໑໓. ອາວາສິກວຄ຺ໂຄ

໔໖໑. ‘‘ກຕິຫິ ນຸ ໂຂ, ຠນ຺ເຕ, ອງ຺ເຄຫິ ສມນ຺ນາຄໂຕ ອາວາສິໂກ ຠິກ຺ຂຸ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ’’ຕິ? ‘‘ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ອາວາສິໂກ ຠິກ຺ຂຸ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ປຎ຺ຈຫິ? ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ, ສງ຺ຆິກໍ ປຸຄ຺ຄລິກປຣິໂຠເຄນ ປຣິຠຸຎ຺ຊຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ອາວາສິໂກ ຠິກ຺ຂຸ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ອາວາສິໂກ ຠິກ຺ຂຸ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ປຎ຺ຈຫິ? ນ ຉນ຺ທາຄຕິໍ ຄຈ຺ຉຕິ, ນ ໂທສາຄຕິໍ ຄຈ຺ຉຕິ, ນ ໂມຫາຄຕິໍ ຄຈ຺ຉຕິ, ນ ຠຍາຄຕິໍ ຄຈ຺ຉຕິ, ສງ຺ຆິກໍ ນ ປຸຄ຺ຄລິກປຣິໂຠເຄນ ປຣິຠຸຎ຺ຊຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ອາວາສິໂກ ຠິກ຺ຂຸ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ.

໔໖໒. ‘‘ກຕິ ນຸ ໂຂ, ຠນ຺ເຕ, ອຘມ຺ມິກາ ວິນຍພ຺ຍາກຣຓາ’’ຕິ? ‘‘ປຎ຺ຈິເມ, ອຸປາລິ, ອຘມ຺ມິກາ ວິນຍພ຺ຍາກຣຓາ. ກຕເມ ປຎ຺ຈ? ອິຘຸປາລິ, ຠິກ຺ຂຸ ອຘມ຺ມໍ ຘມ຺ໂມຕິ ປຣິຓາເມຕິ, ຘມ຺ມໍ ອຘມ຺ໂມຕິ ປຣິຓາເມຕິ, ອວິນຍໍ ວິນໂຍຕິ ປຣິຓາເມຕິ, ວິນຍໍ ອວິນໂຍຕິ ປຣິຓາເມຕິ, ອປຎ຺ຎຕ຺ຕໍ ປຎ຺ຎາເປຕິ, ປຎ຺ຎຕ຺ຕໍ ສມຸຈ຺ຉິນ຺ທຕິ – ອິເມ ໂຂ, ອຸປາລິ, ປຎ຺ຈ ອຘມ຺ມິກາ ວິນຍພ຺ຍາກຣຓາ. ປຎ຺ຈິເມ, ອຸປາລິ, ຘມ຺ມິກາ ວິນຍພ຺ຍາກຣຓາ. ກຕເມ ປຎ຺ຈ? ອິຘຸປາລິ, ຠິກ຺ຂຸ ອຘມ຺ມໍ ອຘມ຺ໂມຕິ ປຣິຓາເມຕິ, ຘມ຺ມໍ ຘມ຺ໂມຕິ ປຣິຓາເມຕິ, ອວິນຍໍ ອວິນໂຍຕິ ປຣິຓາເມຕິ, ວິນຍໍ ວິນໂຍຕິ ປຣິຓາເມຕິ, ອປຎ຺ຎຕ຺ຕໍ ນ ປຎ຺ຎເປຕິ, ປຎ຺ຎຕ຺ຕໍ ນ ສມຸຈ຺ຉິນ຺ທຕິ – ອິເມ ໂຂ, ອຸປາລິ, ປຎ຺ຈ ຘມ຺ມິກາ ວິນຍພ຺ຍາກຣຓາ’’ຕິ.

໔໖໓. [ອ. ນິ. ໕.໒໗໒-໒໘໕] ‘‘ກຕິຫິ ນຸ ໂຂ, ຠນ຺ເຕ, ອງ຺ເຄຫິ ສມນ຺ນາຄໂຕ ຠຕ຺ຕຸທ຺ເທສໂກ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ’’ຕິ? ‘‘ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ຠຕ຺ຕຸທ຺ເທສໂກ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ປຎ຺ຈຫິ? ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ, ອຸທ຺ທິຏ຺ຐານຸທ຺ທິຏ຺ຐໍ ນ ຊານາຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠຕ຺ຕຸທ຺ເທສໂກ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

[ອ. ນິ. ໕.໒໗໒-໒໘໕] ‘‘ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ຠຕ຺ຕຸທ຺ເທສໂກ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ປຎ຺ຈຫິ? ນ ຉນ຺ທາຄຕິໍ ຄຈ຺ຉຕິ, ນ ໂທສາຄຕິໍ ຄຈ຺ຉຕິ, ນ ໂມຫາຄຕິໍ ຄຈ຺ຉຕິ, ນ ຠຍາຄຕິໍ ຄຈ຺ຉຕິ, ອຸທ຺ທິຏ຺ຐານຸທ຺ທິຏ຺ຐໍ ຊານາຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ຠຕ຺ຕຸທ຺ເທສໂກ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ.

໔໖໔. ‘‘ກຕິຫິ ນຸ ໂຂ, ຠນ຺ເຕ, ອງ຺ເຄຫິ ສມນ຺ນາຄໂຕ ເສນາສນປຎ຺ຎາປໂກ…ເປ… ຠຓ຺ຑາຄາຣິໂກ…ເປ… ຈີວຣປຏິຄ຺ຄາຫໂກ…ເປ… ຈີວຣຠາຊໂກ…ເປ… ຍາຄຸຠາຊໂກ…ເປ… ຜລຠາຊໂກ…ເປ… ຂຊ຺ຊຠາຊໂກ…ເປ… ອປ຺ປມຕ຺ຕກວິສ຺ສຊ຺ຊໂກ…ເປ… ສາຏິຍຄ຺ຄາຫາປໂກ…ເປ… ປຕ຺ຕຄ຺ຄາຫາປໂກ…ເປ… ອາຣາມິກເປສໂກ…ເປ… ສາມເຓຣເປສໂກ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ’’ຕິ? ‘‘ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ສາມເຓຣເປສໂກ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ປຎ຺ຈຫິ? ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ, ເປສິຕາເປສິຕໍ ນ ຊານາຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ສາມເຓຣເປສໂກ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ປຎ຺ຈຫຸປາລິ, ອງ຺ເຄຫິ ສມນ຺ນາຄໂຕ ສາມເຓຣເປສໂກ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ປຎ຺ຈຫິ? ນ ຉນ຺ທາຄຕິໍ ຄຈ຺ຉຕິ, ນ ໂທສາຄຕິໍ ຄຈ຺ຉຕິ, ນ ໂມຫາຄຕິໍ ຄຈ຺ຉຕິ, ນ ຠຍາຄຕິໍ ຄຈ຺ຉຕິ, ເປສິຕາເປສິຕໍ ຊານາຕິ – ອິເມຫິ ໂຂ, ອຸປາລິ, ປຎ຺ຈຫງ຺ເຄຫິ ສມນ຺ນາຄໂຕ ສາມເຓຣເປສໂກ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ.

ອາວາສິກວຄ຺ໂຄ ນິຏ຺ຐິໂຕ ເຕຣສໂມ.

ຕສ຺ສຸທ຺ທານໍ –

ອາວາສິກພ຺ຍາກຣຓາ, ຠຕ຺ຕຸເສນາສນານິ ຈ;

ຠຓ຺ຑຈີວຣຄ຺ຄາໂຫ ຈ, ຈີວຣສ຺ສ ຈ ຠາຊໂກ.

ຍາຄຸ ຜລໍ ຂຊ຺ຊກຎ຺ຈ, ອປ຺ປສາຏິຍຄາຫໂກ;

ປຕ຺ໂຕ ອາຣາມິໂກ ເຈວ, ສາມເຓເຣນ ເປສໂກຕິ.