໑. ປາຣາຊິກກຓ຺ຑໍ

໒໔໗. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ກາຍສໍສຄ຺ຄໍ ສາທິຍນປຈ຺ຈຍາ ປາຣາຊິກໍ ກຕ຺ຖ ປຎ຺ຎຕ຺ຕໍ? ກໍ ອາຣພ຺ຠ? ກິສ຺ມິໍ ວຕ຺ຖຸສ຺ມິໍ…ເປ… ເກນາຠຕນ຺ຕິ?

ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ກາຍສໍສຄ຺ຄໍ ສາທິຍນປຈ຺ຈຍາ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສຸນ຺ທຣີນນ຺ທໍ ຠິກ຺ຂຸນິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສຸນ຺ທຣີນນ຺ທາ ຠິກ຺ຂຸນີ ອວສ຺ສຸຕາ ອວສ຺ສຸຕສ຺ສ ປຸຣິສປຸຄ຺ຄລສ຺ສ ກາຍສໍສຄ຺ຄໍ ສາທິຍິ, ຕສ຺ມິໍ ວຕ຺ຖຸສ຺ມິໍ. ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕີຕິ? ເອກາ ປຎ຺ຎຕ຺ຕິ. ອນຸປຎ຺ຎຕ຺ຕິ ອນຸປ຺ປນ຺ນປຎ຺ຎຕ຺ຕິ ຕສ຺ມິໍ ນຕ຺ຖິ. ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕີຕິ? ສພ຺ພຕ຺ຖປຎ຺ຎຕ຺ຕິ. ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕີຕິ? ອສາຘາຣຓປຎ຺ຎຕ຺ຕິ. ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕີຕິ? ເອກໂຕປຎ຺ຎຕ຺ຕິ. ຈຕຸນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນນ຺ຕິ? ນິທາໂນຄຘໍ ນິທານປຣິຍາປນ຺ນໍ? ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕີຕິ? ທຸຕິເຍນ ອຸທ຺ເທເສນ ອຸທ຺ເທສໍ ອາຄຈ຺ຉຕິ. ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕີຕິ? ສີລວິປຕ຺ຕິ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘຕິ? ປາຣາຊິກາປຕ຺ຕິກ຺ຂນ຺ໂຘ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ…ເປ… ເກນາຠຕນ຺ຕິ? ປຣມ຺ປຣາຠຕໍ –

ອຸປາລິ ທາສໂກ ເຈວ, ໂສຓໂກ ສິຄ຺ຄໂວ ຕຖາ;

ໂມຄ຺ຄລິປຸຕ຺ເຕນ ປຎ຺ຈມາ, ເອເຕ ຊມ຺ພຸສິຣິວ຺ຫເຍ. …ເປ…;

ເອເຕ ນາຄາ ມຫາປຎ຺ຎາ, ວິນຍຎ຺ຎູ ມຄ຺ຄໂກວິທາ;

ວິນຍໍ ທີເປ ປກາເສສຸໍ, ປິຏກໍ ຕມ຺ພປຓ຺ຓິຍາຕິ.

ວຊ຺ຊປ຺ປຏິຈ຺ຉາທນປຈ຺ຈຍາ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຖຸລ຺ລນນ຺ທໍ ຠິກ຺ຂຸນິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຖຸລ຺ລນນ຺ທາ ຠິກ຺ຂຸນີ ຊານໍ ປາຣາຊິກໍ ຘມ຺ມໍ ອຊ຺ຌາປນ຺ນໍ ຠິກ຺ຂຸນິໍ ເນວຕ຺ຕນາ ປຏິໂຈເທສິ ນ ຄຓສ຺ສ ອາໂຣເຈສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ຘຸຣນິກ຺ເຂເປ…ເປ….

ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນປຈ຺ຈຍາ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຖຸລ຺ລນນ຺ທໍ ຠິກ຺ຂຸນິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຖຸລ຺ລນນ຺ທາ ຠິກ຺ຂຸນີ ສມຄ຺ເຄນ ສງ຺ເຆນ ອຸກ຺ຂິຕ຺ຕໍ ອຣິຏ຺ຐໍ ຠິກ຺ຂຸໍ ຄທ຺ຘພາຘິປຸພ຺ພໍ ອນຸວຕ຺ຕິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ຘຸຣນິກ຺ເຂເປ…ເປ….

ອຏ຺ຐມໍ ວຕ຺ຖຸໍ ປຣິປູຣຓປຈ຺ຈຍາ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຉພ຺ພຄ຺ຄິຍາ ຠິກ຺ຂຸນິໂຍ ອຏ຺ຐມໍ ວຕ຺ຖຸໍ ປຣິປູເຣສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ຘຸຣນິກ຺ເຂເປ…ເປ….

ປາຣາຊິກາ ນິຏ຺ຐິຕາ.