໖. ປາຏິເທສນີຍກຓ຺ຑໍ

໑໔໖. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ອຎ຺ຎາຕິກາຍ ຠິກ຺ຂຸນິຍາ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຠຸຎ຺ຊນ຺ຕສ຺ສ ປາຏິເທສນີຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອຎ຺ຎຕຣໍ ຠິກ຺ຂຸໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອຎ຺ຎຕໂຣ ຠິກ຺ຂຸ ອຎ຺ຎາຕິກາຍ ຠິກ຺ຂຸນິຍາ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ອາມິສໍ ປຏິຄ຺ຄເຫສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ສມຸຏ຺ຐາຕິ, ນ ວາຈໂຕ ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ…ເປ….

໑໔໗. ຠິກ຺ຂຸນິຍາ ໂວສາສນ຺ຕິຍາ ນ ນິວາເຣຕ຺ວາ ຠຸຎ຺ຊນ຺ຕສ຺ສ ປາຏິເທສນີຍໍ ກຕ຺ຖ ປຎ຺ຎຕ຺ຕນ຺ຕິ? ຣາຊຄເຫ ປຎ຺ຎຕ຺ຕໍ. ກໍ ອາຣພ຺ຠາຕິ? ຉພ຺ພຄ຺ຄິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຉພ຺ພຄ຺ຄິຍາ ຠິກ຺ຂູ ຠິກ຺ຂຸນິໂຍ ໂວສາສນ຺ຕິໂຍ ນ ນິວາເຣສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໑໔໘. ເສກ຺ຂສມ຺ມເຕສຸ ກຸເລສຸ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຠຸຎ຺ຊນ຺ຕສ຺ສ ປາຏິເທສນີຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ນ ມຕ຺ຕໍ ຊານິຕ຺ວາ ປຏິຄ຺ຄເຫສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ທ຺ເວ ອນຸປຎ຺ຎຕ຺ຕິໂຍ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ສມຸຏ຺ຐາຕິ, ນ ວາຈໂຕ ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ…ເປ….

໑໔໙. ອາຣຎ຺ຎເກສຸ ເສນາສເນສຸ ປຸພ຺ເພ ອປ຺ປຏິສໍວິທິຕໍ ຂາທນີຍໍ ວາ ໂຠຊນີຍໍ ວາ ອຊ຺ຌາຣາເມ ສຫຕ຺ຖາ ປຏິຄ຺ຄເຫຕ຺ວາ ຠຸຎ຺ຊນ຺ຕສ຺ສ ປາຏິເທສນີຍໍ ກຕ຺ຖ ປຎ຺ຎຕ຺ຕນ຺ຕິ? ສກ຺ເກສຸ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ. ສມ຺ພຫຸລາ ຠິກ຺ຂູ ອາຣາເມ ໂຈເຣ ປຏິວສນ຺ເຕ ນາໂຣເຈສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

ຈຕ຺ຕາໂຣ ປາຏິເທສນີຍາ ນິຏ຺ຐິຕາ.

ຕສ຺ສຸທ຺ທານໍ –

ອຎ຺ຎາຕິກາຍ ໂວສາສໍ, ເສກ຺ຂອາຣຎ຺ຎເກນ ຈ;

ປາຏິເທສນີຍາ ຈຕ຺ຕາໂຣ, ສມ຺ພຸທ຺ເຘນ ປກາສິຕາຕິ.