໙. ນວມສິກ຺ຂາປທໍ

໙໒໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຖຸລ຺ລນນ຺ທາຍ ຠິກ຺ຂຸນິຍາ ອຸປຏ຺ຐາກກຸລໍ ຖຸລ຺ລນນ຺ທໍ ຠິກ຺ຂຸນິໍ ເອຕທໂວຈ – ‘‘ສເຈ ມຍໍ, ອຍ຺ເຍ, ສກ຺ໂກມ, ຠິກ຺ຂຸນິສງ຺ຆສ຺ສ ຈີວຣໍ ທສ຺ສາມາ’’ຕິ. ເຕນ ໂຂ ປນ ສມເຍນ ວສ຺ສໍວຸຏ຺ຐາ ຠິກ຺ຂຸນິໂຍ ຈີວຣໍ ຠາເຊຕຸກາມາ ສນ຺ນິປຕິໍສຸ. ຖຸລ຺ລນນ຺ທາ ຠິກ຺ຂຸນີ ຕາ ຠິກ຺ຂຸນິໂຍ ເອຕທໂວຈ – ‘‘ອາຄເມຖ, ອຍ຺ເຍ, ອຕ຺ຖິ ຠິກ຺ຂຸນິສງ຺ຆສ຺ສ ຈີວຣປຈ຺ຈາສາ’’ຕິ. ຠິກ຺ຂຸນິໂຍ ຖຸລ຺ລນນ຺ທໍ ຠິກ຺ຂຸນິໍ ເອຕທໂວຈຸໍ – ‘‘ຄຈ຺ຉາຍ຺ເຍ, ຕໍ ຈີວຣໍ ຊານາຫີ’’ຕິ. ຖຸລ຺ລນນ຺ທາ ຠິກ຺ຂຸນີ ເຍນ ຕໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ເຕ ມນຸສ຺ເສ ເອຕທໂວຈ – ‘‘ເທຖາວຸໂສ, ຠິກ຺ຂຸນິສງ຺ຆສ຺ສ ຈີວຣ’’ນ຺ຕິ. ‘‘ນ ມຍໍ, ອຍ຺ເຍ, ສກ຺ໂກມ ຠິກ຺ຂຸນິສງ຺ຆສ຺ສ ຈີວຣໍ ທາຕຸ’’ນ຺ຕິ. ຖຸລ຺ລນນ຺ທາ ຠິກ຺ຂຸນີ ຠິກ຺ຂຸນີນໍ ເອຕມຕ຺ຖໍ ອາໂຣເຈສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ທຸພ຺ພລຈີວຣປຈ຺ຈາສາຍ ຈີວຣກາລສມຍໍ ອຕິກ຺ກາເມສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ທຸພ຺ພລຈີວຣປຈ຺ຈາສາຍ ຈີວຣກາລສມຍໍ ອຕິກ຺ກາເມຕີຕິ [ອຕິກ຺ກາເມສີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ທຸພ຺ພລຈີວຣປຈ຺ຈາສາຍ ຈີວຣກາລສມຍໍ ອຕິກ຺ກາເມສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໙໒໑. ‘‘ຍາ ປນ ຠິກ຺ຂຸນີ ທຸພ຺ພລຈີວຣປຈ຺ຈາສາຍ ຈີວຣກາລສມຍໍ ອຕິກ຺ກາເມຍ຺ຍ, ປາຈິຕ຺ຕິຍ’’ນ຺ຕິ.

໙໒໒. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ທຸພ຺ພລຈີວຣປຈ຺ຈາສາ ນາມ ‘‘ສເຈ ມຍໍ ສກ຺ໂກມ, ທສ຺ສາມ ກຣິສ຺ສາມາ’’ຕິ ວາຈາ ຠິນ຺ນາ ໂຫຕິ.

ຈີວຣກາລສມໂຍ ນາມ ອນຕ຺ຖເຕ ກຖິເນ ວສ຺ສານສ຺ສ ປຈ຺ຉິໂມ ມາໂສ, ອຕ຺ຖເຕ ກຖິເນ ປຎ຺ຈ ມາສາ.

ຈີວຣກາລສມຍໍ ອຕິກ຺ກາເມຍ຺ຍາຕິ ອນຕ຺ຖເຕ ກຖິເນ ວສ຺ສານສ຺ສ ປຈ຺ຉິມໍ ທິວສໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ. ອຕ຺ຖເຕ ກຖິເນ ກຖິນຸທ຺ຘາຣທິວສໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ.

໙໒໓. ທຸພ຺ພລຈີວເຣ ທຸພ຺ພລຈີວຣສຎ຺ຎາ ຈີວຣກາລສມຍໍ ອຕິກ຺ກາເມຕິ, ອາປຕ຺ຕິ ປາຈິຕ຺ຕິຍສ຺ສ. ທຸພ຺ພລຈີວເຣ ເວມຕິກາ ຈີວຣກາລສມຍໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສ. ທຸພ຺ພລຈີວເຣ ອທຸພ຺ພລຈີວຣສຎ຺ຎາ ຈີວຣກາລສມຍໍ ອຕິກ຺ກາເມຕິ, ອນາປຕ຺ຕິ.

ອທຸພ຺ພລຈີວເຣ ທຸພ຺ພລຈີວຣສຎ຺ຎາ, ອາປຕ຺ຕິ ທຸກ຺ກຏສ຺ສ. ອທຸພ຺ພລຈີວເຣ ເວມຕິກາ, ອາປຕ຺ຕິ ທຸກ຺ກຏສ຺ສ. ອທຸພ຺ພລຈີວເຣ ອທຸພ຺ພລຈີວຣສຎ຺ຎາ, ອນາປຕ຺ຕິ.

໙໒໔. ອນາປຕ຺ຕິ ອານິສໍສໍ ທສ຺ເສຕ຺ວາ ນິວາເຣຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ນວມສິກ຺ຂາປທໍ ນິຏ຺ຐິຕໍ.