໙. ທຸຕິຍທຸຏ຺ຐໂທສສິກ຺ຂາປທໍ

໓໙໑. ເຕນ ສມເຍນ ພຸທ຺ໂຘ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ເຕນ ໂຂ ປນ ສມເຍນ ເມຕ຺ຕິຍຠູມຊກາ ຠິກ຺ຂູ ຄິຊ຺ຌກູຏາ ປພ຺ພຕາ ໂອໂຣຫນ຺ຕາ ອທ຺ທສໍສຸ ຉຄລກໍ [ຉກລກໍ (ສ຺ຍາ.)] ອຊິກາຍ ວິປ຺ປຏິປຊ຺ຊນ຺ຕໍ. ທິສ຺ວານ ເອວມາຫໍສຸ – ‘‘ຫນ຺ທ ມຍໍ, ອາວຸໂສ, ອິມໍ ຉຄລກໍ ທພ຺ພໍ ມລ຺ລປຸຕ຺ຕໍ ນາມ ກໂຣມ. ອິມໍ ອຊິກໍ ເມຕ຺ຕິຍໍ ນາມ ຠິກ຺ຂຸນິໍ ກໂຣມ. ເອວໍ ມຍໍ ໂວຫຣິສ຺ສາມ. ປຸພ຺ເພ ມຍໍ, ອາວຸໂສ, ທພ຺ພໍ ມລ຺ລປຸຕ຺ຕໍ ສຸເຕນ ອໂວຈຸມ຺ຫາ. ອິທານິ ປນ ອມ຺ເຫຫິ ສາມໍ ທິຏ຺ໂຐ ເມຕ຺ຕິຍາຍ ຠິກ຺ຂຸນິຍາ ວິປ຺ປຏິປຊ຺ຊນ຺ໂຕ’’ຕິ. ເຕ ຕໍ ຉຄລກໍ ທພ຺ພໍ ມລ຺ລປຸຕ຺ຕໍ ນາມ ອກໍສຸ. ຕໍ ອຊິກໍ ເມຕ຺ຕິຍໍ ນາມ ຠິກ຺ຂຸນິໍ ອກໍສຸ. ເຕ ຠິກ຺ຂູນໍ ອາໂຣເຈສຸໍ – ‘‘ປຸພ຺ເພ ມຍໍ, ອາວຸໂສ, ທພ຺ພໍ ມລ຺ລປຸຕ຺ຕໍ ສຸເຕນ ອໂວຈຸມ຺ຫາ. ອິທານິ ປນ ອມ຺ເຫຫິ ສາມໍ ທິຏ຺ໂຐ ເມຕ຺ຕິຍາຍ ຠິກ຺ຂຸນິຍາ ວິປ຺ປຏິປຊ຺ຊນ຺ໂຕ’’ຕິ. ຠິກ຺ຂູ ເອວມາຫໍສຸ – ‘‘ມາວຸໂສ, ເອວໍ ອວຈຸຕ຺ຖ. ນາຍສ຺ມາ ທພ຺ໂພ ມລ຺ລປຸຕ຺ໂຕ ເອວໍ ກຣິສ຺ສຕີ’’ຕິ.

ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ປຏິປຸຈ຺ຉິ – ‘‘ສຣສິ ຕ຺ວໍ, ທພ຺ພ, ເອວຣູປໍ ກຕ຺ຕາ ຍຖຍິເມ ຠິກ຺ຂູ ອາຫໍສູ’’ຕິ? ‘‘ຍຖາ ມໍ, ຠນ຺ເຕ, ຠຄວາ ຊານາຕີ’’ຕິ. ທຸຕິຍມ຺ປິ ໂຂ ຠຄວາ…ເປ… ຕຕິຍມ຺ປິ ໂຂ ຠຄວາ ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ເອຕທໂວຈ – ‘‘ສຣສິ ຕ຺ວໍ, ທພ຺ພ, ເອວຣູປໍ ກຕ຺ຕາ ຍຖຍິເມ ຠິກ຺ຂູ ອາຫໍສູ’’ຕິ? ‘‘ຍຖາ ມໍ, ຠນ຺ເຕ, ຠຄວາ ຊານາຕີ’’ຕິ. ‘‘ນ ໂຂ, ທພ຺ພ, ທພ຺ພາ ເອວໍ ນິພ຺ເພເຐນ຺ຕິ. ສເຈ ຕຍາ ກຕໍ ກຕນ຺ຕິ ວເທຫິ, ສເຈ ຕຍາ ອກຕໍ ອກຕນ຺ຕິ ວເທຫີ’’ຕິ. ‘‘ຍໂຕ ອຫໍ, ຠນ຺ເຕ, ຊາໂຕ ນາຠິຊານາມິ ສຸປິນນ຺ເຕນປິ ເມຖຸນຘມ຺ມໍ ປຏິເສວິຕາ, ປເຄວ ຊາຄໂຣ’’ຕິ! ອຖ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ເຕນ ຫິ, ຠິກ຺ຂຸເວ, ອິເມ ຠິກ຺ຂູ ອນຸຍຸຎ຺ຊຖາ’’ຕິ. ອິທໍ ວຕ຺ວາ ຠຄວາ ອຸຏ຺ຐາຍາສນາ ວິຫາຣໍ ປາວິສິ.

ອຖ ໂຂ ເຕ ຠິກ຺ຂູ ເມຕ຺ຕິຍຠູມຊເກ ຠິກ຺ຂູ ອນຸຍຸຎ຺ຊິໍສຸ. ເຕ ຠິກ຺ຂູຫິ ອນຸຍຸຎ຺ຊີຍມານາ ຠິກ຺ຂູນໍ ເອຕມຕ຺ຖໍ ອາໂຣເຈສຸໍ – ‘‘ກິໍ ປນ ຕຸມ຺ເຫ, ອາວຸໂສ, ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສຖາ’’ຕິ? ‘‘ເອວມາວຸໂສ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ເມຕ຺ຕິຍຠູມຊກາ ຠິກ຺ຂູ ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສສ຺ສນ຺ຕີ’’ຕິ! ອຖ ໂຂ ເຕ ຠິກ຺ຂູ ເມຕ຺ຕິຍຠູມຊເກ ຠິກ຺ຂູ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ທພ຺ພໍ ມລ຺ລປຸຕ຺ຕໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສຖາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ‘‘ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ທພ຺ພໍ ມລ຺ລປຸຕ຺ຕໍ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິ ເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໙໒. ‘‘ໂຍ ປນ ຠິກ຺ຂຸ ຠິກ຺ຂຸໍ ທຸຏ຺ໂຐ ໂທໂສ ອປ຺ປຕີໂຕ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສຍ຺ຍ – ‘ອປ຺ເປວ ນາມ ນໍ ອິມມ຺ຫາ ພ຺ຣຫ຺ມຈຣິຍາ ຈາເວຍ຺ຍ’ນ຺ຕິ. ຕໂຕ ອປເຣນ ສມເຍນ ສມນຸຄ຺ຄາຫີຍມາໂນ ວາ ອສມນຸຄ຺ຄາຫີຍມາໂນ ວາ ອຎ຺ຎຠາຄິຍຎ຺ເຈວ ຕໍ ອຘິກຣຓໍ ໂຫຕິ ໂກຈິເທໂສ ເລສມຕ຺ໂຕ ອຸປາທິນ຺ໂນ, ຠິກ຺ຂຸ ຈ ໂທສໍ ປຕິຏ຺ຐາຕິ, ສງ຺ຆາທິເສໂສ’’ຕິ.

໓໙໓. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂຸນ຺ຕິ ອຎ຺ຎໍ ຠິກ຺ຂຸໍ.

ທຸຏ຺ໂຐ ໂທໂສຕິ ກຸປິໂຕ ອນຕ຺ຕມໂນ ອນຠິຣທ຺ໂຘ ອາຫຕຈິຕ຺ໂຕ ຂິລຊາໂຕ.

ອປ຺ປຕີໂຕຕິ ເຕນ ຈ ໂກເປນ, ເຕນ ຈ ໂທເສນ, ຕາຍ ຈ ອນຕ຺ຕມນຕາຍ, ຕາຍ ຈ ອນຠິຣທ຺ຘິຍາ ອປ຺ປຕີໂຕ ໂຫຕິ.

ອຎ຺ຎຠາຄິຍສ຺ສ ອຘິກຣຓສ຺ສາຕິ ອາປຕ຺ຕຎ຺ຎຠາຄິຍໍ ວາ ໂຫຕິ ອຘິກຣຓຎ຺ຎຠາຄິຍໍ ວາ. ກຖໍ ອຘິກຣຓໍ ອຘິກຣຓສ຺ສ ອຎ຺ຎຠາຄິຍໍ? ວິວາທາຘິກຣຓໍ ອນຸວາທາຘິກຣຓສ຺ສ ອາປຕ຺ຕາຘິກຣຓສ຺ສ ກິຈ຺ຈາຘິກຣຓສ຺ສ ອຎ຺ຎຠາຄິຍໍ. ອນຸວາທາຘິກຣຓໍ ອາປຕ຺ຕາຘິກຣຓສ຺ສ ກິຈ຺ຈາຘິກຣຓສ຺ສ ວິວາທາຘິກຣຓສ຺ສ ອຎ຺ຎຠາຄິຍໍ. ອາປຕ຺ຕາຘິກຣຓໍ ກິຈ຺ຈາຘິກຣຓສ຺ສ ວິວາທາຘິກຣຓສ຺ສ ອນຸວາທາຘິກຣຓສ຺ສ ອຎ຺ຎຠາຄິຍໍ. ກິຈ຺ຈາຘິກຣຓໍ ວິວາທາຘິກຣຓສ຺ສ ອນຸວາທາຘິກຣຓສ຺ສ ອາປຕ຺ຕາຘິກຣຓສ຺ສ ອຎ຺ຎຠາຄິຍໍ. ເອວໍ ອຘິກຣຓໍ ອຘິກຣຓສ຺ສ ອຎ຺ຎຠາຄິຍໍ.

ກຖໍ ອຘິກຣຓໍ ອຘິກຣຓສ຺ສ ຕພ຺ຠາຄິຍໍ? ວິວາທາຘິກຣຓໍ ວິວາທາຘິກຣຓສ຺ສ ຕພ຺ຠາຄິຍໍ. ອນຸວາທາຘິກຣຓໍ ອນຸວາທາຘິກຣຓສ຺ສ ຕພ຺ຠາຄິຍໍ. ອາປຕ຺ຕາຘິກຣຓໍ ອາປຕ຺ຕາຘິກຣຓສ຺ສ ສິຍາ ຕພ຺ຠາຄິຍໍ ສິຍາ ອຎ຺ຎຠາຄິຍໍ.

ກຖໍ ອາປຕ຺ຕາຘິກຣຓໍ ອາປຕ຺ຕາຘິກຣຓສ຺ສ ອຎ຺ຎຠາຄິຍໍ? ເມຖຸນຘມ຺ມປາຣາຊິກາປຕ຺ຕິ ອທິນ຺ນາທານປາຣາຊິກາປຕ຺ຕິຍາ ມນຸສ຺ສວິຄ຺ຄຫປາຣາຊິກາປຕ຺ຕິຍາ ອຸຕ຺ຕຣິມນຸສ຺ສຘມ຺ມປາຣາຊິກາປຕ຺ຕິຍາ ອຎ຺ຎຠາຄິຍາ. ອທິນ຺ນາທານປາຣາຊິກາປຕ຺ຕິ ມນຸສ຺ສວິຄ຺ຄຫປາຣາຊິກາປຕ຺ຕິຍາ ອຸຕ຺ຕຣິມນຸສ຺ສຘມ຺ມປາຣາຊິກາປຕ຺ຕິຍາ ເມຖຸນຘມ຺ມປາຣາຊິກາປຕ຺ຕິຍາ ອຎ຺ຎຠາຄິຍາ. ມນຸສ຺ສວິຄ຺ຄຫປາຣາຊິກາປຕ຺ຕິ ອຸຕ຺ຕຣິມນຸສ຺ສຘມ຺ມປາຣາຊິກາປຕ຺ຕິຍາ ເມຖຸນຘມ຺ມປາຣາຊິກາປຕ຺ຕິຍາ ອທິນ຺ນາທານປາຣາຊິກາປຕ຺ຕິຍາ ອຎ຺ຎຠາຄິຍາ. ອຸຕ຺ຕຣິມນຸສ຺ສຘມ຺ມປາຣາຊິກາປຕ຺ຕິ ເມຖຸນຘມ຺ມປາຣາຊິກາປຕ຺ຕິຍາ ອທິນ຺ນາທານປາຣາຊິກາປຕ຺ຕິຍາ ມນຸສ຺ສວິຄ຺ຄຫປາຣາຊິກາປຕ຺ຕິຍາ ອຎ຺ຎຠາຄິຍາ. ເອວໍ ອາປຕ຺ຕາຘິກຣຓໍ ອາປຕ຺ຕາຘິກຣຓສ຺ສ ອຎ຺ຎຠາຄິຍໍ.

ກຖໍ ອາປຕ຺ຕາຘິກຣຓໍ ອາປຕ຺ຕາຘິກຣຓສ຺ສ ຕພ຺ຠາຄິຍໍ? ເມຖຸນຘມ຺ມປາຣາຊິກາປຕ຺ຕິ ເມຖຸນຘມ຺ມປາຣາຊິກາປຕ຺ຕິຍາ ຕພ຺ຠາຄິຍາ. ອທິນ຺ນາທານປາຣາຊິກາປຕ຺ຕິ ອທິນ຺ນາທານປາຣາຊິກາປຕ຺ຕິຍາ ຕພ຺ຠາຄິຍາ. ມນຸສ຺ສວິຄ຺ຄຫປາຣາຊິກາປຕ຺ຕິ ມນຸສ຺ສວິຄ຺ຄຫປາຣາຊິກາປຕ຺ຕິຍາ ຕພ຺ຠາຄິຍາ. ອຸຕ຺ຕຣິມນຸສ຺ສຘມ຺ມປາຣາຊິກາປຕ຺ຕິ ອຸຕ຺ຕຣິມນຸສ຺ສຘມ຺ມປາຣາຊິກາປຕ຺ຕິຍາ ຕພ຺ຠາຄິຍາ. ເອວໍ ອາປຕ຺ຕາຘິກຣຓໍ ອາປຕ຺ຕາຘິກຣຓສ຺ສ ຕພ຺ຠາຄິຍໍ.

ກິຈ຺ຈາຘິກຣຓໍ ກິຈ຺ຈາຘິກຣຓສ຺ສ ຕພ຺ຠາຄິຍໍ. ເອວໍ ອຘິກຣຓໍ ອຘິກຣຓສ຺ສ ຕພ຺ຠາຄິຍໍ.

໓໙໔. ກິຎ຺ຈິ ເທສໍ ເລສມຕ຺ຕໍ ອຸປາທາຍາຕິ ເລໂສ ນາມ ທສ ເລສາ – ຊາຕິເລໂສ, ນາມເລໂສ, ໂຄຕ຺ຕເລໂສ, ລິງ຺ຄເລໂສ, ອາປຕ຺ຕິເລໂສ, ປຕ຺ຕເລໂສ, ຈີວຣເລໂສ, ອຸປຊ຺ຌາຍເລໂສ, ອາຈຣິຍເລໂສ, ເສນາສນເລໂສ.

໓໙໕. ຊາຕິເລໂສ ນາມ ຂຕ຺ຕິໂຍ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ຂຕ຺ຕິຍໍ ປສ຺ສິຕ຺ວາ ໂຈເທຕິ – ‘‘ຂຕ຺ຕິໂຍ ມຍາ ທິຏ຺ໂຐ [ເອຕ຺ຖ ‘‘ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ’’ຕິ ປາໂຐ ອູໂນ ມຎ຺ເຎ, ອຏ຺ຐກຖາຍໍ ຫິ ‘‘ຂຕ຺ຕິໂຍ ມຍາ ທິຏ຺ໂຐ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ’’ຕິ ທິສ຺ສຕິ]. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ, ນຕ຺ຖິ ຕຍາ ສທ຺ຘິໍ ອຸໂປສໂຖ ວາ ປວາຣຓາ ວາ ສງ຺ຆກມ຺ມໍ ວາ’’ຕິ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ພ຺ຣາຫ຺ມໂຓ ທິຏ຺ໂຐ ໂຫຕິ…ເປ… ເວສ຺ໂສ ທິຏ຺ໂຐ ໂຫຕິ…ເປ… ສຸທ຺ໂທ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ສຸທ຺ທໍ ປສ຺ສິຕ຺ວາ ໂຈເທຕິ – ‘‘ສຸທ຺ໂທ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໓໙໖. ນາມເລໂສ ນາມ ພຸທ຺ຘຣກ຺ຂິໂຕ ທິຏ຺ໂຐ ໂຫຕິ…ເປ… ຘມ຺ມຣກ຺ຂິໂຕ ທິຏ຺ໂຐ ໂຫຕິ…ເປ… ສງ຺ຆຣກ຺ຂິໂຕ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ສງ຺ຆຣກ຺ຂິຕໍ ປສ຺ສິຕ຺ວາ ໂຈເທຕິ – ‘‘ສງ຺ຆຣກ຺ຂິໂຕ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໓໙໗. ໂຄຕ຺ຕເລໂສ ນາມ ໂຄຕໂມ ທິຏ຺ໂຐ ໂຫຕິ…ເປ… ໂມຄ຺ຄລ຺ລາໂນ ທິຏ຺ໂຐ ໂຫຕິ…ເປ… ກຈ຺ຈາຍໂນ ທິຏ຺ໂຐ ໂຫຕິ…ເປ… ວາສິຏ຺ໂຐ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ວາສິຏ຺ຐໍ ປສ຺ສິຕ຺ວາ ໂຈເທຕິ – ‘‘ວາສິຏ຺ໂຐ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໓໙໘. ລິງ຺ຄເລໂສ ນາມ ທີໂຆ ທິຏ຺ໂຐ ໂຫຕິ…ເປ… ຣສ຺ໂສ ທິຏ຺ໂຐ ໂຫຕິ…ເປ… ກຓ຺ໂຫ ທິຏ຺ໂຐ ໂຫຕິ…ເປ… ໂອທາໂຕ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ໂອທາຕໍ ປສ຺ສິຕ຺ວາ ໂຈເທຕິ – ‘‘ໂອທາໂຕ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໓໙໙. ອາປຕ຺ຕິເລໂສ ນາມ ລຫຸກໍ ອາປຕ຺ຕິໍ ອາປຊ຺ຊນ຺ໂຕ ທິຏ຺ໂຐ ໂຫຕິ. ຕຎ຺ເຈ ປາຣາຊິເກນ ໂຈເທຕິ – ‘‘ອສ຺ສມໂຓສິ, ອສກ຺ຍປຸຕ຺ຕິໂຍສິ…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໔໐໐. ປຕ຺ຕເລໂສ ນາມ ໂລຫປຕ຺ຕຘໂຣ ທິຏ຺ໂຐ ໂຫຕິ…ເປ… ສາຏກປຕ຺ຕຘໂຣ ທິຏ຺ໂຐ ໂຫຕິ…ເປ… ສຸມ຺ຠກປຕ຺ຕຘໂຣ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ສຸມ຺ຠກປຕ຺ຕຘຣໍ ປສ຺ສິຕ຺ວາ ໂຈເທຕິ – ‘‘ສຸມ຺ຠກປຕ຺ຕຘໂຣ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໔໐໑. ຈີວຣເລໂສ ນາມ ປໍສຸກູລິໂກ ທິຏ຺ໂຐ ໂຫຕິ…ເປ… ຄຫປຕິຈີວຣຘໂຣ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ຄຫປຕິຈີວຣຘຣໍ ປສ຺ສິຕ຺ວາ ໂຈເທຕິ – ‘‘ຄຫປຕິຈີວຣຘໂຣ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໔໐໒. ອຸປຊ຺ຌາຍເລໂສ ນາມ ອິຕ຺ຖນ຺ນາມສ຺ສ ສທ຺ຘິວິຫາຣິໂກ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ອິຕ຺ຖນ຺ນາມສ຺ສ ສທ຺ຘິວິຫາຣິກໍ ປສ຺ສິຕ຺ວາ ໂຈເທຕິ – ‘‘ອິຕ຺ຖນ຺ນາມສ຺ສ ສທ຺ຘິວິຫາຣິໂກ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໔໐໓. ອາຈຣິຍເລໂສ ນາມ ອິຕ຺ຖນ຺ນາມສ຺ສ ອນ຺ເຕວາສິໂກ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ອິຕ຺ຖນ຺ນາມສ຺ສ ອນ຺ເຕວາສິກໍ ປສ຺ສິຕ຺ວາ ໂຈເທຕິ – ‘‘ອິຕ຺ຖນ຺ນາມສ຺ສ ອນ຺ເຕວາສິໂກ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ’’…ເປ… ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໔໐໔. ເສນາສນເລໂສ ນາມ ອິຕ຺ຖນ຺ນາມເສນາສນວາສິໂກ ທິຏ຺ໂຐ ໂຫຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ. ອຎ຺ຎໍ ອິຕ຺ຖນ຺ນາມເສນາສນວາສິກໍ ປສ຺ສິຕ຺ວາ ໂຈເທຕິ – ‘‘ອິຕ຺ຖນ຺ນາມເສນາສນວາສິໂກ ມຍາ ທິຏ຺ໂຐ. ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ, ອສກ຺ຍປຸຕ຺ຕິໂຍສິ, ນຕ຺ຖິ ຕຍາ ສທ຺ຘິໍ ອຸໂປສໂຖ ວາ ປວາຣຓາ ວາ ສງ຺ຆກມ຺ມໍ ວາ’’ຕິ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໔໐໕. ປາຣາຊິເກນ ຘມ຺ເມນາຕິ ຈຕຸນ຺ນໍ ອຎ຺ຎຕເຣນ.

ອນຸທ຺ຘໍເສຍ຺ຍາຕິ ໂຈເທຕິ ວາ ໂຈທາເປຕິ ວາ.

ອປ຺ເປວ ນາມ ນໍ ອິມມ຺ຫາ ພ຺ຣຫ຺ມຈຣິຍາຈາເວຍ຺ຍນ຺ຕິ ຠິກ຺ຂຸຠາວາ ຈາເວຍ຺ຍໍ, ສມຓຘມ຺ມາ ຈາເວຍ຺ຍໍ, ສີລກ຺ຂນ຺ຘາ ຈາເວຍ຺ຍໍ, ຕໂປຄຸຓາ ຈາເວຍ຺ຍໍ.

ຕໂຕ ອປເຣນ ສມເຍນາຕິ ຍສ຺ມິໍ ຂເຓ ອນຸທ຺ຘໍສິໂຕ ໂຫຕິ, ຕໍ ຂຓໍ ຕໍ ລຍໍ ຕໍ ມຸຫຸຕ຺ຕໍ ວີຕິວຕ຺ເຕ.

ສມນຸຄ຺ຄາຫີຍມາໂນຕິ ເຍນ ວຕ຺ຖຸນາ ອນຸທ຺ຘໍສິໂຕ ໂຫຕິ ຕສ຺ມິໍ ວຕ຺ຖຸສ຺ມິໍ ສມນຸຄ຺ຄາຫີຍມາໂນ.

ອສມນຸຄ຺ຄາຫີຍມາໂນຕິ ນ ເກນຈິ ວຸຈ຺ຈມາໂນ.

ອຘິກຣຓໍ ນາມ ຈຕ຺ຕາຣິ ອຘິກຣຓານິ – ວິວາທາຘິກຣຓໍ, ອນຸວາທາຘິກຣຓໍ, ອາປຕ຺ຕາຘິກຣຓໍ, ກິຈ຺ຈາຘິກຣຓໍ.

ໂກຈິ ເທໂສ ເລສມຕ຺ໂຕ ອຸປາທິນ຺ໂນຕິ ເຕສໍ ທສນ຺ນໍ ເລສານໍ ອຎ຺ຎຕໂຣ ເລໂສ ອຸປາທິນ຺ໂນ ໂຫຕິ.

ຠິກ຺ຂຸ ຈ ໂທສໍ ປຕິຏ຺ຐາຕີຕິ ຕຸຈ຺ຉກໍ ມຍາ ຠຓິຕໍ, ມຸສາ ມຍາ ຠຓິຕໍ, ອຠູຕໍ ມຍາ ຠຓິຕໍ, ອຊານນ຺ເຕນ ມຍາ ຠຓິຕໍ.

ສງ຺ຆາທິເສໂສຕິ …ເປ… ເຕນປິ ວຸຈ຺ຈຕິ ສງ຺ຆາທິເສໂສຕິ.

໔໐໖. ຠິກ຺ຂຸ ສງ຺ຆາທິເສສໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ, ສງ຺ຆາທິເສເສ ສງ຺ຆາທິເສສທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈເທຕິ – ‘‘ອສ຺ສມໂຓສິ, ອສກ຺ຍປຸຕ຺ຕິໂຍສິ, ນຕ຺ຖິ ຕຍາ ສທ຺ຘິໍ ອຸໂປສໂຖ ວາ ປວາຣຓາ ວາ ສງ຺ຆກມ຺ມໍ ວາ’’ຕິ, ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ຠິກ຺ຂຸ ສງ຺ຆາທິເສສໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ, ສງ຺ຆາທິເສເສ ຖຸລ຺ລຈ຺ຈຍທິຏ຺ຐິ ໂຫຕິ…ເປ… ປາຈິຕ຺ຕິຍທິຏ຺ຐິ ໂຫຕິ… ປາຏິເທສນີຍທິຏ຺ຐິ ໂຫຕິ… ທຸກ຺ກຏທິຏ຺ຐິ ໂຫຕິ… ທຸພ຺ຠາສິຕທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈເທຕິ – ‘‘ອສ຺ສມໂຓສິ’’…ເປ… ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ຠິກ຺ຂຸ ຖຸລ຺ລຈ຺ຈຍໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ ຖຸລ຺ລຈ຺ຈເຍ ຖຸລ຺ລຈ຺ຈຍທິຏ຺ຐິ ໂຫຕິ…ເປ… ຖຸລ຺ລຈ຺ຈເຍ ປາຈິຕ຺ຕິຍທິຏ຺ຐິ ໂຫຕິ… ປາຏິເທສນີຍທິຏ຺ຐິ ໂຫຕິ… ທຸກ຺ກຏທິຏ຺ຐິ ໂຫຕິ… ທຸພ຺ຠາສິຕທິຏ຺ຐິ ໂຫຕິ… ສງ຺ຆາທິເສສທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈເທຕິ – ‘‘ອສ຺ສມໂຓສິ’’ …ເປ… ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ຠິກ຺ຂຸ ປາຈິຕ຺ຕິຍໍ…ເປ… ປາຏິເທສນີຍໍ… ທຸກ຺ກຏໍ… ທຸພ຺ຠາສິຕໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ, ທຸພ຺ຠາສິເຕ ທຸພ຺ຠາສິຕທິຏ຺ຐິ ໂຫຕິ…ເປ… ທຸພ຺ຠາສິເຕ ສງ຺ຆາທິເສສທິຏ຺ຐິ ໂຫຕິ… ຖຸລ຺ລຈ຺ຈຍທິຏ຺ຐິ ໂຫຕິ… ປາຈິຕ຺ຕິຍທິຏ຺ຐິ ໂຫຕິ… ປາຏິເທສນີຍທິຏ຺ຐິ ໂຫຕິ… ທຸກ຺ກຏທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈເທຕິ – ‘‘ອສ຺ສມໂຓສິ, ອສກ຺ຍປຸຕ຺ຕິໂຍສິ, ນຕ຺ຖິ ຕຍາ ສທ຺ຘິໍ ອຸໂປສໂຖ ວາ ປວາຣຓາ ວາ ສງ຺ຆກມ຺ມໍ ວາ’’ຕິ, ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ເອເກກໍ ມູລໍ ກາຕຸນ ຈກ຺ກໍ ພນ຺ຘິຕພ຺ພໍ.

໔໐໗. ຠິກ຺ຂຸ ສງ຺ຆາທິເສສໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ ສງ຺ຆາທິເສເສ ສງ຺ຆາທິເສສທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈທາເປຕິ – ‘‘ອສ຺ສມໂຓສິ’’…ເປ… ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ຠິກ຺ຂຸ ສງ຺ຆາທິເສສໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ, ສງ຺ຆາທິເສເສ ຖຸລ຺ລຈ຺ຈຍທິຏ຺ຐິ ໂຫຕິ…ເປ… ປາຈິຕ຺ຕິຍທິຏ຺ຐິ ໂຫຕິ… ປາຏິເທສນີຍທິຏ຺ຐິ ໂຫຕິ… ທຸກ຺ກຏທິຏ຺ຐິ ໂຫຕິ… ທຸພ຺ຠາສິຕທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈທາເປຕິ – ‘‘ອສ຺ສມໂຓສິ’’…ເປ… ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ຠິກ຺ຂຸ ຖຸລ຺ລຈ຺ຈຍໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ ຖຸລ຺ລຈ຺ຈເຍ ຖຸລ຺ລຈ຺ຈຍທິຏ຺ຐິ ໂຫຕິ…ເປ… ຖຸລ຺ລຈ຺ຈເຍ ປາຈິຕ຺ຕິຍທິຏ຺ຐິ ໂຫຕິ… ປາຏິເທສນີຍທິຏ຺ຐິ ໂຫຕິ… ທຸກ຺ກຏທິຏ຺ຐິ ໂຫຕິ… ທຸພ຺ຠາສິຕທິຏ຺ຐິ ໂຫຕິ… ສງ຺ຆາທິເສສທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈທາເປຕິ – ‘‘ອສ຺ສມໂຓສິ’’…ເປ… ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

ຠິກ຺ຂຸ ປາຈິຕ຺ຕິຍໍ…ເປ… ປາຏິເທສນີຍໍ… ທຸກ຺ກຏໍ… ທຸພ຺ຠາສິຕໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕິ ທຸພ຺ຠາສິເຕ ທຸພ຺ຠາສິຕທິຏ຺ຐິ ໂຫຕິ…ເປ… ທຸພ຺ຠາສິເຕ ສງ຺ຆາທິເສສທິຏ຺ຐິ ໂຫຕິ… ຖຸລ຺ລຈ຺ຈຍທິຏ຺ຐິ ໂຫຕິ… ປາຈິຕ຺ຕິຍທິຏ຺ຐິ ໂຫຕິ… ປາຏິເທສນີຍທິຏ຺ຐິ ໂຫຕິ… ທຸກ຺ກຏທິຏ຺ຐິ ໂຫຕິ. ຕຎ຺ເຈ ປາຣາຊິເກນ ໂຈທາເປຕິ – ‘‘ອສ຺ສມໂຓສິ, ອສກ຺ຍປຸຕ຺ຕິໂຍສິ, ນຕ຺ຖິ ຕຍາ ສທ຺ຘິໍ ອຸໂປສໂຖ ວາ ປວາຣຓາ ວາ ສງ຺ຆກມ຺ມໍ ວາ’’ຕິ, ເອວມ຺ປິ ອາປຕ຺ຕຎ຺ຎຠາຄິຍໍ ໂຫຕິ ເລໂສ ຈ ອຸປາທິນ຺ໂນ, ອາປຕ຺ຕິ ວາຈາຍ, ວາຈາຍ ສງ຺ຆາທິເສສສ຺ສ.

໔໐໘. ອນາປຕ຺ຕິ ຕຖາສຎ຺ຎີ ໂຈເທຕິ ວາ ໂຈທາເປຕິ ວາ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ທຸຕິຍທຸຏ຺ຐໂທສສິກ຺ຂາປທໍ ນິຏ຺ຐິຕໍ ນວມໍ.