໒. ກຕາປຕ຺ຕິວາໂຣ

໑. ປາຣາຊິກກຓ຺ຑໍ

໒໒໘. ອວສ຺ສຸຕາ ຠິກ຺ຂຸນີ ອວສ຺ສຸຕສ຺ສ ປຸຣິສປຸຄ຺ຄລສ຺ສ ກາຍສໍສຄ຺ຄໍ ສາທິຍນ຺ຕີ ກຕິ ອາປຕ຺ຕິໂຍ ອາປຊ຺ຊຕິ? ອວສ຺ສຸຕາ ຠິກ຺ຂຸນີ ອວສ຺ສຸຕສ຺ສ ປຸຣິສປຸຄ຺ຄລສ຺ສ ກາຍສໍສຄ຺ຄໍ ສາທິຍນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ອຘກ຺ຂກໍ ອຸພ຺ຠຊາຓຸມຓ຺ຑລໍ ຄຫຓໍ ສາທິຍຕິ, ອາປຕ຺ຕິ ປາຣາຊິກສ຺ສ; ອຸພ຺ຠກ຺ຂກໍ ອໂຘຊາຓຸມຓ຺ຑລໍ ຄຫຓໍ ສາທິຍຕິ, ອາປຕ຺ຕິ ຖຸລ຺ລຈ຺ຈຍສ຺ສ; ກາຍປຏິພທ຺ຘໍ ຄຫຓໍ ສາທິຍຕິ, ອາປຕ຺ຕິ ທຸກ຺ກຏສ຺ສ – ອວສ຺ສຸຕາ ຠິກ຺ຂຸນີ ອວສ຺ສຸຕສ຺ສ ປຸຣິສປຸຄ຺ຄລສ຺ສ ກາຍສໍສຄ຺ຄໍ ສາທິຍນ຺ຕີ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ວຊ຺ຊປ຺ປຏິຈ຺ຉາທິກາ ຠິກ຺ຂຸນີ ວຊ຺ຊໍ ປຏິຈ຺ຉາເທນ຺ຕີ ກຕິ ອາປຕ຺ຕິໂຍ ອາປຊ຺ຊຕິ? ວຊ຺ຊປ຺ປຏິຈ຺ຉາທິກາ ຠິກ຺ຂຸນີ ວຊ຺ຊໍ ປຏິຈ຺ຉາເທນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຊານໍ ປາຣາຊິກໍ ຘມ຺ມໍ ປຏິຈ຺ຉາເທຕິ, ອາປຕ຺ຕິ ປາຣາຊິກສ຺ສ; ເວມຕິກາ ປຏິຈ຺ຉາເທຕິ, ອາປຕ຺ຕິ ຖຸລ຺ລຈ຺ຈຍສ຺ສ; ອາຈາຣວິປຕ຺ຕິໍ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ – ວຊ຺ຊປ຺ປຏິຈ຺ຉາທິກາ ຠິກ຺ຂຸນີ ວຊ຺ຊໍ ປຏິຈ຺ຉາເທນ຺ຕີ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ອຸກ຺ຂິຕ຺ຕານຸວຕ຺ຕິກາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕີ ກຕິ ອາປຕ຺ຕິໂຍ ອາປຊ຺ຊຕິ? ອຸກ຺ຂິຕ຺ຕານຸວຕ຺ຕິກາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ປາຣາຊິກສ຺ສ – ອຸກ຺ຂິຕ຺ຕານຸວຕ຺ຕິກາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕີ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ອຏ຺ຐມໍ ວຕ຺ຖຸໍ ປຣິປູເຣນ຺ຕີ ກຕິ ອາປຕ຺ຕິໂຍ ອາປຊ຺ຊຕິ? ອຏ຺ຐມໍ ວຕ຺ຖຸໍ ປຣິປູເຣນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ປຸຣິເສນ – ‘‘ອິຕ຺ຖນ຺ນາມໍ ໂອກາສໍ [ອິຕ຺ຖນ຺ນາມໍ ຄຫນໍ (ສີ.), ອິຕ຺ຖນ຺ນາມໍ ຄພ຺ຠໍ (ສ຺ຍາ.)] ອາຄຈ຺ຉາ’’ຕິ ວຸຕ຺ຕາ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ; ປຸຣິສສ຺ສ ຫຕ຺ຖປາສໍ ໂອກ຺ກນ຺ຕມຕ຺ເຕ ອາປຕ຺ຕິ ຖຸລ຺ລຈ຺ຈຍສ຺ສ; ອຏ຺ຐມໍ ວຕ຺ຖຸໍ ປຣິປູເຣຕິ, ອາປຕ຺ຕິ ປາຣາຊິກສ຺ສ – ອຏ຺ຐມໍ ວຕ຺ຖຸໍ ປຣິປູເຣນ຺ຕີ ອິມາ ຕິສ຺ໂສ ອາປຕ຺ຕິໂຍ ອາປຊ຺ຊຕິ.

ປາຣາຊິກາ ນິຏ຺ຐິຕາ.

໒. ສງ຺ຆາທິເສສກຓ຺ຑໍ

໒໒໙. ອຸສ຺ສຍວາທິກາ ຠິກ຺ຂຸນີ ອຑ຺ຑໍ ກໂຣນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ເອກສ຺ສ ອາໂຣເຈຕິ, ອາປຕ຺ຕິ ທຸກ຺ກຏສ຺ສ; ທຸຕິຍສ຺ສ ອາໂຣເຈຕິ, ອາປຕ຺ຕິ ຖຸລ຺ລຈ຺ຈຍສ຺ສ; ອຑ຺ຑປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ໂຈຣິໍ ວຸຏ຺ຐາເປນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ເອກາ ຄາມນ຺ຕຣໍ ຄຈ຺ຉນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຄຈ຺ຉຕິ, ອາປຕ຺ຕິ ທຸກ຺ກຏສ຺ສ; ປຐມໍ ປາທໍ ປຣິກ຺ເຂປໍ ອຕິກ຺ກາເມຕິ, ອາປຕ຺ຕິ ຖຸລ຺ລຈ຺ຈຍສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ສງ຺ຆາທິເສສສ຺ສ.

ສມຄ຺ເຄນ ສງ຺ເຆນ ອຸກ຺ຂິຕ຺ຕໍ ຠິກ຺ຂຸນິໍ ຘມ຺ເມນ ວິນເຍນ ສຕ຺ຖຸສາສເນນ ອນປໂລເກຕ຺ວາ ກາຣກສງ຺ຆໍ ອນຎ຺ຎາຍ ຄຓສ຺ສ ຉນ຺ທໍ ໂອສາເຣນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ອວສ຺ສຸຕາ ຠິກ຺ຂຸນີ ອວສ຺ສຸຕສ຺ສ ປຸຣິສປຸຄ຺ຄລສ຺ສ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຠຸຎ຺ຊນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ຖຸລ຺ລຈ຺ຈຍສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ສງ຺ຆາທິເສສສ຺ສ; ອຸທກທນ຺ຕໂປນໍ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ.

‘‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕິ ອວສ຺ສຸໂຕ ວາ ອນວສ຺ສຸໂຕ ວາ, ຍໂຕ ຕ຺ວໍ ອນວສ຺ສຸຕາ! ອິງ຺ຆ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ ໂຠຊນີຍໍ ວາ, ຕໍ ຕ຺ວໍ ສຫຕ຺ຖາ ປຏິຄ຺ຄເຫຕ຺ວາ ຂາທ ວາ ຠຸຎ຺ຊ ວາ’’ຕິ ອຸຍ຺ໂຍເຊນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຕສ຺ສາ ວຈເນນ ຂາທິສ຺ສາມິ ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ຖຸລ຺ລຈ຺ຈຍສ຺ສ; ໂຠຊນປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ກຸປິຕາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ກິສ຺ມິຎ຺ຈິເທວ ອຘິກຣເຓ ປຈ຺ຈາກຕາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ສໍສຏ຺ຐາ ຠິກ຺ຂຸນິໂຍ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕິໂຍ ຕິສ຺ໂສ ອາປຕ຺ຕິໂຍ ອາປຊ຺ຊນ຺ຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

‘‘ສໍສຏ຺ຐາວ, ອຍ຺ເຍ, ຕຸມ຺ເຫ ວິຫຣຖ. ມາ ຕຸມ຺ເຫ ນານາ ວິຫຣິຕ຺ຖາ’’ຕິ ອຸຍ຺ໂຍເຊນ຺ຕີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕີ ຕິສ຺ໂສ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ທ຺ວີຫິ ກມ຺ມວາຈາຫິ ຖຸລ຺ລຈ຺ຈຍາ; ກມ຺ມວາຈາປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ສງ຺ຆາທິເສສາ ນິຏ຺ຐິຕາ.

໓. ນິສ຺ສຄ຺ຄິຍກຓ຺ຑໍ

໒໓໐. ປຕ຺ຕສນ຺ນິຈຍໍ ກໂຣນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ນິສ຺ສຄ຺ຄິຍໍ ປາຈິຕ຺ຕິຍໍ.

ອກາລຈີວຣໍ ‘‘ກາລຈີວຣ’’ນ຺ຕິ ອຘິຏ຺ຐຫິຕ຺ວາ ຠາຊາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຠາຊາເປຕິ, ປໂຍເຄ ທຸກ຺ກຏໍ; ຠາຊາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ຠິກ຺ຂຸນິຍາ ສທ຺ຘິໍ ຈີວຣໍ ປຣິວຕ຺ເຕຕ຺ວາ ອຈ຺ຉິນ຺ທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຈ຺ຉິນ຺ທຕິ, ປໂຍເຄ ທຸກ຺ກຏໍ; ອຈ຺ຉິນ຺ເນ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎໍ ວິຎ຺ຎາເປຕ຺ວາ ອຎ຺ຎໍ ວິຎ຺ຎາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວິຎ຺ຎາເປຕິ, ປໂຍເຄ ທຸກ຺ກຏໍ; ວິຎ຺ຎາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎໍ ເຈຕາເປຕ຺ວາ ອຎ຺ຎໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎທຕ຺ຖິເກນ ປຣິກ຺ຂາເຣນ ອຎ຺ຎຸທ຺ທິສິເກນ ສງ຺ຆິເກນ ອຎ຺ຎໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎທຕ຺ຖິເກ ປຣິກ຺ຂາເຣນ ອຎ຺ຎຸທ຺ທິສິເກນ ສງ຺ຆິເກນ ສໍຍາຈິເກນ ອຎ຺ຎໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎທຕ຺ຖິເກນ ປຣິກ຺ຂາເຣນ ອຎ຺ຎຸທ຺ທິສິເກນ ມຫາຊນິເກນ ອຎ຺ຎໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎທຕ຺ຖິເກນ ປຣິກ຺ຂາເຣນ ອຎ຺ຎຸທ຺ທິສິເກນ ມຫາຊນິເກນ ສໍຍາຈິເກນ ອຎ຺ຎໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຎ຺ຎທຕ຺ຖິເກນ ປຣິກ຺ຂາເຣນ ອຎ຺ຎຸທ຺ທິສິເກ ປຸຄ຺ຄລິເກນ ສໍຍາຈິເກນ ອຎ຺ຎໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຕິເຣກຈຕຸກ຺ກໍສປຣມໍ ຄຣຸປາວຸຣຓໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ອຕິເຣກອຑ຺ຒເຕຍ຺ຍກໍສປຣມໍ ລຫຸປາວຸຣຓໍ ເຈຕາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຈຕາເປຕິ, ປໂຍເຄ ທຸກ຺ກຏໍ; ເຈຕາປິເຕ ນິສ຺ສຄ຺ຄິຍໍ ປາຈິຕ຺ຕິຍໍ.

ນິສ຺ສຄ຺ຄິຍາ ປາຈິຕ຺ຕິຍາ ນິຏ຺ຐິຕາ.

໔. ປາຈິຕ຺ຕິຍກຓ຺ຑໍ

໑. ລສຸຓວຄ຺ໂຄ

໒໓໑. ລສຸຓໍ ຂາທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຂາທິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ສມ຺ພາເຘ ໂລມໍ ສໍຫຣາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ສໍຫຣາເປຕິ, ປໂຍເຄ ທຸກ຺ກຏໍ; ສໍຫຣາປິເຕ ອາປຕ຺ຕິ ປາຈິຕ຺ຕິຍສ຺ສ.

ຕລຆາຕກໍ ກໂຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ກໂຣຕິ, ປໂຍເຄ ທຸກ຺ກຏໍ; ກເຕ ອາປຕ຺ຕິ ປາຈິຕ຺ຕິຍສ຺ສ.

ຊຕຸມຏ຺ຐກໍ ອາທິຍນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອາທິຍຕິ, ປໂຍເຄ ທຸກ຺ກຏໍ, ອາທິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ອຕິເຣກທ຺ວງ຺ຄຸລປພ຺ພປຣມໍ ອຸທກສຸທ຺ຘິກໍ ອາທິຍນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອາທິຍຕິ, ປໂຍເຄ ທຸກ຺ກຏໍ; ອາທິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ຠຸຎ຺ຊນ຺ຕສ຺ສ ປານີເຍນ ວາ ວິຘູປເນນ ວາ ອຸປຕິຏ຺ຐນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ; ຫຕ຺ຖປາສໍ ວິຊຫິຕ຺ວາ ຕິຏ຺ຐຕິ, ອາປຕ຺ຕິ ທຸກ຺ກຏສ຺ສ.

ອາມກຘຎ຺ຎໍ ວິຎ຺ຎາເປຕ຺ວາ ຠຸຎ຺ຊນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ອຸຈ຺ຈາຣໍ ວາ ປສ຺ສາວໍ ວາ ສງ຺ກາຣໍ ວາ ວິຆາສໍ ວາ ຕິໂຣກຸຏ຺ເຏ ວາ ຕິໂຣປາກາເຣ ວາ ຉຑ຺ເຑນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຉຑ຺ເຑຕິ, ປໂຍເຄ ທຸກ຺ກຏໍ; ຉຑ຺ຑິເຕ ອາປຕ຺ຕິ ປາຈິຕ຺ຕິຍສ຺ສ.

ອຸຈ຺ຈາຣໍ ວາ ປສ຺ສາວໍ ວາ ສງ຺ກາຣໍ ວາ ວິຆາສໍ ວາ ຫຣິເຕ ຉຑ຺ເຑນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຉຑ຺ເຑຕິ, ປໂຍເຄ ທຸກ຺ກຏໍ; ຉຑ຺ຑິເຕ ອາປຕ຺ຕິ ປາຈິຕ຺ຕິຍສ຺ສ.

ນຈ຺ຈໍ ວາ ຄີຕໍ ວາ ວາທິຕໍ ວາ ທສ຺ສນາຍ ຄຈ຺ຉນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຄຈ຺ຉຕິ, ອາປຕ຺ຕິ ທຸກ຺ກຏສ຺ສ; ຍຕ຺ຖ ຐິຕາ ປສ຺ສຕິ ວາ ສຸຓາຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ລສຸຓວຄ຺ໂຄ ປຐໂມ.

໒. ຣຕ຺ຕນ຺ຘກາຣວຄ຺ໂຄ

໒໓໒. ຣຕ຺ຕນ຺ຘກາເຣ ອປ຺ປທີເປ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ; ຫຕ຺ຖປາສໍ ວິຊຫິຕ຺ວາ ຕິຏ຺ຐຕິ, ອາປຕ຺ຕິ ທຸກ຺ກຏສ຺ສ.

ປຏິຈ຺ຉນ຺ເນ ໂອກາເສ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ; ຫຕ຺ຖປາສໍ ວິຊຫິຕ຺ວາ ຕິຏ຺ຐຕິ, ອາປຕ຺ຕິ ທຸກ຺ກຏສ຺ສ.

ອຊ຺ໂຌກາເສ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ; ຫຕ຺ຖປາສໍ ວິຊຫິຕ຺ວາ ຕິຏ຺ຐຕິ, ອາປຕ຺ຕິ ທຸກ຺ກຏສ຺ສ.

ຣຖິກາຍ ວາ ພ຺ຍູເຫ ວາ ສິງ຺ຆາຏເກ ວາ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ; ຫຕ຺ຖປາສໍ ວິຊຫິຕ຺ວາ ຕິຏ຺ຐຕິ, ອາປຕ຺ຕິ ທຸກ຺ກຏສ຺ສ.

ປຸເຣຠຕ຺ຕໍ ກຸລານິ ອຸປສງ຺ກມິຕ຺ວາ ອາສເນ ນິສີທິຕ຺ວາ ສາມິເກ ອນາປຸຈ຺ຉາ ປກ຺ກມນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ອໂນວສ຺ສກໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ອາສເນ ນິສີທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ນິສີທຕິ, ປໂຍເຄ ທຸກ຺ກຏໍ; ນິສິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ວິກາເລ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ເສຍ຺ຍໍ ສນ຺ຖຣິຕ຺ວາ ວາ ສນ຺ຖຣາເປຕ຺ວາ ວາ ອຠິນິສີທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຠິນິສີທຕິ, ປໂຍເຄ ທຸກ຺ກຏໍ; ອຠິນິສິນ຺ເນ ອາປຕ຺ຕິ ປາຈິຕ຺ຕິຍສ຺ສ.

ທຸຄ຺ຄຫິເຕນ ທູປຘາຣິເຕນ ປຣໍ ອຸຊ຺ຌາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຸຊ຺ຌາເປຕິ, ປໂຍເຄ ທຸກ຺ກຏໍ; ອຸຊ຺ຌາປິເຕ ອາປຕ຺ຕິ ປາຈິຕ຺ຕິຍສ຺ສ.

ອຕ຺ຕານໍ ວາ ປຣໍ ວາ ນິຣເຍນ ວາ ພ຺ຣຫ຺ມຈຣິເຍນ ວາ ອຠິສປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຠິສປຕິ, ປໂຍເຄ ທຸກ຺ກຏໍ; ອຠິສປິເຕ ອາປຕ຺ຕິ ປາຈິຕ຺ຕິຍສ຺ສ.

ອຕ຺ຕານໍ ວຘິຕ຺ວາ ວຘິຕ຺ວາ ໂຣທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຘຕິ ໂຣທຕິ, ອາປຕ຺ຕິ ປາຈິຕ຺ຕິຍສ຺ສ; ວຘຕິ ນ ໂຣທຕິ, ອາປຕ຺ຕິ ທຸກ຺ກຏສ຺ສ.

ຣຕ຺ຕນ຺ຘກາຣວຄ຺ໂຄ ທຸຕິໂຍ.

໓. ນຫານວຄ຺ໂຄ

໒໓໓. ນຄ຺ຄາ ນຫາຍນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ນຫາຍຕິ, ປໂຍເຄ ທຸກ຺ກຏໍ; ນຫານປຣິໂຍສາເນ ອາປຕ຺ຕິ ປາຈິຕ຺ຕິຍສ຺ສ.

ປມາຓາຕິກ຺ກນ຺ຕໍ ອຸທກສາຏິກໍ ກາຣາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ກາຣາເປຕິ, ປໂຍເຄ ທຸກ຺ກຏໍ; ກາຣາປິເຕ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນິຍາ ຈີວຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ ເນວ ສິພ຺ເພນ຺ຕີ ນ ສິພ຺ພາປນາຍ ອຸສ຺ສຸກ຺ກໍ ກໂຣນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ປຎ຺ຈາຫິກໍ ສງ຺ຆາຏິຈາຣໍ ອຕິກ຺ກາເມນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ. ຈີວຣສງ຺ກມນີຍໍ ຘາເຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຘາເຣຕິ, ປໂຍເຄ ທຸກ຺ກຏໍ; ຘາຣິເຕ, ອາປຕ຺ຕິ ປາຈິຕ຺ຕິຍສ຺ສ.

ຄຓສ຺ສ ຈີວຣລາຠໍ ອນ຺ຕຣາຍໍ ກໂຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ກໂຣຕິ, ປໂຍເຄ ທຸກ຺ກຏໍ; ກເຕ, ອາປຕ຺ຕິ ປາຈິຕ຺ຕິຍສ຺ສ.

ຘມ຺ມິກໍ ຈີວຣວິຠງ຺ຄໍ ປຏິພາຫນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິພາຫຕິ, ປໂຍເຄ ທຸກ຺ກຏໍ; ປຏິພາຫິເຕ, ອາປຕ຺ຕິ ປາຈິຕ຺ຕິຍສ຺ສ.

ອຄາຣິກສ຺ສ ວາ ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ ສມຓຈີວຣໍ ເທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເທຕິ, ປໂຍເຄ ທຸກ຺ກຏໍ; ທິນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ທຸພ຺ພລຈີວຣປຈ຺ຈາສາ ຈີວຣກາລສມຍໍ ອຕິກ຺ກາເມນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຕິກ຺ກາເມຕິ, ປໂຍເຄ ທຸກ຺ກຏໍ; ອຕິກ຺ກາມິເຕ, ອາປຕ຺ຕິ ປາຈິຕ຺ຕິຍສ຺ສ.

ຘມ຺ມິກໍ ກຖິນຸທ຺ຘາຣໍ ປຏິພາຫນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິພາຫຕິ, ປໂຍເຄ ທຸກ຺ກຏໍ; ປຏິພາຫິເຕ, ອາປຕ຺ຕິ ປາຈິຕ຺ຕິຍສ຺ສ.

ນຫານວຄ຺ໂຄ ຕຕິໂຍ.

໔. ຕຸວຏ຺ຏວຄ຺ໂຄ

໒໓໔. ທ຺ເວ ຠິກ຺ຂຸນິໂຍ ເອກມຎ຺ເຈ ຕຸວຏ຺ເຏນ຺ຕິໂຍ ທ຺ເວ ອາປຕ຺ຕິໂຍ ອາປຊ຺ຊນ຺ຕິ. ນິປຊ຺ຊນ຺ຕິ, ປໂຍເຄ ທຸກ຺ກຏໍ; ນິປນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ທ຺ເວ ຠິກ຺ຂຸນິໂຍ ເອກຕ຺ຖຣຓປາວຸຣຓາ ຕຸວຏ຺ເຏນ຺ຕິໂຍ ທ຺ເວ ອາປຕ຺ຕິໂຍ ອາປຊ຺ຊນ຺ຕິ. ນິປຊ຺ຊນ຺ຕິ, ປໂຍເຄ ທຸກ຺ກຏໍ; ນິປນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນິຍາ ສຎ຺ຈິຈ຺ຈ ອຜາສຸໍ ກໂຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ກໂຣຕິ, ປໂຍເຄ ທຸກ຺ກຏໍ; ກເຕ, ອາປຕ຺ຕິ ປາຈິຕ຺ຕິຍສ຺ສ.

ທຸກ຺ຂິຕໍ ສຫຊີວິນິໍ ເນວ ອຸປຏ຺ເຐນ຺ຕີ ນ ອຸປຏ຺ຐາປນາຍ ອຸສ຺ສຸກ຺ກໍ ກໂຣນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ຠິກ຺ຂຸນິຍາ ອຸປສ຺ສຍໍ ທຕ຺ວາ ກຸປິຕາ ອນຕ຺ຕມນາ ນິກ຺ກຑ຺ຒນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ນິກ຺ກຑ຺ຒຕິ, ປໂຍເຄ ທຸກ຺ກຏໍ; ນິກ຺ກຑ຺ຒິເຕ, ອາປຕ຺ຕິ ປາຈິຕ຺ຕິຍສ຺ສ.

ສໍສຏ຺ຐາ ຠິກ຺ຂຸນີ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຎຕ຺ຕິຍາ ທຸກ຺ກຏໍ; ກມ຺ມວາຈາປຣິໂຍສາເນ ອາປຕ຺ຕິ ປາຈິຕ຺ຕິຍສ຺ສ.

ອນ຺ໂຕຣຏ຺ເຐ ສາສງ຺ກສມ຺ມເຕ ສປ຺ປຏິຠເຍ ອສຕ຺ຖິກາ ຈາຣິກໍ ຈຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິປຊ຺ຊຕິ, ປໂຍເຄ ທຸກ຺ກຏໍ; ປຏິປນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ຕິໂຣຣຏ຺ເຐ ສາສງ຺ກສມ຺ມເຕ ສປ຺ປຏິຠເຍ ອສຕ຺ຖິກາ ຈາຣິກໍ ຈຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິປຊ຺ຊຕິ, ປໂຍເຄ ທຸກ຺ກຏໍ; ປຏິປນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ອນ຺ໂຕວສ຺ສໍ ຈາຣິກໍ ຈຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຏິປຊ຺ຊຕິ, ປໂຍເຄ ທຸກ຺ກຏໍ; ປຏິປນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ວສ຺ສໍວຸຏ຺ຐາ ຠິກ຺ຂຸນີ ຈາຣິກໍ ນ ປກ຺ກມນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ຕຸວຏ຺ຏວຄ຺ໂຄ ຈຕຸຕ຺ໂຖ.

໕. ຈິຕ຺ຕາຄາຣວຄ຺ໂຄ

໒໓໕. ຣາຊາຄາຣໍ ວາ ຈິຕ຺ຕາຄາຣໍ ວາ ອາຣາມໍ ວາ ອຸຍ຺ຍານໍ ວາ ໂປກ຺ຂຣຓິໍ ວາ ທສ຺ສນາຍ ຄຈ຺ຉນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຄຈ຺ຉຕິ, ອາປຕ຺ຕິ ທຸກ຺ກຏສ຺ສ; ຍຕ຺ຖ ຐິຕາ ປສ຺ສຕິ, ອາປຕ຺ຕິ ປາຈິຕ຺ຕິຍສ຺ສ.

ອາສນ຺ທິໍ ວາ ປລ຺ລງ຺ກໍ ວາ ປຣິຠຸຎ຺ຊນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຠຸຎ຺ຊຕິ, ປໂຍເຄ ທຸກ຺ກຏໍ; ປຣິຠຸຕ຺ເຕ, ອາປຕ຺ຕິ ປາຈິຕ຺ຕິຍສ຺ສ.

ສຸຕ຺ຕໍ ກນ຺ຕນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ກນ຺ຕຕິ, ປໂຍເຄ ທຸກ຺ກຏໍ; ອຸຊ຺ຊວຸຊ຺ຊເວ, ອາປຕ຺ຕິ ປາຈິຕ຺ຕິຍສ຺ສ.

ຄິຫິເວຍ຺ຍາວຈ຺ຈໍ ກໂຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ກໂຣຕິ, ປໂຍເຄ ທຸກ຺ກຏໍ; ກເຕ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນິຍາ – ‘‘ເອຫາຍ຺ເຍ ອິມໍ ອຘິກຣຓໍ ວູປສເມຫີ’’ຕິ ວຸຈ຺ຈມານາ – ‘‘ສາຘູ’’ຕິ ປຏິສ຺ສຸຓິຕ຺ວາ ເນວ ວູປສເມນ຺ຕີ ນ ວູປສມາຍ ອຸສ຺ສຸກ຺ກໍ ກໂຣນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ອຄາຣິກສ຺ສ ວາ ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ ສຫຕ຺ຖາ ຂາທນີຍໍ ວາ ໂຠຊນີຍໍ ວາ ເທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເທຕິ, ປໂຍເຄ ທຸກ຺ກຏໍ; ທິນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ອາວສຖຈີວຣໍ ອນິສ຺ສຊ຺ຊິຕ຺ວາ ປຣິຠຸຎ຺ຊນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຠຸຎ຺ຊຕິ, ປໂຍເຄ ທຸກ຺ກຏໍ; ປຣິຠຸຕ຺ເຕ, ອາປຕ຺ຕິ ປາຈິຕ຺ຕິຍສ຺ສ.

ອາວສຖໍ ອນິສ຺ສຊ຺ຊິຕ຺ວາ ຈາຣິກໍ ປກ຺ກມນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ປຣິກ຺ເຂປໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ຕິຣຈ຺ຉານວິຊ຺ຊໍ ປຣິຍາປຸຓນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຍາປຸຓາຕິ, ປໂຍເຄ ທຸກ຺ກຏໍ; ປເທ ປເທ ອາປຕ຺ຕິ ປາຈິຕ຺ຕິຍສ຺ສ.

ຕິຣຈ຺ຉານວິຊ຺ຊໍ ວາເຈນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວາເຈຕິ, ປໂຍເຄ ທຸກ຺ກຏໍ; ປເທ ປເທ ອາປຕ຺ຕິ ປາຈິຕ຺ຕິຍສ຺ສ.

ຈິຕ຺ຕາຄາຣວຄ຺ໂຄ ປຎ຺ຈໂມ.

໖. ອາຣາມວຄ຺ໂຄ

໒໓໖. ຊານໍ ສຠິກ຺ຂຸກໍ ອາຣາມໍ ອນາປຸຈ຺ຉາ ປວິສນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ປຣິກ຺ເຂປໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸໍ ອກ຺ໂກສນ຺ຕີ ປຣິຠາສນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອກ຺ໂກສຕິ, ປໂຍເຄ ທຸກ຺ກຏໍ; ອກ຺ໂກສິເຕ, ອາປຕ຺ຕິ ປາຈິຕ຺ຕິຍສ຺ສ.

ຈຓ຺ຑີກຕາ ຄຓໍ ປຣິຠາສນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຣິຠາສຕິ, ປໂຍເຄ ທຸກ຺ກຏໍ; ປຣິຠາສິເຕ, ອາປຕ຺ຕິ ປາຈິຕ຺ຕິຍສ຺ສ.

ນິມນ຺ຕິຕາ ວາ ປວາຣິຕາ ວາ ຂາທນີຍໍ ວາ ໂຠຊນີຍໍ ວາ ຠຸຎ຺ຊນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

ກຸລໍ ມຈ຺ຉຣາຍນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ມຈ຺ຉຣາຍຕິ, ປໂຍເຄ ທຸກ຺ກຏໍ; ມຈ຺ຉຣິເຕ, ອາປຕ຺ຕິ ປາຈິຕ຺ຕິຍສ຺ສ.

ອຠິກ຺ຂຸເກ ອາວາເສ ວສ຺ສໍ ວສນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ‘‘ວສ຺ສໍ ວສິສ຺ສາມີ’’ຕິ ເສນາສນໍ ປຎ຺ຎເປຕິ ປານີຍໍ ປຣິໂຠຊນີຍໍ ອຸປຏ຺ຐເປຕິ ປຣິເວຓໍ ສມ຺ມຊ຺ຊຕິ, ອາປຕ຺ຕິ ທຸກ຺ກຏສ຺ສ; ສຫ ອຣຸຓຸຄ຺ຄມນາ ອາປຕ຺ຕິ ປາຈິຕ຺ຕິຍສ຺ສ.

ວສ຺ສໍວຸຏ຺ຐາ ຠິກ຺ຂຸນີ ອຸຠໂຕສງ຺ເຆ ຕີຫິ ຐາເນຫິ ນ ປວາເຣນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ໂອວາທາຍ ວາ ສໍວາສາຍ ວາ ນ ຄຈ຺ຉນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ອຸໂປສຖມ຺ປິ ນ ປຸຈ຺ຉນ຺ຕີ ໂອວາທມ຺ປິ ນ ຍາຈນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ປສາເຂ ຊາຕໍ ຄຓ຺ຑໍ ວາ ຣຸຘິຕໍ ວາ ອນປໂລເກຕ຺ວາ ສງ຺ຆໍ ວາ ຄຓໍ ວາ ປຸຣິເສນ ສທ຺ຘິໍ ເອເກເນກາ ເຠທາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ເຠທາເປຕິ, ປໂຍເຄ ທຸກ຺ກຏໍ; ຠິນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ອາຣາມວຄ຺ໂຄ ຉຏ຺ໂຐ.

໗. ຄພ຺ຠິນີວຄ຺ໂຄ

໒໓໗. ຄພ຺ຠິນິໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ປາຍນ຺ຕິໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ທ຺ເວ ວສ຺ສານິ ຉສຸ ຘມ຺ເມສຸ ອສິກ຺ຂິຕສິກ຺ຂໍ ສິກ຺ຂມານໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ທ຺ເວ ວສ຺ສານິ ຉສຸ ຘມ຺ເມສຸ ສິກ຺ຂິຕສິກ຺ຂໍ ສິກ຺ຂມານໍ ສງ຺ເຆນ ອສມ຺ມຕໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ອູນທ຺ວາທສວສ຺ສໍ ຄິຫິຄຕໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ປຣິປຸຓ຺ຓທ຺ວາທສວສ຺ສໍ ຄິຫິຄຕໍ ທ຺ເວ ວສ຺ສານິ ຉສຸ ຘມ຺ເມສຸ ອສິກ຺ຂິຕສິກ຺ຂໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ປຣິປຸຓ຺ຓທ຺ວາທສວສ຺ສໍ ຄິຫິຄຕໍ ທ຺ເວ ວສ຺ສານິ ຉສຸ ຘມ຺ເມສຸ ສິກ຺ຂິຕສິກ຺ຂໍ ສງ຺ເຆນ ອສມ຺ມຕໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ສຫຊີວິນິໍ ວຸຏ຺ຐາເປຕ຺ວາ ທ຺ເວ ວສ຺ສານິ ເນວ ອນຸຄ຺ຄຓ຺ຫນ຺ຕີ ນານຸຄ຺ຄຓ຺ຫາເປນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ວຸຏ຺ຐາປິຕໍ ປວຕ຺ຕິນິໍ ທ຺ເວ ວສ຺ສານິ ນານຸພນ຺ຘນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ສຫຊີວິນິໍ ວຸຏ຺ຐາເປຕ຺ວາ ເນວ ວູປກາເສນ຺ຕີ ນ ວູປກາສາເປນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ຄພ຺ຠິນີວຄ຺ໂຄ ສຕ຺ຕໂມ.

໘. ກຸມາຣີຠູຕວຄ຺ໂຄ

໒໓໘. ອູນວີສຕິວສ຺ສໍ ກຸມາຣິຠູຕໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ປຣິປຸຓ຺ຓວີສຕິວສ຺ສໍ ກຸມາຣິຠູຕໍ ທ຺ເວ ວສ຺ສານິ ຉສຸ ຘມ຺ເມສຸ ອສິກ຺ຂິຕສິກ຺ຂໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ປຣິປຸຓ຺ຓວີສຕິວສ຺ສໍ ກຸມາຣິຠູຕໍ ທ຺ເວ ວສ຺ສານິ ຉສຸ ຘມ຺ເມສຸ ສິກ຺ຂິຕສິກ຺ຂໍ ສງ຺ເຆນ ອສມ຺ມຕໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ອູນທ຺ວາທສວສ຺ສາ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ປຣິປຸຓ຺ຓທ຺ວາທສວສ຺ສາ ສງ຺ເຆນ ອສມ຺ມຕາ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

‘‘ອລໍ ຕາວ ເຕ, ອຍ຺ເຍ, ວຸຏ຺ຐາປິເຕນາ’’ຕິ ວຸຈ຺ຈມານາ ‘‘ສາຘູ’’ຕິ ປຏິສ຺ສຸຓິຕ຺ວາ ປຈ຺ຉາ ຂີຍນຘມ຺ມໍ ອາປຊ຺ຊນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຂິຍ຺ຍຕິ, ປໂຍເຄ ທຸກ຺ກຏໍ; ຂິຍ຺ຍິເຕ, ອາປຕ຺ຕິ ປາຈິຕ຺ຕິຍສ຺ສ.

ສິກ຺ຂມານໍ – ‘‘ສເຈ ເມ ຕ຺ວໍ, ອຍ຺ເຍ, ຈີວຣໍ ທສ຺ສສິ, ເອວາຫໍ ຕໍ ວຸຏ຺ຐາເປສ຺ສາມີ’’ຕິ ວຕ຺ວາ ເນວ ວຸຏ຺ຐາເປນ຺ຕີ ນ ວຸຏ຺ຐາປນາຍ ອຸສ຺ສຸກ຺ກໍ ກໂຣນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ສິກ຺ຂມານໍ – ‘‘ສເຈ ມໍ ຕ຺ວໍ, ອຍ຺ເຍ, ທ຺ເວ ວສ຺ສານິ ອນຸພນ຺ຘິສ຺ສສິ, ເອວາຫໍ ຕໍ ວຸຏ຺ຐາເປສ຺ສາມີ’’ຕິ ວຕ຺ວາ ເນວ ວຸຏ຺ຐາເປນ຺ຕີ ນ ວຸຏ຺ຐາປນາຍ ອຸສ຺ສຸກ຺ກໍ ກໂຣນ຺ຕີ ເອກໍ ອາປຕ຺ຕິໍ ອາປຊ຺ຊຕິ. ປາຈິຕ຺ຕິຍໍ.

ປຸຣິສສໍສຏ຺ຐໍ ກຸມາຣກສໍສຏ຺ຐໍ ຈຓ຺ຑິໍ ໂສກາວາສໍ ສິກ຺ຂມານໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ມາຕາປິຕູຫິ ວາ ສາມິເກນ ວາ ອນນຸຎ຺ຎາຕໍ ສິກ຺ຂມານໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ປາຣິວາສິກຉນ຺ທທາເນ ສິກ຺ຂມານໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ອນຸວສ຺ສໍ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ເອກໍ ວສ຺ສໍ ທ຺ເວ ວຸຏ຺ຐາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ວຸຏ຺ຐາເປຕິ, ປໂຍເຄ ທຸກ຺ກຏໍ; ວຸຏ຺ຐາປິເຕ, ອາປຕ຺ຕິ ປາຈິຕ຺ຕິຍສ຺ສ.

ກຸມາຣີຠູຕວຄ຺ໂຄ ອຏ຺ຐໂມ.

໙. ຉຕ຺ຕຸປາຫນວຄ຺ໂຄ

໒໓໙. ຉຕ຺ຕຸປາຫນໍ ຘາເຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຘາເຣຕິ, ປໂຍເຄ ທຸກ຺ກຏໍ; ຘາຣິເຕ, ອາປຕ຺ຕິ ປາຈິຕ຺ຕິຍສ຺ສ.

ຍາເນນ ຍາຍນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຍາຍຕິ, ປໂຍເຄ ທຸກ຺ກຏໍ; ຍາຍິເຕ, ອາປຕ຺ຕິ ປາຈິຕ຺ຕິຍສ຺ສ.

ສງ຺ຆາຓິໍ ຘາເຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຘາເຣຕິ, ປໂຍເຄ ທຸກ຺ກຏໍ; ຘາຣິເຕ, ອາປຕ຺ຕິ ປາຈິຕ຺ຕິຍສ຺ສ.

ອິຕ຺ຖາລງ຺ກາຣໍ ຘາເຣນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຘາເຣຕິ, ປໂຍເຄ ທຸກ຺ກຏໍ; ຘາຣິເຕ, ອາປຕ຺ຕິ ປາຈິຕ຺ຕິຍສ຺ສ.

ຄນ຺ຘວຓ຺ຓເກນ ນຫາຍນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ນຫາຍຕິ, ປໂຍເຄ ທຸກ຺ກຏໍ; ນຫານປຣິໂຍສາເນ, ອາປຕ຺ຕິ ປາຈິຕ຺ຕິຍສ຺ສ.

ວາສິຕເກນ ປິຎ຺ຎາເກນ ນຫາຍນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ນຫາຍຕິ, ປໂຍເຄ ທຸກ຺ກຏໍ; ນຫານປຣິໂຍສາເນ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸນິຍາ ອຸມ຺ມທ຺ທາເປນ຺ຕີ ປຣິມທ຺ທາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຸມ຺ມທ຺ທາເປຕິ, ປໂຍເຄ ທຸກ຺ກຏໍ; ອຸມ຺ມທ຺ທິເຕ, ອາປຕ຺ຕິ ປາຈິຕ຺ຕິຍສ຺ສ.

ສິກ຺ຂມານາຍ ອຸມ຺ມທ຺ທາເປນ຺ຕີ ປຣິມທ຺ທາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຸມ຺ມທ຺ທາເປຕິ, ປໂຍເຄ ທຸກ຺ກຏໍ; ອຸມ຺ມທ຺ທິເຕ, ອາປຕ຺ຕິ ປາຈິຕ຺ຕິຍສ຺ສ.

ສາມເຓຣິຍາ ອຸມ຺ມທ຺ທາເປນ຺ຕີ ປຣິມທ຺ທາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຸມ຺ມທ຺ທາເປຕິ, ປໂຍເຄ ທຸກ຺ກຏໍ; ອຸມ຺ມທ຺ທິເຕ, ອາປຕ຺ຕິ ປາຈິຕ຺ຕິຍສ຺ສ.

ຄິຫິນິຍາ ອຸມ຺ມທ຺ທາເປນ຺ຕີ ປຣິມທ຺ທາເປນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ອຸມ຺ມທ຺ທາເປຕິ, ປໂຍເຄ ທຸກ຺ກຏໍ; ອຸມ຺ມທ຺ທິເຕ, ອາປຕ຺ຕິ ປາຈິຕ຺ຕິຍສ຺ສ.

ຠິກ຺ຂຸສ຺ສ ປຸຣໂຕ ອນາປຸຈ຺ຉາ ອາສເນ ນິສີທນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ນິສີທຕິ, ປໂຍເຄ ທຸກ຺ກຏໍ; ນິສິນ຺ເນ, ອາປຕ຺ຕິ ປາຈິຕ຺ຕິຍສ຺ສ.

ອໂນກາສກຕໍ ຠິກ຺ຂຸໍ ປຎ຺ຫໍ ປຸຈ຺ຉນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຸຈ຺ຉຕິ, ປໂຍເຄ ທຸກ຺ກຏໍ; ປຸຈ຺ຉິເຕ, ອາປຕ຺ຕິ ປາຈິຕ຺ຕິຍສ຺ສ.

ອສງ຺ກຈ຺ຈິກາ ຄາມໍ ປວິສນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ປຐມໍ ປາທໍ ປຣິກ຺ເຂປໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ; ທຸຕິຍໍ ປາທໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

ຉຕ຺ຕຸປາຫນວຄ຺ໂຄ ນວໂມ.

ຂຸທ຺ທກໍ ນິຏ຺ຐິຕໍ.

໕. ປາຏິເທສນີຍກຓ຺ຑໍ

໒໔໐. ສປ຺ປິໍ ວິຎ຺ຎາເປຕ຺ວາ ຠຸຎ຺ຊນ຺ຕີ ທ຺ເວ ອາປຕ຺ຕິໂຍ ອາປຊ຺ຊຕິ. ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ; ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຏິເທສນີຍສ຺ສ.