໔. ກຖິນາທິຊານິຕພ຺ພວິຠາໂຄ

໔໑໒. ກຖິນໍ ຊານິຕພ຺ພໍ, ກຖິນຕ຺ຖາໂຣ ຊານິຕພ຺ໂພ, ກຖິນສ຺ສ ອຕ຺ຖາຣມາໂສ ຊານິຕພ຺ໂພ, ກຖິນສ຺ສ ອຕ຺ຖາຣວິປຕ຺ຕິ ຊານິຕພ຺ພາ, ກຖິນສ຺ສ ອຕ຺ຖາຣສມ຺ປຕ຺ຕິ ຊານິຕພ຺ພາ, ນິມິຕ຺ຕກມ຺ມໍ ຊານິຕພ຺ພໍ, ປຣິກຖາ ຊານິຕພ຺ພາ, ກຸກ຺ກຸກຕໍ ຊານິຕພ຺ພໍ, ສນ຺ນິຘິ ຊານິຕພ຺ພາ, ນິສ຺ສຄ຺ຄິຍໍ ຊານິຕພ຺ພໍ.

ກຖິນໍ ຊານິຕພ຺ພນ຺ຕິ ເຕສຎ຺ເຎວ ຘມ຺ມານໍ ສງ຺ຄໂຫ ສມວາໂຍ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ ຍທິທໍ ກຖິນນ຺ຕິ.

ກຖິນສ຺ສ ອຕ຺ຖາຣມາໂສ ຊານິຕພ຺ໂພຕິ ວສ຺ສານສ຺ສ ປຈ຺ຉິໂມ ມາໂສ ຊານິຕພ຺ໂພ.

ກຖິນສ຺ສ ອຕ຺ຖາຣວິປຕ຺ຕິ ຊານິຕພ຺ພາຕິ ຈຕຸວີສຕິຍາ ອາກາເຣຫິ ກຖິນສ຺ສ ອຕ຺ຖາຣວິປຕ຺ຕິ ຊານິຕພ຺ພາ.

ກຖິນສ຺ສ ອຕ຺ຖາຣສມ຺ປຕ຺ຕິ ຊານິຕພ຺ພາຕິ ສຕ຺ຕຣສຫິ ອາກາເຣຫິ ກຖິນສ຺ສ ອຕ຺ຖາຣສມ຺ປຕ຺ຕິ ຊານິຕພ຺ພາ.

ນິມິຕ຺ຕກມ຺ມໍ ຊານິຕພ຺ພນ຺ຕິ ນິມິຕ຺ຕໍ ກໂຣຕິ ອິມິນາ ທຸສ຺ເສນ ກຖິນໍ ອຕ຺ຖຣິສ຺ສາມີຕິ.

ປຣິກຖາ ຊານິຕພ຺ພາຕິ ປຣິກຖໍ ກໂຣຕິ ອິມາຍ ປຣິກຖາຍ ກຖິນທຸສ຺ສໍ ນິພ຺ພຕ຺ເຕສ຺ສາມີຕິ.

ກຸກ຺ກຸກຕໍ ຊານິຕພ຺ພນ຺ຕິ ອນາທິຍທານໍ ຊານິຕພ຺ພໍ.

ສນ຺ນິຘິ ຊານິຕພ຺ພາຕິ ທ຺ເວ ສນ຺ນິຘິໂຍ ຊານິຕພ຺ພາ – ກຣຓສນ຺ນິຘິ ວາ ນິຈຍສນ຺ນິຘິ ວາ.

ນິສ຺ສຄ຺ຄິຍໍ ຊານິຕພ຺ພນ຺ຕິ ກຣິຍມາເນ ອຣຸຓໍ ອຸຏ຺ຐຫຕິ.

ກຖິນຕ຺ຖາໂຣ ຊານິຕພ຺ໂພຕິ ສເຈ ສງ຺ຆສ຺ສ ກຖິນທຸສ຺ສໍ ອຸປ຺ປນ຺ນໍ ໂຫຕິ, ສງ຺ເຆນ ກຖໍ ປຏິປຊ຺ຊິຕພ຺ພໍ, ອຕ຺ຖາຣເກນ ກຖໍ ປຏິປຊ຺ຊິຕພ຺ພໍ, ອນຸໂມທເກນ ກຖໍ ປຏິປຊ຺ຊິຕພ຺ພໍ.

໔໑໓. ສງ຺ເຆນ ຎຕ຺ຕິທຸຕິເຍນ ກມ຺ເມນ ກຖິນຕ຺ຖາຣກສ຺ສ ຠິກ຺ຂຸໂນ ທາຕພ຺ພໍ, ເຕນ ກຖິນຕ຺ຖາຣເກນ ຠິກ຺ຂຸນາ ຕທເຫວ ໂຘວິຕ຺ວາ ວິມຊ຺ຊິຕ຺ວາ ວິຈາເຣຕ຺ວາ ຉິນ຺ທິຕ຺ວາ ສິພ຺ເພຕ຺ວາ ຣຊິຕ຺ວາ ກປ຺ປໍ ກຕ຺ວາ ກຖິນໍ ອຕ຺ຖຣິຕພ຺ພໍ. ສເຈ ສງ຺ຆາຏິຍາ ກຖິນໍ ອຕ຺ຖຣິຕຸກາໂມ ໂຫຕິ, ໂປຣາຓິກາ ສງ຺ຆາຏິ ປຈ຺ຈຸທ຺ຘຣິຕພ຺ພາ, ນວາ ສງ຺ຆາຏິ ອຘິຏ຺ຐາຕພ຺ພາ. ອິມາຍ ສງ຺ຆາຏິຍາ ກຖິນໍ ອຕ຺ຖຣາມີຕິ ວາຈາ ຠິນ຺ທິຕພ຺ພາ. ສເຈ ອຸຕ຺ຕຣາສງ຺ເຄນ ກຖິນໍ ອຕ຺ຖຣິຕຸກາໂມ ໂຫຕິ, ໂປຣາຓໂກ ອຸຕ຺ຕຣາສງ຺ໂຄ ປຈ຺ຈຸທ຺ຘຣິຕພ຺ໂພ, ນໂວ ອຸຕ຺ຕຣາສງ຺ໂຄ ອຘິຏ຺ຐາຕພ຺ໂພ. ອິມິນາ ອຸຕ຺ຕຣາສງ຺ເຄນ ກຖິນໍ ອຕ຺ຖຣາມີຕິ ວາຈາ ຠິນ຺ທິຕພ຺ພາ. ສເຈ ອນ຺ຕຣວາສເກນ ກຖິນໍ ອຕ຺ຖຣິຕຸກາໂມ ໂຫຕິ, ໂປຣາຓໂກ ອນ຺ຕຣວາສໂກ ປຈ຺ຈຸທ຺ຘຣິຕພ຺ໂພ, ນໂວ ອນ຺ຕຣວາສໂກ ອຘິຏ຺ຐາຕພ຺ໂພ. ອິມິນາ ອນ຺ຕຣວາສເກນ ກຖິນໍ ອຕ຺ຖຣາມີຕິ ວາຈາ ຠິນ຺ທິຕພ຺ພາ. ເຕນ ກຖິນຕ຺ຖາຣເກນ ຠິກ຺ຂຸນາ ສງ຺ຆໍ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ອຕ຺ຖຕໍ, ຠນ຺ເຕ, ສງ຺ຆສ຺ສ ກຖິນໍ, ຘມ຺ມິໂກ ກຖິນຕ຺ຖາໂຣ, ອນຸໂມທຖາ’’ຕິ. ເຕຫິ ອນຸໂມທເກຫິ ຠິກ຺ຂູຫິ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ອຕ຺ຖຕໍ, ອາວຸໂສ, ສງ຺ຆສ຺ສ ກຖິນໍ, ຘມ຺ມິໂກ ກຖິນຕ຺ຖາໂຣ, ອນຸໂມທາມາ’’ຕິ. ເຕນ ກຖິນຕ຺ຖາຣເກນ ຠິກ຺ຂຸນາ ສມ຺ພຫຸເລ ຠິກ຺ຂູ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສຸ ວຈນີຍາ – ‘‘ອຕ຺ຖຕໍ, ຠນ຺ເຕ, ສງ຺ຆສ຺ສ ກຖິນໍ, ຘມ຺ມິໂກ ກຖິນຕ຺ຖາໂຣ, ອນຸໂມທຖາ’’ຕິ. ເຕຫິ ອນຸໂມທເກຫິ ຠິກ຺ຂູຫິ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ອຕ຺ຖຕໍ, ອາວຸໂສ, ສງ຺ຆສ຺ສ ກຖິນໍ, ຘມ຺ມິໂກ ກຖິນຕ຺ຖາໂຣ ອນຸໂມທາມາ’’ຕິ. ເຕນ ກຖິນຕ຺ຖາຣເກນ ຠິກ຺ຂຸນາ ເອກໍ ຠິກ຺ຂຸໍ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ອຕ຺ຖຕໍ, ອາວຸໂສ, ສງ຺ຆສ຺ສ ກຖິນໍ, ຘມ຺ມິໂກ ກຖິນຕ຺ຖາໂຣ, ອນຸໂມທາຫີ’’ຕິ. ເຕນ ອນຸໂມທເກນ ຠິກ຺ຂຸນາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ອຕ຺ຖຕໍ, ອາວຸໂສ, ສງ຺ຆສ຺ສ ກຖິນໍ, ຘມ຺ມິໂກ ກຖິນຕ຺ຖາໂຣ, ອນຸໂມທາມີ’’ຕິ.