໕. ປຸຄ຺ຄລສ຺ເສວກຖິນຕ຺ຖາໂຣ

໔໑໔. ສງ຺ໂຆ ກຖິນໍ ອຕ຺ຖຣຕິ, ຄໂຓ ກຖິນໍ ອຕ຺ຖຣຕິ, ປຸຄ຺ຄໂລ ກຖິນໍ ອຕ຺ຖຣຕີຕິ. ນ ສງ຺ໂຆ ກຖິນໍ ອຕ຺ຖຣຕິ, ນ ຄໂຓ ກຖິນໍ ອຕ຺ຖຣຕິ, ປຸຄ຺ຄໂລ ກຖິນໍ ອຕ຺ຖຣຕີຕິ. ຫຎ຺ຈິ ນ ສງ຺ໂຆ ກຖິນໍ ອຕ຺ຖຣຕິ, ນ ຄໂຓ ກຖິນໍ ອຕ຺ຖຣຕິ, ປຸຄ຺ຄໂລ ກຖິນໍ ອຕ຺ຖຣຕິ. ສງ຺ຆສ຺ສ ອນຕ຺ຖຕໍ ໂຫຕິ ກຖິນໍ, ຄຓສ຺ສ ອນຕ຺ຖຕໍ ໂຫຕິ ກຖິນໍ, ປຸຄ຺ຄລສ຺ສ ອຕ຺ຖຕໍ ໂຫຕິ ກຖິນໍ. ສງ຺ໂຆ ປາຕິໂມກ຺ຂໍ ອຸທ຺ທິສຕິ ຄໂຓ ປາຕິໂມກ຺ຂໍ ອຸທ຺ທິສຕິ ປຸຄ຺ຄໂລ ປາຕິໂມກ຺ຂໍ ອຸທ຺ທິສຕີຕິ ນ ສງ຺ໂຆ ປາຕິໂມກ຺ຂໍ ອຸທ຺ທິສຕິ, ນ ຄໂຓ ປາຕິໂມກ຺ຂໍ ອຸທ຺ທິສຕິ, ປຸຄ຺ຄໂລ ປາຕິໂມກ຺ຂໍ ອຸທ຺ທິສຕີຕິ. ຫຎ຺ຈິ ນ ສງ຺ໂຆ ປາຕິໂມກ຺ຂໍ ອຸທ຺ທິສຕິ, ນ ຄໂຓ ປາຕິໂມກ຺ຂໍ ອຸທ຺ທິສຕິ, ປຸຄ຺ຄໂລ ປາຕິໂມກ຺ຂໍ ອຸທ຺ທິສຕິ. ສງ຺ຆສ຺ສ ອນຸທ຺ທິຏ຺ຐໍ ໂຫຕິ ປາຕິໂມກ຺ຂໍ, ຄຓສ຺ສ ອນຸທ຺ທິຏ຺ຐໍ ໂຫຕິ ປາຕິໂມກ຺ຂໍ, ປຸຄ຺ຄລສ຺ສ ອຸທ຺ທິຏ຺ຐໍ ໂຫຕິ ປາຕິໂມກ຺ຂໍ. ສງ຺ຆສ຺ສ ສາມຄ຺ຄິຍາ ຄຓສ຺ສ ສາມຄ຺ຄິຍາ ປຸຄ຺ຄລສ຺ສ ອຸທ຺ເທສາ ສງ຺ຆສ຺ສ ອຸທ຺ທິຏ຺ຐໍ ໂຫຕິ ປາຕິໂມກ຺ຂໍ, ຄຓສ຺ສ ອຸທ຺ທິຏ຺ຐໍ ໂຫຕິ ປາຕິໂມກ຺ຂໍ, ປຸຄ຺ຄລສ຺ສ ອຸທ຺ທິຏ຺ຐໍ ໂຫຕິ ປາຕິໂມກ຺ຂໍ. ເອວເມວ ນ ສງ຺ໂຆ ກຖິນໍ ອຕ຺ຖຣຕິ, ນ ຄໂຓ ກຖິນໍ ອຕ຺ຖຣຕິ, ປຸຄ຺ຄໂລ ກຖິນໍ ອຕ຺ຖຣຕິ. ສງ຺ຆສ຺ສ ອນຸໂມທນາຍ ຄຓສ຺ສ ອນຸໂມທນາຍ ປຸຄ຺ຄລສ຺ສ ອຕ຺ຖາຣາ ສງ຺ຆສ຺ສ ອຕ຺ຖຕໍ ໂຫຕິ ກຖິນໍ, ຄຓສ຺ສ ອຕ຺ຖຕໍ ໂຫຕິ ກຖິນໍ, ປຸຄ຺ຄລສ຺ສ ອຕ຺ຖຕໍ ໂຫຕິ ກຖິນນ຺ຕິ.