໒. ກາຍສໍສຄ຺ຄສິກ຺ຂາປທໍ

໒໖໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸທາຍີ ອຣຎ຺ເຎ ວິຫຣຕິ. ຕສ຺ສາຍສ຺ມໂຕ ວິຫາໂຣ ອຠິຣູໂປ ໂຫຕິ ທສ຺ສນີໂຍ ປາສາທິໂກ, ມຊ຺ເຌຄພ຺ໂຠ, ສມນ຺ຕາປຣິຍາຄາໂຣ, ສຸປຎ຺ຎຕ຺ຕໍ ມຎ຺ຈປີຐໍ ຠິສິພິມ຺ໂພຫນໍ, ປານີຍໍ ປຣິໂຠຊນີຍໍ ສຸປຏ຺ຐິຕໍ, ປຣິເວຓໍ ສຸສມ຺ມຏ຺ຐໍ. ພຫູ ມນຸສ຺ສາ ອາຍສ຺ມໂຕ ອຸທາຍິສ຺ສ ວິຫາຣເປກ຺ຂກາ ອາຄຈ຺ຉນ຺ຕິ. ອຎ຺ຎຕໂຣປິ ພ຺ຣາຫ຺ມໂຓ ສປຊາປຕິໂກ ເຍນາຍສ຺ມາ ອຸທາຍີ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອຸທາຍິໍ ເອຕທໂວຈ – ‘‘ອິຈ຺ຉາມ ມຍໍ ໂຠໂຕ ອຸທາຍິສ຺ສ ວິຫາຣໍ ເປກ຺ຂິຕຸ’’ນ຺ຕິ. ‘‘ເຕນ ຫິ, ພ຺ຣາຫ຺ມຓ, ເປກ຺ຂສ຺ສູ’’ຕິ, ອວາປຸຣຓໍ [ອປາປຸຣຓໍ (ສ຺ຍາ.)] ອາທາຍ ຆຏິກໍ ອຸຄ຺ຆາເຏຕ຺ວາ ກວາຏໍ ປຓາເມຕ຺ວາ ວິຫາຣໍ ປາວິສິ. ໂສປິ ໂຂ ພ຺ຣາຫ຺ມໂຓ ອາຍສ຺ມໂຕ ອຸທາຍິສ຺ສ ປິຏ຺ຐິໂຕ ປາວິສິ. ສາປິ ໂຂ ພ຺ຣາຫ຺ມຓີ ຕສ຺ສ ພ຺ຣາຫ຺ມຓສ຺ສ ປິຏ຺ຐິໂຕ ປາວິສິ. ອຖ ໂຂ ອາຍສ຺ມາ ອຸທາຍີ ເອກຈ຺ເຈ ວາຕປາເນ ວິວຣນ຺ໂຕ ເອກຈ຺ເຈ ວາຕປາເນ ຖເກນ຺ໂຕ ຄພ຺ຠໍ ອນຸປຣິຄນ຺ຕ຺ວາ ປິຏ຺ຐິໂຕ ອາຄນ຺ຕ຺ວາ ຕສ຺ສາ ພ຺ຣາຫ຺ມຓິຍາ ອງ຺ຄມງ຺ຄານິ ປຣາມສິ. ອຖ ໂຂ ໂສ ພ຺ຣາຫ຺ມໂຓ ອາຍສ຺ມຕາ ອຸທາຍິນາ ສທ຺ຘິໍ ປຏິສມ຺ໂມທິຕ຺ວາ ອຄມາສິ. ອຖ ໂຂ ໂສ ພ຺ຣາຫ຺ມໂຓ ອຕ຺ຕມໂນ ອຕ຺ຕມນວາຈໍ ນິຈ຺ຉາເຣສິ – ‘‘ອຸຬາຣາ ອິເມ ສມຓາ ສກ຺ຍປຸຕ຺ຕິຍາ ເຍ ອິເມ ເອວຣູເປ ອຣຎ຺ເຎ ວິຫຣນ຺ຕິ. ຠວມ຺ປິ ອຸທາຍີ ອຸຬາໂຣ ໂຍ ເອວຣູເປ ອຣຎ຺ເຎ ວິຫຣຕີ’’ຕິ.

ເອວໍ ວຸຕ຺ເຕ ສາ ພ຺ຣາຫ຺ມຓີ ຕໍ ພ຺ຣາຫ຺ມຓໍ ເອຕທໂວຈ – ‘‘ກຸໂຕ ຕສ຺ສ ອຸຬາຣຕ຺ຕຕາ! ຍເຖວ ເມ ຕ຺ວໍ ອງ຺ຄມງ຺ຄານິ ປຣາມສິ ເອວເມວ ເມ ສມໂຓ ອຸທາຍີ ອງ຺ຄມງ຺ຄານິ ປຣາມສີ’’ຕິ. ອຖ ໂຂ ໂສ ພ຺ຣາຫ຺ມໂຓ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ອລຊ຺ຊິໂນ ອິເມ ສມຓາ ສກ຺ຍປຸຕ຺ຕິຍາ ທຸສ຺ສີລາ ມຸສາວາທິໂນ. ອິເມ ຫິ ນາມ ຘມ຺ມຈາຣິໂນ ສມຈາຣິໂນ ພ຺ຣຫ຺ມຈາຣິໂນ ສຈ຺ຈວາທິໂນ ສີລວນ຺ໂຕ ກລ຺ຍາຓຘມ຺ມາ ປຏິຊານິສ຺ສນ຺ຕິ! ນຕ຺ຖິ ອິເມສໍ ສາມຎ຺ຎໍ ນຕ຺ຖິ ອິເມສໍ ພ຺ຣຫ຺ມຎ຺ຎໍ, ນຏ຺ຐໍ ອິເມສໍ ສາມຎ຺ຎໍ ນຏ຺ຐໍ ອິເມສໍ ພ຺ຣຫ຺ມຎ຺ຎໍ, ກຸໂຕ ອິເມສໍ ສາມຎ຺ຎໍ ກຸໂຕ ອິເມສໍ ພ຺ຣຫ຺ມຎ຺ຎໍ, ອປຄຕາ ອິເມ ສາມຎ຺ຎາ ອປຄຕາ ອິເມ ພ຺ຣຫ຺ມຎ຺ຎາ. ກຖຎ຺ຫິ ນາມ ສມໂຓ ອຸທາຍີ ມມ ຠຣິຍາຍ ອງ຺ຄມງ຺ຄານິ ປຣາມສິສ຺ສຕິ! ນ ຫິ ສກ຺ກາ ກຸລິຕ຺ຖີຫິ ກຸລຘີຕາຫິ ກຸລກຸມາຣີຫິ ກຸລສຸຓ຺ຫາຫິ ກຸລທາສີຫິ ອາຣາມໍ ວາ ວິຫາຣໍ ວາ ຄນ຺ຕຸໍ. ສເຈ [ສເຈ ຫິ (ສ຺ຍາ.)] ກຸລິຕ຺ຖິໂຍ ກຸລຘີຕໂຣ [ກຸລຘີຕາໂຍ (ສີ. ສ຺ຍາ.)] ກຸລກຸມາຣິໂຍ ກຸລສຸຓ຺ຫາໂຍ ກຸລທາສິໂຍ ອາຣາມໍ ວາ ວິຫາຣໍ ວາ ຄຈ຺ເຉຍ຺ຍຸໍ, ຕາປິ ສມຓາ ສກ຺ຍປຸຕ຺ຕິຍາ ທູເສຍ຺ຍຸ’’ນ຺ຕິ!

ອສ຺ໂສສຸໍ ໂຂ ຠິກ຺ຂຸ ຕສ຺ສ ພ຺ຣາຫ຺ມຓສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸທາຍີ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊິສ຺ສຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ອຸທາຍິໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ອາຍສ຺ມນ຺ຕໍ ອຸທາຍິໍ ປຏິປຸຈ຺ຉິ – ‘‘ສຈ຺ຈໍ ກິຣ ຕ຺ວໍ, ອຸທາຍິ, ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊສີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ – ‘‘ອນນຸຈ຺ຉວິກໍ, ໂມຆປຸຣິສ, ອນນຸໂລມິກໍ ອປ຺ປຕິຣູປໍ ອສ຺ສາມຓກໍ ອກປ຺ປິຍໍ ອກຣຓີຍໍ. ກຖຎ຺ຫິ ນາມ ຕ຺ວໍ, ໂມຆປຸຣິສ, ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ຊິສ຺ສສິ! ນນຸ ມຍາ, ໂມຆປຸຣິສ, ອເນກປຣິຍາເຍນ ວິຣາຄາຍ ຘມ຺ໂມ ເທສິໂຕ ໂນ ສຣາຄາຍ…ເປ… ກາມປຣິຬາຫານໍ ວູປສໂມ ອກ຺ຂາໂຕ. ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໗໐. ‘‘ໂຍ ປນ ຠິກ຺ຂຸ ໂອຕິຓ຺ໂຓ ວິປຣິຓເຕນ ຈິຕ຺ເຕນ ມາຕຸຄາເມນ ສທ຺ຘິໍ ກາຍສໍສຄ຺ຄໍ ສມາປຊ຺ເຊຍ຺ຍ ຫຕ຺ຖຄ຺ຄາຫໍ ວາ ເວຓິຄ຺ຄາຫໍ ວາ ອຎ຺ຎຕຣສ຺ສ ວາ ອຎ຺ຎຕຣສ຺ສ ວາ ອງ຺ຄສ຺ສ ປຣາມສນໍ, ສງ຺ຆາທິເສໂສ’’ຕິ.

໒໗໑. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ໂອຕິຓ຺ໂຓ ນາມ ສາຣຕ຺ໂຕ ອເປກ຺ຂວາ ປຏິພທ຺ຘຈິຕ຺ໂຕ.

ວິປຣິຓຕນ຺ຕິ ຣຕ຺ຕມ຺ປິ ຈິຕ຺ຕໍ ວິປຣິຓຕໍ. ທຸຏ຺ຐມ຺ປິ ຈິຕ຺ຕໍ ວິປຣິຓຕໍ. ມູຬ຺ຫມ຺ປິ ຈິຕ຺ຕໍ ວິປຣິຓຕໍ. ອປິຈ, ຣຕ຺ຕໍ ຈິຕ຺ຕໍ ອິມສ຺ມິໍ ອຕ຺ເຖ ອຘິປ຺ເປຕໍ ວິປຣິຓຕນ຺ຕິ.

ມາຕຸຄາໂມ ນາມ ມນຸສ຺ສິຕ຺ຖີ, ນ ຍກ຺ຂີ ນ ເປຕີ, ນ ຕິຣຈ຺ຉານຄຕາ. ອນ຺ຕມໂສ ຕທຫຸຊາຕາປິ ທາຣິກາ, ປເຄວ ມຫຕ຺ຕຣີ.

ສທ຺ຘິນ຺ຕິ ເອກໂຕ.

ກາຍສໍສຄ຺ຄໍ ສມາປຊ຺ເຊຍ຺ຍາຕິ ອຊ຺ຌາຈາໂຣ ວຸຈ຺ຈຕິ.

ຫຕ຺ໂຖ ນາມ ກປ຺ປຣໍ ອຸປາທາຍໍ ຍາວ ອຄ຺ຄນຂາ.

ເວຓີ ນາມ ສຸທ຺ຘເກສາ ວາ, ສຸຕ຺ຕມິສ຺ສາ ວາ, ມາລາມິສ຺ສາ ວາ, ຫິຣຎ຺ຎມິສ຺ສາ ວາ, ສຸວຓ຺ຓມິສ຺ສາ ວາ, ມຸຕ຺ຕາມິສ຺ສາ ວາ, ມຓິມິສ຺ສາ ວາ.

ອງ຺ຄໍ ນາມ ຫຕ຺ຖຎ຺ຈ ເວຓິຎ຺ຈ ຐເປຕ຺ວາ ອວເສສໍ ອງ຺ຄໍ ນາມ.

໒໗໒. ອາມສນາ, ປຣາມສນາ, ໂອມສນາ, ອຸມ຺ມສນາ, ໂອລງ຺ຆນາ, ອຸລ຺ລງ຺ຆນາ, ອາກຑ຺ຒນາ, ປຕິກຑ຺ຒນາ, ອຠິນິຄ຺ຄຓ຺ຫນາ, ອຠິນິປ຺ປີຬນາ, ຄຫຓໍ, ຉຸປນໍ.

ອາມສນາ ນາມ ອາມຏ຺ຐມຕ຺ຕາ.

ປຣາມສນາ ນາມ ອິໂຕຈິໂຕ ຈ ສໍໂຈປນາ.

ໂອມສນາ ນາມ ເຫຏ຺ຐາ ໂອໂຣປນາ.

ອຸມ຺ມສນາ ນາມ ອຸທ຺ຘໍ ອຸຈ຺ຈາຣຓາ.

ໂອລງ຺ຆນາ ນາມ ເຫຏ຺ຐາ ໂອນມນາ.

ອຸລ຺ລງ຺ຆນາ ນາມ ອຸທ຺ຘໍ ອຸຈ຺ຈາຣຓາ.

ອາກຑ຺ຒນາ ນາມ ອາວິຎ຺ຉນາ [ອາວິຎ຺ຊນາ (ສີ. ສ຺ຍາ.)].

ປຕິກຑ຺ຒນາ ນາມ ປຕິປ຺ປຓາມນາ.

ອຠິນິຄ຺ຄຓ຺ຫນາ ນາມ ອງ຺ຄໍ ຄເຫຕ຺ວາ ນິປ຺ປີຬນາ.

ອຠິນິປ຺ປີຬນາ ນາມ ເກນຈິ ສຫ ນິປ຺ປີຬນາ.

ຄຫຓໍ ນາມ ຄຫິຕມຕ຺ຕໍ.

ຉຸປນໍ ນາມ ຜຸຏ຺ຐມຕ຺ຕໍ.

ສງ຺ຆາທິເສໂສຕິ…ເປ… ເຕນປິ ວຸຈ຺ຈຕິ ສງ຺ຆາທິເສໂສຕິ.

໒໗໓. ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ ຠິກ຺ຂຸ ຈ. ນໍ ອິຕ຺ຖິຍາ ກາເຍນ ກາຍໍ ອາມສຕິ ປຣາມສຕິ ໂອມສຕິ ອຸມ຺ມສຕິ ໂອລງ຺ເຆຕິ ອຸລ຺ລງ຺ເຆຕິ ອາກຑ຺ຒຕິ ປຕິກຑ຺ຒຕິ ອຠິນິຄ຺ຄຓ຺ຫາຕິ ອຠິນິປ຺ປີເຬຕິ ຄຓ຺ຫາຕິ ຉຸປຕິ, ອາປຕ຺ຕິ ສງ຺ຆາທິເສສສ຺ສ.

ອິຕ຺ຖີ ຈ ໂຫຕິ ເວມຕິໂກ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈຍສ຺ສ.

ອິຕ຺ຖີ ຈ ໂຫຕິ ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈຍສ຺ສ.

ອິຕ຺ຖີ ຈ ໂຫຕິ ປຸຣິສສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈຍສ຺ສ.

ອິຕ຺ຖີ ຈ ໂຫຕິ ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈຍສ຺ສ.

ປຓ຺ຑໂກ ຈ ໂຫຕິ ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ປຓ຺ຑກສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈຍສ຺ສ.

ປຓ຺ຑໂກ ຈ ໂຫຕິ ເວມຕິໂກ ສາຣຕ຺ໂຕ ຈ. ຠິກ຺ຂຸ ຈ ນໍ ປຓ຺ຑກສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ປຓ຺ຑໂກ ຈ ໂຫຕິ ປຸຣິສສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ປຓ຺ຑກສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ປຓ຺ຑໂກ ຈ ໂຫຕິ ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ປຓ຺ຑກສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ປຓ຺ຑໂກ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ປຓ຺ຑກສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ປຸຣິໂສ ຈ ໂຫຕິ ປຸຣິສສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ປຸຣິສສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ປຸຣິໂສ ຈ ໂຫຕິ ເວມຕິໂກ…ເປ… ປຸຣິໂສ ຈ ໂຫຕິ ຕິຣຈ຺ຉານຄຕສຎ຺ຎີ… ປຸຣິໂສ ຈ ໂຫຕິ ອິຕ຺ຖິສຎ຺ຎີ… ປຸຣິໂສ ຈ ໂຫຕິ ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ປຸຣິສສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ຕິຣຈ຺ຉານຄໂຕ ຈ ໂຫຕິ ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ຕິຣຈ຺ຉານຄຕສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ຕິຣຈ຺ຉານຄໂຕ ຈ ໂຫຕິ ເວມຕິໂກ…ເປ… ຕິຣຈ຺ຉານຄໂຕ ຈ ໂຫຕິ ອິຕ຺ຖິສຎ຺ຎີ… ຕິຣຈ຺ຉານຄໂຕ ຈ ໂຫຕິ ປຓ຺ຑກສຎ຺ຎີ… ຕິຣຈ຺ຉານຄໂຕ ຈ ໂຫຕິ. ປຸຣິສສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ຕິຣຈ຺ຉານຄຕສ຺ສ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ.

ເອກມູລກໍ ນິຏ຺ຐິຕໍ.

໒໗໔. ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ສງ຺ຆາທິເສສານໍ.

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ເວມຕິໂກ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ.

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ປຓ຺ຑກສຎ຺ຎີ…ເປ… ປຸຣິສສຎ຺ຎີ… ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ທ຺ວິນ຺ນໍ ອິຕ຺ຖີນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ.

ທ຺ເວ ປຓ຺ຑກາ ທ຺ວິນ຺ນໍ ປຓ຺ຑການໍ ປຓ຺ຑກສຎ຺ຎີ ສາຣຕ຺ໂຕ ຈ ຠິກ຺ຂຸ ຈ ນໍ ທ຺ວິນ຺ນໍ ປຓ຺ຑການໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ.

ທ຺ເວ ປຓ຺ຑກາ ທ຺ວິນ຺ນໍ ປຓ຺ຑການໍ ເວມຕິໂກ…ເປ… ປຸຣິສສຎ຺ຎີ… ຕິຣຈ຺ຉານຄຕສຎ຺ຎີ… ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ປຓ຺ຑການໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ທ຺ເວ ປຸຣິສາ ທ຺ວິນ຺ນໍ ປຸຣິສານໍ ປຸຣິສສຎ຺ຎີ ສາຣຕ຺ໂຕ ຈ ຠິກ຺ຂຸ ຈ ນໍ ທ຺ວິນ຺ນໍ ປຸຣິສານໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ທ຺ເວ ປຸຣິສາ ທ຺ວິນ຺ນໍ ປຸຣິສານໍ ເວມຕິໂກ…ເປ… ຕິຣຈ຺ຉານຄຕສຎ຺ຎີ… ອິຕ຺ຖິສຎ຺ຎີ… ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ປຸຣິສານໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ທ຺ເວ ຕິຣຈ຺ຉານຄຕາ ທ຺ວິນ຺ນໍ ຕິຣຈ຺ຉານຄຕານໍ ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ຕິຣຈ຺ຉານຄຕານໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ທ຺ເວ ຕິຣຈ຺ຉານຄຕາ ທ຺ວິນ຺ນໍ ຕິຣຈ຺ຉານຄຕານໍ ເວມຕິໂກ…ເປ… ອິຕ຺ຖິສຎ຺ຎີ… ປຓ຺ຑກສຎ຺ຎີ … ປຸຣິສສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ຕິຣຈ຺ຉານຄຕານໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

໒໗໕. ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ.

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ເວມຕິໂກ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ.

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ.

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ປຸຣິສສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ.

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ.

ອິຕ຺ຖີ ຈ ປຸຣິໂສ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ.

ອິຕ຺ຖີ ຈ ປຸຣິໂສ ຈ ອຸຠິນ຺ນໍ ເວມຕິໂກ…ເປ… ປຓ຺ຑກສຎ຺ຎີ… ປຸຣິສສຎ຺ຎີ… ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ.

ອິຕ຺ຖີ ຈ ຕິຣຈ຺ຉານຄໂຕ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ.

ອິຕ຺ຖີ ຈ ຕິຣຈ຺ຉານຄໂຕ ຈ ອຸຠິນ຺ນໍ ເວມຕິໂກ…ເປ… ປຓ຺ຑກສຎ຺ຎີ… ປຸຣິສສຎ຺ຎີ … ຕິຣຈ຺ຉານຄຕສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ.

ປຓ຺ຑໂກ ຈ ປຸຣິໂສ ຈ ອຸຠິນ຺ນໍ ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ.

ປຓ຺ຑໂກ ຈ ປຸຣິໂສ ຈ ອຸຠິນ຺ນໍ ເວມຕິໂກ…ເປ… ປຸຣິສສຎ຺ຎີ… ຕິຣຈ຺ຉານຄຕສຎ຺ຎີ… ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ປຓ຺ຑໂກ ຈ ຕິຣຈ຺ຉານຄໂຕ ຈ ອຸຠິນ຺ນໍ ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ.

ປຓ຺ຑໂກ ຈ ຕິຣຈ຺ຉານຄໂຕ ຈ ອຸຠິນ຺ນໍ ເວມຕິໂກ…ເປ… ປຸຣິສສຎ຺ຎີ… ຕິຣຈ຺ຉານຄຕສຎ຺ຎີ… ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ປຸຣິໂສ ຈ ຕິຣຈ຺ຉານຄໂຕ ຈ ອຸຠິນ຺ນໍ ປຸຣິສສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ປຸຣິໂສ ຈ ຕິຣຈ຺ຉານຄໂຕ ຈ ອຸຠິນ຺ນໍ ເວມຕິໂກ…ເປ… ຕິຣຈ຺ຉານຄຕສຎ຺ຎີ… ອິຕ຺ຖິສຎ຺ຎີ… ປຓ຺ຑກສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ທຸມູລກໍ ນິຏ຺ຐິຕໍ.

໒໗໖. ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ກາເຍນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈຍສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ກາເຍນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ …ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາເຍນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ກາຍປຏິພທ຺ເຘນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈຍສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ກາຍປຏິພທ຺ເຘນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາຍປຏິພທ຺ເຘນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ກາຍປຏິພທ຺ເຘນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ກາຍປຏິພທ຺ເຘນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ກາຍປຏິພທ຺ເຘນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ນິສ຺ສຄ຺ຄິເຍນ ກາຍໍ ອາມສຕິ ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ນິສ຺ສຄ຺ຄິເຍນ ກາຍໍ ອາມສຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ນິສ຺ສຄ຺ຄິເຍນ ກາຍໍ ອາມສຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ນິສ຺ສຄ຺ຄິເຍນ ກາຍປຏິພທ຺ຘໍ ອາມສຕິ, ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ນິສ຺ສຄ຺ຄິເຍນ ກາຍປຏິພທ຺ຘໍ ອາມສຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ນິສ຺ສຄ຺ຄິເຍນ ກາຍປຏິພທ຺ຘໍ ອາມສຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອິຕ຺ຖິຍາ ນິສ຺ສຄ຺ຄິເຍນ ນິສ຺ສຄ຺ຄິຍໍ ອາມສຕິ, ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ທ຺ວິນ຺ນໍ ອິຕ຺ຖີນໍ ນິສ຺ສຄ຺ຄິເຍນ ນິສ຺ສຄ຺ຄິຍໍ ອາມສຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ຠິກ຺ຂຸ ຈ ນໍ ອຸຠິນ຺ນໍ ນິສ຺ສຄ຺ຄິເຍນ ນິສ຺ສຄ຺ຄິຍໍ ອາມສຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ຠິກ຺ຂຸເປຍ຺ຍາໂລ ນິຏ຺ຐິໂຕ.

໒໗໗. ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖີ ຈ ນໍ ຠິກ຺ຂຸສ຺ສ ກາເຍນ ກາຍໍ ອາມສຕິ ປຣາມສຕິ ໂອມສຕິ ອຸມ຺ມສຕິ ໂອລງ຺ເຆຕິ ອຸລ຺ລງ຺ເຆຕິ ອາກຑ຺ຒຕິ ປຕິກຑ຺ຒຕິ ອຠິນິຄ຺ຄຓ຺ຫາຕິ ອຠິນິປ຺ປີເຬຕິ ຄຓ຺ຫາຕິ ຉຸປຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ສງ຺ຆາທິເສສສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖິໂຍ ຈ ນໍ ຠິກ຺ຂຸສ຺ສ ກາເຍນ ກາຍໍ ອາມສນ຺ຕິ ປຣາມສນ຺ຕິ ໂອມສນ຺ຕິ ອຸມ຺ມສນ຺ຕິ ໂອລງ຺ເຆນ຺ຕິ ອຸລ຺ລງ຺ເຆນ຺ຕິ ອາກຑ຺ຒນ຺ຕິ ປຕິກຑ຺ຒນ຺ຕິ ອຠິນິຄ຺ຄຓ຺ຫນ຺ຕິ ອຠິນິປ຺ປີເຬນ຺ຕິ ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ສງ຺ຆາທິເສສານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອຸໂຠ ຈ ນໍ ຠິກ຺ຂຸສ຺ສ ກາເຍນ ກາຍໍ ອາມສນ຺ຕິ ປຣາມສນ຺ຕິ…ເປ… ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ສງ຺ຆາທິເສເສນ ທຸກ຺ກຏສ຺ສ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖີ ຈ ນໍ ຠິກ຺ຂຸສ຺ສ ກາເຍນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ຖຸລ຺ລຈ຺ຈຍສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖິໂຍ ຈ ນໍ ຠິກ຺ຂຸສ຺ສ ກາເຍນ ກາຍປຏິພທ຺ຘໍ ອາມສນ຺ຕິ ປຣາມສນ຺ຕິ…ເປ… ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອຸໂຠ ຈ ນໍ ຠິກ຺ຂຸສ຺ສ ກາເຍນ ກາຍປຏິພທ຺ຘໍ ອາມສນ຺ຕິ ປຣາມສນ຺ຕິ…ເປ… ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖີ ຈ ນໍ ຠິກ຺ຂຸສ຺ສ ກາຍປຏິພທ຺ເຘນ ກາຍໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ຖຸລ຺ລຈ຺ຈຍສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖິໂຍ ຈ ນໍ ຠິກ຺ຂຸສ຺ສ ກາຍປຏິພທ຺ເຘນ ກາຍໍ ອາມສນ຺ຕິ ປຣາມສນ຺ຕິ…ເປ… ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ຖຸລ຺ລຈ຺ຈຍານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອຸໂຠ ຈ ນໍ ຠິກ຺ຂຸສ຺ສ ກາຍປຏິພທ຺ເຘນ ກາຍໍ ອາມສນ຺ຕິ ປຣາມສນ຺ຕິ…ເປ… ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ຖຸລ຺ລຈ຺ຈເຍນ ທຸກ຺ກຏສ຺ສ…ເປ….

໒໗໘. ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖີ ຈ ນໍ ຠິກ຺ຂຸສ຺ສ ກາຍປຏິພທ຺ເຘນ ກາຍປຏິພທ຺ຘໍ ອາມສຕິ ປຣາມສຕິ…ເປ… ຄຓ຺ຫາຕິ ຉຸປຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖິໂຍ ຈ ນໍ ຠິກ຺ຂຸສ຺ສ ກາຍປຏິພທ຺ເຘນ ກາຍປຏິພທ຺ຘໍ ອາມສນ຺ຕິ ປຣາມສນ຺ຕິ…ເປ… ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອຸໂຠ ຈ ນໍ ຠິກ຺ຂຸສ຺ສ ກາຍປຏິພທ຺ເຘນ ກາຍປຏິພທ຺ຘໍ ອາມສນ຺ຕິ ປຣາມສນ຺ຕິ…ເປ… ຄຓ຺ຫນ຺ຕິ ຉຸປນ຺ຕິ, ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖີ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ກາຍໍ ອາມສຕິ. ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖິໂຍ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ກາຍໍ ອາມສນ຺ຕິ. ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອຸໂຠ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ກາຍໍ ອາມສນ຺ຕິ. ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖີ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ກາຍປຏິພທ຺ຘໍ ອາມສຕິ. ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖິໂຍ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ກາຍປຏິພທ຺ຘໍ ອາມສນ຺ຕິ. ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອຸໂຠ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ກາຍປຏິພທ຺ຘໍ ອາມສນ຺ຕິ. ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ໂຫຕິ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖີ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ນິສ຺ສຄ຺ຄິຍໍ ອາມສຕິ. ເສວນາຘິປ຺ປາໂຍ ກາເຍນ ວາຍມຕິ, ນ ຈ ຜສ຺ສໍ ປຏິວິຊານາຕິ, ອາປຕ຺ຕິ ທຸກ຺ກຏສ຺ສ…ເປ….

ທ຺ເວ ອິຕ຺ຖິໂຍ ທ຺ວິນ຺ນໍ ອິຕ຺ຖີນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອິຕ຺ຖິໂຍ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ນິສ຺ສຄ຺ຄິຍໍ ອາມສນ຺ຕິ. ເສວນາຘິປ຺ປາໂຍ ກາເຍນ ວາຍມຕິ, ນ ຈ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

ອິຕ຺ຖີ ຈ ປຓ຺ຑໂກ ຈ ອຸຠິນ຺ນໍ ອິຕ຺ຖິສຎ຺ຎີ ສາຣຕ຺ໂຕ ຈ. ອຸໂຠ ຈ ນໍ ຠິກ຺ຂຸສ຺ສ ນິສ຺ສຄ຺ຄິເຍນ ນິສ຺ສຄ຺ຄິຍໍ ອາມສນ຺ຕິ. ເສວນາຘິປ຺ປາໂຍ ກາເຍນ ວາຍມຕິ, ນ ຈ ຜສ຺ສໍ ປຏິວິຊານາຕິ, ອາປຕ຺ຕິ ທ຺ວິນ຺ນໍ ທຸກ຺ກຏານໍ…ເປ….

໒໗໙. ເສວນາຘິປ຺ປາໂຍ ກາເຍນ ວາຍມຕິ ຜສ຺ສໍ ປຏິວິຊານາຕິ, ອາປຕ຺ຕິ ສງ຺ຆາທິເສສສ຺ສ.

ເສວນາຘິປ຺ປາໂຍ ກາເຍນ ວາຍມຕິ, ນ ຈ ຜສ຺ສໍ ປຏິວິຊານາຕິ, ອາປຕ຺ຕິ ທຸກ຺ກຏສ຺ສ.

ເສວນາຘິປ຺ປາໂຍ ນ ຈ ກາເຍນ ວາຍມຕິ, ຜສ຺ສໍ ປຏິວິຊານາຕິ, ອນາປຕ຺ຕິ.

ເສວນາຘິປ຺ປາໂຍ ນ ຈ ກາເຍນ ວາຍມຕິ, ນ ຈ ຜສ຺ສໍ ປຏິວິຊານາຕິ, ອນາປຕ຺ຕິ.

ໂມກ຺ຂາຘິປ຺ປາໂຍ ກາເຍນ ວາຍມຕິ, ຜສ຺ສໍ ປຏິວິຊານາຕິ, ອນາປຕ຺ຕິ.

ໂມກ຺ຂາຘິປ຺ປາໂຍ ກາເຍນ ວາຍມຕິ, ນ ຈ ຜສ຺ສໍ ປຏິວິຊານາຕິ, ອນາປຕ຺ຕິ.

ໂມກ຺ຂາຘິປ຺ປາໂຍ ນ ຈ ກາເຍນ ວາຍມຕິ, ຜສ຺ສໍ ປຏິວິຊານາຕິ, ອນາປຕ຺ຕິ.

ໂມກ຺ຂາຘິປ຺ປາໂຍ ນ ຈ ກາເຍນ ວາຍມຕິ, ນ ຈ ຜສ຺ສໍ ປຏິວິຊານາຕິ, ອນາປຕ຺ຕິ.

໒໘໐. ອນາປຕ຺ຕິ ອສຎ຺ຈິຈ຺ຈ, ອສຕິຍາ, ອຊານນ຺ຕສ຺ສ, ອສາທິຍນ຺ຕສ຺ສ, ອຸມ຺ມຕ຺ຕກສ຺ສ, ຂິຕ຺ຕຈິຕ຺ຕສ຺ສ, ເວທນາຏ຺ຏສ຺ສ, ອາທິກມ຺ມິກສ຺ສາຕິ.

ວິນີຕວຕ຺ຖຸອຸທ຺ທານຄາຖາ

ມາຕາ ຘີຕາ ຠຄິນີ ຈ, ຊາຍາ ຍກ຺ຂີ ຈ ປຓ຺ຑໂກ;

ສຸຕ຺ຕາ ມຕາ ຕິຣຈ຺ຉານາ, ທາຣຸຘິຕລິກາຍ ຈ.

ສມ຺ປີເຬ ສງ຺ກໂມ ມຄ຺ໂຄ, ຣຸກ຺ໂຂ ນາວາ ຈ ຣຊ຺ຊຸ ຈ;

ທຓ຺ໂຑ ປຕ຺ຕໍ ປຓາເມສິ, ວນ຺ເທ ວາຍມິ ນຈ຺ຉຸເປຕິ.

ວິນີຕວຕ຺ຖຸ

໒໘໑. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ມາຕຸຍາ ມາຕຸເປເມນ ອາມສິ. ຕສ຺ສ ກຸກ຺ກຸຈ຺ຈໍ ອໂຫສິ – ‘‘ຠຄວຕາ ສິກ຺ຂາປທໍ ປຎ຺ຎຕ຺ຕໍ, ກຈ຺ຈິ ນຸ ໂຂ ອຫໍ ສງ຺ຆາທິເສສໍ ອາປຕ຺ຕິໍ ອາປນ຺ໂນ’’ຕິ? ຠຄວໂຕ ເອຕມຕ຺ຖໍ ອາໂຣເຈສິ. ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ຘີຕຸຍາ ຘີຕຸເປເມນ ອາມສິ…ເປ… ຠຄິນິຍາ ຠຄິນິເປເມນ ອາມສິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ປຸຣາຓທຸຕິຍິກາຍ ກາຍສໍສຄ຺ຄໍ ສມາປຊ຺ຊິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອາປຕ຺ຕິໍ ຕ຺ວໍ, ຠິກ຺ຂຸ, ອາປນ຺ໂນ ສງ຺ຆາທິເສສ’’ນ຺ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ຍກ຺ຂິນິຍາ ກາຍສໍສຄ຺ຄໍ ສມາປຊ຺ຊິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ປຓ຺ຑກສ຺ສ ກາຍສໍສຄ຺ຄໍ ສມາປຊ຺ຊິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ສຸຕ຺ຕິຕ຺ຖິຍາ ກາຍສໍສຄ຺ຄໍ ສມາປຊ຺ຊິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອາປຕ຺ຕິໍ ຕ຺ວໍ, ຠິກ຺ຂຸ, ອາປນ຺ໂນ ສງ຺ຆາທິເສສ’’ນ຺ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ມຕິຕ຺ຖິຍາ ກາຍສໍສຄ຺ຄໍ ສມາປຊ຺ຊິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ຕິຣຈ຺ຉານຄຕິຕ຺ຖິຍາ ກາຍສໍສຄ຺ຄໍ ສມາປຊ຺ຊິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ທາຣຸຘີຕລິກາຍ ກາຍສໍສຄ຺ຄໍ ສມາປຊ຺ຊິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

໒໘໒. ເຕນ ໂຂ ປນ ສມເຍນ ສມ຺ພຫຸລາ ອິຕ຺ຖິໂຍ ອຎ຺ຎຕຣໍ ຠິກ຺ຂຸໍ ສມ຺ປີເຬຕ຺ວາ ພາຫາປຣມ຺ປຣາຍ ອາເນສຸໍ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ສາທິຍິ ຕ຺ວໍ, ຠິກ຺ຂູ’’ຕິ? ‘‘ນາຫໍ, ຠຄວາ, ສາທິຍິ’’ນ຺ຕິ. ‘‘ອນາປຕ຺ຕິ, ຠິກ຺ຂູ, ອສາທິຍນ຺ຕສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິຍາ ອຠິຣູຬ຺ຫໍ ສງ຺ກມໍ ສາຣຕ຺ໂຕ ສຎ຺ຈາເລສິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິໍ ປຏິປເຖ ປສ຺ສິຕ຺ວາ ສາຣຕ຺ໂຕ ອໍສກູເຏນ ປຫາຣໍ ອທາສິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອາປຕ຺ຕິໍ ຕ຺ວໍ, ຠິກ຺ຂຸ, ອາປນ຺ໂນ ສງ຺ຆາທິເສສ’’ນ຺ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິຍາ ອຠິຣູຬ຺ຫໍ ຣຸກ຺ຂໍ ສາຣຕ຺ໂຕ ສຎ຺ຈາເລສິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິຍາ ອຠິຣູຬ຺ຫໍ ນາວໍ ສາຣຕ຺ໂຕ ສຎ຺ຈາເລສິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິຍາ ຄຫິຕໍ ຣຊ຺ຊຸໍ ສາຣຕ຺ໂຕ ອາວິຎ຺ຉິ [ອາວິຎ຺ຊິ (ສີ. ສ຺ຍາ.)]. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິຍາ ຄຫິຕໍ ທຓ຺ຑໍ ສາຣຕ຺ໂຕ ອາວິຎ຺ຉິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ສາຣຕ຺ໂຕ ອິຕ຺ຖິໍ ປຕ຺ເຕນ ປຓາເມສິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິຍາ ວນ຺ທນ຺ຕິຍາ ສາຣຕ຺ໂຕ ປາທໍ ອຸຈ຺ຈາເຣສິ. ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອາປຕ຺ຕິໍ ຕ຺ວໍ, ຠິກ຺ຂຸ, ອາປນ຺ໂນ ສງ຺ຆາທິເສສ’’ນ຺ຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອິຕ຺ຖິໍ ຄເຫສ຺ສາມີຕິ ວາຍມິຕ຺ວາ ນ ຉຸປິ.

ຕສ຺ສ ກຸກ຺ກຸຈ຺ຈໍ ອໂຫສິ…ເປ… ‘‘ອນາປຕ຺ຕິ, ຠິກ຺ຂຸ, ສງ຺ຆາທິເສສສ຺ສ; ອາປຕ຺ຕິ ທຸກ຺ກຏສ຺ສາ’’ຕິ.

ກາຍສໍສຄ຺ຄສິກ຺ຂາປທໍ ນິຏ຺ຐິຕໍ ທຸຕິຍໍ.