໑໐. ທສມສິກ຺ຂາປທໍ

໙໒໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕເຣນ ອຸປາສເກນ ສງ຺ຆໍ ອຸທ຺ທິສ຺ສ ວິຫາໂຣ ກາຣາປິໂຕ ໂຫຕິ. ໂສ ຕສ຺ສ ວິຫາຣສ຺ສ ມເຫ ອຸຠໂຕສງ຺ຆສ຺ສ ອກາລຈີວຣໍ ທາຕຸກາໂມ ໂຫຕິ. ເຕນ ໂຂ ປນ ສມເຍນ ອຸຠໂຕສງ຺ຆສ຺ສ ກຖິນໍ ອຕ຺ຖຕໍ ໂຫຕິ. ອຖ ໂຂ ໂສ ອຸປາສໂກ ສງ຺ຆໍ ອຸປສງ຺ກມິຕ຺ວາ ກຖິນຸທ຺ຘາຣໍ ຍາຈິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ກຖິນໍ ອຸທ຺ຘຣິຕຸໍ. ເອວຎ຺ຈ ປນ ຠິກ຺ຂເວ ກຖິນໍ ອຸທ຺ຘຣິຕພ຺ພໍ. ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

໙໒໖. ‘‘ສຸຓາຕຸ ເມ, ຠນ຺ເຕ, ສງ຺ໂຆ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ກຖິນໍ ອຸທ຺ຘເຣຍ຺ຍ. ເອສາ ຎຕ຺ຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ສງ຺ໂຆ ກຖິນໍ ອຸທ຺ຘຣຕິ. ຍສ຺ສາຍສ຺ມໂຕ ຂມຕິ ກຖິນສ຺ສ ອຸທ຺ຘາໂຣ, ໂສ ຕຸຓ຺ຫສ຺ສ; ຍສ຺ສ ນກ຺ຂມຕິ, ໂສ ຠາເສຍ຺ຍ.

‘‘ອຸພ຺ຠຕໍ ສງ຺ເຆນ ກຖິນໍ, ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ.

໙໒໗. ອຖ ໂຂ ໂສ ອຸປາສໂກ ຠິກ຺ຂຸນິສງ຺ຆໍ ອຸປສງ຺ກມິຕ຺ວາ ກຖິນຸທ຺ຘາຣໍ ຍາຈິ. ຖຸລ຺ລນນ຺ທາ ຠິກ຺ຂຸນີ – ‘‘ຈີວຣໍ ອມ຺ຫາກໍ ຠວິສ຺ສຕີ’’ຕິ ກຖິນຸທ຺ຘາຣໍ ປຏິພາຫິ. ອຖ ໂຂ ໂສ ອຸປາສໂກ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ອມ຺ຫາກໍ ກຖິນຸທ຺ຘາຣໍ ນ ທສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ຕສ຺ສ ອຸປາສກສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ຘມ຺ມິກໍ ກຖິນຸທ຺ຘາຣໍ ປຏິພາຫິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຘມ຺ມິກໍ ກຖິນຸທ຺ຘາຣໍ ປຏິພາຫຕີຕິ [ປຏິພາຫີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຘມ຺ມິກໍ ກຖິນຸທ຺ຘາຣໍ ປຏິພາຫິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໙໒໘. ‘‘ຍາ ປນ ຠິກ຺ຂຸນີ ຘມ຺ມິກໍ ກຖິນຸທ຺ຘາຣໍ ປຏິພາເຫຍ຺ຍ, ປາຈິຕ຺ຕິຍ’’ນ຺ຕິ.

໙໒໙. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຘມ຺ມິໂກ ນາມ ກຖິນຸທ຺ຘາໂຣ ສມຄ຺ໂຄ ຠິກ຺ຂຸນິສງ຺ໂຆ ສນ຺ນິປຕິຕ຺ວາ ອຸທ຺ຘຣຕິ.

ປຏິພາເຫຍ຺ຍາຕິ ‘‘ກຖໍ ອິທໍ ກຖິນໍ ນ ອຸທ຺ຘເຣຍ຺ຍາ’’ຕິ [ກຖິນໍ ອຸທ຺ຘເຣຍ຺ຍາຕິ (ກ.)] ປຏິພາຫຕິ, ອາປຕ຺ຕິ ປາຈິຕ຺ຕິຍສ຺ສ.

໙໓໐. ຘມ຺ມິເກ ຘມ຺ມິກສຎ຺ຎາ ປຏິພາຫຕິ, ອາປຕ຺ຕິ ປາຈິຕ຺ຕິຍສ຺ສ. ຘມ຺ມິເກ ເວມຕິກາ ປຏິພາຫຕິ, ອາປຕ຺ຕິ ທຸກ຺ກຏສ຺ສ. ຘມ຺ມິເກ ອຘມ຺ມິກສຎ຺ຎາ ປຏິພາຫຕິ, ອນາປຕ຺ຕິ. ອຘມ຺ມິເກ ຘມ຺ມິກສຎ຺ຎາ, ອາປຕ຺ຕິ ທຸກ຺ກຏສ຺ສ. ອຘມ຺ມິເກ ເວມຕິກາ, ອາປຕ຺ຕິ ທຸກ຺ກຏສ຺ສ. ອຘມ຺ມິເກ ອຘມ຺ມິກສຎ຺ຎາ, ອນາປຕ຺ຕິ.

໙໓໑. ອນາປຕ຺ຕິ ອນິສໍສໍ ທສ຺ເສຕ຺ວາ ປຏິພາຫຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທສມສິກ຺ຂາປທໍ ນິຏ຺ຐິຕໍ.

ນຄ຺ຄວຄ຺ໂຄ ຕຕິໂຍ.