໑໐. ທສມສິກ຺ຂາປທໍ

໑໑໖໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ ມາຕາປິຕູຫິປິ ສາມິເກນປິ ອນນຸຎ຺ຎາຕໍ ສິກ຺ຂມານໍ ວຸຏ຺ຐາເປຕິ. ມາຕາປິຕໂຣປິ ສາມິໂກປິ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ອມ຺ເຫຫິ ອນນຸຎ຺ຎາຕໍ ສິກ຺ຂມານໍ ວຸຏ຺ຐາເປສ຺ສຕີ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ມາຕາປິຕູນມ຺ປິ ສາມິກສ຺ສປິ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ມາຕາປິຕູຫິປິ ສາມິເກນປິ ອນນຸຎ຺ຎາຕໍ ສິກ຺ຂມານໍ ວຸຏ຺ຐາເປສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ, ມາຕາປິຕູຫິປິ ສາມິເກນປິ ອນນຸຎ຺ຎາຕໍ ສິກ຺ຂມານໍ ວຸຏ຺ຐາເປຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ມາຕາປິຕູຫິປິ ສາມິເກນປິ ອນນຸຎ຺ຎາຕໍ ສິກ຺ຂມານໍ ວຸຏ຺ຐາເປສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໑໖໓. ‘‘ຍາ ປນ ຠິກ຺ຂຸນີ ມາຕາປິຕູຫິ ວາ ສາມິເກນ ວາ ອນນຸຎ຺ຎາຕໍ ສິກ຺ຂມານໍ ວຸຏ຺ຐາເປຍ຺ຍ, ປາຈິຕ຺ຕິຍ’’ນ຺ຕິ.

໑໑໖໔. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ມາຕາປິຕໂຣ ນາມ ຊນກາ ວຸຈ຺ຈນ຺ຕິ. ສາມິໂກ ນາມ ເຍນ ປຣິຄ຺ຄຫິຕາ ໂຫຕິ. ອນນຸຎ຺ຎາຕາຕິ ອນາປຸຈ຺ຉາ. ສິກ຺ຂມານາ ນາມ ທ຺ເວ ວສ຺ສານິ ຉສຸ ຘມ຺ເມສຸ ສິກ຺ຂິຕສິກ຺ຂາ. ວຸຏ຺ຐາເປຍ຺ຍາຕິ ອຸປສມ຺ປາເທຍ຺ຍ.

ວຸຏ຺ຐາເປສ຺ສາມີຕິ ຄຓໍ ວາ ອາຈຣິນິໍ ວາ ປຕ຺ຕໍ ວາ ຈີວຣໍ ວາ ປຣິເຍສຕິ, ສີມໍ ວາ ສມ຺ມນ຺ນຕິ, ອາປຕ຺ຕິ ທຸກ຺ກຏສ຺ສ. ຎຕ຺ຕິຍາ ທຸກ຺ກຏໍ. ທ຺ວີຫິ ກມ຺ມວາຈາຫິ ທຸກ຺ກຏາ. ກມ຺ມວາຈາປຣິໂຍສາເນ ອຸປຊ຺ຌາຍາຍ ອາປຕ຺ຕິ ປາຈິຕ຺ຕິຍສ຺ສ. ຄຓສ຺ສ ຈ ອາຈຣິນິຍາ ຈ ອາປຕ຺ຕິ ທຸກ຺ກຏສ຺ສ.

໑໑໖໕. ອນາປຕ຺ຕິ ອຊານນ຺ຕີ ວຸຏ຺ຐາເປຕິ, ອປໂລເກຕ຺ວາ ວຸຏ຺ຐາເປຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທສມສິກ຺ຂາປທໍ ນິຏ຺ຐິຕໍ.