໙. ຣາຊວຄ຺ໂຄ

໑໗໓. ປຸພ຺ເພ ອປ຺ປຏິສໍວິທິໂຕ ຣຎ຺ໂຎ ອນ຺ເຕປຸຣໍ ປວິສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ອຸມ຺ມາຣໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ຣຕນໍ ອຸຄ຺ຄຓ຺ຫນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ຄຓ຺ຫາຕິ, ປໂຍເຄ ທຸກ຺ກຏໍ; ຄຫິເຕ ອາປຕ຺ຕິ ປາຈິຕ຺ຕິຍສ຺ສ.

ສນ຺ຕໍ ຠິກ຺ຂຸໍ ອນາປຸຈ຺ຉາ ວິກາເລ ຄາມໍ ປວິສນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ປຣິກ຺ເຂປໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ອຏ຺ຐິມຍໍ ວາ ທນ຺ຕມຍໍ ວາ ວິສາຓມຍໍ ວາ ສູຈິຆຣໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ອາປຕ຺ຕິ ປາຈິຕ຺ຕິຍສ຺ສ.

ປມາຓາຕິກ຺ກນ຺ຕໍ ມຎ຺ຈໍ ວາ ປີຐໍ ວາ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ອາປຕ຺ຕິ ປາຈິຕ຺ຕິຍສ຺ສ.

ມຎ຺ຈໍ ວາ ປີຐໍ ວາ ຕູໂລນທ຺ຘໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ອາປຕ຺ຕິ ປາຈິຕ຺ຕິຍສ຺ສ.

ປມາຓາຕິກ຺ກນ຺ຕໍ ນິສີທນໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ອາປຕ຺ຕິ ປາຈິຕ຺ຕິຍສ຺ສ.

ປມາຓາຕິກ຺ກນ຺ຕໍ ກຓ຺ຑຸປ຺ປຏິຈ຺ຉາທິໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ອາປຕ຺ຕິ ປາຈິຕ຺ຕິຍສ຺ສ.

ປມາຓາຕິກ຺ກນ຺ຕໍ ວສ຺ສິກສາຏິກໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ອາປຕ຺ຕິ ປາຈິຕ຺ຕິຍສ຺ສ.

ຈີວຣໍ ກາຣາເປນ຺ໂຕ ກຕິ ອາປຕ຺ຕິໂຍ ອາປຊ຺ຊຕິ? ສຸຄຕຈີວຣປ຺ປມາຓໍ ຈີວຣໍ ກາຣາເປນ຺ໂຕ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ ອາປຕ຺ຕິ ປາຈິຕ຺ຕິຍສ຺ສ – ສຸຄຕຈີວຣປ຺ປມາຓໍ ຈີວຣໍ ກາຣາເປນ຺ໂຕ ອິມາ ທ຺ເວ ອາປຕ຺ຕິໂຍ ອາປຊ຺ຊຕິ.

ຣາຊວຄ຺ໂຄ ນວໂມ. ຂຸທ຺ທກາ ນິຏ຺ຐິຕາ.