໑. ປາຣາຊິກກຓ຺ຑໍ

໑. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ປຐມໍ ປາຣາຊິກໍ ກຕ຺ຖ ປຎ຺ຎຕ຺ຕໍ, ກໍ ອາຣພ຺ຠ, ກິສ຺ມິໍ ວຕ຺ຖຸສ຺ມິໍ? ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕິ? ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕິ? ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕິ? ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕິ? ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນໍ? ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕິ? ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕິ? ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘ? ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕິ? ຈຕຸນ຺ນໍ ອຘິກຣຓານໍ ກຕມໍ ອຘິກຣຓໍ? ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕິ? ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍ? ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂໍ? ກາ ວິປຕ຺ຕິ? ກາ ສມ຺ປຕ຺ຕິ? ກາ ປຏິປຕ຺ຕິ? ກຕິ ອຕ຺ຖວເສ ປຏິຈ຺ຈ ຠຄວຕາ ປຐມໍ ປາຣາຊິກໍ ປຎ຺ຎຕ຺ຕໍ? ເກ ສິກ຺ຂນ຺ຕິ? ເກ ສິກ຺ຂິຕສິກ຺ຂາ? ກຕ຺ຖ ຐິຕໍ? ເກ ຘາເຣນ຺ຕິ? ກສ຺ສ ວຈນໍ? ເກນາຠຕນ຺ຕິ?

໒. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ປຐມໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ເວສາລິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສຸທິນ຺ນໍ ກລນ຺ທປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສຸທິນ຺ໂນ ກລນ຺ທປຸຕ຺ໂຕ ປຸຣາຓທຸຕິຍິກາຍ ເມຖຸນໍ ຘມ຺ມໍ ປຏິເສວິ, ຕສ຺ມິໍ ວຕ຺ຖຸສ຺ມິໍ. ອຕ຺ຖິ ຕຕ຺ຖ ປຎ຺ຎຕ຺ຕິ, ອນຸປຎ຺ຎຕ຺ຕິ, ອນຸປ຺ປນ຺ນປຎ຺ຎຕ຺ຕີຕິ? ເອກາ ປຎ຺ຎຕ຺ຕິ, ທ຺ເວ ອນຸປຎ຺ຎຕ຺ຕິໂຍ. ອນຸປ຺ປນ຺ນປຎ຺ຎຕ຺ຕິ ຕສ຺ມິໍ ນຕ຺ຖິ. ສພ຺ພຕ຺ຖປຎ຺ຎຕ຺ຕິ, ປເທສປຎ຺ຎຕ຺ຕີຕິ? ສພ຺ພຕ຺ຖປຎ຺ຎຕ຺ຕິ. ສາຘາຣຓປຎ຺ຎຕ຺ຕິ, ອສາຘາຣຓປຎ຺ຎຕ຺ຕີຕິ? ສາຘາຣຓປຎ຺ຎຕ຺ຕິ. ເອກໂຕປຎ຺ຎຕ຺ຕິ, ອຸຠໂຕປຎ຺ຎຕ຺ຕີຕິ? ອຸຠໂຕປຎ຺ຎຕ຺ຕິ. ປຎ຺ຈນ຺ນໍ ປາຕິໂມກ຺ຂຸທ຺ເທສານໍ ກຕ຺ໂຖຄຘໍ ກຕ຺ຖ ປຣິຍາປນ຺ນນ຺ຕິ? ນິທາໂນຄຘໍ, ນິທານປຣິຍາປນ຺ນໍ. ກຕເມນ ອຸທ຺ເທເສນ ອຸທ຺ເທສໍ ອາຄຈ຺ຉຕີຕິ? ທຸຕິເຍນ ອຸທ຺ເທເສນ ອຸທ຺ເທສໍ ອາຄຈ຺ຉຕິ. ຈຕຸນ຺ນໍ ວິປຕ຺ຕີນໍ ກຕມາ ວິປຕ຺ຕີຕິ? ສີລວິປຕ຺ຕິ. ສຕ຺ຕນ຺ນໍ ອາປຕ຺ຕິກ຺ຂນ຺ຘານໍ ກຕໂມ ອາປຕ຺ຕິກ຺ຂນ຺ໂຘຕິ? ປາຣາຊິກາປຕ຺ຕິກ຺ຂນ຺ໂຘ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ເອເກນ ສມຸຏ຺ຐາເນນ ສມຸຏ຺ຐາຕິ – ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ. ຈຕຸນ຺ນໍ ອຘິກຣຓານໍ ກຕມໍ ອຘິກຣຓນ຺ຕິ? ອາປຕ຺ຕາຘິກຣຓໍ. ສຕ຺ຕນ຺ນໍ ສມຖານໍ ກຕິຫິ ສມເຖຫິ ສມ຺ມຕີຕິ? ທ຺ວີຫິ ສມເຖຫິ ສມ຺ມຕິ – ສມ຺ມຸຂາວິນເຍນ ຈ ປຏິຎ຺ຎາຕກຣເຓນ ຈ. ໂກ ຕຕ຺ຖ ວິນໂຍ, ໂກ ຕຕ຺ຖ ອຠິວິນໂຍຕິ? ປຎ຺ຎຕ຺ຕິ ວິນໂຍ, ວິຠຕ຺ຕິ ອຠິວິນໂຍ. ກິໍ ຕຕ຺ຖ ປາຕິໂມກ຺ຂໍ, ກິໍ ຕຕ຺ຖ ອຘິປາຕິໂມກ຺ຂນ຺ຕິ? ປຎ຺ຎຕ຺ຕິ ປາຕິໂມກ຺ຂໍ, ວິຠຕ຺ຕິ ອຘິປາຕິໂມກ຺ຂໍ. ກາ ວິປຕ຺ຕີຕິ? ອສໍວໂຣ ວິປຕ຺ຕິ. ກາ ສມ຺ປຕ຺ຕີຕິ? ສໍວໂຣ ສມ຺ປຕ຺ຕິ. ກາ ປຏິປຕ຺ຕີຕິ? ນ ເອວຣູປໍ ກຣິສ຺ສາມີຕິ ຍາວຊີວໍ ອາປາຓໂກຏິກໍ ສມາທາຍ ສິກ຺ຂຕິ ສິກ຺ຂາປເທສຸ. [ອ. ນິ. ໑໐.໓໑] ກຕິ ອຕ຺ຖວເສ ປຏິຈ຺ຈ ຠຄວຕາ ປຐມໍ ປາຣາຊິກໍ ປຎ຺ຎຕ຺ຕນ຺ຕິ? ທສ ອຕ຺ຖວເສ ປຏິຈ຺ຈ ຠຄວຕາ ປຐມໍ ປາຣາຊິກໍ ປຎ຺ຎຕ຺ຕໍ – ສງ຺ຆສຸຏ຺ຐຸຕາຍ, ສງ຺ຆຜາສຸຕາຍ, ທຸມ຺ມງ຺ກູນໍ ປຸຄ຺ຄລານໍ ນິຄ຺ຄຫາຍ, ເປສລານໍ ຠິກ຺ຂູນໍ ຜາສຸວິຫາຣາຍ, ທິຏ຺ຐຘມ຺ມິການໍ ອາສວານໍ ສໍວຣາຍ, ສມ຺ປຣາຍິການໍ ອາສວານໍ ປຏິຆາຕາຍ, ອປ຺ປສນ຺ນານໍ ປສາທາຍ, ປສນ຺ນານໍ ຠິຍ຺ໂຍຠາວາຍ, ສທ຺ຘມ຺ມຏ຺ຐິຕິຍາ, ວິນຍານຸຄ຺ຄຫາຍ. ເກ ສິກ຺ຂນ຺ຕີຕິ? ເສກ຺ຂາ ຈ ປຸຖຸຊ຺ຊນກລ຺ຍາຓກາ ຈ ສິກ຺ຂນ຺ຕິ. ເກ ສິກ຺ຂິຕສິກ຺ຂາຕິ? ອຣຫນ຺ໂຕ ສິກ຺ຂິຕສິກ຺ຂາ. ກຕ຺ຖ ຐິຕນ຺ຕິ? ສິກ຺ຂາກາເມສຸ ຐິຕໍ. ເກ ຘາເຣນ຺ຕີຕິ? ເຍສໍ ວຕ຺ຕຕິ ເຕ ຘາເຣນ຺ຕິ. ກສ຺ສ ວຈນນ຺ຕິ? ຠຄວໂຕ ວຈນໍ ອຣຫໂຕ ສມ຺ມາສມ຺ພຸທ຺ຘສ຺ສ. ເກນາຠຕນ຺ຕິ? ປຣມ຺ປຣາຠຕໍ –

໓. ອຸປາລິ ທາສໂກ ເຈວ, ໂສຓໂກ ສິຄ຺ຄໂວ ຕຖາ;

ໂມຄ຺ຄລິປຸຕ຺ເຕນ [ໂມຄ຺ຄລີປຸຕ຺ເຕນ (ສ຺ຍາ.)] ປຎ຺ຈມາ, ເອເຕ ຊມ຺ພຸສິຣິວ຺ຫເຍ [ຊມ຺ພຸສຣິວ຺ຫເຍ (ສາຣຕ຺ຖ)].

ຕໂຕ ມຫິນ຺ໂທ ອິຏ຺ຏິໂຍ [ອິຏ຺ຐິໂຍ (ສີ.)], ອຸຕ຺ຕິໂຍ ສມ຺ພໂລ [ອຸຏ຺ຏິໂຍ ສມ຺ປໂລ (ອິຕິປິ)] ຕຖາ;

ຠທ຺ທນາໂມ ຈ ປຓ຺ຑິໂຕ.

ເອເຕ ນາຄາ ມຫາປຎ຺ຎາ, ຊມ຺ພຸທີປາ ອິຘາຄຕາ;

ວິນຍໍ ເຕ ວາຈຍິໍສຸ, ປິຏກໍ ຕມ຺ພປຓ຺ຓິຍາ.

ນິກາເຍ ປຎ຺ຈ ວາເຈສຸໍ, ສຕ຺ຕ ເຈວ ປກຣເຓ;

ຕໂຕ ອຣິຏ຺ໂຐ ເມຘາວີ, ຕິສ຺ສທຕ຺ໂຕ ຈ ປຓ຺ຑິໂຕ.

ວິສາຣໂທ ກາຬສຸມໂນ, ເຖໂຣ ຈ ທີຆນາມໂກ;

ທີຆສຸມໂນ ຈ ປຓ຺ຑິໂຕ.

ປຸນເທວ [ປຸນເຣວ (ສ຺ຍາ.)] ກາຬສຸມໂນ, ນາຄຕ຺ເຖໂຣ ຈ ພຸທ຺ຘຣກ຺ຂິໂຕ;

ຕິສ຺ສຕ຺ເຖໂຣ ຈ ເມຘາວີ, ເທວຕ຺ເຖໂຣ [ເຣວຕ຺ເຖໂຣ (ອິຕິປິ)] ຈ ປຓ຺ຑິໂຕ.

ປຸນເທວ ສຸມໂນ ເມຘາວີ, ວິນເຍ ຈ ວິສາຣໂທ;

ພຫຸສ຺ສຸໂຕ ຈູຬນາໂຄ, ຄໂຊວ ທຸປ຺ປຘໍສິໂຍ.

ຘມ຺ມປາລິຕນາໂມ ຈ, ໂຣຫເຓ [ໂຣຫໂຓ (ສີ.)] ສາຘຸປູຊິໂຕ;

ຕສ຺ສ ສິສ຺ໂສ ມຫາປຎ຺ໂຎ ເຂມນາໂມ ຕິເປຏໂກ.

ທີເປ ຕາຣກຣາຊາວ ປຎ຺ຎາຍ ອຕິໂຣຈຖ;

ອຸປຕິສ຺ໂສ ຈ ເມຘາວີ, ຜຸສ຺ສເທໂວ ມຫາກຖີ.

ປຸນເທວ ສຸມໂນ ເມຘາວີ, ປຸປ຺ຜນາໂມ ພຫຸສ຺ສຸໂຕ;

ມຫາກຖີ ມຫາສິໂວ, ປິຏເກ ສພ຺ພຕ຺ຖ ໂກວິໂທ.

ປຸນເທວ ອຸປາລິ ເມຘາວີ, ວິນເຍ ຈ ວິສາຣໂທ;

ມຫານາໂຄ ມຫາປຎ຺ໂຎ, ສທ຺ຘມ຺ມວໍສໂກວິໂທ.

ປຸນເທວ ອຠໂຍ ເມຘາວີ, ປິຏເກ ສພ຺ພຕ຺ຖ ໂກວິໂທ;

ຕິສ຺ສຕ຺ເຖໂຣ ຈ ເມຘາວີ, ວິນເຍ ຈ ວິສາຣໂທ.

ຕສ຺ສ ສິສ຺ໂສ ມຫາປຎ຺ໂຎ, ປຸປ຺ຜນາໂມ ພຫຸສ຺ສຸໂຕ;

ສາສນໍ ອນຸຣກ຺ຂນ຺ໂຕ, ຊມ຺ພຸທີເປ ປຕິຏ຺ຐິໂຕ.

ຈູຬາຠໂຍ ຈ ເມຘາວີ, ວິນເຍ ຈ ວິສາຣໂທ;

ຕິສ຺ສຕ຺ເຖໂຣ ຈ ເມຘາວີ, ສທ຺ຘມ຺ມວໍສໂກວິໂທ.

ຈູຬເທໂວ [ຜຸສ຺ສເທໂວ (ສີ.)] ຈ ເມຘາວີ, ວິນເຍ ຈ ວິສາຣໂທ;

ສິວຕ຺ເຖໂຣ ຈ ເມຘາວີ, ວິນເຍ ສພ຺ພຕ຺ຖ ໂກວິໂທ.

ເອເຕ ນາຄາ ມຫາປຎ຺ຎາ, ວິນຍຎ຺ຎູ ມຄ຺ຄໂກວິທາ;

ວິນຍໍ ທີເປ ປກາເສສຸໍ, ປິຏກໍ ຕມ຺ພປຓ຺ຓິຍາຕິ.

໔. ຍໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ທຸຕິຍໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ຣາຊຄເຫ ປຎ຺ຎຕ຺ຕໍ. ກໍ ອາຣພ຺ຠາຕິ? ຘນິຍໍ ກຸມ຺ຠກາຣປຸຕ຺ຕໍ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ຘນິໂຍ ກຸມ຺ຠກາຣປຸຕ຺ໂຕ ຣຎ຺ໂຎ ທາຣູນິ ອທິນ຺ນໍ ອາທິຍິ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໕. ຕຕິຍໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ເວສາລິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ສມ຺ພຫຸເລ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ສມ຺ພຫຸລາ ຠິກ຺ຂູ ອຎ຺ຎມຎ຺ຎໍ ຊີວິຕາ ໂວໂຣເປສຸໍ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

໖. ຈຕຸຕ຺ຖໍ ປາຣາຊິກໍ ກຕ຺ຖ ປຎ຺ຎຕ຺ຕນ຺ຕິ? ເວສາລິຍໍ ປຎ຺ຎຕ຺ຕໍ. ກໍ ອາຣພ຺ຠາຕິ? ວຄ຺ຄຸມຸທາຕີຣິເຍ ຠິກ຺ຂູ ອາຣພ຺ຠ. ກິສ຺ມິໍ ວຕ຺ຖຸສ຺ມິນ຺ຕິ? ວຄ຺ຄຸມຸທາຕີຣິຍາ ຠິກ຺ຂູ ຄິຫີນໍ ອຎ຺ຎມຎ຺ຎສ຺ສ ອຸຕ຺ຕຣິມນຸສ຺ສຘມ຺ມສ຺ສ ວຓ຺ຓໍ ຠາສິໍສຸ, ຕສ຺ມິໍ ວຕ຺ຖຸສ຺ມິໍ. ເອກາ ປຎ຺ຎຕ຺ຕິ, ເອກາ ອນຸປຎ຺ຎຕ຺ຕິ. ຉນ຺ນໍ ອາປຕ຺ຕິສມຸຏ຺ຐານານໍ ກຕິຫິ ສມຸຏ຺ຐາເນຫິ ສມຸຏ຺ຐາຕີຕິ? ຕີຫິ ສມຸຏ຺ຐາເນຫິ ສມຸຏ຺ຐາຕິ – ສິຍາ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ; ສິຍາ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ; ສິຍາ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ…ເປ….

ຈຕ຺ຕາໂຣ ປາຣາຊິກາ ນິຏ຺ຐິຕາ.

ຕສ຺ສຸທ຺ທານໍ –

ເມຖຸນາທິນ຺ນາທານຎ຺ຈ, ມນຸສ຺ສວິຄ຺ຄຫຸຕ຺ຕຣິ;

ປາຣາຊິການິ ຈຕ຺ຕາຣິ, ເຉຊ຺ຊວຕ຺ຖູ ອສໍສຍາຕິ.