໑. ກຕ຺ຖປຎ຺ຎຕ຺ຕິວາໂຣ

໑. ປາຣາຊິກກຓ຺ຑໍ

໑. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ປຐມໍ ປາຣາຊິກໍ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ, ກິສ຺ມິໍ ວຕ຺ຖຸສ຺ມິໍ? ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕິ? ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕິ? ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕິ? ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕິ? ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນໍ? ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕິ? ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕິ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘ? ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ? ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕິ? ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍ? ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂໍ? ກາ ວິປຕ຺ຕິ? ກາ ສມ຺ປຕ຺ຕິ? ກາ ປຏິປຕ຺ຕິ? ກຕິ ອຕ຺ຖວເສ ປຏິຈ຺ຈ ຠຄວຕາ ປຐມໍ ປາຣາຊິກໍ ປຎ຺ຎຕ຺ຕໍ? ເກ ສິກ຺ຂນ຺ຕິ? ເກ ສິກ຺ຂິຕສິກ຺ຂາ? ກຕ຺ຖ ຐິຕໍ? ເກ ຘາເຣນ຺ຕິ? ກສ຺ສ ວຈນໍ? ເກນາຠຕນ຺ຕິ?

໒. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ປຐມໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ເວສາລິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສຸທິນ຺ນໍ ກລນ຺ທປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສຸທິນ຺ໂນ ກລນ຺ທປຸຕ຺ໂຕ ປຸຣາຓທຸຕິຍິກາຍ ເມຖຸນໍ ຘມ຺ມໍ ປຏິເສວິ, ຕສ຺ມິໍ ວຕ຺ຖຸສ຺ມິໍ. ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕີຕິ? ເອກາ ປຎ຺ຎຕ຺ຕິ, ທ຺ເວ ອນຸປຎ຺ຎຕ຺ຕິໂຍ. ອນຸປ຺ປນ຺ນປຎ຺ຎຕ຺ຕິ ຕສ຺ມິໍ ນຕ຺ຖິ. ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕີຕິ? ສພ຺ພຕ຺ຖປຎ຺ຎຕ຺ຕິ. ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕີຕິ? ສາຘາຣຓປຎ຺ຎຕ຺ຕິ. ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕີຕິ? ອຸຠໂຕປຎ຺ຎຕ຺ຕິ. ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນນ຺ຕິ? ນິທາໂນຄຘໍ, ນິທານປຣິຍາປນ຺ນໍ. ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕີຕິ? ທຸຕິເຍນ ອຸທ຺ເທເສນ ອຸທ຺ເທສໍ ອາຄຈ຺ຉຕິ. ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕີຕິ? ສີລວິປຕ຺ຕິ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘຕິ? ປາຣາຊິກາປຕ຺ຕິກ຺ຂນ຺ໂຘ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ. ຈຕຸນ຺ນໍ ອຘິກຣຓານໍ ກຕມໍ ອຘິກຣຓນ຺ຕິ? ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕີຕິ? ທ຺ວີຫິ ສມເຖຫິ ສມ຺ມຕິ – ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ. ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍຕິ? ປຎ຺ຎຕ຺ຕິ ວິນໂຍ, ວິຠຕ຺ຕິ ອຠິວິນໂຍ. ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂນ຺ຕິ? ປຎ຺ຎຕ຺ຕິ ປາຕິໂມກ຺ຂໍ, ວິຠຕ຺ຕິ ອຘິປາຕິໂມກ຺ຂໍ. ກາ ວິປຕ຺ຕີຕິ? ອສໍວໂຣ ວິປຕ຺ຕິ. ກາ ສມ຺ປຕ຺ຕີຕິ? ສໍວໂຣ ສມ຺ປຕ຺ຕິ. ກາ ປຏິປຕ຺ຕີຕິ? ນ ເອວຣູປໍ ກຣິສ຺ສາມີຕິ ຍາວຊີວໍ ອາປາຓໂກຏິກໍ ສມາທາຍ ສິກ຺ຂຕິ ສິກ຺ຂາປເທສຸ. [ອ. ນິ. ໑໐.໓໑] ກຕິ ອຕ຺ຖວເສ ປຏິຈ຺ຈ ຠຄວຕາ ປຐມໍ ປາຣາຊິກໍ ປຎ຺ຎຕ຺ຕນ຺ຕິ? ທສ ອຕ຺ຖວເສ ປຏິຈ຺ຈ ຠຄວຕາ ປຐມໍ ປາຣາຊິກໍ ປຎ຺ຎຕ຺ຕໍ – ສງ຺ຆສຸຏ຺ຐຸຕາຍ, ສງ຺ຆຜາສຸຕາຍ, ທຸມ຺ມງ຺ກູນໍ ປຸຄ຺ຄລານໍ ນິຄ຺ຄຫາຍ, ເປສລານໍ ຠິກ຺ຂູນໍ ຜາສຸວິຫາຣາຍ, ທິຏ຺ຐຘມ຺ມິການໍ ອາສວານໍ ສໍວຣາຍ, ສມ຺ປຣາຍິການໍ ອາສວານໍ ປຏິຆາຕາຍ, ອປ຺ປສນ຺ນານໍ ປສາທາຍ, ປສນ຺ນານໍ ຠິຍ຺ໂຍຠາວາຍ, ສທ຺ຘມ຺ມຏ຺ຐິຕິຍາ, ວິນຍານຸຄ຺ຄຫາຍ. ເກ ສິກ຺ຂນ຺ຕີຕິ? ເສກ຺ຂາ ຈ ປຸຖຸຊ຺ຊນກລ຺ຍາຓກາ ຈ ສິກ຺ຂນ຺ຕິ. ເກ ສິກ຺ຂິຕສິກ຺ຂາຕິ? ອຣຫນ຺ໂຕ ສິກ຺ຂິຕສິກ຺ຂາ. ກຕ຺ຖ ຐິຕນ຺ຕິ? ສິກ຺ຂາກາເມສຸ ຐິຕໍ. ເກ ຘາເຣນ຺ຕີຕິ? ເຍສໍ ວຕ຺ຕຕິ ເຕ ຘາເຣນ຺ຕິ. ກສ຺ສ ວຈນນ຺ຕິ? ຠຄວໂຕ ວຈນໍ ອຣຫໂຕ ສມ຺ມາສມ຺ພຸທ຺ຘສ຺ສ. ເກນາຠຕນ຺ຕິ? ປຣມ຺ປຣາຠຕໍ –

໓. ອຸປາລິ ທາສໂກ ເຈວ, ໂສຓໂກ ສິຄ຺ຄໂວ ຕຖາ;

ໂມຄ຺ຄລິປຸຕ຺ເຕນ [ໂມຄ຺ຄລີປຸຕ຺ເຕນ (ສ຺ຍາ.)] ປຎ຺ຈມາ, ເອເຕ ຊມ຺ພຸສິຣິວ຺ຫເຍ [ຊມ຺ພຸສຣິວ຺ຫເຍ (ສາຣຕ຺ຖ)].

ຕໂຕ ມຫິນ຺ໂທ ອິຏ຺ຏິໂຍ [ອິຏ຺ຐິໂຍ (ສີ.)], ອຸຕ຺ຕິໂຍ ສມ຺ພໂລ [ອຸຏ຺ຏິໂຍ ສມ຺ປໂລ (ອິຕິປິ)] ຕຖາ;

ຠທ຺ທນາໂມ ຈ ປຓ຺ຑິໂຕ.

ເອເຕ ນາຄາ ມຫາປຎ຺ຎາ, ຊມ຺ພຸທີປາ ອິຘາຄຕາ;

ວິນຍໍ ເຕ ວາຈຍິໍສຸ, ປິຏກໍ ຕມ຺ພປຓ຺ຓິຍາ.

ນິກາເຍ ປຎ຺ຈ ວາເຈສຸໍ, ສຕ຺ຕ ເຈວ ປກຣເຓ;

ຕໂຕ ອຣິຏ຺ໂຐ ເມຘາວີ, ຕິສ຺ສທຕ຺ໂຕ ຈ ປຓ຺ຑິໂຕ.

ວິສາຣໂທ ກາຬສຸມໂນ, ເຖໂຣ ຈ ທີຆນາມໂກ;

ທີຆສຸມໂນ ຈ ປຓ຺ຑິໂຕ.

ປຸນເທວ [ປຸນເຣວ (ສ຺ຍາ.)] ກາຬສຸມໂນ, ນາຄຕ຺ເຖໂຣ ຈ ພຸທ຺ຘຣກ຺ຂິໂຕ;

ຕິສ຺ສຕ຺ເຖໂຣ ຈ ເມຘາວີ, ເທວຕ຺ເຖໂຣ [ເຣວຕ຺ເຖໂຣ (ອິຕິປິ)] ຈ ປຓ຺ຑິໂຕ.

ປຸນເທວ ສຸມໂນ ເມຘາວີ, ວິນເຍ ຈ ວິສາຣໂທ;

ພຫຸສ຺ສຸໂຕ ຈູຬນາໂຄ, ຄໂຊວ ທຸປ຺ປຘໍສິໂຍ.

ຘມ຺ມປາລິຕນາໂມ ຈ, ໂຣຫເຓ [ໂຣຫໂຓ (ສີ.)] ສາຘຸປູຊິໂຕ;

ຕສ຺ສ ສິສ຺ໂສ ມຫາປຎ຺ໂຎ ເຂມນາໂມ ຕິເປຏໂກ.

ທີເປ ຕາຣກຣາຊາວ ປຎ຺ຎາຍ ອຕິໂຣຈຖ;

ອຸປຕິສ຺ໂສ ຈ ເມຘາວີ, ຜຸສ຺ສເທໂວ ມຫາກຖີ.

ປຸນເທວ ສຸມໂນ ເມຘາວີ, ປຸປ຺ຜນາໂມ ພຫຸສ຺ສຸໂຕ;

ມຫາກຖີ ມຫາສິໂວ, ປິຏເກ ສພ຺ພຕ຺ຖ ໂກວິໂທ.

ປຸນເທວ ອຸປາລິ ເມຘາວີ, ວິນເຍ ຈ ວິສາຣໂທ;

ມຫານາໂຄ ມຫາປຎ຺ໂຎ, ສທ຺ຘມ຺ມວໍສໂກວິໂທ.

ປຸນເທວ ອຠໂຍ ເມຘາວີ, ປິຏເກ ສພ຺ພຕ຺ຖ ໂກວິໂທ;

ຕິສ຺ສຕ຺ເຖໂຣ ຈ ເມຘາວີ, ວິນເຍ ຈ ວິສາຣໂທ.

ຕສ຺ສ ສິສ຺ໂສ ມຫາປຎ຺ໂຎ, ປຸປ຺ຜນາໂມ ພຫຸສ຺ສຸໂຕ;

ສາສນໍ ອນຸຣກ຺ຂນ຺ໂຕ, ຊມ຺ພຸທີເປ ປຕິຏ຺ຐິໂຕ.

ຈູຬາຠໂຍ ຈ ເມຘາວີ, ວິນເຍ ຈ ວິສາຣໂທ;

ຕິສ຺ສຕ຺ເຖໂຣ ຈ ເມຘາວີ, ສທ຺ຘມ຺ມວໍສໂກວິໂທ.

ຈູຬເທໂວ [ຜຸສ຺ສເທໂວ (ສີ.)] ຈ ເມຘາວີ, ວິນເຍ ຈ ວິສາຣໂທ;

ສິວຕ຺ເຖໂຣ ຈ ເມຘາວີ, ວິນເຍ ສພ຺ພຕ຺ຖ ໂກວິໂທ.

ເອເຕ ນາຄາ ມຫາປຎ຺ຎາ, ວິນຍຎ຺ຎູ ມຄ຺ຄໂກວິທາ;

ວິນຍໍ ທີເປ ປກາເສສຸໍ, ປິຏກໍ ຕມ຺ພປຓ຺ຓິຍາຕິ.

໔. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ທຸຕິຍໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ຣາຊຄເຫ ປຎ຺ຎຕ຺ຕໍ. ກໍ ອາຣພ຺ຠາຕິ? ຘນິຍໍ ກຸມ຺ຠກາຣປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຘນິໂຍ ກຸມ຺ຠກາຣປຸຕ຺ໂຕ ຣຎ຺ໂຎ ທາຣູນິ ອທິນ຺ນໍ ອາທິຍິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໕. ຕຕິຍໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ເວສາລິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ອຎ຺ຎມຎ຺ຎໍ ຊີວິຕາ ໂວໂຣເປສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໖. ຈຕຸຕ຺ຖໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ເວສາລິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ວຄ຺ຄຸມຸທາຕີຣິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ວຄ຺ຄຸມຸທາຕີຣິຍາ ຠິກ຺ຂູ ຄິຫີນໍ ອຎ຺ຎມຎ຺ຎສ຺ສ ອຸຕ຺ຕຣິມນຸສ຺ສຘມ຺ມສ຺ສ ວຓ຺ຓໍ ຠາສິໍສຸ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

ຈຕ຺ຕາໂຣ ປາຣາຊິກາ ນິຏ຺ຐິຕາ.

ຕສ຺ສຸທ຺ທານໍ –

ເມຖຸນາທິນ຺ນາທານຎ຺ຈ, ມນຸສ຺ສວິຄ຺ຄຫຸຕ຺ຕຣິ;

ປາຣາຊິການິ ຈຕ຺ຕາຣິ, ເຉຊ຺ຊວຕ຺ຖູ ອສໍສຍາຕິ.

໒. ສງ຺ຆາທິເສສກຓ຺ຑໍ

໗. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ອຸປກ຺ກມິຕ຺ວາ ອສຸຈິໍ ໂມເຈນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕ? ກໍ ອາຣພ຺ຠ? ກິສ຺ມິໍ ວຕ຺ຖຸສ຺ມິໍ? ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕິ? ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕິ? ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕິ? ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕິ? ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນໍ? ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕິ? ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕິ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘ? ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ? ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕິ? ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍ? ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂໍ? ກາ ວິປຕ຺ຕິ, ກາ ສມ຺ປຕ຺ຕິ, ກາ ປຏິປຕ຺ຕິ? ກຕິ ອຕ຺ຖວເສ ປຏິຈ຺ຈ ຠຄວຕາ ອຸປກ຺ກມິຕ຺ວາ ອສຸຈິໍ ໂມເຈນ຺ຕສ຺ສ ສງ຺ຆາທິເສໂສ ປຎ຺ຎຕ຺ໂຕ? ເກ ສິກ຺ຂນ຺ຕິ, ເກ ສິກ຺ຂິຕສິກ຺ຂາ? ກຕ຺ຖ ຐິຕໍ? ເກ ຘາເຣນ຺ຕິ? ກສ຺ສ ວຈນໍ? ເກນາຠຕນ຺ຕິ?

໘. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ອຸປກ຺ກມິຕ຺ວາ ອສຸຈິໍ ໂມເຈນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ເສຍ຺ຍສກໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ເສຍ຺ຍສໂກ ຫຕ຺ເຖນ ອຸປກ຺ກມິຕ຺ວາ ອສຸຈິໍ ໂມເຈສິ, ຕສ຺ມິໍ ວຕ຺ຖຸສ຺ມິໍ. ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕີຕິ? ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ອນຸປ຺ປນ຺ນປຎ຺ຎຕ຺ຕິ ຕສ຺ມິໍ ນຕ຺ຖິ. ສພ຺ພຕ຺ຖ ປຎ຺ຎຕ຺ຕິ, ປເທສປຎ຺ຎຕ຺ຕີຕິ? ສພ຺ພຕ຺ຖປຎ຺ຎຕ຺ຕິ. ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕີຕິ? ອສາຘາຣຓປຎ຺ຎຕ຺ຕິ. ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕີຕິ? ເອກໂຕປຎ຺ຎຕ຺ຕິ. ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນນ຺ຕິ? ນິທາໂນຄຘໍ ນິທານປຣິຍາປນ຺ນໍ. ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕີຕິ? ຕຕິເຍ ອຸທ຺ເທເສນ ອຸທ຺ເທສໍ ອາຄຈ຺ຉຕິ. ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕີຕິ? ສີລວິປຕ຺ຕິ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘຕິ? ສງ຺ຆາທິເສໂສ ອາປຕ຺ຕິກ຺ຂນ຺ໂຘ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ. ຈຕຸນ຺ນໍ ອຘິກຣຓານໍ ກຕມໍ ອຘິກຣຓນ຺ຕິ? ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕີຕິ? ທ຺ວີຫິ ສມເຖຫິ ສມ຺ມຕິ – ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ. ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍຕິ? ປຎ຺ຎຕ຺ຕິ ວິນໂຍ, ວິຠຕ຺ຕິ ອຠິວິນໂຍ. ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂນ຺ຕິ? ປຎ຺ຎຕ຺ຕິ ປາຕິໂມກ຺ຂໍ, ວິຠຕ຺ຕິ ອຘິປາຕິໂມກ຺ຂໍ. ກາ ວິປຕ຺ຕີຕິ? ອສໍວໂຣ ວິປຕ຺ຕິ. ກາ ສມ຺ປຕ຺ຕີຕິ? ສໍວໂຣ ສມ຺ປຕ຺ຕິ. ກາ ປຏິປຕ຺ຕີຕິ? ນ ເອວຣູປໍ ກຣິສ຺ສາມີຕິ ຍາວຊີວໍ ອາປາຓໂກຏິກໍ ສມາທາຍ ສິກ຺ຂຕິ ສິກ຺ຂາປເທສຸ. [ອ. ນິ. ໑໐.໓໑] ກຕິ ອຕ຺ຖວເສ ປຏິຈ຺ຈ ຠຄວຕາ ອຸປກ຺ກມິຕ຺ວາ ອສຸຈິໍ ໂມເຈນ຺ຕສ຺ສ ສງ຺ຆາທິເສໂສ ປຎ຺ຎຕ຺ໂຕຕິ? ທສ ອຕ຺ຖວເສ ປຏິຈ຺ຈ ຠຄວຕາ ອຸປກ຺ກມິຕ຺ວາ ອສຸຈິໍ ໂມເຈນ຺ຕສ຺ສ ສງ຺ຆາທິເສໂສ ປຎ຺ຎຕ຺ໂຕ – ສງ຺ຆສຸຏ຺ຐຸຕາຍ, ສງ຺ຆຜາສຸຕາຍ, ທຸມ຺ມງ຺ກູນໍ ປຸຄ຺ຄລານໍ ນິຄ຺ຄຫາຍ, ເປສລານໍ ຠິກ຺ຂູນໍ ຜາສຸວິຫາຣາຍ, ທິຏ຺ຐຘມ຺ມິການໍ ອາສວານໍ ສໍວຣາຍ, ສມ຺ປຣາຍິການໍ ອາສວານໍ ປຏິຆາຕາຍ, ອປ຺ປສນ຺ນານໍ ປສາທາຍ, ປສນ຺ນານໍ ຠິຍ຺ໂຍຠາວາຍ, ສທ຺ຘມ຺ມຏ຺ຐິຕິຍາ, ວິນຍານຸຄ຺ຄຫາຍ. ເກ ສິກ຺ຂນ຺ຕີຕິ? ເສກ຺ຂາ ຈ ປຸຖຸຊ຺ຊນກລ຺ຍາຓກາ ຈ ສິກ຺ຂນ຺ຕິ. ເກ ສິກ຺ຂິຕສິກ຺ຂາຕິ? ອຣຫນ຺ໂຕ ສິກ຺ຂິຕສິກ຺ຂາ. ກຕ຺ຖ ຐິຕນ຺ຕິ? ສິກ຺ຂາກາເມສຸ ຐິຕໍ. ເກ ຘາເຣນ຺ຕີຕິ? ເຍສໍ ວຕ຺ຕຕິ, ເຕ ຘາເຣນ຺ຕິ. ກສ຺ສ ວຈນນ຺ຕິ? ຠຄວໂຕ ວຈນໍ ອຣຫໂຕ ສມ຺ມາສມ຺ພຸທ຺ຘສ຺ສ. ເກນາຠຕນ຺ຕິ? ປຣມ຺ປຣາຠຕໍ –

ອຸປາລິ ທາສໂກ ເຈວ, ໂສຓໂກ ສິຄ຺ຄໂວ ຕຖາ;

ໂມຄ຺ຄລິປຸຕ຺ເຕນ ປຎ຺ຈມາ, ເອເຕ ຊມ຺ພຸສິຣິວ຺ຫເຍ.

ຕໂຕ ມຫິນ຺ໂທ ອິຏ຺ຏິໂຍ, ອຸຕ຺ຕິໂຍ ສມ຺ພໂລ ຕຖາ;

ຠທ຺ທນາໂມ ຈ ປຓ຺ຑິໂຕ.

ເອເຕ ນາຄາ ມຫາປຎ຺ຎາ, ຊມ຺ພຸທີປາ ອິຘາຄຕາ;

ວິນຍໍ ເຕ ວາຈຍິໍສຸ, ປິຏກໍ ຕມ຺ພປຓ຺ຓິຍາ.

ນິກາເຍ ປຎ຺ຈ ວາເຈສຸໍ, ສຕ຺ຕ ເຈວ ປກຣເຓ;

ຕໂຕ ອຣິຏ຺ໂຐ ເມຘາວີ, ຕິສ຺ສທຕ຺ໂຕ ຈ ປຓ຺ຑິໂຕ.

ວິສາຣໂທ ກາຬສຸມໂນ, ເຖໂຣ ຈ ທີຆນາມໂກ;

ທີຆສຸມໂນ ຈ ປຓ຺ຑິໂຕ.

ປຸນເທວ ກາຬສຸມໂນ, ນາຄຕ຺ເຖໂຣ ຈ ພຸທ຺ຘຣກ຺ຂິໂຕ;

ຕິສ຺ສຕ຺ເຖໂຣ ຈ ເມຘາວີ, ເທວຕ຺ເຖໂຣ ຈ ປຓ຺ຑິໂຕ.

ປຸນເທວ ສຸມໂນ ເມຘາວີ, ວິນເຍ ຈ ວິສາຣໂທ;

ພຫຸສ຺ສຸໂຕ ຈູຬນາໂຄ, ຄໂຊວ ທຸປ຺ປຘໍສິໂຍ.

ຘມ຺ມປາລິຕນາໂມ ຈ, ໂຣຫເຓ ສາຘຸປູຊິໂຕ;

ຕສ຺ສ ສິສ຺ໂສ ມຫາປຎ຺ໂຎ, ເຂມນາໂມ ຕິເປຏໂກ.

ທີເປ ຕາຣກຣາຊາວ, ປຎ຺ຎາຍ ອຕິໂຣຈຖ;

ອຸປຕິສ຺ໂສ ຈ ເມຘາວີ, ຜຸສ຺ສເທໂວ ມຫາກຖີ.

ປຸນເທວ ສຸມໂນ ເມຘາວີ, ປຸປ຺ຜນາໂມ ພຫຸສ຺ສຸໂຕ;

ມຫາກຖີ ມຫາສິໂວ, ປິຏເກ ສພ຺ພຕ຺ຖ ໂກວິໂທ.

ປຸນເທວ ອຸປາລິ ເມຘາວີ, ວິນເຍ ຈ ວິສາຣໂທ;

ມຫານາໂຄ ມຫາປຎ຺ໂຎ, ສທ຺ຘມ຺ມວໍສໂກວິໂທ.

ປຸນເທວ ອຠໂຍ ເມຘາວີ, ປິຏເກ ສພ຺ພຕ຺ຖ ໂກວິໂທ;

ຕິສ຺ສຕ຺ເຖໂຣ ຈ ເມຘາວີ, ວິນເຍ ຈ ວິສາຣໂທ.

ຕສ຺ສ ສິສ຺ໂສ ມຫາປຎ຺ໂຎ, ປຸປ຺ຜນາໂມ ພຫຸສ຺ສຸໂຕ;

ສາສນໍ ອນຸຣກ຺ຂນ຺ໂຕ, ຊມ຺ພຸທີເປ ປຕິຏ຺ຐິໂຕ.

ຈູຬາຠໂຍ ຈ ເມຘາວີ, ວິນເຍ ຈ ວິສາຣໂທ;

ຕິສ຺ສຕ຺ເຖໂຣ ຈ ເມຘາວີ, ສທ຺ຘມ຺ມວໍສໂກວິໂທ.

ຈູຬເທໂວ ຈ ເມຘາວີ, ວິນເຍ ຈ ວິສາຣໂທ;

ສິວຕ຺ເຖໂຣ ຈ ເມຘາວີ, ວິນເຍ ສພ຺ພຕ຺ຖ ໂກວິໂທ.

ເອເຕ ນາຄາ ມຫາປຎ຺ຎາ, ວິນຍຎ຺ຎູ ມຄ຺ຄໂກວິໂທ;

ວິນຍໍ ທີເປ ປກາເສສຸໍ, ປິຏກໍ ຕມ຺ພປຓ຺ຓິຍາຕິ.

໙. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ…ເປ….

໑໐. ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ມາຕຸຄາມໍ ທຸຏ຺ຐຸລ຺ລາຫິ ວາຈາຫິ ໂອຠາສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໑໑. ມາຕຸຄາມສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ຠາສນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ມາຕຸຄາມສ຺ສ ສນ຺ຕິເກ ອຕ຺ຕກາມປາຣິຈຣິຍາຍ ວຓ຺ຓໍ ອຠາສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໑໒. ສຎ຺ຈຣິຕ຺ຕໍ ສມາປຊ຺ຊນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ສຎ຺ຈຣິຕ຺ຕໍ ສມາປຊ຺ຊິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ສມຸຏ຺ຐາຕິ, ນ ວາຈໂຕ ນ ຈິຕ຺ຕໂຕ; ສິຍາ ວາຈໂຕ ສມຸຏ຺ຐາຕິ, ນ ກາຍໂຕ ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໑໓. ສຎ຺ຎາຈິກາ ກຸຏິໍ ກາຣາເປນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ອາຬວິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຬວເກ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຬວກາ ຠິກ຺ຂູ ສຎ຺ຎາຈິກາຍ ກຸຏິໂຍ ກາຣາເປສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໑໔. ມຫລ຺ລກໍ ວິຫາຣໍ ກາຣາເປນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ໂກສມ຺ພິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ຉນ຺ນໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ຉນ຺ໂນ ວິຫາຣວຕ຺ຖຸໍ ໂສເຘນ຺ໂຕ ອຎ຺ຎຕຣໍ ເຈຕິຍຣຸກ຺ຂໍ ເຉທາເປສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໑໕. ຠິກ຺ຂຸໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ຣາຊຄເຫ ປຎ຺ຎຕ຺ໂຕ. ກໍ ອາຣພ຺ຠາຕິ? ເມຕ຺ຕິຍຠູມຊເກ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ເມຕ຺ຕິຍຠູມຊກາ ຠິກ຺ຂູ ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ອມູລເກນ ປາຣາຊິເກນ ຘມ຺ເມນ ອນຸທ຺ຘໍເສສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໑໖. ຠິກ຺ຂຸໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ຣາຊຄເຫ ປຎ຺ຎຕ຺ໂຕ. ກໍ ອາຣພ຺ຠາຕິ? ເມຕ຺ຕິຍຠູມຊເກ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ເມຕ຺ຕິຍຠູມຊກາ ຠິກ຺ຂູ ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໑໗. ສງ຺ຆເຠທກສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ຣາຊຄເຫ ປຎ຺ຎຕ຺ໂຕ. ກໍ ອາຣພ຺ຠາຕິ? ເທວທຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ເທວທຕ຺ໂຕ ສມຄ຺ຄສ຺ສ ສງ຺ຆສ຺ສ ເຠທາຍ ປຣກ຺ກມິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໑໘. ເຠທານຸວຕ຺ຕການໍ ຠິກ຺ຂູນໍ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕານໍ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ຣາຊຄເຫ ປຎ຺ຎຕ຺ໂຕ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ເທວທຕ຺ຕສ຺ສ ສງ຺ຆເຠທາຍ ປຣກ຺ກມນ຺ຕສ຺ສ ອນຸວຕ຺ຕກາ ອເຫສຸໍ ວຄ຺ຄວາທກາ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໑໙. ທຸພ຺ພຈສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ໂກສມ຺ພິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ຉນ຺ນໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ຉນ຺ໂນ ຠິກ຺ຂູຫິ ສຫຘມ຺ມິກໍ ວຸຈ຺ຈມາໂນ ອຕ຺ຕານໍ ອວຈນີຍໍ ອກາສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໒໐. ກຸລທູສກສ຺ສ ຠິກ຺ຂຸໂນ ຍາວຕຕິຍໍ ສມນຸຠາສນາຍ ນ ປຏິນິສ຺ສຊ຺ຊນ຺ຕສ຺ສ ສງ຺ຆາທິເສໂສ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອສ຺ສຊິປຸນພ຺ພສຸເກ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອສ຺ສຊິປຸນພ຺ພສຸກາ ຠິກ຺ຂູ ສງ຺ເຆນ ປພ຺ພາຊນີຍກມ຺ມກຕາ ຠິກ຺ຂູ ຉນ຺ທຄາມິຕາ ໂທສຄາມິຕາ ໂມຫຄາມິຕາ ຠຍຄາມິຕາ ປາເປສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

ເຕຣສ ສງ຺ຆາທິເສສາ ນິຏ຺ຐິຕາ.

ຕສ຺ສຸທ຺ທານໍ –

ວິສ຺ສຏ຺ຐິ ກາຍສໍສຄ຺ຄໍ, ທຸຏ຺ຐຸລ຺ລໍ ອຕ຺ຕກາມຎ຺ຈ;

ສຎ຺ຈຣິຕ຺ຕໍ ກຸຏີ ເຈວ, ວິຫາໂຣ ຈ ອມູລກໍ.

ກິຎ຺ຈິເທສຎ຺ຈ ເຠໂທ ຈ, ຕສ຺ເສວ [ຕເຖວ (ກ.)] ອນຸວຕ຺ຕກາ;

ທຸພ຺ພຈໍ ກຸລທູສຎ຺ຈ, ສງ຺ຆາທິເສສາ ເຕຣສາຕິ.

໓. ອນິຍຕກຓ຺ຑໍ

໒໑. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ປຐໂມ ອນິໍຍໂຕ ກຕ຺ຖ ປຎ຺ຎຕ຺ໂຕ? ກໍ ອາຣພ຺ຠ? ກິສ຺ມິໍ ວຕ຺ຖຸສ຺ມິໍ? ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕິ, ສພ຺ພຕ຺ຖປຎ຺ຎຕ຺ຕິ ປເທສປຎ຺ຎຕ຺ຕິ, ສາຘາຣຓປຎ຺ຎຕ຺ຕິ ອສາຘາຣຓປຎ຺ຎຕ຺ຕິ, ເອກໂຕປຎ຺ຎຕ຺ຕິ ອຸຠໂຕປຎ຺ຎຕ຺ຕິ, ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນໍ, ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕິ, ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕິ, ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘ, ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ, ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ, ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕິ, ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍ, ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂໍ, ກາ ວິປຕ຺ຕິ, ກາ ສມ຺ປຕ຺ຕິ, ກາ ປຏິປຕ຺ຕິ, ກຕິ ອຕ຺ຖວເສ ປຏິຈ຺ຈ ຠຄວຕາ ປຐໂມ ອນິຍໂຕ ປຎ຺ຎຕ຺ໂຕ, ເກ ສິກ຺ຂນ຺ຕິ, ເກ ສິກ຺ຂິຕສິກ຺ຂາ, ກຕ຺ຖ ຐິຕໍ, ເກ ຘາເຣນ຺ຕິ, ກສ຺ສ ວຈນໍ ເກນາຠຕນ຺ຕິ.

໒໒. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ປຐໂມ ອນິຍໂຕ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ປຏິຈ຺ຉນ຺ເນ ອາສເນ ອລງ຺ກມ຺ມນິເຍ ນິສຊ຺ຊໍ ກປ຺ເປສິ, ຕສ຺ມິໍ ວຕ຺ຖຸສ຺ມິໍ. ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕີຕິ? ເອກາ ປຎ຺ຎຕ຺ຕິ. ອນຸປຎ຺ຎຕ຺ຕິ ອນຸປ຺ປນ຺ນປຎ຺ຎຕ຺ຕິ ຕສ຺ມິໍ ນຕ຺ຖິ. ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕີຕິ? ສພ຺ພຕ຺ຖປຎ຺ຎຕ຺ຕິ. ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕີຕິ? ອສາຘາຣຓປຎ຺ຎຕ຺ຕິ. ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕີຕິ? ເອກໂຕປຎ຺ຎຕ຺ຕິ. ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນນ຺ຕິ? ນິທາໂນຄຘໍ ນິທານປຣິຍາປນ຺ນໍ. ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕີຕິ? ຈຕຸຕ຺ເຖນ ອຸທ຺ເທເສນ ອຸທ຺ເທສໍ ອາຄຈ຺ຉຕິ. ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕີຕິ? ສິຍາ ສີລວິປຕ຺ຕິ ສິຍາ ອາຈາຣວິປຕ຺ຕິ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘຕິ? ສິຍາ ປາຣາຊິກາປຕ຺ຕິກ຺ຂນ຺ໂຘ ສິຍາ ສງ຺ຆາທິເສສາປຕ຺ຕິກ຺ຂນ຺ໂຘ ສິຍາ ປາຈິຕ຺ຕິຍາປຕ຺ຕິກ຺ຂນ຺ໂຘ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ເອເກ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ. ຈຕຸນ຺ນໍ ອຘິກຣຓານໍ ກຕມໍ ອຘິກຣຓນ຺ຕິ? ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕີຕິ? ຕີຫິ ສມເຖຫິ ສມ຺ມຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ. ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍຕິ? ປຎ຺ຎຕ຺ຕິ ວິນໂຍ, ວິຠຕ຺ຕິ ອຠິວິນໂຍ. ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂນ຺ຕິ? ປຎ຺ຎຕ຺ຕິ ປາຕິໂມກ຺ຂໍ, ວິຠຕ຺ຕິ ອຘິປາຕິໂມກ຺ຂໍ. ກາ ວິປຕ຺ຕີຕິ? ອສໍວໂຣ ວິປຕ຺ຕິ. ກາ ສມ຺ປຕ຺ຕີຕິ? ສໍວໂຣ ສມ຺ປຕ຺ຕິ. ກາ ປຏິປຕ຺ຕີຕິ? ນ ເອວຣູປໍ ກຣິສ຺ສາມີຕິ ຍາວຊີວໍ ອາປາຓໂກຏິກໍ ສມາທາຍ ສິກ຺ຂຕິ ສິກ຺ຂາປເທສຸ. [ອ. ນິ. ໑໐.໓໑] ກຕິ ອຕ຺ຖວເສ ປຏິຈ຺ຈ ຠຄວຕາ ປຐໂມ ອນິຍໂຕ ປຎ຺ຎຕ຺ໂຕຕິ? ທສ ອຕ຺ຖວເສ ປຏິຈ຺ຈ ຠຄວຕາ ປຐໂມ ອນິຍໂຕ ປຎ຺ຎຕ຺ໂຕ – ສງ຺ຆສຸຏ຺ຐຸຕາຍ, ສງ຺ຆຜາສຸຕາຍ, ທຸມ຺ມງ຺ກູນໍ ປຸຄ຺ຄລານໍ ນິຄ຺ຄຫາຍ, ເປສລານໍ ຠິກ຺ຂູນໍ ຜາສຸວິຫາຣາຍ, ທິຏ຺ຐຘມ຺ມິການໍ ອາສວານໍ ສໍວຣາຍ, ສມ຺ປຣາຍິການໍ ອາສວານໍ ປຏິຆາຕາຍ, ອປ຺ປສນ຺ນານໍ ປສາທາຍ, ປສນ຺ນານໍ ຠິຍ຺ໂຍຠາວາຍ, ສທ຺ຘມ຺ມຏ຺ຐິຕິຍາ, ວິນຍານຸຄ຺ຄຫາຍ. ເກ ສິກ຺ຂນ຺ຕີຕິ? ເສກ຺ຂາ ຈ ປຸຖຸຊ຺ຊນກລ຺ຍາຓກາ ຈ ສິກ຺ຂນ຺ຕິ. ເກ ສິກ຺ຂິຕສິກ຺ຂາຕິ? ອຣຫນ຺ໂຕ ສິກ຺ຂິຕສິກ຺ຂາ. ກຕ຺ຖ ຐິຕນ຺ຕິ? ສິກ຺ຂາກາເມສຸ ຐິຕໍ. ເກ ຘາເຣນ຺ຕີຕິ? ເຍສໍ ວຕ຺ຕຕິ ເຕ ຘາເຣນ຺ຕິ. ກສ຺ສ ວຈນນ຺ຕິ? ຠຄວໂຕ ວຈນໍ ອຣຫໂຕ ສມ຺ມາສມ຺ພຸທ຺ຘສ຺ສ. ເກນາຠຕນ຺ຕິ? ປຣມ຺ປຣາຠຕໍ –

ອຸປາລິ ທາສໂກ ເຈວ, ໂສຓໂກ ສິຄ຺ຄໂວ ຕຖາ;

ໂມຄ຺ຄລິປຸຕ຺ເຕນ ປຎ຺ຈມາ, ເອເຕ ຊມ຺ພຸສິຣິວ຺ຫເຍ.

ຕໂຕ ມຫິນ຺ໂທ ອິຏ຺ຏິໂຍ, ອຸຕ຺ຕິໂຍ ສມ຺ພໂລ ຕຖາ;

ຠທ຺ທນາໂມ ຈ ປຓ຺ຑິໂຕ.

ເອເຕ ນາຄາ ມຫາປຎ຺ຎາ, ຊມ຺ພຸທີປາ ອິຘາຄຕາ;

ວິນຍໍ ເຕ ວາຈຍິໍສຸ, ປິຏກໍ ຕມ຺ພປຓ຺ຓິຍາ.

ນິກາເຍ ປຎ຺ຈ ວາເຈສຸໍ, ສຕ຺ຕ ເຈວ ປກຣເຓ;

ຕໂຕ ອຣິຏ຺ໂຐ ເມຘາວີ, ຕິສ຺ສທຕ຺ໂຕ ຈ ປຓ຺ຑິໂຕ.

ວິສາຣໂທ ກາຬສຸມໂນ, ເຖໂຣ ຈ ທີຆນາມໂກ;

ທີຆສຸມໂນ ຈ ປຓ຺ຑິໂຕ.

ປຸນເທວ ກາຬສຸມໂນ, ນາຄຕ຺ເຖໂຣ ຈ ພຸທ຺ຘຣກ຺ຂິໂຕ;

ຕິສ຺ສຕ຺ເຖໂຣ ຈ ເມຘາວີ, ເທວຕ຺ເຖໂຣ ຈ ປຓ຺ຑິໂຕ.

ປຸນເທວ ສຸມໂນ ເມຘາວີ, ວິນເຍ ຈ ວິສາຣໂທ;

ພຫຸສ຺ສຸໂຕ ຈູຬນາໂຄ, ຄໂຊວ ທຸປ຺ປຘໍສິໂຍ.

ຘມ຺ມປາລິຕນາໂມ ຈ, ໂຣຫເຓ ສາຘຸປູຊິໂຕ;

ຕສ຺ສ ສິສ຺ໂສ ມຫາປຎ຺ໂຎ, ເຂມນາໂມ ຕິເປຏໂກ.

ທີເປ ຕາຣກຣາຊາວ ປຎ຺ຎາຍ ອຕິໂຣຈຖ;

ອຸປຕິສ຺ໂສ ຈ ເມຘາວີ, ຜຸສ຺ສເທໂວ ມຫາກຖີ.

ປຸນເທວ ສຸມໂນ ເມຘາວີ, ປຸປ຺ຜນາໂມ ພຫຸສ຺ສຸໂຕ;

ມຫາກຖີ ມຫາສິໂວ, ປິຏເກ ສພ຺ພຕ຺ຖ ໂກວິໂທ.

ປຸນເທວ ອຸປາລິ ເມຘາວີ, ວິນເຍ ຈ ວິສາຣໂທ;

ມຫານາໂຄ ມຫາປຎ຺ໂຎ, ສທ຺ຘມ຺ມວໍສໂກວິໂທ.

ປຸນເທວ ອຠໂຍ ເມຘາວີ, ປິຏເກ ສພ຺ພຕ຺ຖ ໂກວິໂທ;

ຕິສ຺ສຕ຺ເຖໂຣ ຈ ເມຘາວີ, ວິນເຍ ຈ ວິສາຣໂທ.

ຕສ຺ສ ສິສ຺ໂສ ມຫາປຎ຺ໂຎ, ປຸປ຺ຜນາໂມ ພຫຸສ຺ສຸໂຕ;

ສາສນໍ ອນຸຣກ຺ຂນ຺ໂຕ, ຊມ຺ພຸທີເປ ປຕິຏ຺ຐິໂຕ.

ຈູຬາຠໂຍ ຈ ເມຘາວີ, ວິນເຍ ຈ ວິສາຣໂທ;

ຕິສ຺ສຕ຺ເຖໂຣ ຈ ເມຘາວີ, ສທ຺ຘມ຺ມວໍສໂກວິໂທ.

ຈູຬເທໂວ ຈ ເມຘາວີ, ວິນເຍ ຈ ວິສາຣໂທ;

ສິວຕ຺ເຖໂຣ ຈ ເມຘາວີ, ວິນເຍ ສພ຺ພຕ຺ຖ ໂກວິໂທ.

ເອເຕ ນາຄາ ມຫາປຎ຺ຎາ, ວິນຍຎ຺ຎູ ມຄ຺ຄໂກວິທາ;

ວິນຍໍ ທີເປ ປກາເສສຸໍ, ປິຏກໍ ຕມ຺ພປຓ຺ຓິຍາຕິ.

໒໓. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ທຸຕິໂຍ ອນິຍໂຕ ກຕ຺ຖ ປຎ຺ຎຕ຺ໂຕຕິ? ສາວຕ຺ຖິຍໍ ປຎ຺ຎຕ຺ໂຕ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ມາຕຸຄາເມນ ສທ຺ຘິໍ ເອໂກ ເອກາຍ ຣໂຫ ນິສຊ຺ຊໍ ກປ຺ເປສິ, ຕສ຺ມິໍ ວຕ຺ຖຸສ຺ມິໍ. ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ ອນຸປ຺ປນ຺ນປຎ຺ຎຕ຺ຕີຕິ? ເອກາ ປຎ຺ຎຕ຺ຕິ. ອນຸປຎ຺ຎຕ຺ຕິ ອນຸປ຺ປນ຺ນປຎ຺ຎຕ຺ຕິ ຕສ຺ມິໍ ນຕ຺ຖິ. ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕີຕິ? ສພ຺ພຕ຺ຖປຎ຺ຎຕ຺ຕິ. ສາຘາຣຓປຎ຺ຎຕ຺ຕິ ອສາຘາຣຓປຎ຺ຎຕ຺ຕີຕິ? ອສາຘາຣຓປຎ຺ຎຕ຺ຕິ. ເອກໂຕປຎ຺ຎຕ຺ຕິ ອຸຠໂຕປຎ຺ຎຕ຺ຕີຕິ? ເອກໂຕປຎ຺ຎຕ຺ຕິ. ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນນ຺ຕິ? ນິທາໂນຄຘໍ ນິທານປຣິຍາປນ຺ນໍ. ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕີຕິ? ຈຕຸຕ຺ເຖນ ອຸທ຺ເທເສນ ອຸທ຺ເທສໍ ອາຄຈ຺ຉຕິ. ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕີຕິ? ສິຍາ ສີລວິປຕ຺ຕິ, ສິຍາ ອາຈາຣວິປຕ຺ຕິ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘຕິ? ສິຍາ ສງ຺ຆາທິເສສາປຕ຺ຕິກ຺ຂນ຺ໂຘ, ສິຍາ ປາຈິຕ຺ຕິຍາປຕ຺ຕິກ຺ຂນ຺ໂຘ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ. ຈຕຸນ຺ນໍ ອຘິກຣຓານໍ ກຕມໍ ອຘິກຣຓນ຺ຕິ? ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕີຕິ? ຕີຫິ ສມເຖຫິ ສມ຺ມຕິ – ສິຍາ ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ, ສິຍາ ສມ຺ມຸຂາວິນເຍນ ຈ ຕິຓວຕ຺ຖາຣເກນ ຈ…ເປ….

ທ຺ເວ ອນິຍຕາ ນິຏ຺ຐິຕາ.

ຕສ຺ສຸທ຺ທານໍ –

ອລງ຺ກມ຺ມນິຍຎ຺ເຈວ, ຕເຖວ ຈ ນ ເຫວ ໂຂ;

ອນິຍຕາ ສຸປຎ຺ຎຕ຺ຕາ, ພຸທ຺ຘເສຏ຺ເຐນ ຕາທິນາຕິ.

໔. ນິສ຺ສຄ຺ຄິຍກຓ຺ຑໍ

໑. ກຖິນວຄ຺ໂຄ

໒໔. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ອຕິເຣກຈີວຣໍ ທສາຫໍ ອຕິກ຺ກາເມນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ເວສາລິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຉພ຺ພຄ຺ຄິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຉພ຺ພຄ຺ຄິຍາ ຠິກ຺ຂູ ອຕິເຣກຈີວຣໍ ຘາເຣສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໒໕. ເອກຣຕ຺ຕໍ ຕິຈີວເຣນ ວິປ຺ປວສນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ຠິກ຺ຂູນໍ ຫຕ຺ເຖ ຈີວຣໍ ນິກ຺ຂິປິຕ຺ວາ ສນ຺ຕຣຸຕ຺ຕເຣນ ຊນປທຈາຣິກໍ ປກ຺ກມິໍສຸ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໒໖. ອກາລຈີວຣໍ ປຏິຄ຺ຄເຫຕ຺ວາ ມາສໍ ອຕິກ຺ກາເມນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ອກາລຈີວຣໍ ປຏິຄ຺ຄເຫຕ຺ວາ ມາສໍ ອຕິກ຺ກາເມສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໒໗. ອຎ຺ຎາຕິກາຍ ຠິກ຺ຂຸນິຍາ ປຸຣາຓຈີວຣໍ ໂຘວາເປນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ອຎ຺ຎາຕິກາຍ ຠິກ຺ຂຸນິຍາ ປຸຣາຓຈີວຣໍ ໂຘວາເປສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໒໘. ອຎ຺ຎາຕິກາຍ ຠິກ຺ຂຸນິຍາ ຫຕ຺ຖໂຕ ຈີວຣໍ ປຏິຄ຺ຄຓ຺ຫນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ຣາຊຄເຫ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸທາຍິໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸທາຍີ ອຎ຺ຎາຕິກາຍ ຠິກ຺ຂຸນິຍາ ຫຕ຺ຖໂຕ ຈີວຣໍ ປຏິຄ຺ຄເຫສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໒໙. ອຎ຺ຎາຕກໍ ຄຫປຕິໍ ວາ ຄຫປຕານິໍ ວາ ຈີວຣໍ ວິຎ຺ຎາເປນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ອຎ຺ຎາຕກໍ ເສຏ຺ຐິປຸຕ຺ຕໍ ຈີວຣໍ ວິຎ຺ຎາເປສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໓໐. ອຎ຺ຎາຕກໍ ຄຫປຕິໍ ວາ ຄຫປຕານິໍ ວາ ຕຕຸຕ຺ຕຣິ ຈີວຣໍ ວິຎ຺ຎາເປນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຉພ຺ພຄ຺ຄິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຉພ຺ພຄ຺ຄິຍາ ຠິກ຺ຂູ ນ ມຕ຺ຕໍ ຊານິຕ຺ວາ ພຫຸໍ ຈີວຣໍ ວິຎ຺ຎາເປສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໓໑. ປຸພ຺ເພ ອປ຺ປວາຣິຕສ຺ສ ອຎ຺ຎາຕກໍ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ປຸພ຺ເພ ອປ຺ປວາຣິໂຕ ອຎ຺ຎາຕກໍ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໓໒. ປຸພ຺ເພ ອປ຺ປວາຣິຕສ຺ສ ອຎ຺ຎາຕເກ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ປຸພ຺ເພ ອປ຺ປວາຣິໂຕ ອຎ຺ຎາຕເກ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໓໓. ອຕິເຣກຕິກ຺ຂຕ຺ຕຸໍ ໂຈທນາຍ ອຕິເຣກຉກ຺ຂຕ຺ຕຸໍ ຐາເນນ ຈີວຣໍ ອຠິນິປ຺ຜາເທນ຺ຕສ຺ສ ນິສ຺ສຄ຺ຄິຍໍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ອຸປາສເກນ – ‘‘ອຊ຺ຊຓ຺ໂຫ, ຠນ຺ເຕ, ອາຄເມຫີ’’ຕິ ວຸຈ຺ຈມາໂນ ນາຄເມສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

ກຖິນວຄ຺ໂຄ ປຐໂມ.

໒. ໂກສິຍວຄ຺ໂຄ