໖. ສຸຣາປານວຄ຺ໂຄ

໑໐໔. ສຸຣາເມຣຍປາເນ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ໂກສມ຺ພິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ສາຄຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ສາຄໂຕ ມຊ຺ຊໍ ປິວິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ສມຸຏ຺ຐາຕິ, ນ ວາຈໂຕ ນ ຈິຕ຺ຕໂຕ; ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ…ເປ….

໑໐໕. ອງ຺ຄຸລິປໂຕທເກ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຉພ຺ພຄ຺ຄິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຉພ຺ພຄ຺ຄິຍາ ຠິກ຺ຂູ ຠິກ຺ຂຸໍ ອງ຺ຄຸລິປໂຕທເກນ ຫາເສສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ…ເປ….

໑໐໖. ອຸທເກ ຫສຘມ຺ເມ [ຫສ຺ສຘມ຺ເມ (ສີ. ສ຺ຍາ.)] ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສຕ຺ຕຣສວຄ຺ຄິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສຕ຺ຕຣສວຄ຺ຄິຍາ ຠິກ຺ຂູ ອຈິຣວຕິຍາ ນທິຍາ ອຸທເກ ກີຬິໍສຸ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ…ເປ….

໑໐໗. ອນາທຣິເຍ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ໂກສມ຺ພິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ຉນ຺ນໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ຉນ຺ໂນ ອນາທຣິຍໍ ອກາສິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໑໐໘. ຠິກ຺ຂຸໍ ຠິໍສາເປນ຺ຕສ຺ສ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຉພ຺ພຄ຺ຄິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຉພ຺ພຄ຺ຄິຍາ ຠິກ຺ຂູ ຠິກ຺ຂຸໍ ຠິໍສາເປສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໑໐໙. ໂຊຕິໍ ສມາທຫິຕ຺ວາ ວິສິພ຺ເພນ຺ຕສ຺ສ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ຠຄ຺ເຄສຸ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ໂຊຕິໍ ສມາທຫິຕ຺ວາ ວິສິພ຺ເພສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ທ຺ເວ ອນຸປຎ຺ຎຕ຺ຕິໂຍ. ຉນ຺ນໍ ອາປຕ຺ຕິສມຸຏ຺ຐານານໍ ຉຫິ ສມຸຏ຺ຐາເນຫິ ສມຸຏ຺ຐາຕິ…ເປ….

໑໑໐. ໂອເຣນທ຺ຘມາສໍ ນຫາຍນ຺ຕສ຺ສ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ຣາຊຄເຫ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ຣາຊານມ຺ປິ ປສ຺ສິຕ຺ວາ ນ ມຕ຺ຕໍ ຊານິຕ຺ວາ ນຫາຍິໍສຸ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ຉ ອນຸປຎ຺ຎຕ຺ຕິໂຍ. ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕີຕິ? ປເທສປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ ເອຬກໂລມເກ…ເປ….

໑໑໑. ອນາທິຍິຕ຺ວາ ຕິຓ຺ຓໍ ທຸພ຺ພຓ຺ຓກຣຓານໍ ອຎ຺ຎຕຣໍ ທຸພ຺ພຓ຺ຓກຣຓໍ ນວໍ ຈີວຣໍ ປຣິຠຸຎ຺ຊນ຺ຕສ຺ສ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ອຕ຺ຕໂນ ຈີວຣໍ ນ ສຎ຺ຊານິໍສຸ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ ເອຬກໂລມເກ…ເປ….

໑໑໒. ຠິກ຺ຂຸສ຺ສ ວາ ຠິກ຺ຂຸນິຍາ ວາ ສິກ຺ຂມານາຍ ວາ ສາມເຓຣສ຺ສ ວາ ສາມເຓຣິຍາ ວາ ສາມໍ ຈີວຣໍ ວິກປ຺ເປຕ຺ວາ ອປ຺ປຈ຺ຈຸທ຺ຘາຣຓໍ ປຣິຠຸຎ຺ຊນ຺ຕສ຺ສ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ຠິກ຺ຂຸສ຺ສ ສາມໍ ຈີວຣໍ ວິກປ຺ເປຕ຺ວາ ອປ຺ປຈ຺ຈຸທ຺ຘາຣຓໍ ປຣິຠຸຎ຺ຊິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ທ຺ວີຫິ ສມຸຏ຺ຐາເນຫິ ສມຸຏ຺ຐາຕິ ກຖິນເກ…ເປ….

໑໑໓. ຠິກ຺ຂຸສ຺ສ ປຕ຺ຕໍ ວາ ຈີວຣໍ ວາ ນິສີທນໍ ວາ ສູຈິຆຣໍ ວາ ກາຍພນ຺ຘນໍ ວາ ອປນິເຘນ຺ຕສ຺ສ ປາຈິຕ຺ຕິຍໍ ກຕ຺ຖ ປຎ຺ຎຕ຺ຕນ຺ຕິ? ສາວຕ຺ຖິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ຉພ຺ພຄ຺ຄິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຉພ຺ພຄ຺ຄິຍາ ຠິກ຺ຂູ ຠິກ຺ຂູນໍ ປຕ຺ຕມ຺ປິ ຈີວຣມ຺ປິ ອປນິເຘສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ຕີຫິ ສມຸຏ຺ຐາເນຫິ ສມຸຏ຺ຐາຕິ…ເປ….

ສຸຣາເມຣຍວຄ຺ໂຄ ຉຏ຺ໂຐ.