໑໑. ເອກາທສມສິກ຺ຂາປທໍ

໑໑໖໖. ເຕນ ສມເຍນ ພຸທ຺ໂຘ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ – ‘‘ສິກ຺ຂມານໍ ວຸຏ຺ຐາເປສ຺ສາມີ’’ຕິ ເຖເຣ ຠິກ຺ຂູ ສນ຺ນິປາເຕຕ຺ວາ ປຫູຕໍ ຂາທນີຍໍ ໂຠຊນີຍໍ ປສ຺ສິຕ຺ວາ – ‘‘ນ ຕາວາຫໍ, ອຍ຺ຍາ, ສິກ຺ຂມານໍ ວຸຏ຺ຐາເປສ຺ສາມີ’’ຕິ ເຖເຣ ຠິກ຺ຂູ ອຸຍ຺ໂຍເຊຕ຺ວາ ເທວທຕ຺ຕໍ ໂກກາລິກໍ ກຏໂມທກຕິສ຺ສກໍ ຂຓ຺ຑເທວິຍາ ປຸຕ຺ຕໍ ສມຸທ຺ທທຕ຺ຕໍ ສນ຺ນິປາເຕຕ຺ວາ ສິກ຺ຂມານໍ ວຸຏ຺ຐາເປສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ປາຣິວາສິກຉນ຺ທທາເນນ ສິກ຺ຂມານໍ ວຸຏ຺ຐາເປສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ປາຣິວາສິກຉນ຺ທທາເນນ ສິກ຺ຂມານໍ ວຸຏ຺ຐາເປຕີຕິ [ວຸຏ຺ຐາເປສີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ປາຣິວາສິກຉນ຺ທທາເນນ ສິກ຺ຂມານໍ ວຸຏ຺ຐາເປສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໑໖໗. ‘‘ຍາ ປນ ຠິກ຺ຂຸນີ ປາຣິວາສິກຉນ຺ທທາເນນ ສິກ຺ຂມານໍ ວຸຏ຺ຐາເປຍ຺ຍ, ປາຈິຕ຺ຕິຍ’’ນ຺ຕິ.

໑໑໖໘. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ປາຣິວາສິກຉນ຺ທທາເນນາຕິ ວຸຏ຺ຐິຕາຍ ປຣິສາຍ. ສິກ຺ຂມານາ ນາມ ທ຺ເວ ວສ຺ສານິ ຉສຸ ຘມ຺ເມສຸ ສິກ຺ຂິຕສິກ຺ຂາ. ວຸຏ຺ຐາເປຍ຺ຍາຕິ ອຸປສມ຺ປາເທຍ຺ຍ.

‘‘ວຸຏ຺ຐາເປສ຺ສາມີ’’ຕິ ຄຓໍ ວາ ອາຈຣິນິໍ ວາ ປຕ຺ຕໍ ວາ ຈີວຣໍ ວາ ປຣິເຍສຕິ, ສີມໍ ວາ ສມ຺ມນ຺ນຕິ, ອາປຕ຺ຕິ ທຸກ຺ກຏສ຺ສ. ຎຕ຺ຕິຍາ ທຸກ຺ກຏໍ. ທ຺ວີຫິ ກມ຺ມວາຈາຫິ ທຸກ຺ກຏາ. ກມ຺ມວາຈາປຣິໂຍສາເນ ອຸປຊ຺ຌາຍາຍ ອາປຕ຺ຕິ ປາຈິຕ຺ຕິຍສ຺ສ. ຄຓສ຺ສ ຈ ອາຈຣິນິຍາ ຈ ອາປຕ຺ຕິ ທຸກ຺ກຏສ຺ສ.

໑໑໖໙. ອນາປຕ຺ຕິ ອວຸຏ຺ຐິຕາຍ ປຣິສາຍ ວຸຏ຺ຐາເປຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ເອກາທສມສິກ຺ຂາປທໍ ນິຏ຺ຐິຕໍ.