໑. ມຸສາວາທວຄ຺ໂຄ

໑໖໕. ສມ຺ປຊານມຸສາວາທໍ ຠາສນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ສມ຺ປຊານມຸສາວາທໍ ຠາສນ຺ໂຕ ປຎ຺ຈ ອາປຕ຺ຕິໂຍ ອາປຊ຺ຊຕິ. ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ, ອາປຕ຺ຕິ ປາຣາຊິກສ຺ສ; ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສຕິ, ອາປຕ຺ຕິ ສງ຺ຆາທິເສສສ຺ສ; ‘‘ໂຍ ເຕ ວິຫາເຣ ວສຕິ, ໂສ ຠິກ຺ຂຸ ອຣຫາ’’ຕິ ຠຓຕິ, ປຏິວິຊານນ຺ຕສ຺ສ ອາປຕ຺ຕິ ຖຸລ຺ລຈ຺ຈຍສ຺ສ; ນ ປຏິວິຊານນ຺ຕສ຺ສ ອາປຕ຺ຕິ ທຸກ຺ກຏສ຺ສ; ສມ຺ປຊານມຸສາວາເທ ປາຈິຕ຺ຕິຍໍ – ສມ຺ປຊານມຸສາວາທໍ ຠາສນ຺ໂຕ ອິມາ ປຎ຺ຈ ອາປຕ຺ຕິໂຍ ອາປຊ຺ຊຕິ.

ໂອມສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸປສມ຺ປນ຺ນໍ ໂອມສຕິ, ອາປຕ຺ຕິ ປາຈິຕ຺ຕິຍສ຺ສ; ອນຸປສມ຺ປນ຺ນໍ ໂອມສຕິ, ອາປຕ຺ຕິ ທຸກ຺ກຏສ຺ສ.

ເປສຸຎ຺ຎໍ ອຸປສໍຫຣນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸປສມ຺ປນ຺ນສ຺ສ ເປສຸຎ຺ຎໍ ອຸປສໍຫຣຕິ, ອາປຕ຺ຕິ ປາຈິຕ຺ຕິຍສ຺ສ; ອນຸປສມ຺ປນ຺ນສ຺ສ ເປສຸຎ຺ຎໍ ອຸປສໍຫຣຕິ, ອາປຕ຺ຕິ ທຸກ຺ກຏສ຺ສ.

ອນຸປສມ຺ປນ຺ນໍ ປທໂສ ຘມ຺ມໍ ວາເຈນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວາເຈຕິ, ປໂຍເຄ ທຸກ຺ກຏໍ; ປເທ ປເທ ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ເນນ ອຸຕ຺ຕຣິທິຣຕ຺ຕຕິຣຕ຺ຕໍ ສຫເສຍ຺ຍໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິປຊ຺ຊຕິ, ປໂຍເຄ ທຸກ຺ກຏໍ; ນິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ມາຕຸຄາເມນ ສຫເສຍ຺ຍໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິປຊ຺ຊຕິ, ປໂຍເຄ ທຸກ຺ກຏໍ; ນິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ເທເສຕິ, ປໂຍເຄ ທຸກ຺ກຏໍ; ປເທ ປເທ ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ນສ຺ສ ອຸຕ຺ຕຣິມນຸສ຺ສຘມ຺ມໍ ຠູຕໍ ອາໂຣເຈນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອາໂຣເຈຕິ, ປໂຍເຄ ທຸກ຺ກຏໍ; ອາໂຣຈິເຕ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ທຸຏ຺ຐຸລ຺ລໍ ອາປຕ຺ຕິໍ ອນຸປສມ຺ປນ຺ນສ຺ສ ອາໂຣເຈນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອາໂຣເຈຕິ, ປໂຍເຄ ທຸກ຺ກຏໍ; ອາໂຣຈິເຕ ອາປຕ຺ຕິ ປາຈິຕ຺ຕິຍສ຺ສ.

ປຖວິໍ ຂຓນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຂຓຕິ, ປໂຍເຄ ທຸກ຺ກຏໍ; ປຫາເຣ ປຫາເຣ ອາປຕ຺ຕິ ປາຈິຕ຺ຕິຍສ຺ສ.

ມຸສາວາທວຄ຺ໂຄ ປຐໂມ.