໒. ກຕາປຕ຺ຕິວາໂຣ

໑. ປາຣາຊິກກຓ຺ຑໍ

໑໕໗. ເມຖຸນໍ ຘມ຺ມໍ ປຏິເສວນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ເມຖຸນໍ ຘມ຺ມໍ ປຏິເສວນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ອກ຺ຂາຍິເຕ ສຣີເຣ ເມຖຸນໍ ຘມ຺ມໍ ປຏິເສວຕິ, ອາປຕ຺ຕິ ປາຣາຊິກສ຺ສ; ເຍຠຸຍ຺ເຍນ ຂາຍິເຕ ສຣີເຣ ເມຖຸນໍ ຘມ຺ມໍ ປຏິເສວຕິ, ອາປຕ຺ຕິ ຖຸລ຺ລຈ຺ຈຍສ຺ສ; ວຏ຺ຏກເຕ [ວິວຏກເຕ (ສ຺ຍາ.)] ມຸເຂ ອຈ຺ຉຸປນ຺ຕໍ ອງ຺ຄຊາຕໍ ປເວເສຕິ, ອາປຕ຺ຕິ ທຸກ຺ກຏສ຺ສ – ເມຖຸນໍ ຘມ຺ມໍ ປຏິເສວນ຺ໂຕ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

໑໕໘. ອທິນ຺ນໍ ອາທິຍນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ອທິນ຺ນໍ ອາທິຍນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ປຎ຺ຈມາສກໍ ວາ ອຕິເຣກປຎ຺ຈມາສກໍ ວາ ອຄ຺ຆນກໍ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ອາປຕ຺ຕິ ປາຣາຊິກສ຺ສ; ອຕິເຣກມາສກໍ ວາ ອູນປຎ຺ຈມາສກໍ ວາ ອຄ຺ຆນກໍ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ອາປຕ຺ຕິ ຖຸລ຺ລຈ຺ຈຍສ຺ສ; ມາສກໍ ວາ ອູນມາສກໍ ວາ ອຄ຺ຆນກໍ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ອາປຕ຺ຕິ ທຸກ຺ກຏສ຺ສ – ອທິນ຺ນໍ ອາທິຍນ຺ໂຕ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

໑໕໙. ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣເປນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣເປນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ມນຸສ຺ສໍ ໂອທິສ຺ສ ໂອປາຕໍ ຂຓຕິ ‘‘ປປຕິຕ຺ວາ ມຣິສ຺ສຕີ’’ຕິ, ອາປຕ຺ຕິ ທຸກ຺ກຏສ຺ສ; ປປຕິເຕ ທຸກ຺ຂາ ເວທນາ ອຸປ຺ປຊ຺ຊຕິ, ອາປຕ຺ຕິ ຖຸລ຺ລຈ຺ຈຍສ຺ສ; ມຣຕິ, ອາປຕ຺ຕິ ປາຣາຊິກສ຺ສ – ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣເປນ຺ໂຕ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

໑໖໐. ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ, ອາປຕ຺ຕິ ປາຣາຊິກສ຺ສ; ‘‘ໂຍ ເຕ ວິຫາເຣ ວສຕິ, ໂສ ຠິກ຺ຂຸ ອຣຫາ’’ຕິ ຠຓຕິ, ປຏິວິຊານນ຺ຕສ຺ສ ອາປຕ຺ຕິ ຖຸລ຺ລຈ຺ຈຍສ຺ສ; ນ ປຏິວິຊານນ຺ຕສ຺ສ ອາປຕ຺ຕິ ທຸກ຺ກຏສ຺ສ – ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປນ຺ໂຕ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ຈຕ຺ຕາໂຣ ປາຣາຊິກາ ນິຏ຺ຐິຕາ.

໒. ສງ຺ຆາທິເສສກຓ຺ຑໍ

໑໖໑. ອຸປກ຺ກມິຕ຺ວາ ອສຸຈິໍ ໂມເຈນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ເຈເຕຕິ ອຸປກ຺ກມຕິ ມຸຈ຺ຈຕິ, ອາປຕ຺ຕິ ສງ຺ຆາທິເສສສ຺ສ; ເຈເຕຕິ ອຸປກ຺ກມຕິ ນ ມຸຈ຺ຈຕິ, ອາປຕ຺ຕິ ຖຸລ຺ລຈ຺ຈຍສ຺ສ; ປໂຍເຄ ທຸກ຺ກຏໍ.

ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ກາເຍນ ກາຍໍ ອາມສຕິ, ອາປຕ຺ຕິ ສງ຺ຆາທິເສສສ຺ສ; ກາເຍນ ກາຍປຏິພທ຺ຘໍ ອາມສຕິ, ອາປຕ຺ຕິ ຖຸລ຺ລຈ຺ຈຍສ຺ສ; ກາຍປຏິພທ຺ເຘນ ກາຍປຏິພທ຺ຘໍ ອາມສຕິ, ອາປຕ຺ຕິ ທຸກ຺ກຏສ຺ສ.

ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາເສນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ວຈ຺ຈມຄ຺ຄໍ ປສ຺ສາວມຄ຺ຄໍ ອາທິສ຺ສ ວຓ຺ຓມ຺ປິ ຠຓຕິ, ອວຓ຺ຓມ຺ປິ ຠຓຕິ, ອາປຕ຺ຕິ ສງ຺ຆາທິເສສສ຺ສ; ວຈ຺ຈມຄ຺ຄໍ ປສ຺ສາວມຄ຺ຄໍ ຐເປຕ຺ວາ ອຘກ຺ຂກໍ ອຸພ຺ຠຊາຓຸມຓ຺ຑລໍ ອາທິສ຺ສ ວຓ຺ຓມ຺ປິ ຠຓຕິ ອວຓ຺ຓມ຺ປິ ຠຓຕິ, ອາປຕ຺ຕິ ຖຸລ຺ລຈ຺ຈຍສ຺ສ; ກາຍປຏິພທ຺ຘໍ ອາທິສ຺ສ ວຓ຺ຓມ຺ປິ ຠຓຕິ ອວຓ຺ຓມ຺ປິ ຠຓຕິ, ອາປຕ຺ຕິ ທຸກ຺ກຏສ຺ສ.

ອຕ຺ຕກາມປາຣິຈຣິຍາ ວຓ຺ຓໍ ຠາສນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ມາຕຸຄາມສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສຕິ, ອາປຕ຺ຕິ ສງ຺ຆາທິເສສສ຺ສ; ປຓ຺ຑກສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສຕິ, ອາປຕ຺ຕິ ຖຸລ຺ລຈ຺ຈຍສ຺ສ; ຕິຣຈ຺ຉານຄຕສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສຕິ, ອາປຕ຺ຕິ ທຸກ຺ກຏສ຺ສ.

ສຎ຺ຈຣິຕ຺ຕໍ ສມາປຊ຺ຊນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ປຏິຄ຺ຄຓ຺ຫາຕິ ວີມໍສຕິ ປຈ຺ຈາຫຣຕິ, ອາປຕ຺ຕິ ສງ຺ຆາທິເສສສ຺ສ; ປຏິຄ຺ຄຓ຺ຫາຕິ ວີມໍສຕິ ນ ປຈ຺ຈາຫຣຕິ, ອາປຕ຺ຕິ ຖຸລ຺ລຈ຺ຈຍສ຺ສ; ປຏິຄ຺ຄຓ຺ຫາຕິ ນ ວີມໍສຕິ ນ ປຈ຺ຈາຫຣຕິ, ອາປຕ຺ຕິ ທຸກ຺ກຏສ຺ສ.

ສຎ຺ຎາຈິກາຍ ກຸຏິໍ ກາຣາເປນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ, ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ, ອາປຕ຺ຕິ ສງ຺ຆາທິເສສສ຺ສ.

ມຫລ຺ລກໍ ວິຫາຣໍ ກາຣາເປນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ເອກໍ ປິຓ຺ຑໍ ອນາຄເຕ, ອາປຕ຺ຕິ ຖຸລ຺ລຈ຺ຈຍສ຺ສ; ຕສ຺ມິໍ ປິຓ຺ເຑ ອາຄເຕ, ອາປຕ຺ຕິ ສງ຺ຆາທິເສສສ຺ສ.

ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ອໂນກາສໍ ກາຣາເປຕ຺ວາ ຈາວນາຘິປ຺ປາໂຍ ວເທຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ; ໂອກາສໍ ກາຣາເປຕ຺ວາ ອກ຺ໂກສາຘິປ຺ປາໂຍ ວເທຕິ, ອາປຕ຺ຕິ ໂອມສວາທສ຺ສ.

ຠິກ຺ຂຸໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ອໂນກາສໍ ກາຣາເປຕ຺ວາ ຈາວນາຘິປ຺ປາໂຍ ວເທຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ; ໂອກາສໍ ກາຣາເປຕ຺ວາ ອກ຺ໂກສາຘິປ຺ປາໂຍ ວເທຕິ, ອາປຕ຺ຕິ ໂອມສວາທສ຺ສ.

ສງ຺ຆເຠທໂກ ຠິກ຺ຂຸ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ເຠທການຸວຕ຺ຕກາ ຠິກ຺ຂູ ຍາວຕຕິຍໍ ສມນຸຠາສນາຍ [ສມນຸຠາສິຍມານາ (ສ຺ຍາ.)] ນ ປຏິນິສ຺ສຊ຺ຊນ຺ຕາ ຕິສ຺ໂສ ອາປຕ຺ຕິໂຍ ອາປຊ຺ຊນ຺ຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ທຸພ຺ພໂຈ ຠິກ຺ຂຸ ຍາວຕຕິຍໍ ສມນຸຠາສນາຍ [ສມນຸຠາສິຍມາໂນ (ສ຺ຍາ.)] ນ ປຏິນິສ຺ສຊ຺ຊນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ກຸລທູສໂກ ຠິກ຺ຂຸ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ໂຕ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ເຕຣສ ສງ຺ຆາທິເສສາ ນິຏ຺ຐິຕາ.

໓. ນິສ຺ສຄ຺ຄິຍກຓ຺ຑໍ

໑. ກຖິນວຄ຺ໂຄ

໑໖໒. ອຕິເຣກຈີວຣໍ ທສາຫໍ ອຕິກ຺ກາເມນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ເອກຣຕ຺ຕໍ ຕິຈີວເຣນ ວິປ຺ປວສນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ອກາລຈີວຣໍ ປຏິຄ຺ຄເຫຕ຺ວາ ມາສໍ ອຕິກ຺ກາເມນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎາຕິກາຍ ຠິກ຺ຂຸນິຍາ ປຸຣາຓຈີວຣໍ ໂຘວາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ໂຘວາເປຕິ, ປໂຍເຄ ທຸກ຺ກຏໍ; ໂຘວາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎາຕິກາຍ ຠິກ຺ຂຸນິຍາ ຫຕ຺ຖໂຕ ຈີວຣໍ ປຏິຄ຺ຄຓ຺ຫນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຄຓ຺ຫາຕິ, ປໂຍເຄ ທຸກ຺ກຏໍ; ຄຫິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎາຕກໍ ຄຫປຕິໍ ວາ ຄຫປຕານິໍ ວາ ຈີວຣໍ ວິຎ຺ຎາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວິຎ຺ຎາເປຕິ, ປໂຍເຄ ທຸກ຺ກຏໍ; ວິຎ຺ຎາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎາຕກໍ ຄຫປຕິໍ ວາ ຄຫປຕານິໍ ວາ ຕຕຸຕ຺ຕຣິ ຈີວຣໍ ວິຎ຺ຎາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວິຎ຺ຎາເປຕິ, ປໂຍເຄ ທຸກ຺ກຏໍ; ວິຎ຺ຎາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ປຸພ຺ເພ ອປ຺ປວາຣິໂຕ ອຎ຺ຎາຕກໍ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວິກປ຺ປໍ ອາປຊ຺ຊຕິ, ປໂຍເຄ ທຸກ຺ກຏໍ; ວິກປ຺ປໍ ອາປນ຺ເນ ນິສ຺ສຄ຺ຄິຍໍ ປາຈິຕ຺ຕິຍໍ.

ປຸພ຺ເພ ອປ຺ປວາຣິໂຕ ອຎ຺ຎາຕເກ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວິກປ຺ປໍ ອາປຊ຺ຊຕິ, ປໂຍເຄ ທຸກ຺ກຏໍ; ວິກປ຺ປໍ ອາປນ຺ເນ ນິສ຺ສຄ຺ຄິຍໍ ປາຈິຕ຺ຕິຍໍ.

ອຕິເຣກຕິກ຺ຂຕ຺ຕຸໍ ໂຈທນາຍ ອຕິເຣກຉກ຺ຂຕ຺ຕຸໍ ຐາເນນ ຈີວຣໍ ອຠິນິປ຺ຜາເທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຠິນິປ຺ຜາເທຕິ, ປໂຍເຄ ທຸກ຺ກຏໍ; ອຠິນິປ຺ຜາທິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ກຖິນວຄ຺ໂຄ ປຐໂມ.

໒. ໂກສິຍວຄ຺ໂຄ

໑໖໓. ໂກສິຍມິສ຺ສກໍ ສນ຺ຖຕໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ສຸທ຺ຘກາຬການໍ ເອຬກໂລມານໍ ສນ຺ຖຕໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອນາທິຍິຕ຺ວາ ຕຸລໍ ໂອທາຕານໍ ຕຸລໍ ໂຄຈຣິຍານໍ ນວໍ ສນ຺ຖຕໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອນຸວສ຺ສໍ ສນ຺ຖຕໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອນາທິຍິຕ຺ວາ ປຸຣາຓສນ຺ຖຕສ຺ສ ສາມນ຺ຕາ ສຸຄຕວິທຕ຺ຖິໍ ນວໍ ນິສີທນສນ຺ຖຕໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ເອຬກໂລມານິ ປຏິຄ຺ຄເຫຕ຺ວາ ຕິໂຍຊນໍ ອຕິກ຺ກາເມນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ຕິໂຍຊນໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎາຕິກາຍ ຠິກ຺ຂຸນິຍາ ເອຬກໂລມານິ ໂຘວາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ໂຘວາເປຕິ, ປໂຍເຄ ທຸກ຺ກຏໍ; ໂຘວາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ຣູປິຍໍ ປຏິຄ຺ຄຓ຺ຫນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຄຓ຺ຫາຕິ, ປໂຍເຄ ທຸກ຺ກຏໍ; ຄຫິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ນານປ຺ປກາຣກໍ ຣູປິຍສໍໂວຫາຣໍ ສມາປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ສມາປຊ຺ຊຕິ, ປໂຍເຄ ທຸກ຺ກຏໍ; ສມາປນ຺ເນ ນິສ຺ສຄ຺ຄິຍໍ ປາຈິຕ຺ຕິຍໍ.

ນານປ຺ປກາຣກໍ ກຍວິກ຺ກຍໍ ສມາປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ສມາປຊ຺ຊຕິ, ປໂຍເຄ ທຸກ຺ກຏໍ; ສມາປນ຺ເນ ນິສ຺ສຄ຺ຄິຍໍ ປາຈິຕ຺ຕິຍໍ.

ໂກສິຍວຄ຺ໂຄ ທຸຕິໂຍ.

໓. ປຕ຺ຕວຄ຺ໂຄ

໑໖໔. ອຕິເຣກປຕ຺ຕໍ ທສາຫໍ ອຕິກ຺ກາເມນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ອູນປຎ຺ຈພນ຺ຘເນນ ປຕ຺ເຕນ ອຎ຺ຎໍ ນວໍ ປຕ຺ຕໍ ເຈຕາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ເຠສຊ຺ຊານິ ປຏິຄ຺ຄເຫຕ຺ວາ ສຕ຺ຕາຫໍ ອຕິກ຺ກາເມນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ອຕິເຣກມາເສ ເສເສ ຄິມ຺ຫາເນ ວສ຺ສິກສາຏິກຈີວຣໍ ປຣິເຍສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິເຍສຕິ, ປໂຍເຄ ທຸກ຺ກຏໍ; ປຣິຍິຏ຺ເຐ ນິສ຺ສຄ຺ຄິຍໍ ປາຈິຕ຺ຕິຍໍ.

ຠິກ຺ຂຸສ຺ສ ສາມໍ ຈີວຣໍ ທຕ຺ວາ ກຸປິໂຕ ອນຕ຺ຕມໂນ ອຈ຺ຉິນ຺ທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຈ຺ຉິນ຺ທຕິ, ປໂຍເຄ ທຸກ຺ກຏໍ; ອຈ຺ຉິນ຺ເນ ນິສ຺ສຄ຺ຄິຍໍ ປາຈິຕ຺ຕິຍໍ.

ສາມໍ ສຸຕ຺ຕໍ ວິຎ຺ຎາເປຕ຺ວາ ຕນ຺ຕວາເຍຫິ ຈີວຣໍ ວາຍາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວາຍາເປຕິ, ປໂຍເຄ ທຸກ຺ກຏໍ; ວາຍາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ປຸພ຺ເພ ອປ຺ປວາຣິໂຕ ອຎ຺ຎາຕກສ຺ສ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວິກປ຺ປໍ ອາປຊ຺ຊຕິ, ປໂຍເຄ ທຸກ຺ກຏໍ; ວິກປ຺ປໍ ອາປນ຺ເນ ນິສ຺ສຄ຺ຄິຍໍ ປາຈິຕ຺ຕິຍໍ.

ອຈ຺ເຈກຈີວຣໍ ປຏິຄ຺ຄເຫຕ຺ວາ ຈີວຣກາລສມຍໍ ອຕິກ຺ກາເມນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ຕິຓ຺ຓໍ ຈີວຣານໍ ອຎ຺ຎຕຣໍ ຈີວຣໍ ອນ຺ຕຣຆເຣ ນິກ຺ຂິປິຕ຺ວາ ອຕິເຣກຉາຣຕ຺ຕໍ ວິປ຺ປວສນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ຊານໍ ສງ຺ຆິກໍ ລາຠໍ ປຣິຓຕໍ ອຕ຺ຕໂນ ປຣິຓາເມນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຓາເມຕິ, ປໂຍເຄ ທຸກ຺ກຏໍ; ປຣິຓາມິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ປຕ຺ຕວຄ຺ໂຄ ຕຕິໂຍ.

ຕິໍສ ນິສ຺ສຄ຺ຄິຍາ ປາຈິຕ຺ຕິຍາ ນິຏ຺ຐິຕາ.

໔. ປາຈິຕ຺ຕິຍກຓ຺ຑໍ

໑. ມຸສາວາທວຄ຺ໂຄ

໑໖໕. ສມ຺ປຊານມຸສາວາທໍ ຠາສນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ສມ຺ປຊານມຸສາວາທໍ ຠາສນ຺ໂຕ ປຎ຺ຈ ອາປຕ຺ຕິໂຍ ອາປຊ຺ຊຕິ. ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ, ອາປຕ຺ຕິ ປາຣາຊິກສ຺ສ; ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສຕິ, ອາປຕ຺ຕິ ສງ຺ຆາທິເສສສ຺ສ; ‘‘ໂຍ ເຕ ວິຫາເຣ ວສຕິ, ໂສ ຠິກ຺ຂຸ ອຣຫາ’’ຕິ ຠຓຕິ, ປຏິວິຊານນ຺ຕສ຺ສ ອາປຕ຺ຕິ ຖຸລ຺ລຈ຺ຈຍສ຺ສ; ນ ປຏິວິຊານນ຺ຕສ຺ສ ອາປຕ຺ຕິ ທຸກ຺ກຏສ຺ສ; ສມ຺ປຊານມຸສາວາເທ ປາຈິຕ຺ຕິຍໍ – ສມ຺ປຊານມຸສາວາທໍ ຠາສນ຺ໂຕ ອິມາ ປຎ຺ຈ ອາປຕ຺ຕິໂຍ ອາປຊ຺ຊຕິ.

ໂອມສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸປສມ຺ປນ຺ນໍ ໂອມສຕິ, ອາປຕ຺ຕິ ປາຈິຕ຺ຕິຍສ຺ສ; ອນຸປສມ຺ປນ຺ນໍ ໂອມສຕິ, ອາປຕ຺ຕິ ທຸກ຺ກຏສ຺ສ.

ເປສຸຎ຺ຎໍ ອຸປສໍຫຣນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸປສມ຺ປນ຺ນສ຺ສ ເປສຸຎ຺ຎໍ ອຸປສໍຫຣຕິ, ອາປຕ຺ຕິ ປາຈິຕ຺ຕິຍສ຺ສ; ອນຸປສມ຺ປນ຺ນສ຺ສ ເປສຸຎ຺ຎໍ ອຸປສໍຫຣຕິ, ອາປຕ຺ຕິ ທຸກ຺ກຏສ຺ສ.

ອນຸປສມ຺ປນ຺ນໍ ປທໂສ ຘມ຺ມໍ ວາເຈນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວາເຈຕິ, ປໂຍເຄ ທຸກ຺ກຏໍ; ປເທ ປເທ ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ເນນ ອຸຕ຺ຕຣິທິຣຕ຺ຕຕິຣຕ຺ຕໍ ສຫເສຍ຺ຍໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິປຊ຺ຊຕິ, ປໂຍເຄ ທຸກ຺ກຏໍ; ນິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ມາຕຸຄາເມນ ສຫເສຍ຺ຍໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິປຊ຺ຊຕິ, ປໂຍເຄ ທຸກ຺ກຏໍ; ນິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ມາຕຸຄາມສ຺ສ ອຸຕ຺ຕຣິຉປ຺ປຎ຺ຈວາຈາຫິ ຘມ຺ມໍ ເທເສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ເທເສຕິ, ປໂຍເຄ ທຸກ຺ກຏໍ; ປເທ ປເທ ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ນສ຺ສ ອຸຕ຺ຕຣິມນຸສ຺ສຘມ຺ມໍ ຠູຕໍ ອາໂຣເຈນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອາໂຣເຈຕິ, ປໂຍເຄ ທຸກ຺ກຏໍ; ອາໂຣຈິເຕ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ທຸຏ຺ຐຸລ຺ລໍ ອາປຕ຺ຕິໍ ອນຸປສມ຺ປນ຺ນສ຺ສ ອາໂຣເຈນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອາໂຣເຈຕິ, ປໂຍເຄ ທຸກ຺ກຏໍ; ອາໂຣຈິເຕ ອາປຕ຺ຕິ ປາຈິຕ຺ຕິຍສ຺ສ.

ປຖວິໍ ຂຓນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຂຓຕິ, ປໂຍເຄ ທຸກ຺ກຏໍ; ປຫາເຣ ປຫາເຣ ອາປຕ຺ຕິ ປາຈິຕ຺ຕິຍສ຺ສ.

ມຸສາວາທວຄ຺ໂຄ ປຐໂມ.

໒. ຠູຕຄາມວຄ຺ໂຄ

໑໖໖. ຠູຕຄາມໍ ປາເຕນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປາເຕຕິ, ປໂຍເຄ ທຸກ຺ກຏໍ; ປຫາເຣ ປຫາເຣ ອາປຕ຺ຕິ ປາຈິຕ຺ຕິຍສ຺ສ.

ອຎ຺ເຎນຎ຺ຎໍ ປຏິຈຣນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອນາໂຣປິເຕ ອຎ຺ຎວາທເກ ອຎ຺ເຎນຎ຺ຎໍ ປຏິຈຣຕິ, ອາປຕ຺ຕິ ທຸກ຺ກຏສ຺ສ; ອາໂຣປິເຕ ອຎ຺ຎວາທເກ ອຎ຺ເຎນຎ຺ຎໍ ປຏິຈຣຕິ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸໍ ອຸຊ຺ຌາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸຊ຺ຌາເປຕິ, ປໂຍເຄ ທຸກ຺ກຏໍ; ອຸຊ຺ຌາປິເຕ ອາປຕ຺ຕິ ປາຈິຕ຺ຕິຍສ຺ສ.

ສງ຺ຆິກໍ ມຎ຺ຈໍ ວາ ປີຐໍ ວາ ຠິສິໍ ວາ ໂກຈ຺ຉໍ ວາ ອຊ຺ໂຌກາເສ ສນ຺ຖຣິຕ຺ວາ ອນຸທ຺ຘຣິຕ຺ວາ ອນາປຸຈ຺ຉາ ປກ຺ກມນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ເລຑ຺ຑຸປາຕໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ສງ຺ຆິເກ ວິຫາເຣ ເສຍ຺ຍໍ ສນ຺ຖຣິຕ຺ວາ ອນຸທ຺ຘຣິຕ຺ວາ ອນາປຸຈ຺ຉາ ປກ຺ກມນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ປຣິກ຺ເຂປໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ສງ຺ຆິເກ ວິຫາເຣ ຊານໍ ປຸພ຺ພຸປຄຕໍ ຠິກ຺ຂຸໍ ອນຸປຂຊ຺ຊ ເສຍ຺ຍໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິປຊ຺ຊຕິ, ປໂຍເຄ ທຸກ຺ກຏໍ; ນິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸໍ ກຸປິໂຕ ອນຕ຺ຕມໂນ ສງ຺ຆິກາ ວິຫາຣາ ນິກ຺ກຑ຺ເຒນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິກ຺ກຑ຺ຒຕິ, ປໂຍເຄ ທຸກ຺ກຏໍ; ນິກ຺ກຑ຺ຒິເຕ ອາປຕ຺ຕິ ປາຈິຕ຺ຕິຍສ຺ສ.

ສງ຺ຆິເກ ວິຫາເຣ ອຸປຣິເວຫາສກຸຏິຍາ ອາຫຈ຺ຈປາທກໍ ມຎ຺ຈໍ ວາ ປີຐໍ ວາ ອຠິນິສີທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຠິນິສີທຕິ, ປໂຍເຄ ທຸກ຺ກຏໍ; ອຠິນິສິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ທ຺ວຕ຺ຕິປຣິຍາເຍ ອຘິຏ຺ຐຫິຕ຺ວາ ຕຕຸຕ຺ຕຣິ ອຘິຏ຺ຐຫນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຘິຏ຺ເຐຕິ, ປໂຍເຄ ທຸກ຺ກຏໍ; ອຘິຏ຺ຐິເຕ ອາປຕ຺ຕິ ປາຈິຕ຺ຕິຍສ຺ສ.

ຊານໍ ສປ຺ປາຓກໍ ອຸທກໍ ຕິຓໍ ວາ ມຕ຺ຕິກໍ ວາ ສິຎ຺ຈນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ສິຎ຺ຈຕິ, ປໂຍເຄ ທຸກ຺ກຏໍ; ສິຎ຺ຈິເຕ ອາປຕ຺ຕິ ປາຈິຕ຺ຕິຍສ຺ສ.

ຠູຕຄາມວຄ຺ໂຄ ທຸຕິໂຍ.

໓. ໂອວາທວຄ຺ໂຄ

໑໖໗. ອສມ຺ມໂຕ ຠິກ຺ຂຸນິໂຍ ໂອວທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ໂອວທຕິ, ປໂຍເຄ ທຸກ຺ກຏໍ; ໂອວທິເຕ ອາປຕ຺ຕິ ປາຈິຕ຺ຕິຍສ຺ສ.

ອຕ຺ຖງ຺ຄເຕ ສູຣິເຍ ຠິກ຺ຂຸນິໂຍ ໂອວທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ໂອວທຕິ, ປໂຍເຄ ທຸກ຺ກຏໍ; ໂອວທິເຕ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນຸປສ຺ສຍໍ ອຸປສງ຺ກມິຕ຺ວາ ຠິກ຺ຂຸນິໂຍ ໂອວທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ໂອວທຕິ, ປໂຍເຄ ທຸກ຺ກຏໍ; ໂອວທິເຕ ອາປຕ຺ຕິ ປາຈິຕ຺ຕິຍສ຺ສ.

‘‘ອາມິສເຫຕຸ ຠິກ຺ຂູ ຠິກ຺ຂຸນິໂຍ ໂອວທນ຺ຕີ’’ຕິ ຠຓນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຓຕິ, ປໂຍເຄ ທຸກ຺ກຏໍ; ຠຓິເຕ ອາປຕ຺ຕິ ປາຈິຕ຺ຕິຍສ຺ສ.

ອຎ຺ຎາຕິກາຍ ຠິກ຺ຂຸນິຍາ ຈີວຣໍ ເທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ເທຕິ, ປໂຍເຄ ທຸກ຺ກຏໍ; ທິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ອຎ຺ຎາຕິກາ ຠິກ຺ຂຸນິຍາ ຈີວຣໍ ສິພ຺ເພນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ສິພ຺ເພຕິ, ປໂຍເຄ ທຸກ຺ກຏໍ; ອາຣາປເຖ ອາຣາປເຖ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນິຍາ ສທ຺ຘິໍ ສໍວິຘາຍ ເອກທ຺ຘານມຄ຺ຄໍ ປຏິປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິປຊ຺ຊຕິ, ປໂຍເຄ ທຸກ຺ກຏໍ; ປຏິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນິຍາ ສທ຺ຘິໍ ສໍວິຘາຍ ເອກໍ ນາວໍ ອຠິຣຸຫນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຠິຣຸຫຕິ, ປໂຍເຄ ທຸກ຺ກຏໍ; ອຠິຣຸຬ຺ເຫ ອາປຕ຺ຕິ ປາຈິຕ຺ຕິຍສ຺ສ.

ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ‘‘ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນິຍາ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິສີທຕິ, ປໂຍເຄ ທຸກ຺ກຏໍ; ນິສິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ໂອວາທວຄ຺ໂຄ ຕຕິໂຍ.

໔. ໂຠຊນວຄ຺ໂຄ

໑໖໘. ຕຕຸຕ຺ຕຣິ ອາວສຖປິຓ຺ຑໍ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ຄຓໂຠຊນໍ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ປຣມ຺ປຣໂຠຊນໍ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ທ຺ວຕ຺ຕິປຕ຺ຕປູເຣ ປູເວ ປຏິຄ຺ຄເຫຕ຺ວາ ຕຕຸຕ຺ຕຣິ ປຏິຄ຺ຄຓ຺ຫນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຄຓ຺ຫາຕິ, ປໂຍເຄ ທຸກ຺ກຏໍ; ຄຫິເຕ ອາປຕ຺ຕິ ປາຈິຕ຺ຕິຍສ຺ສ.

ຠຸຕ຺ຕາວີ ປວາຣິໂຕ ອນຕິຣິຕ຺ຕໍ ຂາທນີຍໍ ວາ ໂຠຊນີຍໍ ວາ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸໍ ຠຸຕ຺ຕາວິໍ ປວາຣິຕໍ ອນຕິຣິຕ຺ເຕນ ຂາທນີເຍນ ວາ ໂຠຊນີເຍນ ວາ ອຠິຫຏ຺ຐຸໍ ປວາເຣນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຕສ຺ສ ວຈເນນ ຂາທິສ຺ສາມິ ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ໂຠຊນປຣິໂຍສາເນ ອາປຕ຺ຕິ ປາຈິຕ຺ຕິຍສ຺ສ.

ວິກາເລ ຂາທນີຍໍ ວາ ໂຠຊນີຍໍ ວາ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຂາທິສ຺ສາມິ ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ສນ຺ນິຘິກາຣກໍ ຂາທນີຍໍ ວາ ໂຠຊນີຍໍ ວາ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຂາທິສ຺ສາມິ ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ປຓີຕໂຠຊນານິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ອທິນ຺ນໍ ມຸຂທ຺ວາຣໍ ອາຫາຣໍ ອາຫຣນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ໂຠຊນວຄ຺ໂຄ ຈຕຸຕ຺ໂຖ.

໕. ອເຈລກວຄ຺ໂຄ

໑໖໙. ອເຈລກສ຺ສ, ວາ ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ ສຫຕ຺ຖາ ຂາທນີຍໍ ວາ ໂຠຊນີຍໍ ວາ ເທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ເທຕິ, ປໂຍເຄ ທຸກ຺ກຏໍ; ທິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸໍ – ‘‘ເອຫາວຸໂສ, ຄາມໍ ວາ ນິຄມໍ ວາ ປິຓ຺ຑາຍ ປວິສິສ຺ສາມາ’’ຕິ ຕສ຺ສ ທາເປຕ຺ວາ ວາ ອທາເປຕ຺ວາ ວາ ອຸຍ຺ໂຍເຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸຍ຺ໂຍເຊຕິ, ປໂຍເຄ ທຸກ຺ກຏໍ; ອຸຍ຺ໂຍຊິເຕ ອາປຕ຺ຕິ ປາຈິຕ຺ຕິຍສ຺ສ.

ສໂຠຊເນ ກຸເລ ອນຸປຂຊ຺ຊ ນິສຊ຺ຊໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິສີທຕິ, ປໂຍເຄ ທຸກ຺ກຏໍ; ນິສິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ມາຕຸຄາເມນ ສທ຺ຘິໍ ຣໂຫ ປຏິຈ຺ຉນ຺ເນ ອາສເນ ນິສຊ຺ຊໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິສີທຕິ, ປໂຍເຄ ທຸກ຺ກຏໍ; ນິສິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນິສີທຕິ, ປໂຍເຄ ທຸກ຺ກຏໍ; ນິສິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ນິມນ຺ຕິໂຕ ສຠຕ຺ໂຕ ສມາໂນ ປຸເຣຠຕ຺ຕໍ ປຈ຺ຉາຠຕ຺ຕໍ ກຸເລສຸ ຈາຣິຕ຺ຕໍ ອາປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ອຸມ຺ມາຣໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ຕຕຸຕ຺ຕຣິ ເຠສຊ຺ຊໍ ວິຎ຺ຎາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວິຎ຺ຎາເປຕິ, ປໂຍເຄ ທຸກ຺ກຏໍ; ວິຎ຺ຎາປິເຕ ອາປຕ຺ຕິ ປາຈິຕ຺ຕິຍສ຺ສ.

ອຸຍ຺ຍຸຕ຺ຕໍ ເສນໍ ທສ຺ສນາຍ ຄຈ຺ຉນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຄຈ຺ຉຕິ, ອາປຕ຺ຕິ ທຸກ຺ກຏສ຺ສ; ຍຕ຺ຖ ຐິໂຕ ປສ຺ສຕິ, ອາປຕ຺ຕິ ປາຈິຕ຺ຕິຍສ຺ສ.

ອຕິເຣກຕິຣຕ຺ຕໍ ເສນາຍ ວສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວສຕິ, ປໂຍເຄ ທຸກ຺ກຏໍ; ວສິເຕ ອາປຕ຺ຕິ ປາຈິຕ຺ຕິຍສ຺ສ.

ອຸຍ຺ໂຍຘິກໍ ຄຈ຺ຉນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຄຈ຺ຉຕິ, ອາປຕ຺ຕິ ທຸກ຺ກຏສ຺ສ; ຍຕ຺ຖ ຐິໂຕ ປສ຺ສຕິ, ອາປຕ຺ຕິ ປາຈິຕ຺ຕິຍສ຺ສ.

ອເຈລກວຄ຺ໂຄ ປຎ຺ຈໂມ.

໖. ສຸຣາເມຣຍວຄ຺ໂຄ

໑໗໐. ມຊ຺ຊໍ ປິວນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ‘‘ປິວິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸໍ ອງ຺ຄຸລິປໂຕທເກນ ຫາເສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຫາເສຕິ, ປໂຍເຄ ທຸກ຺ກຏໍ; ຫສິເຕ ອາປຕ຺ຕິ ປາຈິຕ຺ຕິຍສ຺ສ.

ອຸທເກ ກີຬນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ເຫຏ຺ຐາໂຄປ຺ຜເກ ອຸທເກ ກີຬຕິ, ອາປຕ຺ຕິ ທຸກ຺ກຏສ຺ສ; ອຸປຣິໂຄປ຺ຜເກ ກີຬຕິ, ອາປຕ຺ຕິ ປາຈິຕ຺ຕິຍສ຺ສ.

ອນາທຣິຍໍ ກໂຣນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກໂຣຕິ, ປໂຍເຄ ທຸກ຺ກຏໍ; ກເຕ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸໍ ຠິໍສາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠິໍສາເປຕິ, ປໂຍເຄ ທຸກ຺ກຏໍ; ຠິໍສາປິເຕ ອາປຕ຺ຕິ ປາຈິຕ຺ຕິຍສ຺ສ.

ໂຊຕິໍ ສມາທຫິຕ຺ວາ ວິສິພ຺ເພນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ສມາທຫຕິ, ປໂຍເຄ ທຸກ຺ກຏໍ; ສມາທຫິເຕ ອາປຕ຺ຕິ ປາຈິຕ຺ຕິຍສ຺ສ.

ໂອເຣນທ຺ຘມາສໍ ນຫາຍນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ນຫາຍຕິ, ປໂຍເຄ ທຸກ຺ກຏໍ; ນຫານປຣິໂຍສາເນ ອາປຕ຺ຕິ ປາຈິຕ຺ຕິຍສ຺ສ.

ອນາທິຍິຕ຺ວາ ຕິຓ຺ຓໍ ທຸພ຺ພຓ຺ຓກຣຓານໍ ອຎ຺ຎຕຣໍ ທຸພ຺ພຓ຺ຓກຣຓໍ ນວໍ ຈີວຣໍ ປຣິຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຠຸຎ຺ຊຕິ, ປໂຍເຄ ທຸກ຺ກຏໍ; ປຣິຠຸຕ຺ເຕ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ວາ ຠິກ຺ຂຸນິຍາ ວາ ສິກ຺ຂມານາຍ ວາ ສາມເຓຣສ຺ສ ວາ ສາມເຓຣິຍາ ວາ ສາມໍ ຈີວຣໍ ວິກປ຺ເປຕ຺ວາ ອປ຺ປຈ຺ຈຸທ຺ຘາຣຓໍ ປຣິຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຠຸຎ຺ຊຕິ, ປໂຍເຄ ທຸກ຺ກຏໍ; ປຣິຠຸຕ຺ເຕ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ປຕ຺ຕໍ ວາ ຈີວຣໍ ວາ ນິສີທນໍ ວາ ສູຈິຆຣໍ ວາ ກາຍພນ຺ຘນໍ ວາ ອປນິເຘນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອປນິເຘຕິ, ປໂຍເຄ ທຸກ຺ກຏໍ; ອປນິຘິເຕ ອາປຕ຺ຕິ ປາຈິຕ຺ຕິຍສ຺ສ.

ສຸຣາເມຣຍວຄ຺ໂຄ ຉຏ຺ໂຐ.

໗. ສປ຺ປາຓກວຄ຺ໂຄ

໑໗໑. ສຎ຺ຈິຈ຺ຈ ປາຓໍ ຊີວິຕາ ໂວໂຣເປນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ສຎ຺ຈິຈ຺ຈ ປາຓໍ ຊີວິຕາ ໂວໂຣເປນ຺ໂຕ ຈຕສ຺ໂສ ອາປຕ຺ຕິໂຍ ອາປຊ຺ຊຕິ. ອໂນທິສ຺ສ ໂອປາຕໍ ຂຓຕິ – ‘‘ໂຍ ໂກຈິ ປປຕິຕ຺ວາ ມຣິສ຺ສຕີ’’ຕິ, ອາປຕ຺ຕິ ທຸກ຺ກຏສ຺ສ; ມນຸສ຺ໂສ ຕສ຺ມິໍ ປປຕິຕ຺ວາ ມຣຕິ, ອາປຕ຺ຕິ ປາຣາຊິກສ຺ສ; ຍກ຺ໂຂ ວາ ເປໂຕ ວາ ຕິຣຈ຺ຉານຄຕມນຸສ຺ສວິຄ຺ຄໂຫ ວາ ຕສ຺ມິໍ ປປຕິຕ຺ວາ ມຣຕິ, ອາປຕ຺ຕິ ຖຸລ຺ລຈ຺ຈຍສ຺ສ; ຕິຣຈ຺ຉານຄໂຕ ຕສ຺ມິໍ ປປຕິຕ຺ວາ ມຣຕິ, ອາປຕ຺ຕິ ປາຈິຕ຺ຕິຍສ຺ສ – ສຎ຺ຈິຈ຺ຈ ປາຓໍ ຊີວິຕາ ໂວໂຣເປນ຺ໂຕ ອິມາ ຈຕສ຺ໂສ ອາປຕ຺ຕິໂຍ ອາປຊ຺ຊຕິ.

ຊານໍ ສປ຺ປາຓກໍ ອຸທກໍ ປຣິຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຠຸຎ຺ຊຕິ, ປໂຍເຄ ທຸກ຺ກຏໍ; ປຣິຠຸຕ຺ເຕ ອາປຕ຺ຕິ ປາຈິຕ຺ຕິຍສ຺ສ.

ຊານໍ ຍຖາຘມ຺ມໍ ນິຫຕາຘິກຣຓໍ ປຸນກມ຺ມາຍ ອຸກ຺ໂກເຏນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸກ຺ໂກເຏຕິ, ປໂຍເຄ ທຸກ຺ກຏໍ; ອຸກ຺ໂກຏິເຕ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ຊານໍ ທຸຏ຺ຐຸລ຺ລໍ ອາປຕ຺ຕິໍ ປຏິຈ຺ຉາເທນ຺ໂຕ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ຊານໍ ອູນວີສຕິວສ຺ສໍ ປຸຄ຺ຄລໍ ອຸປສມ຺ປາເທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸປສມ຺ປາເທຕິ, ປໂຍເຄ ທຸກ຺ກຏໍ; ອຸປສມ຺ປາທິເຕ ອາປຕ຺ຕິ ປາຈິຕ຺ຕິຍສ຺ສ.

ຊານໍ ເຖຍ຺ຍສຕ຺ເຖນ ສທ຺ຘິໍ ສໍວິຘາຍ ເອກທ຺ຘານມຄ຺ຄໍ ປຏິປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິປຊ຺ຊຕິ, ປໂຍເຄ ທຸກ຺ກຏໍ; ປຏິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ມາຕຸຄາເມນ ສທ຺ຘິໍ ສໍວິຘາຍ ເອກທ຺ຘານມຄ຺ຄໍ ປຏິປຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິປຊ຺ຊຕິ, ປໂຍເຄ ທຸກ຺ກຏໍ; ປຏິປນ຺ເນ ອາປຕ຺ຕິ ປາຈິຕ຺ຕິຍສ຺ສ.

ປາປິກາຍ ທິຏ຺ຐິຍາ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ກມ຺ມວາຈາປຣິໂຍສາເນ ອາປຕ຺ຕິ ປາຈິຕ຺ຕິຍສ຺ສ.

ຊານໍ ຕຖາວາທິນາ ຠິກ຺ຂຸນາ ອກຏານຸຘມ຺ເມນ ຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິໍ ສມ຺ຠຸຎ຺ຊນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ສມ຺ຠຸຎ຺ຊຕິ, ປໂຍເຄ ທຸກ຺ກຏໍ; ສມ຺ຠຸຕ຺ເຕ ອາປຕ຺ຕິ ປາຈິຕ຺ຕິຍສ຺ສ.

ຊານໍ ຕຖານາສິຕໍ ສມຓຸທ຺ເທສໍ ອຸປລາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອຸປລາເປຕິ, ປໂຍເຄ ທຸກ຺ກຏໍ; ອຸປລາປິເຕ ອາປຕ຺ຕິ ປາຈິຕ຺ຕິຍສ຺ສ.

ສປ຺ປາຓກວຄ຺ໂຄ ສຕ຺ຕໂມ.

໘. ສຫຘມ຺ມິກວຄ຺ໂຄ

໑໗໒. ຠິກ຺ຂູຫິ ສຫຘມ຺ມິກໍ ວຸຈ຺ຈມາໂນ – ‘‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຣິປຸຈ຺ຉິສ຺ສາມີ’’ຕິ ຠຓນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຠຓຕິ, ປໂຍເຄ ທຸກ຺ກຏໍ; ຠຓິເຕ ອາປຕ຺ຕິ ປາຈິຕ຺ຕິຍສ຺ສ.

ວິນຍໍ ວິວຓ຺ເຓນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ວິວຓ຺ເຓຕິ, ປໂຍເຄ ທຸກ຺ກຏໍ; ວິວຓ຺ຓິເຕ ອາປຕ຺ຕິ ປາຈິຕ຺ຕິຍສ຺ສ.

ໂມເຫນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ອນາໂຣປິເຕ ໂມເຫ ໂມເຫຕິ, ອາປຕ຺ຕິ ທຸກ຺ກຏສ຺ສ; ອາໂຣປິເຕ ໂມເຫ ໂມເຫຕິ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ກຸປິໂຕ ອນຕ຺ຕມໂນ ປຫາຣໍ ເທນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຫຣຕິ, ປໂຍເຄ ທຸກ຺ກຏໍ; ປຫເຕ ອາປຕ຺ຕິ ປາຈິຕ຺ຕິຍສ຺ສ.