໕. ປຎ຺ຈມສິກ຺ຂາປທໍ

໑໐໔໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕຣາ ຠິກ຺ຂຸນີ ສາວຕ຺ຖິຍໍ ອຎ຺ຎຕຣິສ຺ສາ ວິສິຂາຍ ປິຓ຺ຑາຍ ຈຣມານາ ເຍນ ອຎ຺ຎຕຣໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອຖ ໂຂ ເຕ ມນຸສ຺ສາ ຕໍ ຠິກ຺ຂຸນິໍ ໂຠເຊຕ຺ວາ ເອຕທໂວຈຸໍ – ‘‘ອຎ຺ຎາປິ, ອຍ຺ເຍ, ຠິກ຺ຂຸນິໂຍ ອາຄຈ຺ຉນ຺ຕູ’’ຕິ. ອຖ ໂຂ ສາ ຠິກ຺ຂຸນີ, ‘‘ກຖຎ຺ຫິ ນາມ [ກຖໍ ອຎ຺ຎາ (ສ຺ຍາ.)] ຠິກ຺ຂຸນິໂຍ ນາຄຈ຺ເຉຍ຺ຍຸ’’ນ຺ຕິ, ຠິກ຺ຂຸນິໂຍ ອຸປສງ຺ກມິຕ຺ວາ ເອຕທໂວຈ – ‘‘ອມຸກສ຺ມິໍ, ອຍ຺ເຍ, ໂອກາເສ ວາຬາ ສຸນຂາ ຈຓ຺ໂຑ ພລິພທ຺ໂທ ຈິກ຺ຂລ຺ໂລ ໂອກາໂສ. ມາ ໂຂ ຕຕ຺ຖ ອຄມິຕ຺ຖາ’’ຕິ. ອຎ຺ຎຕຣາປິ ຠິກ຺ຂຸນີ ຕສ຺ສາ ວິສິຂາຍ ປິຓ຺ຑາຍ ຈຣມານາ ເຍນ ຕໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອຖ ໂຂ ເຕ ມນຸສ຺ສາ ຕໍ ຠິກ຺ຂຸນິໍ ໂຠເຊຕ຺ວາ ເອຕທໂວຈຸໍ – ‘‘ກິສ຺ສ, ອຍ຺ເຍ, ຠິກ຺ຂຸນິໂຍ ນ ອາຄຈ຺ຉນ຺ຕີ’’ຕິ? ອຖ ໂຂ ສາ ຠິກ຺ຂຸນີ ເຕສໍ ມນຸສ຺ສານໍ ເອຕມຕ຺ຖໍ ອາໂຣເຈສິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ກຸລໍ ມຈ຺ຉຣາຍິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ກຸລໍ ມຈ຺ຉຣາຍຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ກຸລໍ ມຈ຺ຉຣາຍິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໑໐໔໓. ‘‘ຍາ ປນ ຠິກ຺ຂຸນີ ກຸລມຈ຺ຉຣິນີ ອສ຺ສ, ປາຈິຕ຺ຕິຍ’’ນ຺ຕິ.

໑໐໔໔. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ກຸລໍ ນາມ ຈຕ຺ຕາຣິ ກຸລານິ – ຂຕ຺ຕິຍກຸລໍ, ພ຺ຣາຫ຺ມຓກຸລໍ, ເວສ຺ສກຸລໍ, ສຸທ຺ທກຸລໍ.

ມຈ຺ຉຣິນີ ອສ຺ສາຕິ ‘‘ກຖໍ ຠິກ຺ຂຸນິໂຍ ນາຄຈ຺ເຉຍ຺ຍຸ’’ນ຺ຕິ ຠິກ຺ຂຸນີນໍ ສນ຺ຕິເກ ກຸລສ຺ສ ອວຓ຺ຓໍ ຠາສຕິ, ອາປຕ຺ຕິ ປາຈິຕ຺ຕິຍສ຺ສ. ກຸລສ຺ສ ວາ ສນ຺ຕິເກ ຠິກ຺ຂຸນີນໍ ອວຓ຺ຓໍ ຠາສຕິ, ອາປຕ຺ຕິ ປາຈິຕ຺ຕິຍສ຺ສ.

໑໐໔໕. ອນາປຕ຺ຕິ ກຸລໍ ນ ມຈ຺ຉຣາຍນ຺ຕີ ສນ຺ຕໍເຍວ ອາທີນວໍ ອາຈິກ຺ຂຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.