິ, ອຎ຺ຎໍ ວາ ຕາທິສິກໍ, ຕໂຕ ວາ ປາປິຏ຺ຐຕຣໍ, ກມ຺ມໍ ຄຣຫຕິ, ກມ຺ມິເກ ຄຣຫຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພໍ.

‘‘ອປເຣຫິປິ, ອຸປາລິ, ປຎ຺ຈຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພໍ. ກຕເມຫິ ປຎ຺ຈຫິ? ພຸທ຺ຘສ຺ສ ອວຓ຺ຓໍ ຠາສຕິ, ຘມ຺ມສ຺ສ ອວຓ຺ຓໍ ຠາສຕິ, ສງ຺ຆສ຺ສ ອວຓ຺ຓໍ ຠາສຕິ, ມິຈ຺ຉາທິຏ຺ຐິໂກ ຈ ໂຫຕິ, ອາຊີວວິປນ຺ໂນ ຈ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພໍ.

‘‘ອປເຣຫິປິ, ອຸປາລິ, ປຎ຺ຈຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພໍ. ກຕເມຫິ ປຎ຺ຈຫິ? ອລຊ຺ຊີ ຈ ໂຫຕິ, ພາໂລ ຈ, ອປກຕຕ຺ໂຕ ຈ, ໂອມທ຺ທກາຣໂກ ຈ ໂຫຕິ, ວຕ຺ເຕສຸ ສິກ຺ຂາຍ ຈ ນ ປຣິປູຣກາຣີ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄຕສ຺ສ ຠິກ຺ຂຸໂນ ກມ຺ມໍ ນປ຺ປຏິປ຺ປສ຺ສມ຺ເຠຕພ຺ພ’’ນ຺ຕິ.

໔໒໑. ‘‘ສງ຺ຄາມາວຈເຣນ, ຠນ຺ເຕ, ຠິກ຺ຂຸນາ ສງ຺ຆໍ ອຸປສງ຺ກມນ຺ເຕນ ກຕິ ຘມ຺ເມ ອຊ຺ຌຕ຺ຕໍ ອຸປຏ຺ຐາເປຕ຺ວາ ສງ຺ໂຆ ອຸປສງ຺ກມິຕພ຺ໂພ’’ຕິ?

[ປຣິ. ໓໖໕] ‘‘ສງ຺ຄາມາວຈເຣນ, ອຸປາລິ, ຠິກ຺ຂຸນາ ສງ຺ຆໍ ອຸປສງ຺ກມນ຺ເຕນ ປຎ຺ຈ ຘມ຺ເມ ອຊ຺ຌຕ຺ຕໍ ອຸປຏ຺ຐາເປຕ຺ວາ ສງ຺ໂຆ ອຸປສງ຺ກມິຕພ຺ໂພ. ກຕເມ ປຎ຺ຈ? ສງ຺ຄາມາວຈເຣນ, ອຸປາລິ, ຠິກ຺ຂຸນາ ສງ຺ຆໍ ອຸປສງ຺ກມນ຺ເຕນ ນີຈຈິຕ຺ເຕນ ສງ຺ໂຆ ອຸປສງ຺ກມິຕພ຺ໂພ, ຣໂຊຫຣຓສເມນ ຈິຕ຺ເຕນ, ອາສນກຸສເລນ ຠວິຕພ຺ພໍ ນິສ຺ສຊ຺ຊກຸສເລນ, ເຖເຣ ຠິກ຺ຂູ ອນຸປຂຊ຺ຊນ຺ເຕນ, ນເວ ຠິກ຺ຂູ ອາສເນນ ອປ຺ປຏິພາຫນ຺ເຕນ ຍຖາປຕິຣູເປ ອາສເນ ນິສີທິຕພ຺ພໍ, ອນານາກຖິເກນ ຠວິຕພ຺ພໍ ອຕິຣຈ຺ຉານກຖິເກນ, ສາມໍ ວາ ຘມ຺ໂມ ຠາສິຕພ຺ໂພ, ປໂຣ ວາ ອຊ຺ເຌສິຕພ຺ໂພ, ອຣິໂຍ ວາ ຕຸຓ຺ຫິຠາໂວ ນາຕິມຎ຺ຎິຕພ຺ໂພ, ສເຈ, ອຸປາລິ, ສງ຺ໂຆ ສມຄ຺ຄກຣຓີຍານິ ກມ຺ມານິ ກໂຣຕິ ຕຕ຺ຣ ເຈ, ອຸປາລິ, ຠິກ຺ຂຸໂນ ນກ຺ຂມຕິ, ອປິ ທິຏ຺ຐາວິກມ຺ມໍ ກຕ຺ວາ ຎາເປຕພ຺ພາ ສາມຄ຺ຄີ. ຕໍ ກິສ຺ສເຫຕຸ? ມາຫໍ ສງ຺ເຆນ ນານຕ຺ໂຕ ອສ຺ສນ຺ຕິ. ສງ຺ຄາມາວຈເຣນຸປາລິ, ຠິກ຺ຂຸນາ ສງ຺ຆໍ ອຸປສງ຺ກມນ຺ເຕນ ອິເມ ປຎ຺ຈ ຘມ຺ເມ ອຊ຺ຌຕ຺ຕໍ ອຸປຏ຺ຐາເປຕ຺ວາ ສງ຺ໂຆ ອຸປສງ຺ກມິຕພ຺ໂພ’’ຕິ.

໔໒໒. ‘‘ກຕິຫິ ນຸ ໂຂ, ຠນ຺ເຕ, ອງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນອກນ຺ໂຕ ຈ ໂຫຕິ ພຫຸຊນອມນາໂປ ຈ ພຫຸຊນອຣຸຈິໂຕ ຈາ’’ຕິ?

‘‘ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນອກນ຺ໂຕ ຈ ໂຫຕິ ພຫຸຊນອມນາໂປ ຈ ພຫຸຊນອຣຸຈິໂຕ ຈ. ກຕເມຫິ ປຎ຺ຈຫິ? ອຸສ຺ສິຕມນ຺ຕີ ຈ ໂຫຕິ, ນິສ຺ສິຕຊປ຺ປີ ຈ, ນ ຈ ຠາສານຸສນ຺ຘິກຸສໂລ ໂຫຕິ, ນ ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ໂຈເທຕາ ໂຫຕິ, ນ ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ກາເຣຕາ ໂຫຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນອກນ຺ໂຕ ຈ ໂຫຕິ ພຫຸຊນອມນາໂປ ຈ ພຫຸຊນອຣຸຈິໂຕ ຈ. ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນກນ຺ໂຕ ຈ ໂຫຕິ ພຫຸຊນມນາໂປ ຈ ພຫຸຊນອຣຸຈິໂຕ ຈ. ກຕເມຫິ ປຎ຺ຈຫິ? ນ ອຸສ຺ສິຕມນ຺ຕີ ຈ ໂຫຕິ, ນ ນິສ຺ສິຕຊປ຺ປີ ຈ, ຠາສານຸສນ຺ຘິກຸສໂລ ຈ ໂຫຕິ, ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ໂຈເທຕາ ໂຫຕິ, ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ກາເຣຕາ ໂຫຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນກນ຺ໂຕ ຈ ໂຫຕິ ພຫຸຊນມນາໂປ ຈ ພຫຸຊນຣຸຈິໂຕ ຈ.

‘‘ອປເຣຫິປິ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນອກນ຺ໂຕ ຈ ໂຫຕິ ພຫຸຊນອມນາໂປ ຈ ພຫຸຊນອຣຸຈິໂຕ ຈ. ກຕເມຫິ ປຎ຺ຈຫິ? ອຸສ຺ສາເທຕາ ຈ ໂຫຕິ, ອປສາເທຕາ ຈ, ອຘມ຺ມໍ ຄຓ຺ຫາຕິ, ຘມ຺ມໍ ປຏິພາຫຕິ, ສມ຺ຜຎ຺ຈ ພຫຸໍ ຠາສຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນອກນ຺ໂຕ ຈ ໂຫຕິ ພຫຸຊນອມນາໂປ ຈ ພຫຸຊນອຣຸຈິໂຕ ຈ. ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນກນ຺ໂຕ ຈ ໂຫຕິ ພຫຸຊນມນາໂປ ຈ ພຫຸຊນຣຸຈິໂຕ ຈ. ກຕເມຫິ ປຎ຺ຈຫິ? ນ ອຸສ຺ສາເທຕາ ຈ ໂຫຕິ, ນ ອປສາເທຕາ ຈ, ຘມ຺ມໍ ຄຓ຺ຫາຕິ, ອຘມ຺ມໍ ປຏິພາຫຕິ, ສມ຺ຜຎ຺ຈ ນ ພຫຸໍ ຠາສຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນກນ຺ໂຕ ຈ ໂຫຕິ ພຫຸຊນມນາໂປ ຈ ພຫຸຊນຣຸຈິໂຕ ຈ.

‘‘ອປເຣຫິປິ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນອກນ຺ໂຕ ຈ ໂຫຕິ ພຫຸຊນອມນາໂປ ຈ ພຫຸຊນອຣຸຈິໂຕ ຈ. ກຕເມຫິ ປຎ຺ຈຫິ? ປສຍ຺ຫປວຕ຺ຕາ ໂຫຕິ, ອໂນກາສກມ຺ມໍ ກາເຣຕ຺ວາ ປວຕ຺ຕາ ໂຫຕິ, ນ ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ໂຈເທຕາ ໂຫຕິ, ນ ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ກາເຣຕາ ໂຫຕິ, ນ ຍຖາທິຏ຺ຐິຍາ ພ຺ຍາກຕາ ໂຫຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນອກນ຺ໂຕ ຈ ໂຫຕິ ພຫຸຊນອມນາໂປ ຈ ພຫຸຊນອຣຸຈິໂຕ ຈ. ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນກນ຺ໂຕ ຈ ໂຫຕິ ພຫຸຊນມນາໂປ ຈ ພຫຸຊນຣຸຈິໂຕ ຈ. ກຕເມຫິ ປຎ຺ຈຫິ? ນ ປສຍ຺ຫປວຕ຺ຕາ ໂຫຕິ, ໂອກາສກມ຺ມໍ ກາເຣຕ຺ວາ ປວຕ຺ຕາ ໂຫຕິ, ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ໂຈເທຕາ ໂຫຕິ, ຍຖາຘມ຺ເມ ຍຖາວິນເຍ ຍຖາປຕ຺ຕິຍາ ກາເຣຕາ ໂຫຕິ, ຍຖາທິຏ຺ຐິຍາ ພ຺ຍາກຕາ ໂຫຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠິກ຺ຂຸ ສງ຺ເຆ ໂວຫຣນ຺ໂຕ ພຫຸຊນກນ຺ໂຕ ຈ ໂຫຕິ ພຫຸຊນມນາໂປ ຈ ພຫຸຊນຣຸຈິໂຕ ຈາ’’ຕິ.

໔໒໓. ‘‘ກຕິ ນຸ ໂຂ, ຠນ຺ເຕ, ອານິສໍສາ ວິນຍປຣິຍຕ຺ຕິຍາ’’ຕິ?

‘‘ປຎ຺ຈິເມ, ອຸປາລິ, ອານິສໍສາ ວິນຍປຣິຍຕ຺ຕິຍາ. ກຕເມ ປຎ຺ຈ? ອຕ຺ຕໂນ ສີລກ຺ຂນ຺ໂຘ ສຸຄຸຕ຺ໂຕ ໂຫຕິ ສຸຣກ຺ຂິໂຕ, ກຸກ຺ກຸຈ຺ຈປກຕານໍ ປຏິສຣຓໍ ໂຫຕິ, ວິສາຣໂທ ສງ຺ຆມຊ຺ເຌ ໂວຫຣຕິ, ປຈ຺ຈຕ຺ຖິເກ ສຫຘມ຺ເມນ ສຸນິຄ຺ຄຫິຕໍ ນິຄ຺ຄຓ຺ຫາຕິ, ສທ຺ຘມ຺ມຏ຺ຐິຕິຍາ ປຏິປນ຺ໂນ ໂຫຕິ – ອິເມຫິ ໂຂ, ອຸປາລິ, ປຎ຺ຈານິສໍສາ ວິນຍປຣິຍຕ຺ຕິຍາ’’.

ນປ຺ປຏິປ຺ປສ຺ສມ຺ຠນວຄ຺ໂຄ ນິຏ຺ຐິໂຕ ທຸຕິໂຍ.

ຕສ຺ສຸທ຺ທານໍ –

ອາປນ຺ໂນ ຍາຍວຓ຺ຓຎ຺ຈ, ອລຊ຺ຊີ ສງ຺ຄາເມນ ຈ;

ອຸສ຺ສິຕາ ອຸສ຺ສາເທຕາ ຈ, ປສຍ຺ຫ ປຣິຍຕ຺ຕິຍາຕິ.

ປຐມຍມກປຎ຺ຎຕ຺ຕິ.