໒. ທຸຕິຍສິກ຺ຂາປທໍ

໑໐໗໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠິກ຺ຂຸນິໂຍ ປາຍນ຺ຕິໍ ວຸຏ຺ຐາເປນ຺ຕິ. ສາ ປິຓ຺ຑາຍ ຈຣຕິ. ມນຸສ຺ສາ ເອວມາຫໍສຸ – ‘‘ເທຖາຍ຺ຍາຍ ຠິກ຺ຂໍ, ສທຸຕິຍິກາ ອຍ຺ຍາ’’ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ປາຍນ຺ຕິໍ ວຸຏ຺ຐາເປສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ປາຍນ຺ຕິໍ ວຸຏ຺ຐາເປສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ປາຍນ຺ຕິໍ ວຸຏ຺ຐາເປນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ປາຍນ຺ຕິໍ ວຸຏ຺ຐາເປສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໐໗໓. ‘‘ຍາ ປນ ຠິກ຺ຂຸນີ ປາຍນ຺ຕິໍ ວຸຏ຺ຐາເປຍ຺ຍ, ປາຈິຕ຺ຕິຍ’’ນ຺ຕິ.

໑໐໗໔. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ປາຍນ຺ຕີ ນາມ ມາຕາ ວາ ໂຫຕິ [ໂຫຕຸ (ກ.)] ຘາຕິ [ຘາຕີ (ສີ. ສ຺ຍາ.)] ວາ.

ວຸຏ຺ຐາເປຍ຺ຍາຕິ ອຸປສມ຺ປາເທຍ຺ຍ.

‘‘ວຸຏ຺ຐາເປສ຺ສາມີ’’ຕິ ຄຓໍ ວາ ອາຈຣິນິໍ ວາ ປຕ຺ຕໍ ວາ ຈີວຣໍ ວາ ປຣິເຍສຕິ, ສີມໍ ວາ ສມ຺ມນ຺ນຕິ, ອາປຕ຺ຕິ ທຸກ຺ກຏສ຺ສ. ຎຕ຺ຕິຍາ ທຸກ຺ກຏໍ. ທ຺ວີຫິ ກມ຺ມວາຈາຫິ ທຸກ຺ກຏາ. ກມ຺ມວາຈາປຣິໂຍສາເນ ອຸປຊ຺ຌາຍາຍ ອາປຕ຺ຕິ ປາຈິຕ຺ຕິຍສ຺ສ. ຄຓສ຺ສ ຈ ອາຈຣິນິຍາ ຈ ອາປຕ຺ຕິ ທຸກ຺ກຏສ຺ສ.

໑໐໗໕. ປາຍນ຺ຕິຍາ ປາຍນ຺ຕິສຎ຺ຎາ ວຸຏ຺ຐາເປຕິ, ອາປຕ຺ຕິ ປາຈິຕ຺ຕິຍສ຺ສ. ປາຍນ຺ຕິຍາ ເວມຕິກາ ວຸຏ຺ຐາເປຕິ, ອາປຕ຺ຕິ ທຸກ຺ກຏສ຺ສ. ປາຍນ຺ຕິຍາ ອປາຍນ຺ຕິສຎ຺ຎາ ວຸຏ຺ຐາເປຕິ, ອນາປຕ຺ຕິ. ອປາຍນ຺ຕິຍາ ປາຍນ຺ຕິສຎ຺ຎາ, ອາປຕ຺ຕິ ທຸກ຺ກຏສ຺ສ. ອປາຍນ຺ຕິຍາ ເວມຕິກາ, ອາປຕ຺ຕິ ທຸກ຺ກຏສ຺ສ. ອປາຍນ຺ຕິຍາ ອປາຍນ຺ຕິສຎ຺ຎາ, ອນາປຕ຺ຕິ.

໑໐໗໖. ອນາປຕ຺ຕິ ປາຍນ຺ຕິໍ ອປາຍນ຺ຕິສຎ຺ຎາ ວຸຏ຺ຐາເປຕິ, ອປາຍນ຺ຕິໍ ອປາຍນ຺ຕິສຎ຺ຎາ ວຸຏ຺ຐາເປຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທຸຕິຍສິກ຺ຂາປທໍ ນິຏ຺ຐິຕໍ.